Askim
Olsem wanem? I stret long wanpela Kristen i putim han long Baibel na tok tru antap olsem em bai mekim tok tru tasol long kot?
Em samting bilong wan wan Kristen long makim wanem pasin ol i laik bihainim long dispela samting. (Galesia 6:5) Tasol Baibel i no tambuim dispela pasin bilong tok tru antap long mekim tok tru long kot.
Pasin bilong mekim tok tru antap i stap inap longpela taim pinis long planti hap. Long bipo, ol Grik i save litimapim wanpela han i go long heven o ol i putim han long wanpela alta taim ol i mekim tok tru antap. Taim wanpela man bilong Rom i mekim tok tru antap long kot, em i save holim wanpela ston long han bilong em na mekim tok tru antap olsem: “Sapos mi mekim tok bilong giamanim yupela, long taim [god] Jupita i lukautim taun na haus king, orait em i mas rausim olgeta gutpela samting long laip bilong mi, olsem mi rausim dispela ston.”—Buk Cyclopedia of Biblical, Theological, and Ecclesiastical Literature, bilong John McClintock na James Strong, Volium VII, pes 260.
Ol dispela pasin i soim olsem ol man i gat tingting olsem i gat wanpela god i stap na em inap lukim pasin ol man i mekim na ol i mas tokaut long em long ol pasin ol i mekim. Long bipo, ol manmeri i lotu tru long Jehova i save olsem em i save long ol tok ol i mekim na ol samting ol i mekim. (Sindaun 5:21; 15:3) I olsem ol i mekim tok tru antap long ai bilong God, o em i stap olsem wanpela witnes na lukim ol taim ol i mekim tok tru antap. Dispela em pasin Boas, Devit, Solomon na Sedekaia i bin mekim. (Rut 3:13; 2 Samuel 3:35; 1 King 2:23, 24; Jeremaia 38:16) Ol manmeri i lotu long trupela God i larim ol narapela i tokim ol long mekim tok tru antap. Dispela samting i bin kamap long Abraham na Jisas Krais.—Stat 21:22-24; Matyu 26:63, 64.
Taim wanpela man i mekim tok tru antap long ai bilong Jehova, sampela taim em i bin mekim wok long han. Abram (Abraham) i tokim king bilong Sodom: “God, Bikpela Antap Tru, em i bin wokim heven na graun, na mi [“litimapim han bilong mi bilong,” NW ] mekim strongpela tok long nem bilong en olsem, . . . ” (Stat 14:22) Wanpela ensel i toktok wantaim Daniel na “litimapim tupela han bilong en wantaim i go antap long skai, na em i tok olsem, ‘Long nem bilong God i stap oltaim, mi tok tru tumas, . . . ’ ” (Daniel 12:7) Baibel i mekim tok piksa long God olsem em i litimapim han bilong em long mekim tok tru antap.—Lo 32:40, NW; Aisaia 62:8, NW.
I no gat wanpela tok bilong Baibel i tambuim pasin bilong mekim tok tru antap. Tasol i no olsem wanpela Kristen i mas mekim tok tru antap bilong strongim olgeta tok em i mekim. Jisas i tok: “Taim yupela i tok Yes, yupela i mas truim dispela tok Yes, na taim yupela i tok Nogat, yupela i mas truim dispela tok Nogat.” (Matyu 5:33-37, NW ) Disaipel Jems i kamapim wankain tingting. Taim em i tok, “Yupela i no ken . . . mekim tok tru antap,” em i givim tok lukaut long pasin bilong mekim tok tru antap long ol liklik liklik samting nating. (Jems 5:12) Tasol Jisas tupela Jems i no tok olsem i no stret long mekim tok tru antap long mekim tok tru tasol long kot, nogat.
Olsem wanem sapos wanpela Kristen i stap long haus kot na ol i askim em long tok tru antap olsem tok em i mekim em i tru tasol? Ating em bai pilim olsem em i ken mekim olsem. Sapos nogat, ating kot bai orait long em i mekim strongpela promis olsem em i no giaman.—Galesia 1:20.
Long haus kot taim ol i bihainim dispela pasin bilong litimapim han o putim han long Baibel taim ol i mekim tok tru antap, Kristen i ken bihainim. Ating em bai tingim ol man long Baibel i bin mekim tok tru antap na mekim wok long han wantaim. Bikpela samting long wanpela Kristen em olsem, man i mekim tok tru antap em i mas save olsem em i mekim tok tru antap long God olsem em bai mekim tok tru tasol—mekim wok long han bilong mekim tok tru antap em i no bikpela samting. Dispela pasin bilong mekim tok tru antap em i bikpela samting. Sapos wanpela Kristen i pilim olsem em inap bekim askim ol i tromoi long em long kain taim olsem, orait, em i mas save olsem em i mekim tok tru antap long em bai mekim tok tru tasol, em pasin ol Kristen i laik bihainim long olgeta taim.