“Kam Long Mi na Bai Mi Givim Malolo Long Yupela”
“Lukautim Gut Ol Manmeri Bilong God”
“Oltaim yupela i redi long putim gut yau long tok bilong mipela na kamapim sampela tok bilong Baibel bilong mekim gut bel bilong mipela.”—Pamela.
“Tenkyu long olgeta samting yupela i save mekim bilong helpim mipela olgeta. Dispela i givim bikpela helpim long mipela.”—Robert.
PAMELA na Robert i raitim dispela pas bilong tok tenkyu long ol elda Kristen i stap long kongrigesen bilong ol. Ol narapela namel long ol wokboi bilong God long olgeta hap bilong graun, ol tu i tenkyu long ol helpim ol i save kisim long ol man i “lukautim ol manmeri bilong God.” (1 Pita 5:2) Tru tumas, ol manmeri bilong Jehova i amamas long planti samting ol elda i save mekim bilong helpim ol, na long pasin bilong ol long mekim olsem.
“Wok Strong Long Mekim Wok Bilong Bikpela”
Ol Kristen elda i gat planti wok long mekim. (Luk 12:48) Ol i redim ol tok bilong miting bilong kongrigesen na ol i insait tu long wok bilong autim gutnius bilong Kingdom bilong God. Na tu, ol i go lukim ol wanbilip bilong strongim ol. Ol elda i lusim hap taim bilong helpim ol man i sot long ol samting—ol lapun na sampela narapela—tasol taim ol i mekim olsem, ol i no lusim wok bilong lukautim famili bilong ol long ol samting bilong spirit na bilong skin. (Jop 29:12-15; 1 Timoti 3:4, 5; 5:8) Sampela elda i helpim wok bilong sanapim ol Haus Kingdom. Sampela narapela i mekim wok long ol Hospital Lieson Komiti o ol i memba bilong Lain Bilong i Go Lukim Ol Sikman. Na planti bilong ol i mekim wok volantia long ol kibung sekit na ol kibung distrik. Yes, ol elda i “wok strong long mekim wok bilong Bikpela.” (1 Korin 15:58) Olsem na ol lain em ol elda i helpim ol, ol i tingim tru ol kain elda olsem em ol i wok strong tru!—1 Tesalonaika 5:12, 13.
Ol elda em long olgeta taim ol i save go lukim ol wanlain Kristen long haus bilong ol o long ol narapela hap bilong strongim ol long ol samting bilong spirit, ol i gutpela samting bilong givim nupela strong long yumi. Thomas, em i kamap bikpela wantaim mama tasol, em i tok: “Sapos ol elda i no helpim na strongim mi, mi no ting nau bai mi mekim wok bilong Jehova fultaim.” Planti ol yangpela em ol i kamap bikpela insait long famili i gat papa o mama tasol, ol i luksave olsem ol elda i tingim gut ol na strongim ol, na dispela i helpim ol long kisim pasin bilong pas gut wantaim God.
Ol lapun insait long kongrigesen ol tu i amamas long dispela pasin bilong ol elda. Bihain long taim tupela elda i lukim tupela misineri marit em ol i gat 85 krismas samting, tupela misineri i tok: “Mipela i laik tok tenkyu long yupela i kam lukim mipela, mipela i amamas tru yupela i kam. Taim yupela i lusim mipela pinis, mipela i ritim gen ol skripsa yupela i bin skelim wantaim mipela. Mipela i no inap lusim tingting long ol tok yupela i kamapim bilong strongim mipela.” Wanpela meri wanpis i gat 70 krismas em i rait long ol elda na i tok olsem: “Mi bin wok long beten long Jehova long helpim mi, na em i salim yutupela brata i kam long haus bilong mi. Em wanpela blesing long Jehova taim yupela i bin kam lukim mi!” Olsem wanem? I no longtaim i go pinis na yu bin kisim helpim long taim ol elda bilong kongrigesen i kam lukim yu? Tru tumas, yumi olgeta i amamas long hatwok bilong ol long lukautim ol manmeri bilong God.
Ol Wasman Em Ol i Bihainim Pasin Bilong God na Krais
Jehova em i gutpela Wasman. (Song 23:1-4; Jeremaia 31:10; 1 Pita 2:25) Jisas Krais tu em gutpela Wasman i lukautim yumi long ol samting bilong spirit. Olsem na em i gat nem olsem “gutpela wasman,” “strongpela Wasman,” na “Namba Wan Wasman.” (Jon 10:11; Hibru 13:20; 1 Pita 5:4) Jisas i mekim wanem pasin long ol lain em ol i laik kamap disaipel bilong em? Long pasin sori em i tokim ol: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”—Matyu 11:28.
Olsem tasol long nau, ol elda i wok strong long lukautim na givim nupela strong long lain sipsip bilong God. Kain man olsem ol i “stap olsem ol ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.” (Aisaia 32:2) Kain gutpela man bilong lukautim ol narapela ol i save givim nupela strong long yumi, na ol sipsip i givim rispek long ol, na God i amamas long ol.—Filipai 2:29; 1 Timoti 5:17.
Ol i Kisim Bikpela Helpim Long Ol Meri Bilong Ol
Ol manmeri bilong God i amamas long ol elda Kristen na long gutpela helpim ol dispela man i save kisim long ol meri bilong ol. Bilong meri i ken helpim gut man, planti taim em i mas lusim sampela laik bilong em yet bilong helpim man bilong em. Sampela taim, ol yet i stap long haus na man bilong ol i go mekim sampela wok bilong kongrigesen o em i go lukim sampela bilong strongim ol. Sampela taim tupela yet i makim taim bilong mekim sampela samting tasol ol i no mekim, long wanem, i gat sampela bikpela hevi i kamap long kongrigesen. Michelle i tok: “Taim mi lukim man bilong mi i wok long redim ol samting bilong miting o em i go lukim ol narapela bilong strongim ol, mi save tingim olsem em i save mekim wok bilong Jehova, olsem na mi traim mekim ol samting mi inap mekim bilong sapotim em.”
Cheryl, em tu i marit long wanpela elda, em i tok: “Mi save olsem ol brata na sista insait long kongrigesen ol i mas i gat elda bilong toktok long ol na mi laik bai ol i ken save olsem ol i ken kam long man bilong mi long olgeta taim ol i laik kisim helpim.” Ol meri olsem Michelle na Cheryl em ol i sapotim man bilong ol, ol i amamas long lusim sampela laik bilong ol yet bambai man bilong ol i ken lukautim ol sipsip bilong God. Ol narapela i amamas long pasin bilong ol meri bilong ol elda long sapotim wok bilong man bilong ol.
Tasol maski elda i gat planti wok, em i mas tingim meri na ol pikinini bilong em bilong helpim ol long ol samting bilong spirit na ol narapela samting. Elda i marit em i mas i stap olsem ‘man i no gat rong long ai bilong ol manmeri, na man i gat wanpela meri tasol. Na ol pikinini bilong em i mas bilip long Krais, na ol i no ken bihainim ol pasin i doti long ai bilong God, na ol i no ken bihainim pasin bilong bikhet na sakim tok bilong papamama.’ (Taitus 1:6) Em i mas lukautim gut famili bilong em olsem Baibel i tok long ol wasman Kristen i mas mekim.—1 Timoti 3:1-7.
Sapos elda i gat planti wok, na meri bilong em i sapotim em, em wanpela gutpela samting tru! Dispela em i tingting bilong ol elda marit long meri bilong ol. I olsem Baibel i tok: “Sapos yu maritim wanpela [“gutpela,” NW ] meri, dispela i gutpela tru. Dispela i soim olsem, God i amamas na i belgut long yu.” (Sindaun 18:22) Long toktok na pasin bilong ol, kain elda olsem i soim olsem ol i amamas tru long meri bilong ol. Ol i save beten na stadi wantaim ol, na tu, ol i makim taim bilong wokabaut long nambis, go raun long bus, o wokabaut long pak wantaim ol. Yes, ol elda i amamas long lukautim meri bilong ol long gutpela pasin sori.—1 Pita 3:7.
Ol elda em ol i no tingim ol yet na ol i lukautim ol sipsip bilong God, ol i save givim nupela strong bilong spirit long ol manmeri bilong Jehova. Ol i olsem “presen long ol man,” na olsem gutpela samting bilong helpim kongrigesen!—Efesus 4:8, 11-13.