Larim Ol Stiatok Bilong God i Stiaim Wokabaut Bilong Yu
“[Jehova i] skulim yupela . . . na bai yupela i stap gut.”—AISAIA 48:17.
1. Olsem wanem Man bilong wokim yumi i stiaim ol man?
OL SAIENTIS i wok strong bilong kisim save long ol samting bilong ples antap, na ol i kirap nogut long bikpela pawa i stap long en. San bilong yumi—em wanpela sta i no bikpela tumas—em i kamapim wankain pawa olsem “100 bilion bom haidrojen i pairap long olgeta wan wan sekon.” Long bikpela strong bilong em, Man bilong wokim olgeta samting inap bosim na stiaim ol kain bikpela samting olsem bilong ples antap. (Jop 38:32; Aisaia 40:26) Tasol olsem wanem long yumi man? Yumi stap fri long mekim ol samting, pilim wanem samting i stret na wanem samting i no stret, skelim ol samting, na yumi inap save long ol samting bilong spirit. Man bilong wokim yumi i laik stiaim yumi long wanem rot? Long gutpela pasin sori em i stiaim yumi long rot bilong ol gutpela lo bilong em na ol tok bilong stiaim yumi olsem ol stiatok, em ol i wok wantaim maus bilong bel yumi skulim pinis.—2 Samuel 22:31; Rom 2:14, 15.
2, 3. God i amamas long wanem kain pasin bilong bihainim tok?
2 God i amamas long ol man i bihainim tok bilong em long laik bilong ol yet. (Sindaun 27:11) Em i no wokim yumi olsem ol robot i no gat tingting na i bihainim nating tok bilong em, nogat; Jehova i wokim yumi bilong stap fri na bai yumi ken skelim ol samting na bihainim pasin i stret.—Hibru 5:14.
3 Jisas i bihainim stret pasin bilong Papa bilong em, em i tokim ol disaipel olsem: “Sapos yupela i mekim olsem mi bin tokim yupela, orait yupela i stap pren bilong mi. . . . Olsem na mi no kolim yupela ‘wokboi’ moa.” (Jon 15:14, 15) Long bipo tru, wokboi nating i mas bihainim tok bilong bikman bilong em. Tasol pasin pren i kamap taim man i kamapim ol pasin em narapela i laikim tru. Yumi ken kamap pren bilong Jehova. (Jems 2:23) Dispela pasin pren i kamap strong moa taim narapela i laikim tru narapela. Jisas i tok pasin bilong bihainim tok bilong God na pasin sori i poroman wantaim: “Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man.” (Jon 14:23) Jehova i laikim tru yumi na em i laik stiaim gut wokabaut bilong yumi, olsem na em i singautim yumi long bihainim ol stiatok bilong em.
Ol Stiatok Bilong God
4. Ol stiatok i wanem samting?
4 Ol stiatok i wanem samting? Wanpela dikseneri i tok, stiatok em olsem “wanpela as tok i tru: wanpela as lo o bilip i karamapim planti samting, o wanpela tok em i as bilong sampela lo o bilip samting.” (Webster’s Third New International Dictionary) Taim yumi stadi gut long Baibel, dispela i kamapim klia olsem Papa bilong yumi long heven i kamapim ol bikpela tok bilong stiaim yumi, em ol i karamapim kain kain samting bilong i stap bilong yumi ol man. Em i mekim olsem bilong yumi ken i stap gut inap oltaim oltaim. Dispela i stret wantaim tok saveman King Solomon i raitim: “Pikinini, yu mas harim gut tok bilong mi, na bai yu stap longpela taim long graun. Mi save skulim yu long bihainim gutpela tingting na mi save stiaim yu long wokabaut long stretpela rot.” (Sindaun 4:10, 11) Ol bikpela stiatok Jehova i kamapim i mekim ol samting long pasin wanbel i stap namel long yumi na Jehova na ol narapela man, na pasin bilong yumi long lotuim God, na ol samting bilong wan wan de. (Song 1:1) Nau yumi ken skelim sampela bilong ol dispela bikpela stiatok.
5. Stori long sampela bikpela stiatok.
5 Jisas i tok long pasin bilong yumi long pas gut wantaim Jehova olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Na tu, God i givim ol stiatok i stiaim pasin yumi mekim long ol narapela, olsem Gutpela Lo Tru: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12; Galesia 6:10; Taitus 3:2) Long ol samting bilong lotu, Baibel i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim.” (Hibru 10:24, 25) Long ol samting yumi save mekim long olgeta de, aposel Pol i tok: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.” (1 Korin 10:31) I gat planti narapela stiatok i stap long Tok Bilong God.
6. Olsem wanem ol stiatok i narapela kain long ol lo?
6 Ol stiatok em ol tok i wok gut, ol i trupela tok bilong ol bikpela samting, na ol Kristen i gat gutpela tingting ol i lain long laikim ol tru. Jehova i kirapim Solomon long tok: “Putim yau gut long tok bilong mi. Yu mas holimpas dispela tok bilong mi, na putim gut long tingting bilong yu. Nogut yu lusim. Sapos yu kisim tok bilong mi, orait dispela tok bai i givim laip long yu. Dispela tok inap mekim yu i stap gut tru.” (Sindaun 4:20-22) Olsem wanem ol stiatok i narapela kain long ol lo? Ol stiatok i olsem as bilong ol lo. Ol lo i kolim stret ol samting man i mas mekim o i no ken mekim, na ating ol i stret long bihainim long sampela taim, tasol ol stiatok i wok gut long olgeta taim. (Song 119:111) Ol stiatok bilong God i no save kamap olpela, na ol i no inap pinis. Tok bilong profet Aisaia i tru: “Gras i save drai, na ol plaua i save pundaun. Tasol tok bilong God bilong yumi i save stap oltaim oltaim.”—Aisaia 40:8.
Tingim na Mekim Ol Samting i Stret Wantaim Ol Stiatok
7. Olsem wanem Tok Bilong God i strongim yumi long tingim na mekim ol samting i stret wantaim ol stiatok?
7 Planti taim “tok bilong God bilong yumi” i save strongim yumi long tingim na mekim ol samting i stret wantaim ol stiatok. Taim ol i askim Jisas long kamapim ol bikpela tok bilong Lo, em i mekim tupela tok—wanpela i tok yumi mas laikim tru Jehova, na narapela i tok yumi mas laikim tru ol narapela man. (Matyu 22:37-40) Jisas i kamapim sampela tok bilong ol bikpela stiatok bilong Lo Bilong Moses, olsem Lo 6:4, 5 i kamapim: “Bikpela, em wanpela tasol em i God bilong yumi. Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” Jisas i tingim tu tok bilong God i stap long Wok Pris 19:18. Ol tok long pinis bilong Buk Saveman i klia, gutpela, na strongpela, em long dispela hap King Solomon i kamapim planti lo bilong God: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit long God tasol na bihainim ol lo bilong em. God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.”—Saveman 12:13, 14; Maika 6:8.
8. Bilong wanem pasin bilong save gut long ol bikpela stiatok bilong Baibel i lukautim yumi?
8 Taim yumi save gut long ol kain bikpela stiatok olsem, dispela inap helpim yumi long save gut long ol lo na bihainim. Na tu, sapos yumi no save gut na bilip long ol bikpela stiatok, ating yumi no inap makim gut ol samting yumi mas mekim na yumi inap lusim bilip liklik. (Efesus 4:14) Sapos yumi putim gut ol kain stiatok olsem long tingting na bel bilong yumi, yumi redi long bihainim ol dispela tok taim yumi mas makim ol samting yumi laik mekim. Taim yumi save gut long ol stiatok na bihainim, ol i helpim yumi long stap gut.—Josua 1:8; Sindaun 4:1-9.
9. Bilong wanem sampela taim i hatwok long save gut na bihainim ol stiatok bilong Baibel?
9 I hatwok liklik long save gut na bihainim ol stiatok bilong Baibel, tasol i no hatwok tumas long bihainim ol lo. Yumi ol man i gat sin na ating yumi no laik wok strong long tingim na skelim ol stiatok. Ating yumi laik bai i gat wanpela lo stret taim yumi mas makim ol samting yumi mas mekim o taim yumi gat tupela tingting long wanpela samting. Sampela taim yumi inap askim wanpela strongpela Kristen long stiaim tingting bilong yumi—ating wanpela elda long kongrigesen—na yumi ting em bai kamapim wanpela lo i stret long i stap bilong yumi. Tasol ating Baibel o ol buk bilong Baibel i no kamapim wanpela lo stret, na maski wanpela i kolim wanpela lo long yumi, ating dispela i no stret long olgeta taim na long olgeta samting i painim yumi. Ating yu inap tingim tok wanpela man i mekim long Jisas: “Tisa, papa bilong mi i dai pinis, na mi laik bai yu tokim brata bilong mi long em i mas tilim ol samting papa i lusim, na givim hap long mi.” Jisas i no kamapim kwik wanpela lo i stretim hevi bilong tupela brata, nogat; em i kamapim wanpela stiatok long em: “Yupela lukaut na was gut. Nogut yupela i mangal long kisim ol kain kain samting.” Jisas i givim gutpela tok i stiaim ol man long bipo na long nau tu.—Luk 12:13-15.
10. Olsem wanem pasin bilong bihainim ol stiatok i kamapim klia tingting tru i stap long bel bilong yumi?
10 Ating yu save long sampela man em ol i no amamas long bihainim ol lo, tasol ol i bihainim, long wanem, ol i pret long kisim strafe. Tasol pasin bilong tingting gut long ol stiatok i mekim na yumi no gat dispela kain tingting. Ol stiatok i save kirapim bel bilong ol man long bihainim ol dispela tok. Ol man i no save bihainim ol stiatok, planti taim ol i no kisim strafe hariap long dispela pasin. Dispela i opim rot long yumi ken soim i gat wanem as na yumi bihainim tok bilong Jehova, em i kamapim klia tingting tru i stap long bel bilong yumi. Josep i kamapim klia dispela, taim em i sakim meri bilong Potifar i laik pulim Josep long slip wantaim em. Jehova i no bin kamapim yet wanpela lo i tambuim pasin pamuk na em i no bin kolim wanem kain strafe bai painim man i slip wantaim meri bilong narapela man, tasol Josep i save long ol stiatok long pasin bilong stap gut long poroman marit. (Stat 2:24; 12:18-20) Bekim bilong em i kamapim klia olsem em i tingim tru ol dispela stiatok, em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.”—Stat 39:9.
11. Ol Kristen i laik bai ol stiatok bilong Jehova i stiaim ol long wanem ol samting?
11 Long nau, ol Kristen i laik bai ol stiatok bilong Jehova i stiaim ol long ol samting bilong ol yet, olsem ol bai poroman wantaim husat, painim wanem kain amamas, harim wanem kain musik, na ritim wanem ol buk. (1 Korin 15:33; Filipai 4:8) Taim yumi kisim save na pilim tru ol gutpela pasin bilong Jehova na ol lo bilong em, maus bilong bel na stretpela tingting bilong yumi bai helpim yumi long bihainim ol stiatok bilong God, maski wanem samting i painim yumi o em samting bilong yumi yet. Taim ol stiatok bilong Baibel i stiaim yumi, yumi no painim rot bilong abrusim ol lo bilong God, na tu, bai yumi no bihainim pasin bilong ol man em ol i save mekim wanpela pasin i go inap long mak bilong brukim wanpela lo, tasol ol i no abrusim dispela mak. Yumi save kain tingting olsem i nogutim yumi yet.—Jems 1:22-25.
12. Wanem samting inap kirapim yumi long bihainim ol stiatok bilong God?
12 Ol strongpela Kristen i save olsem, bilong ol i ken bihainim ol stiatok bilong Jehova, ol i mas i gat laik long save long tingting bilong Jehova long ol samting. Man bilong raitim song i tok: “Bikpela i laikim tru ol manmeri i no save laikim pasin nogut.” (Song 97:10) Sindaun 6:16-19 i kolim sampela samting em God i ting em i pasin nogut. Em i tok: “Bikpela i no laikim tru ol man i mekim dispela 7-pela pasin. Pasin bilong hambak na lukim ol arapela man i olsem samting nating. Pasin bilong mekim tok giaman. Pasin bilong kilim nating ol arapela man. Pasin bilong tingting long mekim pasin nogut. Pasin bilong hariap long mekim sin. Pasin bilong tok giaman long kot. Pasin bilong mekim ol man i bel nogut long ol brata bilong ol yet.” Taim laik bilong kisim save long tingting bilong Jehova long ol dispela samting i bosim wokabaut bilong yumi, em nau dispela i helpim yumi long kisim pasin bilong bihainim ol stiatok.—Jeremaia 22:16.
Gutpela Tingting i Mas Kirapim Yumi
13. Long tok bilong em antap long maunten Jisas i laik kirapim ol man long tingim wanem kain tok?
13 Pasin bilong save long ol stiatok na bihainim ol, bai lukautim yumi na bai yumi no insait long pasin bilong lotu long God long skin tasol. Pasin bilong bihainim ol stiatok i no wankain olsem pasin bilong bihainim strong ol lo. Jisas i kamapim klia dispela samting long tok bilong em antap long maunten. (Matyu 5:17-48) Tingim, ol man i harim tok bilong Jisas em ol Juda, olsem na Lo Bilong Moses i mas bosim wokabaut bilong ol. Tasol ol i no gat stretpela tingting long Lo. Ol i strong long ol man i mas bihainim stret olgeta liklik liklik samting bilong wanpela lo, tasol ol i no tokim ol long stap gut long ol samting Lo i makim. Na ol i strong long bihainim pasin bilong ol tumbuna, na long dispela rot ol i daunim tok bilong God. (Matyu 12:9-12; 15:1-9) Dispela i mekim na ol man i no lain long tingim na skelim ol stiatok.
14. Olsem wanem Jisas i helpim ol man i harim tok bilong em long tingim ol stiatok taim ol i mekim ol samting?
14 Long tok bilong em antap long maunten, Jisas i kamapim ol stiatok long faipela samting: pasin bilong belhat, marit na katim marit, tok promis, bekim pasin nogut, na laikim tru narapela o nolaik tru long narapela. Long olgeta dispela samting Jisas i soim ol gutpela samting bai kamap taim man i bihainim wanpela stiatok. Long dispela rot Jisas i helpim ol disaipel long bihainim moa yet stretpela pasin. Olsem: Long ol samting bilong pasin pamuk, em i givim yumi wanpela stiatok i bosim pasin bilong yumi, tasol i no dispela tasol, nogat, em i bosim laik na tingting bilong yumi tu. Em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”—Matyu 5:28.
15. Yumi ken mekim wanem bilong abrusim pasin bilong putim lo long olgeta samting?
15 Dispela i soim olsem yumi no ken lusim tingting long ol samting ol stiatok bilong Jehova i makim na i laik kirapim yumi long mekim. Yumi no ken mekim nating ol pasin bilong lotu na ting long dispela as God bai orait long yumi. Jisas i kamapim klia olsem dispela kain tingting i kranki, taim em i toktok long pasin marimari na sori bilong God. (Matyu 12:7; Luk 6:1-11) Taim yumi bihainim ol stiatok bilong Baibel, bai yumi no bihainim (o tokim ol narapela long bihainim) longpela lista i strong long ol samting yumi mas mekim o no ken mekim, em Baibel i no as bilong ol dispela tok. Bai yumi tingim tru pasin bilong laikim tru God na bihainim tok bilong em na bai yumi no laik lotu long God long skin tasol.—Luk 11:42.
Ol Gutpela Samting Bai Kamap
16. Stori long sampela stiatok i as bilong sampela lo bilong Baibel.
16 Taim yumi wok strong long bihainim tok bilong Jehova, em i bikpela samting long save olsem ol bikpela stiatok i as bilong ol lo bilong em. Olsem: Ol Kristen i no ken lotu long ol giaman god, mekim pasin pamuk, na mekim wok nogut long blut. (Aposel 15:28, 29) Wanem tok i olsem as bilong pasin em Kristen i mekim long ol dispela samting? I stret yumi lotu long God wanpela tasol; yumi mas stap gut long poroman marit bilong yumi; na Jehova em i Man bilong givim laip long yumi. (Stat 2:24; Kisim Bek 20:5; Song 36:9) Taim yumi save long ol dispela stiatok, bai yumi no hatwok tumas long bilip na bihainim ol lo bilong ol dispela samting.
17. Wanem ol gutpela samting i painim yumi taim yumi save long ol stiatok bilong Baibel na bihainim?
17 Taim yumi luksave long ol bikpela stiatok na bihainim ol, bai yumi luksave olsem ol i bilong helpim yumi. Planti blesing bilong spirit em lain bilong God i kisim i helpim ol tru. Olsem: Ol man i no smok, na i bihainim stretpela pasin, na i tingim olsem blut em i samting holi, ol i no inap kisim sampela sik. Na tu, pasin bilong bihainim tok i tru bilong Baibel inap helpim yumi long ol samting bilong mani, long sindaun bilong yumi, na long ol samting bilong famili. Ol dispela gutpela samting i soim olsem ol lo bilong Jehova i gutpela na i helpim tru yumi. Tasol ol dispela gutpela helpim yumi kisim i no nambawan as na yumi bihainim ol stiatok bilong God. Ol trupela Kristen i bihainim tok bilong Jehova, long wanem, ol i laikim em tru, na em i nambawan tru na ol i laik lotu long em, na i stret ol i mekim olsem.—KTH 4:11.
18. Sapos yumi laik mekim gut wok Kristen, wanem samting i mas stiaim wokabaut bilong yumi?
18 Taim yumi larim ol stiatok bilong Baibel i stiaim yumi, dispela i save helpim gut wokabaut bilong yumi, na dispela samting yet inap kirapim ol narapela long bihainim rot God i makim. Tasol bikpela samting moa, dispela wokabaut bilong yumi i save litimapim nem bilong Jehova. Yumi save olsem Jehova em i God bilong pasin sori na em i laik mekim ol samting bilong helpim yumi. Taim yumi makim ol samting yumi laik mekim na dispela i stret wantaim ol stiatok bilong Baibel na yumi luksave long pasin bilong Jehova long mekim gut long yumi, orait bai yumi pilim olsem yumi stap klostu moa long em. Em nau, bai yumi pas gut moa wantaim Papa bilong yumi long heven.
Yu Inap Tingim?
• Stiatok em i wanem samting?
• Olsem wanem ol stiatok i narapela kain long ol lo?
• Bilong wanem em i gutpela long yumi bihainim ol stiatok taim yumi tingim na mekim ol samting?
[Blok long pes 20]
Wilson, em i wanpela Kristen long Gana, na ol i toksave long em olsem 3-pela de samting bihain ol bai pinisim em long wok mani bilong em. Long laspela de em i wok, ol i tokim em long wasim ka bilong dairekta bilong dispela kampani. Taim Wilson i painim sampela mani insait long ka, bos bilong em i tokim em olsem God i salim dispela mani, long wanem, long dispela de Wilson bai pinis long wok. Tasol Wilson i bihainim ol stiatok bilong Baibel long stretpela pasin, na em i givim mani i go bek long dairekta. Dairekta i kirap nogut na i pilim tru pasin bilong Wilson, olsem na em i tokim Wilson olsem em bai givim wok mani long em, na tu, em i givim Wilson bikpela namba liklik insait long kampani.—Efesus 4:28.
[Blok long pes 21]
Rukia em i wanpela meri bilong Albenia i gat 65 krismas samting. Famili i no wanbel long sampela samting, olsem na Rukia i no bin toktok wantaim brata bilong em inap 17 yia. Rukia i kirap stadi long Baibel wantaim ol Witnes Bilong Jehova, na em i kisim save olsem ol Kristen tru i mas i stap wanbel wantaim ol narapela, ol i no ken bel nogut long ol. Em i beten long nait olgeta, na taim em i wokabaut i go long haus bilong brata bilong em, bel bilong em i guria. Pikinini meri bilong brata bilong Rukia i opim dua. Em i kirap nogut, na em i askim Rukia: “Husat i dai? Bilong wanem yu kam?” Rukia i tok em i laik lukim brata bilong em. Long pasin isi Rukia i tok em i bin kisim save long ol stiatok bilong Baibel na long Jehova, na dispela i bin kirapim em long kamap wanbel gen wantaim brata bilong em. Narapela i holim narapela na ol i krai, na bihain ol i mekim bung bilong amamas long tupela i stap wanbel gen!—Rom 12:17, 18.
[Piksa long pes 23]
[Piksa long pes 23]
[Piksa long pes 23]
[Piksa long pes 23]
“Jisas i lukim ol bikpela lain manmeri i kam, na em i go antap long maunten. Em i sindaun, na ol disaipel bilong en i kam long em. Na Jisas i skulim ol.”—MATYU 5:1, 2