Ripot Long Wok Bilong Kingdom
Gutpela Samting i Kamap Long Pasin Bilong No Les Kwik na Wok Strong Yet
JISAS KRAIS i tok profet olsem long taim bilong las de “planti man bai i lusim pasin bilong laikim ol arapela.” Long dispela as, long planti hap bilong graun long nau, planti man i no givim bel long tok bilong Kingdom. Na tu, sampela i tingim lotu i olsem samting nogut.—Matyu 24:12, 14.
Maski olsem, long pasin bilong bilip na no les kwik, ol pablisa bilong Kingdom i winim dispela hatwok na gutpela samting i kamap, olsem dispela stori bilong Ripablik Sek i kamapim.
Tupela Witnes i toktok long wanpela meri i stap insait long haus tasol dua bilong em i pas. Bihain liklik, dua i pairap na i op liklik, han bilong em i kam aut na holim Wastaua na Kirap! em Witnes i givim long em. Em i tok “tenkyu,” na pasim dua. Tupela Witnes i tingting, “Olsem wanem? Yumi mas kam bek?” Wanpela, em i mekim wok painia, olsem autim tok fultaim, em i go bek, tasol meri i mekim wankain pasin gen, na em i mekim olsem tasol i go inap wanpela yia.
Painia i tingting olsem em i mas senisim pasin bilong em long toktok, na em i beten long Jehova i helpim em. Narapela taim em i go bek, em soim nius long meri na long gutpela pasin pren em askim, “Yu stap orait? Olsem wanem? Yu laikim ol dispela nius?” Pastaim meri i no bekim, tasol bihain long em i go bek sampela taim moa, meri i kirap mekim pasin pren. Wanpela taim em opim dua bikpela, tasol stori bilong ol i sotpela.
Painia i tingim olsem meri i no laik toktok long ai bilong haus, olsem na em tingting long raitim pas long meri na stori long as na em i go lukim meri na em laik stadi wantaim em long Baibel. Em nau, bihain long wanpela yia na hap sista i no les kwik na em i kirapim Baibel-stadi wantaim dispela meri. Bihain, meri i tokim em: “Mi bin bilip long God kirap long taim yu stat bringim ol nius long mi,” painia i kirap nogut tasol dispela i strongim em.
Tru tumas, pasin bilong i no les kwik na wok strong yet inap kamapim gutpela samting long wok bilong autim tok bilong Kingdom na kamapim disaipel.—Matyu 28:19, 20.