Nau Yumi Mas Was i Stap Moa Yet
“Yupela i mas was gut. Yupela i no save wanem de Bikpela bilong yupela bai i kam.”—MATYU 24:42.
1, 2. Wanem samting i soim olsem yumi stap long pinis bilong dispela pasin i stap long graun?
“WOA i bin stiaim ol samting i kamap insait long dispela wan handet yia i go pinis.” Bill Emmott, em man bilong raitim buk, em i bin tok olsem. Tru, em i tokaut olsem woa na bagarapim man i bin kamap long olgeta taim bipo, tasol em i tok moa: “Samting i narapela kain i olsem, i gat planti woa moa na ol i bikpela moa yet. Dispela wan handet yia i go pinis em i namba wan taim i gat woa bilong olgeta hap i kamap . . . Na i no gat wanpela woa tasol i bin kamap long olgeta hap—i gat tupela woa olsem.”
2 Jisas Krais i bin tok profet long ol woa em ‘ol narapela narapela lain na ol narapela narapela king’ bai insait long en. Tasol em wanpela hap tasol bilong ‘mak bai kamap bilong makim olsem Krais i kam i stap na pasin bilong dispela graun i laik pinis.’ Long dispela bikpela tok profet, Jisas i tok tu long bikpela hangre, ol bikpela sik, na ol bikpela guria. (Matyu 24:3, 7, 8; Luk 21:6, 7, 10, 11) Long planti rot, ol dispela kain hevi i bin kisim planti hap moa na i kamap bikpela moa. Pasin bilong ol man i nogut tru, na dispela i kamap klia long tingting bilong ol long God na ol narapela man. Ol man i lusim pinis ol stretpela lo, na pasin raskol na bagarapim man i go bikpela moa. Ol man i save laikim tumas mani, na ol i no laikim tumas God, na ol i tingting tasol long painim amamas. Ol dispela samting i kamapim klia olsem yumi stap long taim bilong “planti hevi nogut tru.”—2 Timoti 3:1-5.
3. “Ol mak bilong dispela taim nau” i mas mekim wanem long yumi?
3 Yu ting olsem wanem long ol hevi bilong graun i wok long go bikpela tru? Planti man i no tingim ol bikpela hevi i wok long kamap long nau, na sampela i no pilim liklik. Ol bikman na saveman bilong graun i no save long as bilong “ol mak bilong dispela taim nau,” na ol bikman bilong lotu i no bin soim rot long ol man long dispela samting. (Matyu 16:1-3) Tasol Jisas i tokim ol disaipel: “Yupela i mas was gut [“was i stap,” NW ]. Yupela i no save wanem de Bikpela bilong yupela bai i kam.” (Matyu 24:42) Em nau, Jisas i no tokim yumi long was tasol; em i tokim yumi long “was i stap.” Bilong was i stap, yumi mas tingting gut na was gut oltaim. Bilong mekim olsem, yumi no ken save tasol olsem yumi stap long taim bilong las de, o yumi save em i taim bilong planti hevi, nogat. Yumi mas bilip strong olsem “taim bilong olgeta samting i laik pinis em i klostu nau.” (1 Pita 4:7) Long dispela rot tasol bai yumi pilim tru olsem taim i sot pinis na yumi mas was i stap moa yet. Olsem na yumi mas tingim gut dispela askim: ‘Wanem samting bai helpim yumi long strongim bilip bilong yumi olsem pinis i klostu?’
4, 5. (a) Wanem samting bai strongim bilip bilong yumi olsem pinis bilong dispela pasin nogut bilong nau i klostu? Bilong wanem i olsem? (b) Wanem samting long taim bilong Noa i wankain olsem long taim Pikinini bilong man i kamap?
4 Yumi ken tingim ol pasin i bin stap paslain long taim bilong wanpela bikpela samting tru i bin kamap long graun—em Bikpela Tait long taim bilong Noa. Pasin bilong ol man i nogut tru, olsem na Jehova “i bel hevi tru.” Em i tokaut olsem: “Bai mi pinisim olgeta manmeri mi bin wokim, maski ol i stap long wanem hap.” (Stat 6:6, 7) Na Jehova i mekim olsem em i bin tok. Bilong soim olsem dispela taim bipo i wankain olsem taim bilong yumi, Jisas i tok: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap.”—Matyu 24:37.
5 I stret yumi ken ting olsem, tingting bilong Jehova long ol lain bilong nau i wankain olsem tingting bilong em long ol manmeri paslain long Bikpela Tait. Long taim bilong Noa em i bin pinisim olgeta manmeri i givim baksait long em, olsem na yumi save em bai pinisim ol lain nogut bilong dispela graun long nau. Sapos yumi save gut olsem dispela taim bipo i wankain olsem taim bilong yumi, dispela i mas strongim bilip bilong yumi olsem pinis bilong dispela pasin bilong nau i klostu. Orait wanem ol samting i wankain? I gat olsem 5-pela samting. Namba wan, God i givim strongpela tok lukaut long bagarap bai painim ol man nogut.
Tok Lukaut Long “Samting Bai i Kamap Bihain”
6. Jehova i tok em bai mekim wanem long taim bilong Noa?
6 Long taim bilong Noa, Jehova i tokaut olsem: “Ol [manmeri] i samting bilong graun tasol, olsem na mi no ken larim spirit bilong mi i stap long ol oltaim. Nau bai mi larim ol i stap laip inap 120 krismas tasol, na bai ol i dai.” (Stat 6:3) Dispela tokaut God i mekim long yia 2490 B.C.E. i makim kirap bilong taim bilong pinis bilong ol lain bilong graun i givim baksait long God. Man! Tingim samting dispela bai mekim long ol manmeri i bin stap long dispela taim! I gat 120 yia moa i stap na Jehova bai “mekim bikpela tait i kamap long graun, bilong bagarapim olgeta samting i gat laip.”—Stat 6:17.
7. (a) Taim Noa i kisim tok lukaut long Bikpela Tait bai kamap, em i mekim wanem? (b) Yumi mas mekim wanem long ol tok lukaut yumi bin kisim long pinis bilong dispela pasin i stap long graun?
7 Inap planti yia paslain, Noa i bin kisim tok lukaut long bikpela bagarap bai kamap, na long gutpela tingting em i yusim dispela haptaim i stap yet bilong redi long abrusim bagarap. Aposel Pol i tok: “God i toksave long [Noa] long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. Na em wantaim meri pikinini bilong en . . . ol i no bagarap.” (Hibru 11:7) Orait olsem wanem long yumi? Klostu 90 yia i go pinis na taim bilong las de i bin kirap, em long 1914. Em nau, yumi stap tru long “taim bilong las de.” (Daniel 12:4) Orait yumi mas mekim wanem long ol tok lukaut yumi kisim pinis? Baibel i tok: “Man i bihainim tok bilong God, em bai i stap oltaim.” (1 Jon 2:17) Olsem na nau em i taim bilong wok strong long mekim laik bilong Jehova na pilim tru olsem taim i sot pinis.
8, 9. God i givim wanem ol tok lukaut long ol man long taim bilong yumi? Em i mekim ol dispela tok lukaut olsem wanem?
8 Long taim bilong yumi, ol sumatin bilong Baibel husat i gat gutpela bel, ol i bin kisim save long Baibel olsem bagarap bai painim ol lain bilong dispela graun. Yumi bilip tru long dispela tok? Jisas Krais i tokaut klia olsem: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Na Jisas i tok em bai kam olsem jas God i bin makim na em bai tilim ol man olsem wasman i save tilim ol sipsip i go long hap na ol meme i go long hap. Ol man i lus long kot ol bai “i go bilong kisim pe nogut, em pen i save stap oltaim. Tasol ol stretpela manmeri bai i kisim laip i stap oltaim oltaim.”—Matyu 25:31-33, 46.
9 Jehova i wok long kirapim gen lain bilong em long tingim ol dispela tok lukaut na em i mekim long rot bilong ol kaikai bilong spirit em “wokboi i gat gutpela tingting” i save kamapim. (Matyu 24:45-47) Na tu, Jehova i singautim ol manmeri bilong olgeta kantri, na lain, na tok ples long ol i mas “pret long em na litimapim nem bilong em,” long wanem, “taim i kamap pinis bilong God i skelim pasin bilong olgeta man long kot.” (KTH 14:6, 7) Wanpela bikpela samting bilong dispela tok bilong Kingdom ol Witnes Bilong Jehova i autim long olgeta hap, em dispela tok lukaut olsem klostu nau Kingdom Bilong God bai rausim olgeta wok gavman bilong ol man. (Daniel 2:44) Yumi no ken ting dispela tok lukaut em i liklik samting tasol. God i Gat Olgeta Strong i save truim olgeta tok em i mekim. (Aisaia 55:10, 11) Em i bin mekim olsem long taim bilong Noa, na em bai mekim tu long taim bilong yumi.—2 Pita 3:3-7.
Olkain Pasin Pamuk i Go Bikpela Moa
10. Olsem wanem long olkain pasin pamuk long taim bilong Noa?
10 Taim bilong yumi i wankain olsem taim bilong Noa long narapela samting tu. Jehova i bin tokim namba wan man na meri long kamapim ol pikinini na “kamap planti,” na bilong mekim olsem ol i mas yusim strong God i bin putim long skin bilong ol, tasol ol i mas mekim insait long marit tasol. (Stat 1:28) Long taim bilong Noa, sampela bikhet ensel i kirapim narapela kain maritpasin namel long ol man na i no stret long mekim. Ol i kam daun long graun na tanim i kamap man na ol i slip wantaim ol meri i gat naispela skin na kamapim ol pikinini, em ol i hap man na hap ensel nogut—em ol traipela man ol i kolim Nefilim. (Stat 6:2, 4) Sin bilong ol dispela ensel nogut i kain olsem pasin nogut bilong ol Sodom na Gomora, em ol i bin mekim ol narapela kain pasin pamuk. (Jut 6, 7) Olsem na olkain pasin pamuk nogut tru i pulap long dispela taim bipo.
11. Wanem kain pasin i stap nau na taim bilong yumi i wankain olsem taim bilong Noa?
11 Orait olsem wanem long pasin bilong ol man long taim bilong yumi? Long dispela taim bilong las de, planti man i tingting tasol long mekim maritpasin. Pol i stori long ol dispela kain man olsem “ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.” (Efesus 4:19) Pasin bilong lukim ol piksa nogut i gat sem olsem ponografi, pasin pamuk, mekim pasin sem long ol pikinini, man i slip wantaim man, ol i pulap tru long graun. Sampela ol i kirap pinis long “kisim pe nogut inap long bekim dispela pasin nogut bilong ol,” olsem ol i kisim ol sik nogut bilong pamuk, famili bilong ol i bruk, na ol narapela hevi.—Rom 1:26, 27.
12. Bilong wanem yumi mas kisim pasin bilong nolaik tru long ol pasin nogut?
12 Long taim bilong Noa, Jehova i salim Bikpela Tait na pinisim ol lain bilong graun i bin tingting tasol long mekim maritpasin. Yumi no ken lusim tingting olsem dispela taim bilong yumi i wankain tru olsem taim bilong Noa. Taim bilong “bikpela hevi tru” klostu nau bai kamap, em bai pinisim tru ‘ol man i save mekim pasin pamuk, na ol man i save trabel long ol maritmeri, na ol man i save mekim ol kain kain pasin i gat sem wantaim ol arapela man.’ (Matyu 24:21; 1 Korin 6:9, 10; KTH 21:8) Tru tumas, taim i sot pinis na yumi mas kisim pasin bilong nolaik tru long ol pasin nogut na klia long ol samting inap pulim yumi long mekim pasin pamuk!—Song 97:10; 1 Korin 6:18.
“Pait na Bikhet” i Pulap Long Graun
13. Long taim bilong Noa, bilong wanem “pait na bikhet” i pulap long graun?
13 Baibel i stori long narapela pasin i bin stap long taim bilong Noa, em i tok: “God i lukim pasin bilong ol arapela manmeri i nogut tru. Long olgeta hap bilong graun ol i wok long pait na bikhet tasol.” (Stat 6:11) Tru, pait na bagarapim man i no nupela samting long dispela taim. Pikinini bilong Adam, em Kein, em i bin kilim i dai brata bilong em Abel, em i stretpela man. (Stat 4:8) Long stori Lamek i bin raitim, em i hambak long em i bin kilim i dai wanpela yangpela man i bin paitim em. (Stat 4:23, 24) Nupela samting long taim bilong Noa, em pait na bagarapim man i go bikpela moa. Taim ol bikhet ensel i maritim ol meri bilong graun na kamapim ol pikinini—em ol Nefilim—pait na bagarapim man i go bikpela moa yet, winim olgeta taim bipo. Long tok Hibru bilong pastaim, Baibel i kolim ol dispela traipela man bilong pait olsem “man i mekim ol narapela i pundaun.” (Stat 6:4, NW, sta daunbilo) Olsem na “pait na bikhet” i pulap long graun. (Stat 6:13) Tingim ol hevi i bin painim Noa taim em i laik mekim bikpela long ol pikinini bilong em namel long ol dispela kain pasin! Tasol Noa em i “stretpela man namel long olgeta manmeri bilong graun.”—Stat 7:1.
14. Olsem wanem na “pait na bikhet” i pulap long graun long nau?
14 Kirap long bipo yet na i kam inap nau, pait na bagarapim man i bin i stap long graun. Tasol olsem long taim bilong Noa, long taim bilong yumi tu dispela pasin i kamap bikpela moa yet. Planti taim yumi save harim tok long man marit i paitim nogut meri bilong em, pasin teroris, pasin bilong bagarapim na pinisim wanpela lain olgeta, na ol man i holim gan na kilim i dai planti man, na i olsem i no gat as bilong en. Na tingim tu ol planti planti lain i bin kisim bagarap long ol woa. Em nau, pait na bagarapim man i pulap gen long graun. Bilong wanem i olsem? Wanem samting i mekim na dispela pasin i go bikpela olsem? Bekim bilong en i kamapim klia narapela samting i wankain olsem taim bilong Noa.
15. (a) Wanem samting i mekim na pait na bagarapim man i go bikpela long taim bilong las de? (b) Yumi ken bilip tru long wanem samting bai kamap?
15 Taim Kingdom Bilong God long han bilong Mesaia i kamap long heven long 1914, King Jisas Krais i kirap mekim wanpela bikpela samting tru. Em i rausim Satan wantaim ol spirit nogut bilong em long heven na ol i kam daun long graun. (KTH 12:9-12) Paslain long taim bilong Bikpela Tait, long laik bilong ol yet ol bikhet ensel ol i lusim ples bilong ol long heven, tasol long taim bilong yumi King Jisas Krais i bin rausim ol long heven. Na tu, long nau ol i no inap tanim i kamap man long graun na bai ol i ken kisim amamas long mekim pasin pamuk samting. Ol i belhat na pret long kot i laik painim ol, olsem na ol i stiaim ol man na ol oganaisesen long mekim ol pasin nogut tru bilong pait na bagarapim ol man, winim tru taim bilong Noa. Taim ol ensel nogut na ol pikinini bilong ol i mekim na pasin nogut i pulap long graun, Jehova i bin pinisim olgeta lain nogut i bin i stap paslain long Bikpela Tait. Na tru tumas, em bai mekim wankain pasin long taim bilong yumi! (Song 37:10) Tasol ol man i was i stap long nau ol i save, klostu nau na God bai kisim bek ol.
Ol i Autim Tok
16, 17. Wanem namba 4 samting long taim bilong Noa i wankain olsem taim bilong yumi?
16 I gat namba 4 samting long nau na long taim paslain long Bikpela Tait i wankain. Na dispela samting i kamap klia long wok God i bin givim long Noa. Noa i wokim wanpela traipela sip. Na tu, em i “man bilong tokaut.” (2 Pita 2:5) Em i tokaut long wanem tok? Yumi ken ting, taim Noa i autim tok em i toktok long ol man i mas tanim bel, na em i mekim tok lukaut long bikpela bagarap bai kamap. Jisas i tok, ol manmeri long taim bilong Noa “ol i stap olsem tasol i go inap long taim bikpela tait i kamap na i pinisim olgeta dispela manmeri.”—Matyu 24:38, 39.
17 Na ol Witnes Bilong Jehova tu, taim ol i wok strong long inapim wok bilong ol long autim tok, ol i tokaut long Kingdom Bilong God long olgeta hap. Long klostu olgeta hap bilong graun, ol man inap harim na ritim tok bilong Kingdom long tok ples bilong ol yet. Ol i save wokim olsem 25,000,000 nius Wastaua, em i tokaut long Kingdom Bilong Jehova, na ol i wokim long planti tok ples, winim 140. Tru tumas, ol i wok long autim dispela gutnius bilong Kingdom Bilong God “long olgeta hap bilong graun, bai olgeta lain manmeri i ken harim.” Taim ol i autim dispela tok inap long mak God i laikim, pinis bai kamap tru.—Matyu 24:14.
18. Skelim tingting bilong planti man long wok bilong yumi long autim tok wantaim tingting bilong planti man long taim bilong Noa.
18 Paslain long Bikpela Tait, ol man i no bin tingim liklik ol samting bilong spirit na stretpela pasin, olsem na yumi ken save long as na ol lain i stap klostu long Noa ol i save tok bilas na toknogutim em wantaim famili bilong em. Tasol pinis i bin kamap tru. Olsem tasol, long taim bilong las de “ol man bilong tok bilas bai i kamap.” Tasol Baibel i tok: “De bilong Bikpela bai i kamap wantu tasol olsem ol stilman i save kam.” (2 Pita 3:3, 4, 10) Na em bai kamap tru long taim God i bin makim. Em i no ken kam leit. (Habakuk 2:3, NW ) Em nau, sapos yumi gat gutpela tingting bai yumi was i stap!
Liklik Lain Tasol i Abrusim Bagarap
19, 20. Olsem wanem Bikpela Tait na bagarap bai painim dispela pasin bilong graun long nau i wankain?
19 Tru, long taim bilong Noa na long taim bilong yumi tu, ol manmeri i mekim pasin nogut tru na ol i mas bagarap. Tasol i gat sampela samting moa i wankain: Long taim bilong Bikpela Tait i gat sampela i bin abrusim bagarap, na olsem tasol i gat sampela man bai abrusim bagarap long pinis bilong dispela taim nau. Ol manmeri i abrusim bagarap long Bikpela Tait, ol i gat pasin daun na i stap bilong ol i no wankain olsem ol narapela pipel. Ol i putim yau long tok lukaut bilong God na ol i stap narapela kain long ol manmeri nogut bilong dispela taim. Baibel i tok: “Bikpela i amamas long Noa . . . na wokabaut bilong en i stret long ai bilong God.” (Stat 6:8, 9) Long olgeta lain pipel i gat wanpela famili tasol, olsem “liklik lain tasol, inap 8-pela manmeri, ol i bin i go antap long sip na bikpela wara i karim ol i go na God i kisim bek ol na ol i stap gut.” (1 Pita 3:20) Na God Jehova i givim wanpela tok long ol, olsem: “Karim planti pikinini, bai ol lain bilong yupela i pulapim olgeta hap bilong graun.”—Stat 9:1.
20 Baibel i tokim yumi olsem “planti manmeri tru” bai winim taim bilong “bikpela hevi tru.” (KTH 7:9, 14, NW ) Hamas manmeri bai insait long dispela bikpela lain? Jisas yet i bin tok: “Dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:13, 14) Ol man husat bai abrusim bagarap long dispela bikpela hevi tru ol i liklik lain tasol taim yumi skelim wantaim planti bilion man i stap nau long graun. Tasol ating ol bai kisim wankain tok olsem God i bin givim long ol lain i bin winim Bikpela Tait. Ol manmeri i winim bikpela hevi tru, ating insait long wanpela haptaim ol inap kamapim ol pikinini em ol bai insait long lain bilong nupela graun.—Aisaia 65:23.
“Yupela i Mas Was i Stap”
21, 22. (a) Yumi bin skelim stori bilong Bikpela Tait na dispela i helpim yu olsem wanem? (b) Wanem yia-teks bilong 2004? Bilong wanem yumi mas putim gut yau long ol tok em i givim long yumi?
21 Tru, dispela Bikpela Tait i bin kamap long bipo tru na i olsem em i no samting yumi mas tingim long nau. Tasol em i olsem wanpela tok lukaut yumi no ken givim baksait long en. (Rom 15:4) Ol wankain samting long taim bilong Noa na taim bilong yumi i mas kirapim yumi long tingim ol samting i wok long kamap na kirapim yumi long was gut long taim Jisas bai kam olsem stilman bilong bagarapim ol man nogut.
22 Long nau Jisas Krais i bosim wanpela bikpela wok bilong spirit i kain olsem wokim sip. Bilong helpim ol manmeri i lotu tru long God na bai ol i ken i stap gut na abrusim bagarap, i gat wanpela paradais bilong spirit i olsem sip. (2 Korin 12:3, 4, NW ) Bilong winim taim bilong bikpela hevi tru na stap laip, yumi mas i stap insait long dispela paradais. Long arere bilong dispela paradais bilong spirit lain bilong Satan i stap, na husat i laik slip long ol samting bilong spirit, lain bilong Satan i redi long pulim ol i go insait long lain bilong ol. Olsem na em i bikpela samting tru long yumi mas “was i stap” na yumi redi long de bilong Jehova bai kamap.—Matyu 24:42, 44, NW.
Yu Inap Tingim?
• Jisas i bin givim wanem tok long ol disaipel long taim em bai kam?
• Jisas i tok taim bilong em long kam i stap em i wankain long wanem taim?
• Olsem wanem taim bilong yumi i wankain olsem taim bilong Noa?
• Taim yumi tingim ol wankain pasin i kamap long taim bilong Noa na taim bilong yumi na yumi tingim taim i sot pinis, yumi mas mekim wanem?
[Rait long pes 18]
Yia-teks bilong 2004 bai i olsem: “Was gut. Yupela . . . i mas redi.”—Matyu 24:42, 44.
[Piksa long pes 15]
Noa i putim gut yau long tok lukaut bilong God. Yumi save mekim olsem?
[Ol Piksa long pes 16, 17]
“Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap”