Rot Bilong Kisim Stretpela Tingting Long Wok
NAU long dispela taim bilong ol bikpela bikpela bisnis, na ol man i resis long winim narapela, na ol masin i save wokim ol samting hariap, planti man i no amamas long go long wok long ol wan wan de. Tasol i stret yumi mas amamas long wok bilong yumi. Bilong wanem? Long wanem, God i wokim yumi i kamap olsem em yet—na God i save amamas long ol wok bilong em. Olsem: Long pinis bilong bikpela hap taim bilong 6-pela “de” bilong em i wokim ol samting, “God i lukim olgeta dispela samting i gutpela, na em i amamas tru.”—Stat 1:31.
Jehova i amamas long mekim wok na dispela em i wanpela as na Baibel i tok em i God bilong “amamas.” (1 Timoti 1:11) Olsem na i stret yumi ken ting olsem sapos yumi bihainim pasin bilong em, bai yumi kisim pasin bilong amamas. Long dispela samting, King Solomon bilong Israel bilong bipo, em wanpela man i gat save long wokim haus na stretim gut ol wok, em i tok: “Yumi mas kaikai na dring na amamas long olgeta samting yumi mekim. Dispela i olsem presen God i givim yumi.”—Saveman 3:13.
Nau long dispela taim bilong ol bikpela senis i kamap long ples wok, i hatwok liklik long kisim stretpela tingting long wok. Tasol God Jehova i save mekim gut long ol man i save bihainim gutpela rot em i soim long ol. (Song 119:99, 100) Kain man olsem ol i kamap wokman em bos i laikim ol na bilip long ol na ating em i no ken pinisim ol long wok. Na taim ol i tingim wok mani na i stap bilong ol, ol i tingim ol samting bilong spirit tu—ol i no tingim pe samting tasol. Dispela samting i save helpim ol long skelim gut ol bikpela samting ol i mas mekim, na long save olsem wok mani tasol i no inap givim amamas na bel isi long ol. (Matyu 6:31-33; 1 Korin 2:14, 15) Na i helpim ol long kisim pasin bilong mekim gut ol wok.
Kisim Pasin Bilong Mekim Wok Em God i Laikim
Sampela man i save wok wok oltaim na putim wok bilong ol i go pas long olgeta narapela samting. Na sampela i wet tasol long pinis bilong de i kamap na ol i ken lusim ples wok na go bek long haus. Yumi mas i gat wanem stretpela tingting long wok? Baibel i tok: “Mobeta yumi gat liklik samting tasol na yumi bel isi. Nogut yumi mekim planti wok oltaim, olsem man i ran i go bilong holimpas win.” (Saveman 4:6) Sapos yumi wok strong tumas o yumi wok planti aua tumas insait long de, dispela i no inap helpim tru yumi—i olsem yumi wok long “holimpas win.” Bilong wanem i olsem? Long wanem, dispela pasin inap nogutim ol samting i bilong helpim yumi long stap amamas tru: yumi pas gut wantaim famili na ol pren, stap strong long ol samting bilong spirit, yumi gat gutpela skin, na yumi stap longpela taim. (1 Timoti 6:9, 10) Stretpela tingting i olsem: Sapos yumi tingim liklik samting yumi kisim pinis em inap long yumi, na bel i stap isi, orait dispela i winim pasin bilong mekim planti wok tumas wantaim ol hevi bilong en.
Tru, Baibel i kirapim yumi long kisim kain tingting olsem, tasol em i no orait long yumi stap lesman. (Sindaun 20:4) Isi isi pasin bilong les i mekim na yumi no amamas moa long yumi yet, na ol narapela i no amamas moa long yumi. Na samting i moa nogut, yumi no pas gut wantaim God. Baibel i tokaut klia olsem man i no laik mekim wok, em i no ken kisim kaikai em ol narapela i bin baim. (2 Tesalonaika 3:10) Em i mas senisim pasin bilong em na wok strong, na long dispela rot em i lukautim em yet na famili bilong em long ol samting bilong skin. Na sapos em i wok strong, ating bai em inap helpim tu ol man i sot long ol samting—em wanpela gutpela pasin Baibel i kirapim yumi long mekim.—Sindaun 21:25, 26; Efesus 4:28.
Skulim Ol Pikinini Long Amamas Long Mekim Wok
Yumi no save kisim nating pasin bilong mekim gut ol wok, nogat; yumi skul long dispela pasin taim yumi yangpela. Olsem na Baibel i tokim ol papamama: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Sindaun 22:6) Papamama yet i mas i stap gutpela piksa long mekim wok, tasol ol papamama i gat gutpela tingting ol i save kirap skulim ol pikinini bilong ol long rot bilong givim ol sampela wok long haus i stret long krismas bilong ol. Maski i gat sampela wok ol i no amamas long mekim, bihain bai ol i amamas ol i gat wok insait long famili—na ol bai amamas moa yet taim mama na papa i tokim ol olsem ol i bin mekim gutpela wok. Sori tru, sampela papamama i bihainim tingting kranki na ol i isi tumas long ol pikinini bilong ol—ol i ting ol i helpim ol. Kain papamama olsem i mas tingim Sindaun 29:21 (NW ), em i tok: “Sapos man i isi tumas long wokboi [pikinini] bilong em long taim em i yangpela yet, orait bihain em bai kamap man i no save tenkyu liklik.”
Papamama i gat gutpela tingting ol i tingim tu skul bilong ol pikinini, na ol i kirapim ol long kisim save na wok strong long taim ol i stap long skul. Dispela inap helpim ol yangpela long bihain, taim ol yet i mas kirap na mekim wok mani.
Skelim Gut Wok Yu Laik Kisim
Baibel i no tokim yumi long wanem kain wok yumi mas kisim, tasol em i kamapim sampela gutpela stiatok na bai samting yumi mekim i no ken pasim yumi long kamap strong long ol samting bilong spirit na long mekim wok bilong God na ol narapela bikpela wok yumi mas mekim. Aposel Pol i tok: “Taim i sotpela nau. Olsem na long dispela hap taim i stap yet, ol man . . . i save mekim wok long samting bilong graun, ol i mas i stap olsem dispela wok i no bikpela samting long laip bilong ol. Yumi save, i no longtaim na bai dispela graun wantaim olgeta samting bilong en bai i pinis.” (1 Korin 7:29-31) Dispela pasin i stap nau long graun i no save stap strong na i no bilong i stap olgeta taim. Sapos yumi givim olgeta taim na strong bilong yumi long dispela pasin bilong graun, i olsem yumi lusim olgeta mani bilong yumi long baim wanpela haus ol i bin wokim long hap ol tait wara i save kamap long en. Em longlong pasin stret, a?
Sampela Baibel i tanim dispela tok “i no bikpela samting long laip bilong ol” olsem “i no samting ol i insait tru long en.” (The Jerusalem Bible) Ol man i bihainim gutpela tingting ol i no lusim tingting olsem taim bilong dispela pasin bilong graun “i sotpela” na sapos ol i “insait tru” long en, bagarap inap painim ol.—1 Jon 2:15-17.
‘Bai God i No Lusim Yu’
Jehova i winim yumi long save long ol samting yumi mas kisim. Na tu, em i save yumi stap long wanem hap taim insait long ol samting bilong kamapim laik bilong em. Olsem na em i tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ” (Hibru 13:5) Dispela tok i mekim gut bel bilong yumi, a? God i save sori long lain bilong em na i laik helpim ol, olsem na long bikpela tok Jisas i mekim antap long maunten, em i bihainim dispela pasin bilong God na mekim planti tok bilong lainim ol disaipel long stretpela tingting ol i mas kisim long ol wok na ol samting bilong skin.—Matyu 6:19-33.
Ol Witnes Bilong Jehova i wok strong long bihainim ol dispela tok. Olsem: Taim bos i askim wanpela Witnes, em i mekim wok olsem elektrisen, long wok ovataim planti taim, Witnes i tok em i no ken mekim. Bilong wanem? Long wanem, em i no laik bai wok skin bilong em i kisim hap taim em i save lusim wantaim famili bilong em na long mekim ol wok bilong spirit. Em i wanpela gutpela wokman na bos i bilip long em, olsem na bos i no strong long em i mas wok ovataim. Tasol i no olsem olgeta taim bos i tingim laik bilong wokman, nogat; olsem na bilong wokman i ken mekim ol narapela samting tu em i laik mekim, ating em i mas painim narapela wok mani. Tasol ol man i givim bel tru long Jehova, ol i save olsem gutpela pasin bilong ol na pasin bilong ol long mekim gut wok, dispela i save mekim na bos i laikim ol.—Sindaun 3:5, 6.
Taim Olgeta Wok Bai i Kamapim Gutpela Samting Tasol
Nau long dispela taim yumi stap long en, ol hevi bilong wok bai stap yet. Na ating ol samting bai i go nogut moa taim sampela senis moa i kamap long graun na long ol samting bilong mani. Tasol dispela samting bai stap sotpela taim tasol. Klostu nau, bai i no gat wanpela man i no gat wok. Na tu, olgeta wok bai i gutpela tru na yumi bai kisim amamas long en. Olsem wanem dispela samting inap kamap? Wanem samting bai kamapim dispela gutpela senis?
Long maus bilong profet Aisaia, Jehova i tok long dispela taim, olsem: “Mi wokim nupela skai na nupela graun. Na ol man bai i no inap tingim moa ol samting i bin kamap bipo.” (Aisaia 65:17) Em i toktok long nupela gavman bilong em, na aninit long dispela gavman wanpela nupela lain manmeri i narapela kain bai i stap.—Daniel 2:44.
Dispela tok profet i stori moa long sindaun bilong ol man long dispela taim na long wok bilong ol, olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring. Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim. Wok ol i mekim bai i no inap lus nating. Na ol pikinini bilong ol bai i no inap painim bagarap, long wanem, ol i pikinini bilong dispela lain mi bin makim bilong mekim gut long ol. Na bai mi mekim gut long ol na long ol pikinini bilong ol na long ol lain bilong ol i kamap bihain.”—Aisaia 65:21-23.
Olaman! Ol samting bai stap narapela kain tru long dispela nupela taim God bai kamapim! Ating yu gat laik long stap long kain taim olsem we ol “wok [yu] mekim bai i no inap lus nating” na yu ken amamas long ol samting hatwok bilong yu i kamapim, a? Na tingim wanem kain man bai kisim ol dispela blesing: “Ol i pikinini bilong dispela lain mi bin makim bilong mekim gut long ol.” Yu ken kamap wanpela bilong ol dispela lain God i “mekim gut long ol,” long rot bilong kisim save long Jehova na mekim ol samting em i laikim. Jisas i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Krais Jisas.” (Jon 17:3, NW ) Ol Witnes Bilong Jehova bai amamas long helpim yu long kisim dispela save i givim laip long man, long rot bilong wanpela Baibel-stadi kos.
[Blok long pes 6]
“PLANTI I LAIK KISIM OL”
Baibel i tok: “Olgeta samting yupela i mekim, yupela i mas wok strong na mekim.” (Kolosi 3:23) Ol bos i gat laik long kisim ol wokman i save bihainim dispela stiatok. Olsem na long buk How to Be Invisible, J. J. Luna i tokim ol bos olsem i gat sampela kain lotu em ol manmeri bilong en ol i gutpela bilong kisim long mekim wok, na em i tok: “Tasol mipela i save kisim ol Witnes [Bilong Jehova].” Em i tok ol i gat nem olsem man i no save stil, na dispela em i wanpela as na “planti i laik kisim ol” long wok.
[Ol Piksa long pes 5]
Taim yu mekim wok mani, na ol wok bilong spirit tu na ol samting bilong painim amamas, bai yu stap belgut