Askim
Bihain long Bikpela Tait, Noa i salim wanpela pisin balus i lusim sip na i go, na taim em i kam bek em i karim “lip bilong diwai oliv.” Balus i painim we dispela lip?
Baibel i tok, “wara i kam antap moa moa yet na i karamapim olgeta bikpela maunten.” (Stat 7:19) Taim tait i wok long slek, Noa i salim wanpela balus i go 3-pela taim, olsem wanpela taim long ol wan wan wik. Long namba 2 taim, balus i kam bek na “long maus bilong en, em i holim wanpela nupela lip bilong diwai oliv. Olsem na Noa i save, wara i go daun pinis.”—Stat 8:8-11.
Tru, long nau yumi no inap save, hamas mun samting wara i karamapim wanpela hap bilong graun, long wanem, Bikpela Tait i bin senisim ol mak bilong graun na ol maunten samting. Tasol yumi ken ting, wara i karamapim bikpela hap bilong graun inap longpela taim liklik na planti diwai i dai. Tasol i luk olsem sampela i stap strong yet na ol inap putim nupela kru taim wara i go daun.
Buk The New Bible Dictionary i stori long diwai oliv olsem: “Sapos ol i katim diwai oliv, ol nupela kru bai kamap long as bilong diwai, na sampela taim 5-pela nupela diwai inap kamap. Na ol olpela diwai oliv i laik drai, ol tu i save putim nupela kru taim ol i katim.” Wanpela dikseneri The New Schaff-Herzog Encyclopedia of Religious Knowledge i tok, “i olsem i no gat wanpela samting inap bagarapim dispela diwai.” Long nau i no gat wanpela man i save, dispela tait wara i gat bikpela sol long en o nogat, na wara i kol o nogat, na ol kain samting olsem. Olsem na yumi no inap save gut olsem dispela wara inap mekim wanem long ol diwai oliv na ol narapela diwai samting.
Tasol wel oliv i no inap i stap laip long ol ples kol, olsem long ol bikpela maunten. Diwai oliv i save kamap long ol hap i daun liklik, olsem aninit long 1,000 mita, we mak bilong kol i antap long 10 digri Selsias. Buk The Flood Reconsidered i tok: “Olsem na Noa inap kisim tingting long dispela nupela lip olsem wara i wok long drai long ol ples daun.” Taim Noa i salim balus i go long wik bihain, balus i no kam bek, na dispela i makim olsem i gat planti diwai samting i stap na ol ples bilong balus i ken sindaun malolo long en.—Stat 8:12.