“Laikim Tru Ol Arapela Man Bilong Lain Bilong Mi”
“Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—JON 13:35.
1. Jisas i stori planti long wanem pasin paslain liklik long em i dai?
“OL PIKININI.” (Jon 13:33) Dispela tok i makim olsem man i laikim tru narapela, na Jisas i mekim dispela tok long ol aposel long nait paslain long indai bilong em. Paslain long dispela, ol Gutnius i no bin stori olsem Jisas i kolim kain tok long ol. Tasol long dispela bikpela nait em i kolim dispela tok bilong helpim ol long save olsem em i laikim tru ol. Long dispela nait, Jisas i stori long pasin bilong laikim tru narapela inap 30 taim samting. Wanem as na em i stori planti long dispela pasin?
2. Bilong wanem em i bikpela samting long ol Kristen i mas kamapim pasin bilong laikim tru narapela?
2 Jisas i kamapim klia as na pasin bilong laikim narapela em i bikpela samting. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35; 15:12, 17) Bilong i stap olsem disaipel bilong Krais, man i mas kamapim pasin bilong laikim tru narapela olsem brata. Samting i makim ol Kristen tru, i no wanpela kain stail klos o narakain pasin samting, nogat, em long pasin bilong laikim tru narapela ol i mekim long ol wanbilip. Pasin bilong kamapim dispela kain pasin em i namba tu bilong dispela 3-pela mak ol man i mas winim bilong i stap disaipel bilong Krais, em yumi bin stori long en long kirap bilong stori i bin kamap paslain long dispela. Wanem samting bai helpim yumi long wok yet long winim dispela mak?
“Mekim Dispela Pasin Moa Moa Yet”
3. Aposel Pol i givim wanem tok long pasin bilong laikim tru ol narapela?
3 Ol man inap lukim pasin bilong laikim tru narapela i stap namel long ol disaipel bilong Krais long taim bilong ol aposel na i wankain long ol disaipel tru bilong Krais long nau. Aposel Pol i raitim pas long ol Kristen olsem: “Mi no ken raitim sampela tok long yupela long pasin bilong givim bel bilong yupela long ol manmeri bilong God, long wanem, God i skulim yupela pinis long dispela pasin. Na yupela i save givim bel bilong yupela long ol Kristen.” Tasol Pol i tok moa: “Mekim dispela pasin moa moa yet.” (1 Tesalonaika 3:12; 4:9, 10) Yumi tu mas bihainim dispela tok bilong Pol na wok long kamapim dispela pasin “moa moa yet.”
4. Olsem Pol na Jisas i tok, yumi mas tingting long helpim husat?
4 Long dispela pas yet, Pol i strongim ol wanbilip long strongim bel bilong ol man i stap bel hevi na “helpim ol man i no strong.” (1 Tesalonaika 5:14) Narapela taim em i kirapim tingting bilong ol Kristen olsem: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol.” (Rom 15:1) Jisas tu i bin givim sampela tok bilong helpim ol man i no strong. Taim Jisas i stori pinis olsem long nait ol birua bai holim em, Pita bai givim baksait long em, em i tokim Pita: “Taim yu tanim na yu kam bek, orait yu mas strongim ol brata bilong yu.” Bilong wanem em i tok olsem? Long wanem, ol tu bai lusim Jisas na ol i mas i gat man bilong strongim ol. (Luk 22:32; Jon 21:15-17) Olsem na Baibel i tokim yumi long kamapim pasin bilong laikim tru ol brata i no stap strong long ol samting bilong spirit na ating ol i no bung moa wantaim kongrigesen Kristen. (Hibru 12:12) Wanem as na yumi mas mekim olsem? Tupela tok piksa bilong Jisas bai bekim dispela askim.
Wanpela Sipsip i Lus na Wanpela Mani i Lus
5, 6. (a) Jisas i kamapim wanem tupela sotpela tok piksa? (b) Tupela tok piksa hia i kamapim wanem pasin bilong Jehova?
5 Bilong lainim ol man long tingting bilong Jehova long ol man i lusim lotu tru, Jisas i kamapim tupela sotpela tok piksa. Wanpela em stori bilong wanpela wasman bilong sipsip. Jisas i tok: “Sapos wanpela bilong yupela i gat 100 sipsip, na sapos wanpela sipsip i lus, orait ating em bai i lusim ol 99 sipsip i kaikai i stap long wanpela hap. Na em bai i go painim dispela wanpela sipsip inap em i lukim. Taim em i kisim sipsip pinis, orait em bai i slipim long sol bilong en, na em bai i amamas na karim i kam bek long ples. Na taim em i kamap long haus bilong en, em bai i singautim ol pren na wanples bilong en, na ol i kam bung. Na em bai i tokim ol, ‘Yupela amamas wantaim mi! Wanpela sipsip bilong mi em i lus, na mi painim na kisim bek pinis!’ Na Jisas i tok olsem, ‘Mi tok stret long yupela, wankain amamas i save kamap long heven taim wanpela man bilong mekim sin i tanim bel. Tru, ol i save amamas long 99 man i stretpela pinis na i no gat wok long tanim bel. Tasol sapos wanpela man bilong mekim sin em i tanim bel, orait ol i save amamas moa moa yet.’ ”—Luk 15:4-7.
6 Namba tu tok piksa i stori long wanpela meri. Jisas i tok: “Sapos wanpela meri em i gat 10-pela wan kina mani, na wanpela i lus long haus, orait bai em i mekim wanem nau? Em bai i laitim lam na brumim haus na lukluk gut, na i wok i go inap long em i kisim bek mani bilong en. Taim em i kisim mani pinis, orait em bai i singautim ol pren na wanples bilong en, na ol i kam bung. Na em bai i tokim ol, ‘Yupela amamas wantaim mi! Wanpela mani bilong mi em i lus, tasol nau mi painim na kisim bek pinis!’ Na Jisas i tok olsem, ‘Mi tok stret long yupela, wankain amamas i save kamap namel long ol ensel bilong God taim wanpela man bilong mekim sin em i tanim bel.’ ”—Luk 15:8-10.
7. Tok piksa bilong sipsip i lus na mani i lus, i lainim yumi long wanem tupela samting?
7 Yumi ken kisim wanem save long rot bilong dispela tupela tok piksa? Ol i helpim yumi long save long (1) yumi mas i gat wanem tingting long ol wanbilip ol i no strong moa long spirit na (2) wanem samting yumi mas mekim bilong helpim ol. Yumi laik skelim dispela tupela tok.
Em i Lus Tasol Em i Stap Olsem Gutpela Samting
8. (a) Wasman bilong sipsip na meri i mekim wanem long samting bilong ol i lus? (b) Pasin ol i mekim i soim olsem ol i gat wanem tingting long samting i lus?
8 Long tupela tok piksa, i gat samting i lus, tasol skelim tingting bilong ol man i bin lusim ol dispela samting. Wasman bilong sipsip i no bin tok: ‘Mi gat 99 sipsip i stap, olsem na wanpela i no bikpela samting. Mi no gat wok long dispela wanpela.’ Meri i no bin tok: ‘Mi no ken tingting planti long dispela wanpela mani. Mi amamas long dispela nainpela i stap yet.’ I no olsem. Wasman i wok long painim sipsip i lus na em i mekim olsem em i gat dispela wanpela sipsip tasol. Na meri i mekim olsem em i gat dispela wanpela mani tasol. Tupela wantaim i pilim olsem samting i lus em i bikpela samting. Dispela i makim wanem samting?
9. Tingting bilong wasman na bilong meri i makim wanem samting?
9 Lukim tok Jisas i mekim bilong pinisim dispela tupela tok piksa: “Amamas i save kamap long heven taim wanpela man bilong mekim sin i tanim bel . . . [em i] moa moa yet.” Na “mi tok stret long yupela, wankain amamas i save kamap namel long ol ensel bilong God taim wanpela man bilong mekim sin em i tanim bel.” Tingting bilong wasman bilong sipsip na meri i makim liklik ol tingting bilong Jehova na ol ensel bilong em. Wasman na meri i ting samting i lus em i gutpela samting, olsem na ol man husat isi isi ol i lusim tok i tru na ol i no bung moa wantaim ol manmeri bilong God ol i stap olsem bikpela samting long ai bilong Jehova. (Jeremaia 31:3) Ating kain man olsem ol i no strong long samting bilong spirit, tasol i no olsem ol i bikhet. Maski ol i no strong tumas, ating ol i mekim liklik ol samting Jehova i laik bai ol man i mekim. (Song 119:176; Aposel 15:29) Olsem long bipo, Jehova i no hariap long “rausim ol . . . i go longwe long pes bilong en.”—2 King 13:23.
10, 11. (a) Yumi laik i gat wanem tingting long ol man husat isi isi ol i lusim kongrigesen? (b) Olsem tupela tok piksa bilong Jisas i kamapim, yumi ken mekim wanem bilong soim olsem yumi tingim dispela lain?
10 Olsem Jehova na Jisas, yumi tu i save tingting planti long ol lain husat i no gat strong na ol i no bung wantaim kongrigesen Kristen. (Esekiel 34:16; Luk 19:10) Yumi save tingim ol man i no strong long samting bilong spirit olsem wanpela sipsip i lus—yumi no ting olsem yumi no inap long helpim ol. Yumi no kisim tingting olsem: ‘Maski tingting planti long wanpela man i no gat strong. Kongrigesen i save ran gut maski em i no stap.’ Nogat. Yumi gat wankain tingting olsem Jehova long ol man husat isi isi i lusim tok i tru tasol ol i gat laik long kam bek—ol i olsem gutpela samting.
11 Tasol olsem wanem yumi ken kamapim bel bilong yumi, olsem yumi tingim narapela? Tupela tok piksa bilong Jisas i makim olsem yumi ken mekim olsem taim (1) yumi yet yumi kirap long helpim narapela, (2) taim yumi mekim ol samting long pasin isi, na (3) taim yumi laik tru long helpim narapela. Nau bai yumi skelim dispela 3-pela pasin wan wan.
Yumi Yet Yumi Kirap Long Helpim
12. Dispela tok “bai i go painim dispela wanpela sipsip” i makim olsem wasman bilong sipsip i gat wanem tingting?
12 Long namba wan tok piksa, Jisas i tok wasman bilong sipsip “bai i go painim dispela wanpela sipsip.” Wasman yet i kirap long painim dispela sipsip i lus. Maski i hatwok, o samting inap bagarapim em, o em i mas go longwe, ol dispela samting i no pasim em. Nogat. Em i wok i go inap “em i lukim” dispela sipsip.—Luk 15:4.
13. Ol bilipman bilong bipo i bin mekim wanem bilong strongim ol man i no gat strong? Olsem wanem yumi ken bihainim pasin bilong ol?
13 Olsem na man husat i gat strong i mas go pas long strongim man i no gat strong. Ol bilipman bilong bipo i save long dispela samting. Olsem, taim Jonatan, pikinini bilong King Sol, i luksave olsem gutpela pren bilong em Devit i mas kisim sampela tok bilong strongim em, Jonatan “i go lukim em na mekim gutpela tok long em bai Devit i bilip strong long God.” (1 Samuel 23:15, 16) Sampela handet yia bihain, taim Gavena Nehemia i luksave olsem ol brata Hibru bilong em ol i bel hevi, wantu em i strongim ol long ‘tingim gut Bikpela.’ (Nehemia 4:14) Long nau, yumi tu i laik “i go lukim”—olsem yumi yet i kirap na mekim samting—bilong strongim ol man i no gat strong. Tasol husat long kongrigesen i mas mekim dispela wok?
14. Husat long kongrigesen i mas helpim ol lain i no strong tumas?
14 Ol elda Kristen i gat wok long “strongim ol man i no gat strong na strongim tu bel bilong ol man i pret na guria.” Na “tokim ol man bel na tingting bilong ol i no strong olsem, ‘Yupela i mas sanap strong na i no ken pret.’ ” (Aisaia 35:3, 4; 1 Pita 5:1, 2) Tasol dispela tok strongim bel bilong ol man i stap bel hevi na “helpim ol man i no strong,” Pol i no bin givim long ol elda tasol. Nogat. Pol i mekim dispela tok long olgeta “manmeri bilong sios i stap long taun Tesalonaika.” (1 Tesalonaika 1:1; 5:14) Wok bilong helpim ol man i no gat strong em i wok bilong olgeta Kristen. Olsem wasman bilong sipsip long tok piksa, olgeta wan wan Kristen i mas i gat laik long “go painim dispela wanpela sipsip” i lus. Tasol dispela wok bai kamap gutpela moa taim yumi wok wantaim ol elda. Olsem wanem? Yu inap mekim sampela samting bilong helpim wanpela long kongrigesen i no strong tumas?
Mekim Long Pasin Isi
15. Ating wanem samting i mekim na wasman i karim dispela sipsip i go bek?
15 Wasman bilong sipsip i save mekim wanem taim em i painim pinis sipsip i lus? “Em bai i slipim long sol bilong en.” (Luk 15:5) Dispela i kamapim gut tingting bilong wasman! Ating sipsip i bin wokabaut nating inap planti de na nait long hap em i no save long en, na ating ol laion tu i stap long dispela hap. (Jop 38:39, 40) Sipsip i no gat strong, long wanem, em i no bin kaikai gut. Long strong bilong em yet em i no inap winim ol hevi samting bai painim em long rot taim em i go bek long banis sipsip. Olsem na wasman i lindaun, na isi isi em i apim sipsip, na em i karim em i go bek long ol narapela sipsip. Olsem wanem yumi ken bihainim pasin bilong dispela wasman bilong sipsip?
16. Wanem as na yumi laik bihainim pasin wasman i mekim long sipsip i lus?
16 Ating wanpela man i no bin bung wantaim kongrigesen moa bai i no gat strong long samting bilong spirit. Olsem sipsip i no bin stap wantaim wasman, i olsem dispela man i bin wokabaut nating namel long ol pasin nogut bilong dispela graun. Em i no stap wantaim lain sipsip, olsem kongrigesen Kristen, olsem na Satan inap birua moa yet long em. Satan “i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Na tu, em i no strong, long wanem, em i no bin kisim ol kaikai bilong spirit. Olsem na em yet i no gat strong long winim ol hevi em bai bungim taim em i laik go bek long kongrigesen. I olsem yumi mas lindaun na apim em isi isi na karim em i kam bek. (Galesia 6:2) Yumi ken mekim olsem wanem?
17. Olsem wanem yumi ken bihainim pasin bilong aposel Pol taim yumi go lukim wanpela man em i no gat strong?
17 Aposel Pol i tok: “Sapos strong bilong wanpela Kristen i pinis, orait mi pilim olsem strong bilong mi tu i pinis.” (2 Korin 11:29; 1 Korin 9:22) Pol i pilim tru hevi bilong ol man, na ol man i no gat strong tu. Yumi laik pilim tru hevi bilong ol man i no gat strong. Taim yumi go lukim wanpela Kristen i no strong long samting bilong spirit, tokim em olsem long ai bilong Jehova em i olsem wanpela gutpela samting na taim em i no stap long ol miting ol wanbilip Witnes i pilim tru olsem em i no stap. (1 Tesalonaika 2:17) Tokim em olsem ol i redi long helpim em na ol i amamas long stap olsem “brata i save sambai long helpim yumi long taim bilong hevi.” (Sindaun 17:17; Song 34:18) Ol tok yumi pilim long bel na autim long em inap strongim em isi isi na bihain em bai kam bek long kongrigesen. Yumi laik mekim wanem samting bihain long dispela? Tok piksa bilong meri wantaim mani i lus i givim stia long yumi.
Laik Tru Long Helpim Narapela
18. (a) Bilong wanem meri hia i no pilim olsem em i no inap painim dispela mani? (b) Meri i hatwok olsem wanem? Wanem samting i kamap long hatwok bilong em?
18 Meri em mani bilong em i lus i save olsem em i hatwok long painim dispela mani, tasol em i no pilim olsem em i no inap painim. Sapos mani i bin pundaun long bikbus o long wanpela raunwara i daun tru, ating em bai givap na ting em i no inap painim. Tasol em i save olsem dispela mani i mas stap insait long haus bilong em long wanpela hap em inap painim, olsem na em i kirap givim bel long lukluk gut bilong painim dispela mani. (Luk 15:8) Pastaim em i laitim lam bilong givim lait long haus bilong em. Orait, bihain em i brumim plua, ating em i laik harim nois bilong mani i pairap. Bihain yet em i lukluk gut long olgeta kona na liklik ples hait mani inap hait long en i go inap lait i kisim silva bilong dispela mani na em inap lukim mani. Em nau! Hatwok bilong em i karim kaikai.
19. Yumi ken kisim wanem save long helpim ol man i no strong taim yumi skelim pasin bilong dispela meri long tok piksa, mani bilong em i lus?
19 Olsem dispela hap bilong tok piksa i kamapim, wok Baibel i givim yumi long helpim wanpela Kristen i no strong em i wanpela wok yumi inap long mekim. Tasol yumi save, yumi mas wok hat long mekim. Aposel Pol i tokim ol elda long Efesus: “Yumi mas bihainim dispela pasin bilong wok strong. Olsem bai yumi inap long helpim ol man i no inap helpim ol yet.” (Aposel 20:35a) Tingim, meri hia i no bin painim mani i lus long rot bilong lukluk nabaut liklik o wok long painim inap liklik taim tasol. Nogat, em i painim mani, long wanem, em bihainim gutpela tingting na “i wok i go inap long em i kisim bek mani bilong en.” Olsem na taim yumi laik kisim bek wanpela man em i no strong long samting bilong spirit, yumi mas wok strong na bihainim gutpela tingting. Yumi ken mekim wanem?
20. Yumi ken mekim wanem bilong helpim ol man i no strong?
20 Olsem wanem yumi ken helpim man i no strong long strongim bilip na kisim pasin bilong tenkyu? Sapos yumi stadi wantaim em long wanpela buk Kristen, ating dispela bai helpim em tru. Yumi ken helpim gut tru man i no strong taim yumi mekim Baibel-stadi wantaim em. Ating wasman autim tok i save gut long husat i ken helpim man i no strong. Em i ken kamapim wanem tok na buk samting em i gutpela long stadi wantaim man bilong helpim em gut. Meri bilong tok piksa i bin yusim sampela tul bilong helpim em, olsem na yumi long nau i gat ol gutpela tul bilong helpim yumi long mekim wok God i givim yumi bilong helpim ol man i no strong. Tupela nupela tul, o buk, bilong yumi bai helpim yumi tru long mekim dispela wok. Tupela buk em Worship the Only True God na Draw Close to Jehovah.a
21. Olsem wanem yumi olgeta i save kisim blesing taim yumi helpim ol man i no strong?
21 Yumi olgeta i kisim blesing taim yumi helpim ol man i no strong. Man yumi helpim i kisim amamas long bung gen wantaim ol pren tru. Yumi bel gut long wok bilong yumi long givim samting long narapela. (Luk 15:6, 9; Aposel 20:35b) Taim olgeta wan wan long kongrigesen i laikim na tingim ol narapela, orait pasin bilong laikim tru narapela i kamap strong long kongrigesen. Na nambawan bikpela samting i olsem, dispela pasin i mekim na yumi litimapim nem bilong tupela gutpela Wasman bilong yumi, em Jehova na Jisas. Dispela i kamap taim yumi ol wokboi bilong ol hia long graun i kamapim laik bilong ol long helpim ol man i no strong. (Song 72:12-14; Matyu 11:28-30; 1 Korin 11:1; Efesus 5:1) I gat ol gutpela as na yumi laik bihainim yet pasin bilong “laikim tru ol arapela man bilong lain bilong [yumi]”!
[Futnot]
a Ol Witnes Bilong Jehova i wokim.
Yu Inap Stori Long Dispela?
• Bilong wanem em i bikpela samting long yumi mas kamapim pasin bilong laikim tru narapela?
• Bilong wanem yumi mas kamapim dispela pasin long ol man i no strong?
• Tok piksa bilong sipsip i lus na tok piksa bilong mani i lus i lainim yumi long wanem samting?
• Yumi ken mekim wanem bilong helpim man i no strong?
[Ol Piksa long pes 16, 17]
Long helpim ol man i no strong, yumi yet i mas kirap long helpim ol na mekim long pasin isi na i gat laik tru long helpim ol
[Piksa long pes 16, 17]
Olgeta i save kisim blesing taim yumi helpim ol man i no strong