Rot Bilong Kamapim Pasin Bilong Yumi Long Laikim God
BILONG kisim pasin bilong laikim God i no olsem yumi kisim save tasol long em. Olsem ol wokman bilong God long olgeta hap inap kamapim, pasin bilong laikim tru God i kamap taim man i kisim save long pasin bilong God. Dispela pasin laikim i kamap strong moa taim man i kisim save long ol samting God i laikim, ol samting em i nolaik tru long en, ol samting em i ting i gutpela moa, na ol lo bilong em.
Jehova i mekim gut long yumi na i givim yumi Tok bilong em, Baibel, na em i kamapim em yet long rot bilong en. Long Baibel yumi kisim save long ol samting Jehova i bin mekim taim ol narapela narapela samting i kamap. Olsem amamas yumi kisim long pas wanpela man husat yumi laikim tru i salim long yumi, olsem tasol Baibel i givim bikpela amamas long yumi taim yumi luksave long sampela nupela samting bilong pasin bilong Jehova.
Tasol taim yumi autim tok, sampela taim yumi lukim olsem pasin bilong kisim save long God i no kirapim man long laikim Em. Jisas i stori long sampela Juda long taim bilong em husat i no pilim gutpela pasin bilong God. Em i tok: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok . . . Tasol mi save long yupela. Long bel bilong yupela, yupela i no gat laik long God.” (Jon 5:39, 42) Sampela i lusim planti yia bilong kisim save long gutpela pasin bilong Jehova, tasol ol i no laikim em tumas. Bilong wanem i olsem? Ol i no tingim tingim ol bikpela samting bilong ol tok ol i lainim. Tasol planti milion manmeri husat i gat gutpela bel na yumi stadi wantaim ol long Baibel, ol i luksave olsem pasin bilong ol long laikim God i wok long i go bikpela. Bilong wanem? Long wanem, ol i bihainim pasin bilong Asap, olsem yumi yet i bin mekim. Long wanem rot?
Skelim Long Bel na Pilim Tru
Asap i tingting strong long kamapim pasin bilong laikim Jehova long bel bilong em. Em i tok: “Mi wok long tingting i stap. . . . Yes, bai mi tingting bek long ol kain kain bikpela samting bipo yu bin mekim. Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.” (Song 77:6, 11, 12) Man i tingim tingim ol pasin bilong Jehova olsem man bilong raitim song i bin mekim, pasin bilong em long laikim God bai kamap strong moa long bel bilong em.
Na taim yumi tingim ol ekspiriens yumi bin kisim taim yumi mekim wok bilong Jehova, dispela tu i mekim na yumi pas gut moa wantaim em. Aposel Pol i tok yumi “wanwok” bilong God, na pasin pren inap kamap namel long ol man i wok wantaim em i gutpela samting tru. (1 Korin 3:9) Taim yumi kamapim klia olsem yumi laikim Jehova, em i pilim tru dispela na i amamas long en. (Sindaun 27:11) Na taim yumi askim Jehova long helpim yumi na em i stiaim yumi long winim wanpela hevi, orait yumi save em i stap wantaim yumi, na pasin bilong yumi long laikim em i kamap strong moa.
Pasin pren i kamap namel long tupela man taim narapela i kamapim bel bilong em long narapela. Na olsem tasol, taim yumi tokim Jehova long as na yumi givim bel long em, pasin bilong yumi long laikim em i kamap strong moa. Bai yumi tingim tok bilong Jisas: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela [“givim yu yet olgeta,” NW ] na long tingting bilong yupela na long strong bilong yupela.” (Mak 12:30) Yumi ken mekim wanem na bai yumi wok yet long laikim tru Jehova long bel, tingting, na strong bilong yumi, na givim yumi yet olgeta long em?
Yumi Laikim Jehova Long Bel Olgeta
Baibel i tok long bel bilong man, em olsem tingting, pasin, na ol laik bilong em. Olsem na pasin bilong laikim Jehova long bel olgeta i makim olsem yumi gat bikpela laik tru long mekim ol samting God i laikim, winim olgeta narapela samting. (Song 86:11) Yumi soim olsem yumi gat dispela kain pasin laikim taim yumi senisim pasin bilong yumi na bai God i ken orait long en. Yumi wok strong long bihainim pasin bilong God long rot bilong ‘givim baksait tru long pasin nogut, na pas tru long gutpela pasin.’—Rom 12:9.
Pasin bilong yumi long laikim God i stiaim tingting bilong yumi long olgeta samting. Olsem: Ating wok mani bilong yumi i kirapim tru tingting bilong yumi o yumi mas wokim gut tingting bilong mekim, tasol yu ting yumi givim bel olgeta long en? Nogat. Yumi laikim Jehova long bel olgeta, olsem na nambawan bikpela samting long yumi em yumi stap wokman bilong God. Na tu, yumi laik amamasim papamama, poroman marit, na bos bilong yumi, tasol yumi laikim Jehova long bel olgeta na yumi laik amamasim em moa, winim ol narapela. I stret em i stap nambawan samting long bel bilong yumi.—Matyu 6:24; 10:37.
Yumi Laikim Jehova na Givim Yumi Yet Olgeta Long Em
Pasin bilong laikim Jehova na givim yumi yet olgeta long em i makim olsem yumi yusim laip bilong yumi bilong litimapim nem bilong em na kamapim klia olsem yumi laikim em tru.
Tru, ating i gat ol narapela samting yumi laik mekim, olsem lain long mekim wanpela wok, lukautim wok bisnis, o mekim bikpela long famili. Tasol yumi soim olsem yumi laikim Jehova na givim yumi yet olgeta long em long rot bilong mekim ol samting olsem em i laikim na yumi putim ol bikpela samting i go pas long laip bilong yumi, olsem “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Pasin bilong givim yumi yet olgeta long lotu i makim tu olsem yumi givim bel long wok. Taim yumi givim bel long autim tok bilong Kingdom, mekim ol tok long miting i strongim bel bilong narapela, o helpim ol brata sista Kristen bilong yumi, orait yumi soim Jehova olsem yumi laikim em. Long olgeta samting yumi mekim, yumi givim yumi yet olgeta long God na ‘amamas long bihainim laik bilong em.’—Efesus 6:6.
Jisas i soim olsem em i laikim God na givim em yet olgeta long Em long rot bilong i no tingim ol samting bilong em yet. Em i putim laik bilong God i stap namba wan na ol samting bilong em yet i stap namba tu. Jisas i kirapim yumi long bihainim pasin bilong em. Em i tok: ‘Sapos wanpela man i laik bihainim mi, orait em i mas daunim laik bilong em yet, na em i mas karim diwai bilong en na bihainim mi.’ (Matyu 16:24, 25) Bilong daunim laik bilong yumi yet, yumi mas dediket. Em i makim olsem yumi laikim tru God na yumi kamap olsem samting bilong em, wankain olsem wanpela man Israel bilong bipo i laikim tru bosman bilong em na i laik i stap olsem wokboi nating bilong em inap oltaim. (Lo 15:16, 17) Taim yumi dediketim laip bilong yumi long Jehova, dispela i kamapim klia olsem yumi laikim em tru.
Yumi Laikim Jehova Long Tingting Olgeta
Pasin bilong laikim Jehova long tingting olgeta i makim olsem yumi wok strong tru long save gut long pasin na ol lo bilong em, na ol samting em i tingting pinis long mekim. (Jon 17:3; Aposel 17:11) Yumi kamapim pasin bilong yumi long laikim Jehova long rot bilong givim tingting olgeta long helpim ol narapela long laikim Jehova na long rot bilong mekim wok tisa bilong yumi i kamap gutpela moa. Aposel Pita i tok: “Oltaim tingting bilong yupela i mas i stap redi.” (1 Pita 1:13) Na tu, yumi wok strong long soim olsem yumi tingim ol narapela, na moa yet ol wanlotu bilong yumi. Yumi save long sindaun bilong ol na luksave long wanem taim i gutpela long givim sampela tok amamas o tok bilong mekim gut bel bilong ol.
Taim yumi daun long Jehova long tingting bilong yumi dispela i soim Jehova olsem yumi laikim em long tingting olgeta. Yumi laik kisim tingting bilong em long ol samting, tingim em taim yumi makim ol samting yumi mas mekim, na bilip olsem rot em i makim i nambawan gutpela rot. (Sindaun 3:5, 6; Aisaia 55:9; Filipai 2:3-7) Tasol taim yumi wok long kamapim pasin bilong yumi long laikim God, olsem wanem yumi ken yusim strong bilong yumi?
Yumi Laikim Jehova Long Strong Olgeta
Planti yangpela long kongrigesen Kristen i yusim strong bilong ol bilong litimapim nem bilong Jehova. (Sindaun 20:29; Saveman 12:1) Wanpela rot em planti yangpela Kristen i soim olsem ol i laikim Jehova long strong olgeta bilong ol em long rot bilong mekim wok painia, olsem autim tok fultaim. Planti mama i mekim dispela wok taim pikinini bilong ol i stap long skul. Ol gutpela elda husat i mekim visit bilong wasman na lukautim famili bilong ol yet, ol i soim olsem ol i laikim Jehova long strong olgeta bilong ol. (2 Korin 12:15) Jehova i save givim strong long ol man i wet long em i helpim ol, na ol inap soim olsem ol i laikim em long rot bilong litimapim nem bilong em long strong olgeta bilong ol.—Aisaia 40:29; Hibru 6:11, 12.
Pasin laikim bai go bikpela sapos yumi mekim ol samting bilong strongim dispela pasin. Olsem na yumi mas wok yet long lusim haptaim bilong skelim ol samting long bel. Yumi tingim ol samting Jehova i bin mekim bilong helpim yumi na i gat wanem as na i stret yumi givim bel olgeta long em. Yumi ol pikinini bilong Adam i gat sin, olsem na yumi no gutpela inap long yumi ken kisim “ol samting God i bin redim i stap bilong ol man i save laikim em tru,” tasol yumi ken soim olsem yumi laikim tru Jehova long bel olgeta bilong yumi. Gutpela sapos yumi wok yet long mekim olsem!—1 Korin 2:9.
[Piksa long pes 20]
Yumi kamapim pasin bilong laikim God long rot bilong ol samting yumi mekim