Wok Bilong Makim Ol Samting Yumi Mas Mekim—Em Samting Yumi No Inap Abrusim
NAPOLEON BONAPARTE, em i bin stap king bilong Frans inap 200 yia i go pinis, em i tok: “I hatwok tru long save long pasin bilong makim gut ol samting yumi mas mekim, olsem na sapos man inap mekim olsem, em i wanpela gutpela samting tru.” Ating yu wanbel long dispela tok, long wanem, ol man i save laik tru long bosim i stap bilong ol yet. Tasol ol i bin kisim save tu olsem, sampela taim i hatwok tru long makim ol samting ol i mas mekim.
Tasol maski i hatwok o nogat, yumi no inap abrusim dispela wok. Em samting yumi mas mekim long olgeta de. Taim yumi kirap long moningtaim, yumi mas makim wanem klos yumi bai putim, na yumi bai kaikai wanem samting, na olsem wanem yumi bai mekim ol narapela samting yumi mas mekim long dispela de. Planti bilong ol em ol liklik samting tasol. Na yumi no tingting planti olsem yumi bin bihainim gutpela tingting long mekim o nogat.
Tasol sampela samting yumi mas mekim i bikpela samting long i stap bilong yumi long bihain. Planti yangpela bilong nau ol i mas makim wanem kain wok ol bai mekim, o wanem kain skul ol i mas kisim, na ol i mas skul inap hamas yia. Na bihain planti bilong ol bai makim olsem ol bai marit o i stap singel. Sapos ol i tingting long marit, ol i mas skelim olsem: ‘Mi bikpela inap long mi ken marit? Mi laikim wanem kain poroman, o bikpela samting moa, mi mas i gat wanem kain poroman?’ Wok bilong makim husat poroman yumi bai maritim, dispela bai mekim sampela bikpela samting tru long i stap bilong yumi, winim ol narapela samting.
Bilong makim ol bikpela samting tru yumi mas mekim, yumi mas bihainim gutpela tingting, long wanem, sapos yumi mekim olsem bai yumi stap amamas. Ating sampela i ting ol inap tru long makim gut ol samting ol i mas mekim, na taim wanpela i laik helpim ol, ol i save sakim. Yu ting dispela em pasin bilong gutpela tingting? Orait yumi ken skelim.
[Piksa Kredit Lain long pes 3]
Napoleon: From the book The Pictorial History of the World