Kaikai Bilong Bikpela—Mekim Olsem Wanem?

TOK bilong Kristen aposel Pol i givim save long yumi long dispela bung bilong Kaikai Bilong Bikpela, Pol i tok: “Dispela tok mi bin givim long yupela, em mi kisim long Bikpela tasol. Dispela tok i olsem. Long nait Judas i bin putim Jisas long han bilong ol birua, long dispela nait Bikpela Jisas i kisim bret, na i tenkyu long God, na i brukim, na i tok, ‘Dispela em i bodi bilong mi, mi givim bilong helpim yupela. Yupela i mas mekim olsem bilong tingim mi.’ Na taim ol i kaikai pinis, em i kisim kap wain na i mekim wankain pasin long en. Em i tok olsem, ‘Dispela kap wain em i nupela kontrak mi mekim long blut bilong mi yet. Olgeta taim yupela i dring long dispela kap, yupela i mas mekim olsem bilong tingim mi.’ Dispela tok bilong Jisas i soim olsem, olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.”​—⁠1 Korin 11:​23-26.

Olsem Pol i tok, Jisas i kamapim dispela Kaikai Bilong Bikpela “long nait Judas i bin putim Jisas long han bilong ol birua,” em ol hetman bilong lotu Juda husat i strong long ol Rom i mas nilim Krais long diwai. Dispela kaikai i kamap long Fonde nait, Mas 31, 33 C.E. Jisas i dai long diwai pos long Fraide apinun, Epril 1. Ol de bilong kalenda bilong ol Juda i kirap long taim san i go daun na i go inap long neks de taim san i go daun, olsem na Kaikai Bilong Bikpela na dai bilong Jisas Krais i bin kamap long wankain de​—⁠Nisan 14, 33 C.E.

Ol man i kisim bret na wain i “mas mekim olsem” bilong tingim Jisas. Olsem narapela Baibel i kamapim, Jisas i tok: “Mekim olsem memorial bilong tingim mi.” (1 Korin 11:​24, The Jerusalem Bible) Narapela nem bilong Kaikai Bilong Bikpela em Memorial bilong tingim dai bilong Krais.

Bilong Wanem Yumi Mas Tingim Dai Bilong Jisas?

Man inap save long bekim bilong dispela askim taim em i save long as na dai bilong Jisas i bikpela samting. I go inap long taim em i dai Jisas i stap olsem nambawan man i sapotim wok king bilong Jehova. Olsem na Jisas i kamapim klia Satan i giaman taim em i tok olsem ol man i tingim ol yet tasol na mekim wok bilong God. (Jop 2:​1-5; Sindaun 27:11) Long rot bilong i dai bilong Jisas​—⁠olsem man i gutpela olgeta​—⁠Jisas i “givim laip bilong em bilong baim bek planti manmeri.” (Matyu 20:28) Taim Adam i mekim rong long God, em i tromoi laip i gutpela olgeta wantaim ol gutpela samting bilong en. Tasol “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Tru tumas, “sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.”​—⁠Rom 6:⁠23.

Olsem na dai bilong Jisas Krais i insait long tupela nambawan bikpela samting i kamapim pasin laikim​—⁠bikpela pasin laikim Jehova i soim long ol man taim em i givim Pikinini bilong em, na pasin bilong Jisas long lusim samting bilong em yet na laikim tru ol narapela taim em i lusim laip bilong em olsem man. Memorial bilong tingim i dai bilong Jisas i litimapim dispela tupela samting i kamapim pasin laikim. Jehova na Jisas i kamapim dispela pasin laikim long yumi, olsem na i stret yumi soim olsem yumi tenkyu tru long dispela, a? Wanpela rot bilong mekim olsem em long stap long bung bilong Kaikai Bilong Bikpela.

Samting Bret na Wain i Makim

Taim Jisas i kamapim Kaikai Bilong Bikpela, em i yusim bret na wanpela kap wain bilong makim ol samting. Jisas i kisim bret “na i tenkyu long God, na i brukim, na i tok, ‘Dispela [bret] em i bodi bilong mi, mi givim bilong helpim yupela.’ ” (1 Korin 11:24) Jisas i mas brukim bret na bai em inap tilim na ol i ken kaikai, long wanem, bret i strong liklik, ol i wokim long plaua na wara, na no gat yis. Long Baibel, yis i makim sin. (Matyu 16:​11, 12; 1 Korin 5:​6, 7) Jisas i no gat sin. Olsem na bodi bilong em i gutpela olgeta em inap tru long stap olsem ofa bilong baim bek ol man. (1 Jon 2:​1, 2) I stret tru long yusim bret i no gat yis bilong makim bodi bilong Krais i no gat sin!

Na Jisas i tok tenkyu tu long gutpela kap wain na tok: “Dispela kap wain em i nupela kontrak mi mekim long blut bilong mi yet.” (1 Korin 11:25) Retpela kap wain i makim blut bilong Jisas. Blut bilong ol bulmakau na meme ol i bin mekim ofa long en i bin strongim kontrak bilong Lo em God i bin wokim wantaim lain Israel long 1513 B.C.E., na olsem tasol blut Jisas i kapsaitim taim em i dai i strongim nupela kontrak.

Husat Bai Kisim?

Bilong save husat stret i mas kisim bret na wain bilong Memorial, yumi mas save long nupela kontrak em i wanem samting na husat i insait long en. Baibel i tok: “Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. . . . Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi. . . . Bai mi lusim sin bilong ol na mi no ken tingim moa.”​—⁠Jeremaia 31:​31-34.

Nupela kontrak i opim rot long pas gut tru wantaim God Jehova. Long rot bilong dispela kontrak, wanpela lain i kamap manmeri bilong em yet na em i kamap God bilong ol. Lo bilong Jehova i stap long bel bilong ol, na ol man husat i no bilong lain Juda i bin katim skin, ol tu inap insait long dispela nupela kontrak wantaim God. (Rom 2:29) Man bilong raitim Baibel, Luk, em i stori long God i tingting pinis long go “long ol man bilong ol arapela lain, bilong kisim ol lain manmeri bilong ol na mekim ol i kamap lain bilong em yet.” (Aposel 15:14) Olsem 1 Pita 2:10 i tok, “bipo [ol] i stap ol manmeri nating. Tasol nau [ol] i stap lain manmeri bilong God.” Baibel i makim ol olsem “lain Israel tru bilong God,” em olsem lain Israel bilong spirit. (Galesia 6:16; 2 Korin 1:21) Olsem na nupela kontrak em i kontrak namel long God Jehova na ol Israel bilong spirit.

Long laspela nait em i stap wantaim ol disaipel bilong em, Jisas yet i wokim narapela kontrak wantaim ol. Em i bin tokim ol: “Papa bilong mi em i givim kingdom long mi, olsem tasol mi givim kingdom long yupela.” (Luk 22:29) Dispela em i kontrak bilong Kingdom. Namba bilong ol sinman i insait long dispela kontrak bilong Kingdom em 144,000. Bihain long ol i kirap bek i go long heven, ol bai wok king na pris wantaim Krais. (KTH 5:​9, 10; 14:​1-4) Olsem na ol lain i insait long nupela kontrak wantaim God Jehova ol i insait tu long kontrak bilong Kingdom wantaim Jisas Krais. I stret ol tasol i ken kisim bret na wain long Kaikai Bilong Bikpela.

Ol dispela lain i gat rait long kisim bret na wain bilong Memorial, olsem wanem ol i save ol i pas tru wantaim God na ol bai mekim wok king wantaim Krais? Pol i tok: “Holi Spirit yet i save helpim spirit [tingting] bilong yumi na yumi save tokaut ples klia olsem yumi stap pikinini bilong God. Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em.”​—⁠Rom 8:​16, 17.

Long rot bilong holi spirit bilong em, God i makim ol lain bilong mekim wok king wantaim Krais. Dispela i helpim ol long save gut tru olsem ol i insait long lain bilong Kingdom. Holi spirit i mekim na ol Kristen God i bin makim ol i gat strongpela tingting long i go long heven. Olgeta tok Baibel i mekim long laip long heven, ol i tingim olsem dispela tok i bilong ol yet. Na tu, ol i orait long lusim olgeta samting bilong ol long graun, laip long graun na ol poroman bilong ol long graun. Ol Kristen God i bin makim ol long holi spirit ol i save olsem laip long Paradais long graun bai i gutpela samting tru, tasol dispela i no samting ol i wet long en. (Luk 23:​43, NW ) Spirit bilong God yet i mekim na ol i bilip na wet long i go long heven​—⁠i no ol kranki tok bilong lotu i mekim​—⁠na dispela bilip i no inap senis, olsem na i stret ol i kisim bret na wain long Memorial.

Ating wanpela man i no save gut olsem em i insait long nupela kontrak na kontrak bilong Kingdom o nogat. Na olsem wanem sapos spirit bilong God i no bin tokaut long em olsem em bai wok king wantaim Krais? Sapos olsem, i no stret long em i kisim bret na wain bilong Memorial. Tru tumas, God bai i no amamas sapos wanpela man i tok nating olsem God i makim em long mekim wok king na pris long heven, tasol man ya i save olsem God i no bin singautim em.​—⁠Rom 9:16; KTH 22:⁠5.

Mekim Hamas Taim?

Yu ting yumi mas mekim bung bilong tingim i dai bilong Jisas long olgeta wik o long olgeta de? Krais i kamapim Kaikai Bilong Bikpela long wankain de ol man i mekim pasin i no stret na kilim em i dai, em long de Pasova. De Pasova i kamap wanpela taim tasol long yia, long Nisan 14, na long dispela de ol Juda i save tingim taim God i bin kisim bek ol Israel long Isip. (Kisim Bek 12:​6, 14; Wok Pris 23:⁠5) Olsem na bung bilong tingim dai bilong Krais “olsem sipsip yumi ofaim” long Pasova, em samting bilong mekim wanpela taim tasol long yia, i no long olgeta wik o long olgeta de. (1 Korin 5:⁠7) Bilong mekim bung bilong Kaikai Bilong Bikpela, ol Kristen i bihainim wankain pasin olsem Jisas i mekim taim em i kamapim dispela bung.

Orait, wanem mining bilong dispela tok bilong Pol: “Olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.” (1 Korin 11:26) Long dispela ves Pol i kamapim wanpela tok i makim “long olgeta taim yupela mekim,” o “long wanem wanem taim.” Olsem na em i tok long wanem wanem taim ol Kristen God i bin makim i kisim bret na wain, long dispela taim ol i autim bilip bilong ol long ofa bilong Jisas bilong baim bek ol man.

Ol Kristen God i bin makim bai mekim bung bilong tingim dai bilong Krais i go “inap long taim em i kam bek.” Ol bai mekim dispela bung i go inap long taim Jisas i kam bilong kisim ol lain bilong em i go long heven, ol i mas kirap bek olsem spirit. (1 Tesalonaika 4:​14-17) Dispela i stret wantaim tok Krais i givim long 11-pela aposel i stap gut long em: “Sapos mi go redim ples bilong yupela, bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.”​—⁠Jon 14:⁠3.

Olsem Wanem Memorial i Helpim Yu?

Olsem wanem? Man i mas kisim bret na wain bilong Memorial na bai ofa bilong Krais i helpim em na em i ken kisim laip oltaim long graun? Nogat. I no gat wanpela tok long Baibel i kamapim olsem ol man i pret long God, olsem Noa, Abraham, Sara, Aisak, Rebeka, Josep, Moses, na Devit, ol bai kisim dispela bret na wain bihain long ol i kirap bek long graun, nogat. Tasol dispela lain wantaim ol arapela i laik kisim laip oltaim long graun, ol i mas bilip long God na Krais na long samting Jehova i bin mekim bilong baim bek ol man long rot bilong ofa bilong Jisas. (Jon 3:36; 14:⁠1) Bilong kisim laip oltaim, yu tu i mas bilip long dispela samting. Taim yu stap long bung bilong tingim i dai bilong Krais em ol i save mekim long olgeta yia, dispela bai kirapim yu long tingim dispela nambawan gutpela ofa na i helpim yu long pilim moa yet dispela samting.

Aposel Jon i kamapim klia olsem ofa bilong Jisas i bikpela samting taim em i tok: “Mi raitim dispela tok long yupela [ol wanbilip Kristen God i bin makim], bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:​1, 2) I stret ol man God i bin makim i tok olsem ofa bilong Jisas i karamapim ol sin bilong ol. Tasol dispela ofa tu i bilong karamapim sin bilong olgeta manmeri, na dispela i opim rot long ol man i harim tok ol i ken kisim laip oltaim!

Bai yu stap long Epril 4, 2004, long bung bilong tingim i dai bilong Krais? Dispela bung bai kamap long olgeta hap bilong graun long ol ples bung bilong ol Witnes Bilong Jehova. Sapos yu go, yu bai kisim helpim taim yu putim yau long wanpela bikpela tok bilong Baibel. Tok bai kirapim yu long tingim ol planti samting God Jehova na Jisas Krais i bin mekim bilong helpim yumi. Na tu, em bai helpim yu long samting bilong spirit taim yu bung wantaim ol lain i rispek tru long God na Krais na long ofa bilong Jisas bilong baim bek ol man. Ating dispela bung bai strongim laik bilong yu long kisim marimari bilong God, em i rot bilong kisim laip oltaim. No ken larim wanpela samting i pasim rot bilong yu. Stap long dispela gutpela bung i amamasim na givim biknem long Papa bilong yumi long heven, God Jehova.

[Piksa long pes 5]

Dai bilong Jisas i insait long tupela nambawan bikpela samting i kamapim pasin laikim

[Piksa long pes 6]

Bret i no gat yis na kap wain i makim bodi bilong Jisas i no gat sin na blut em i bin kapsaitim