Kamapim Pasin Bilong Laikim Narapela Insait Long Famili
TOHRU i tokim meri bilong em Yoko,a olsem, “Yu kukim sapos yu inap! Kukim dispela poto!” Meri bilong em i bekim tok olsem, “Bai mi mekim,” na em i slekim masis na em i laik kukim poto bilong tupela. Em i kros na em i tok, “Bai mi kukim haus!” Tohru i kirap na paitim meri bilong em, na long dispela rot em i pinisim tok pait.
Tripela yia paslain long dispela, Tohru na Yoko i marit nupela na tupela i stap amamas. Tasol wanem samting i mekim na hevi i kamap? Tru, Tohru i luk olsem em i gutpela man, tasol meri bilong em i pilim olsem em i no soim olsem em i laikim em na em i no save tingim em. I olsem em i no inap long bekim pasin meri bilong em i save mekim long em bilong soim olsem em i laikim em. Yoko i no inap long karim dispela hevi, na em i wok long bel nogut na belhat long man bilong em. Em i no inap long slip, na em i tingting planti, na em i les long kaikai, na em i kros, na bel hevi, na em i save pret nating nating. Tasol Tohru i no tingting planti long dispela hevi i stap long haus bilong em. Long tingting bilong em, ol samting i orait tasol.
“Planti Hevi Nogut Tru Bai i Kamap”
Ol dispela kain hevi i painim planti famili long nau. Aposel Pol i tok profet long taim bilong yumi olsem ol manmeri “i no save long pasin bilong i stap pren bilong ol arapela [olsem “laikim tru ol wanblut,” NW ].” (2 Timoti 3:1-5) Insait bilong hap tok Grik ol i tanim olsem “laikim tru ol wanblut” i kain olsem dispela tok i makim pasin bilong laikim tru narapela insait long famili. Nau long taim bilong yumi ol man i no save soim dispela kain pasin bilong laikim narapela insait long famili. Maski pasin bilong laikim narapela i stap, ol wan wan insait long famili i no save kamapim olsem ol i laikim narapela insait long famili bilong ol.
Planti papamama long nau ol i no save long pasin bilong kamapim long ol pikinini bilong ol olsem ol i laikim ol na sori long ol. Sampela ol i bin kamap bikpela insait long wanpela famili em ol i no save soim olsem ol i laikim narapela, olsem na ol i no save olsem ol inap long stap amamas na sindaun bilong ol inap long kamap gutpela sapos ol i pilim olsem famili i laikim tru ol, na ol yet i soim olsem ol i laikim tru ol narapela. Dispela samting i bin painim Tohru. Taim em i pikinini yet, papa bilong em i save bisi long wok na em i save kam bek long haus long biknait. Em i no save toktok long Tohru, na taim em i toktok long Tohru em i mekim tok nogut tasol. Mama bilong Tohru i save wok fultaim tu na i no save stap tumas wantaim em. Televisen i stap olsem was mama bilong em. Famili bilong em i no save mekim tok amamas long narapela narapela na ol i no save toktok wantaim.
Ating pasin bilong ples tu i as na ol man i no save soim olsem ol i laikim narapela insait long famili bilong ol. Long sampela hap bilong Latin Amerika, man i mas strong long sakim pasin bilong ples bambai em i ken soim olsem em i laikim meri bilong em. Long planti kantri long hap bilong Is na Afrika, long pasin bilong ples i no stret sapos man i tok long maus olsem em i laikim narapela o em i soim dispela long pasin em i mekim. Ol man marit i hatwok long tokim meri o pikinini bilong ol olsem “Mi laikim yu tru.” Tasol maski i olsem, yumi inap lainim wanpela samting long wanpela famili i pas gut wantaim long bipo yet na i kam inap nau.
Famili i Stap Gutpela Piksa Tru
Gutpela piksa bilong soim ol famili long pasin bilong laikim narapela em i stap namel long God Jehova na dispela wanpela Pikinini tasol bilong em. Tupela i save soim olsem tupela i laikim narapela narapela. Inap planti tausen tausen yia, dispela spirit em bihain i kamap Jisas Krais, em i pas gut wantaim Papa bilong em. Em i stori long pasin bilong tupela long pas gut wantaim olsem: “Olgeta de mi bin mekim em i amamas, long wanem, mi bin amamas tumas long lukim ol samting em i bin wokim.” (Sindaun 8:30) Pikinini i save gut olsem Papa i laikim em, olsem na em i tokaut long ol narapela olsem, long olgeta de em i bin mekim Jehova i amamas. Em i amamas long stap wantaim Papa long olgeta taim.
Long taim em i stap long graun olsem man, long dispela taim tu, Jisas, Pikinini bilong God, i kisim tok long Papa bilong em olsem Em i laikim em tru. Taim Jisas i baptais pinis, em i harim maus bilong Papa bilong em i tok: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Man! Em wanpela gutpela tok Jisas i kisim long kirap bilong wok bilong em long graun, a? Bel bilong em i mas pilim tru taim em i harim olsem Papa bilong em i amamas long em na em inap tingting bek long olgeta samting bilong i stap bilong em bipo long heven.
Olsem na Jehova i stap gutpela piksa long kamapim olsem em i laikim tru famili bilong em long heven na long graun. Sapos yumi bilip long Jisas Krais, Jehova bai laikim yumi tu. (Jon 16:27) Tru, yumi no inap harim tok i kam long heven, tasol yumi inap lukim ol samting Jehova i wokim i kamapim olsem em i laikim yumi, na em i givim Jisas olsem ofa bilong helpim yumi, na em i kamapim sori bilong em long ol narapela rot tu. (1 Jon 4:9, 10) Jehova i save harim ol beten bilong yumi na em i save helpim yumi. (Song 145:18; Aisaia 48:17) Taim yumi wok long pas gut wantaim Jehova bai yumi pilim tru pasin bilong em long laikim yumi.
Jisas i bin lain long Papa bilong em long olsem wanem em inap soim olsem em i pilim tru hevi bilong ol man, tingim ol, mekim gutpela pasin long ol, na tingim tru ol narapela. Em i tok: “Olgeta samting Papa i save mekim, em Pikinini tu i save mekim. Papa i laikim tumas Pikinini na em i save soim em olgeta samting em yet i save mekim.” (Jon 5:19, 20) Long rot bilong kisim save long pasin Jisas i bin mekim taim em i stap long graun, yumi tu inap lain long soim olsem yumi laikim tru ol narapela.—Filipai 1:8.
Laikim Ol Narapela Insait Long Famili—Olsem Wanem Yumi Ken Soim?
“God yet i as bilong pasin bilong laikim ol arapela” na em i wokim yumi ol man i kamap ‘olsem em yet,’ olsem na yumi inap long pilim na soim olsem yumi laikim ol narapela. (1 Jon 4:8; Stat 1:26, 27) Tasol yu no inap long kisim dispela pasin wantu tasol. Bilong yumi ken soim olsem yumi laikim ol narapela, pastaim yumi yet i mas laikim poroman marit bilong yumi na ol pikinini bilong yumi. Lukluk gut long samting ol i mekim na tingim ol gutpela pasin bilong ol, maski i olsem ol dispela pasin i liklik samting tasol. Ating yu bai tok: ‘I no gat wanpela gutpela pasin bilong man [o meri o ol pikinini] bilong mi.’ Sampela em papamama yet i bin makim poroman ol i mas marit long en, olsem na ating pastaim ol i no laikim tumas poroman marit bilong ol. Na sampela marit ol i no bin laik long kamapim pikinini. Tasol tingim Jehova, em i pilim olsem wanem long meri bilong em, em lain Israel, long yia 900 B.C.E. samting. Taim profet Elaija i tok olsem i no gat wanpela man i lotuim Jehova namel long tenpela lain bilong Israel, Jehova i glasim gut ol Israel na em i painim planti manmeri—inap olsem 7,000—ol i gat gutpela pasin long ai bilong em. Olsem wanem long yu? Yu inap long bihainim pasin bilong Jehova na wok long painim gutpela pasin bilong ol narapela insait long famili bilong yu?—1 King 19:14-18.
Tasol bilong ol narapela insait long famili bilong yu i ken save olsem yu laikim ol, yu mas kamapim long ol. Sapos yu lukim wanpela gutpela pasin ol i mekim, tokim ol olsem yu amamas long dispela gutpela pasin bilong ol. Baibel i stori long wanpela meri marit na long gutpela tok famili bilong em i mekim long em, ol i tok: “ ‘Ure, ure long mama bilong mipela.’ Ol pikinini bilong dispela meri i save tok olsem. Na man bilong en i litimapim nem bilong em moa yet.” (Sindaun 31:28) Tingim pasin ol wan wan insait long dispela famili i mekim—ol i kamapim long narapela narapela olsem ol i amamas long ol. Taim papa i litimapim nem bilong meri bilong em, papa i stap olsem gutpela piksa bilong pikinini man bilong em, na dispela bai kirapim pikinini long mekim gutpela tok amamas long poroman marit bilong em taim em i marit.
Na tu, papamama i mas mekim gutpela tok amamas long ol pikinini bilong ol. Dispela bai helpim ol pikinini long amamas long ol yet. Tru tumas, olsem wanem bai wanpela i ken ‘laikim ol wantok olsem em i laikim em yet’ sapos em i no save amamas long em yet? (Matyu 22:39) Tasol sapos oltaim papamama i save krosim ol pikinini bilong ol na ol i no mekim gutpela tok amamas long ol, pikinini bai i no laikim em yet na em bai hatwok long soim olsem em i laikim ol narapela.—Efesus 4:31, 32.
Yu Inap Kisim Helpim
Olsem wanem sapos yu go bikpela long wanpela famili i no save soim pasin bilong laikim narapela? Yu inap lain yet long soim olsem yu laikim narapela. Namba wan samting, em yu mas luksave long dispela hevi yu gat na pilim tru olsem yu mas mekim sampela samting bilong stretim dispela hevi. Tok bilong God long Baibel bai helpim yu tru long dispela samting. Em i kain olsem wanpela glas bilong lukim pes. Taim yumi skelim yumi yet long ol tok bilong Baibel i olsem glas bilong lukim pes, ol popaia o pasin kranki i stap long tingting bilong yumi bai kamap ples klia. (Jems 1:23) Yumi ken senisim ol tingting kranki i stap long bel bilong yumi na bai i stret wantaim ol tok bilong Baibel. (Efesus 4:20-24; Filipai 4:8, 9) Yumi mas mekim olsem long olgeta taim, na no ken “les long mekim gutpela pasin.”—Galesia 6:9.
Sampela i hatwok long soim pasin bilong laikim narapela, long wanem, ol i no save kamapim dispela pasin insait long famili ol i go bikpela long en, o i no gat dispela pasin long ples bilong ol. Tasol nau ol i kisim save olsem ol man inap winim dispela hevi. Dokta Daniel Goleman, em wanpela dokta bilong ol man i gat sik long tingting, em i tok ‘maski wanem kain pasin man i kisim taim em i pikinini na dispela pasin i stap pinis long em, em inap long senisim dispela pasin.’ Inap 1900 handet yia i go pinis, Baibel i tokaut olsem spirit bilong God inap helpim ol man long senisim ol pasin i stap pinis long bel bilong ol. Em i tok olsem: “Yupela i rausim pinis olgeta pasin bilong olpela bel, na yupela i kamap nupela man.”—Kolosi 3:9, 10.
Taim yu luksave pinis long hevi bilong yu, orait famili i ken mekim stadi Baibel na tingim ol samting ol i mas mekim. Olsem: Ol i ken painim sampela tok long Baibel i tok long pasin bilong laikim ol narapela. Ating bai yu painim wanpela skripsa i tok olsem: “Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” (Jems 5:11) Na yu ken skelim stori bilong Jop long Baibel, na tingim pasin bilong Jehova, em i bin mekim pasin sori na marimari long Jop. Ating yu laik bihainim pasin bilong Jehova na mekim pasin sori na marimari long famili bilong yu.
Tasol yumi no stretpela olgeta, na ‘planti taim yumi save popaia’ long ol tok bilong yumi. (Jems 3:2) Insait long famili, ating yumi no yusim maus bilong yumi long mekim gutpela tok. Long dispela kain taim yumi ken beten na wetim Jehova i helpim yumi. No ken les kwik. “Beten oltaim.” (1 Tesalonaika 5:17) Jehova bai helpim ol lain i laik tru long famili i ken soim olsem ol i laikim tru ol, na ol lain i laik soim pasin bilong laikim narapela insait long famili tasol ol i no inap long mekim olsem.
Na tu, Jehova i mekim pasin sori na em i givim helpim long yumi insait long kongrigesen. Jems i tok: “Ating wanpela bilong yupela i gat sik? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen.” (Jems 5:14) Yes, ol elda insait long kongrigesen bilong ol Witnes Bilong Jehova ol inap long helpim ol famili em ol wan wan insait long famili bilong ol i gat hevi long soim pasin bilong laikim narapela narapela. Tru, ol elda ol i no dokta, tasol long pasin isi ol inap helpim ol wanbilip bilong ol—ol i no tokim ol wanbilip long wanem samting ol i mas mekim, tasol ol i tokim ol long tingting bilong Jehova na beten wantaim ol na beten askim God long helpim ol.—Song 119:105; Galesia 6:1.
Ol elda i bin putim yau long hevi bilong Tohru na Yoko na ol i helpim tupela. (1 Pita 5:2, 3) Long sampela taim, wanpela elda na meri bilong em i save go lukim tupela na bai dispela i helpim Yoko long ‘save gut long pasin bilong laikim tru man bilong em.’ (Taitus 2:3, 4) Taim ol elda i soim olsem ol i tingim na pilim tru hevi bilong ol wanbilip Kristen, ol elda i kamap olsem “ol ples hait ol manmeri i ken i go na hait long en long taim bilong bikpela win na ren.”—Aisaia 32:1, 2.
Ol elda i helpim tupela na Tohru i luksave olsem em i gat hevi long kamapim bel na tingting bilong em, na long “taim bilong las de” Satan i save wok strong long brukim ol famili. (2 Timoti 3:1) Tohru i tingting strong long daunim dispela hevi bilong em. Em i luksave olsem em i no save soim olsem em i laikim narapela, long wanem, taim em i wok long go bikpela papamama bilong em i no bin soim olsem tupela i laikim em. Long rot bilong stadi long Baibel na beten, isi isi Tohru i wok long soim olsem em i laikim tru Yoko.
Tru, Yoko i bin belhat long Tohru, tasol taim em i kisim save long sindaun bilong Tohru taim em i pikinini yet, na em i lukim ol pasin kranki bilong em yet, nau em i wok strong long lukim ol gutpela pasin bilong man bilong em. (Matyu 7:1-3; Rom 5:12; Kolosi 3:12-14) Em i beten long Jehova long givim strong long em long laikim yet man bilong em. (Filipai 4:6, 7) Bihain Tohru i kirap long soim olsem em i laikim meri bilong em, na meri bilong em i amamas tru long dispela.
Tru tumas, maski yu hatwok long soim olsem yu laikim ol wan wan insait long famili bilong yu, yu inap long winim dispela hevi. Baibel i save givim gutpela tok long yumi bilong helpim yumi. (Song 19:7) Taim yu luksave olsem dispela em i bikpela samting, na yu traim long painim gutpela pasin bilong ol wan wan insait long famili bilong yu, na yu stadi na bihainim ol tok bilong Baibel, na beten strong na bilip long Jehova, na kisim helpim long ol elda, bai yu inap long daunim dispela hevi i stap namel long yu na famili bilong yu. (1 Pita 5:7) Yu tu inap amamas olsem wanpela man marit long Amerika. Ol i bin kirapim em long soim olsem em i laikim tru meri bilong em. Bihain em i strongim bel na em i tok, “Mi laikim yu.” Taim em i tok olsem, em i kirap nogut long pasin meri bilong em i mekim. Aiwara i pulap long ai bilong meri na em i tok: “Mi laikim yu tu, tasol em i namba wan taim yu bin mekim dispela tok insait long 25 yia mitupela i marit.” No ken wet inap longpela taim olsem bilong soim olsem yu laikim poroman marit na ol pikinini bilong yu!
[Futnot]
a Mipela i senisim sampela nem.
[Piksa long pes 28]
Jehova i putim ol tok bilong helpim yumi insait long Baibel