Ehut i Pinisim Strong Bilong Ol Birua

DISPELA em i wanpela trupela stori i kamapim pasin bilong strongim bel na mekim pasin trik. Em i kamap inap olsem 3,000 yia i go pinis. Stori bilong en long Baibel i kirap long ol tok olsem: “Ol Israel i mekim sin gen long Bikpela. Olsem na Bikpela i givim bikpela strong long King Eklon bilong Moap na em i daunim ol Israel. Eklon i bungim ol Amon wantaim ol Amalek na ol i go pait na winim ol Israel na kisim Taun Bilong Ol Diwai Det. Ol Israel i stap aninit long Eklon na ol i mekim wok kalabus bilong en inap 18 yia.”​​—⁠Hetman 3:​12-​14.

Ples bilong ol Moap i stap long hap is bilong wara Jordan na raunwara Detsi. Tasol ol Moap i bin brukim wara Jordan na kam sindaun long hap klostu long Jeriko, “dispela taun i gat planti diwai det,” na ol Israel i mekim wok kalabus aninit long ol. (Lo 34:⁠3) King bilong Moap, em Eklon, “i patpela man tru,” na inap 18 yia em i bin singaut long bikpela takis long ol Israel, na dispela i putim bikpela hevi long ol na i daunim ol. (Hetman 3:​17) Tasol pasin bilong em long singaut long takis i mekim na ol Israel i gat rot long daunim dispela hatpela bos.

Baibel i tok: “Ol Israel i krai long Bikpela na em i makim wanpela man, nem bilong en Ehut, bilong kisim bek ol long han bilong ol birua. Ehut em i kaisman na em i pikinini bilong Gera bilong lain Benjamin. Ol Israel i salim sampela presen [“takis,” NW ] i go long Eklon, king bilong kantri Moap, na Ehut i bringim ol dispela presen i go.” (Hetman 3:​15) Ating Jehova i bin stretim rot na ol Israel i makim Ehut long givim dispela takis long king. Baibel i no stori olsem em i bin mekim dispela wok long bipo o nogat. Tasol pasin bilong Ehut long redim gut ol samting bilong bungim king na ol wok em i mekim i kamapim olsem em i bin save long haus king bilong Eklon na ol samting inap painim em long dispela hap. Ehut i kaisman, na dispela i bikpela samting long wok bilong em.

Man i Gat Bagarap Long Skin o Man Bilong Pait?

Insait bilong dispela tok Hibru ol i tanim olsem “kaisman” i olsem ‘ol pinga bilong han sut i no inap op, o han sut i bagarap, o ol i pasim han sut.’ Olsem wanem? Dispela i makim olsem Ehut i gat sampela bagarap long skin, olsem han sut bilong em i nogut? Tingim stori bilong Baibel long ol 700 kaisman em “Gibea yet i makim,” em ol i bilong lain Benjamin. Hetman 20:16 i tok: “Ol i save tumas long tromoi ston long katapel, na ol i save kisim mak tru.” Yumi ken save olsem Gibea i bin makim ol, long wanem, ol i save gut long pait. Sampela saveman bilong Baibel i tok, dispela tok “kaisman” i makim olsem man i save mekim wok long han kais na han sut tu, olsem man i save mekim wok long tupela han wantaim.​​—⁠Hetman 3:​15.

Lain Benjamin i gat nem, long wanem, sampela man bilong en i save mekim wok long han kais. Namba 1 Stori 12:​1, 2 i stori long sampela man bilong lain Benjamin ol i ‘strongpela soldia i helpim pait. Ol i save tumas long sut long banara na katapel, maski ol i holim long han kais o long han sut.’ Wanpela buk i tok, ating ol i lainim dispela pasin long rot bilong ‘pasim han sut bilong ol yangpela pikinini, na lainim ol long mekim wok long han kais.’ Ol birua bilong lain Israel i save skul long pasin bilong pait wantaim ol soldia i mekim wok long han sut. Olsem na bikpela wok bilong skulim wanpela soldia i lus nating sapos em i mas pait wantaim wanpela soldia i mekim wok long han kais.

‘Tok Bilong King Wanpela Tasol’

Namba wan samting Ehut i mekim, em i wokim “wanpela bainat bilong em yet”​—⁠em wanpela bainat i gat tupela sap na i sotpela na bai em i ken haitim aninit long laplap bilong em. Ating em i ting ol wokman bilong king bai sekim em. Planti taim ol man i putim ol bainat long han kais bilong bodi. Long dispela rot ol man i mekim wok long han sut inap kisim kwik bainat. Ehut i kaisman, olsem na em i “pasim dispela bainat long han sut bilong em, aninit long laplap,” em hap ating ol wokman bilong king bai i no sekim. Olsem na i no gat wanpela samting i pasim rot bilong em long “kisim ol dispela presen i go long King Eklon.”​​—⁠Hetman 3:​16, 17.

Baibel i no stori long ol liklik samting i kamap pastaim long haus king bilong Eklon. Baibel i tok tasol: “Ehut i givim ol presen pinis long Eklon, na em wantaim ol dispela man i bin karim presen ol i kirap na i go.” (Hetman 3:​18) Ehut i bin givim presen, olsem takis, long King, na bihain em yet wantaim ol man i bin karim ol takis ol i go longwe liklik long haus king bilong Eklon. Em i lusim ol long dispela hap na i go bek long king. Bilong wanem em i mekim olsem? Ating em i kisim ol dispela man i go wantaim em bilong was long em, o em kastam tasol, o ol i bilong karim takis tasol. Na ating em i laik ol i lusim dispela hap bilong king na ol i no ken kisim bagarap taim em i mekim wok bilong em. Maski Ehut i gat wanem tingting long dispela samting, em i strongim bel na em wanpela i go bek.

“Ol i wokabaut i go kamap long ol ston ol man i bin katim piksa long en, klostu long ples Gilgal. Na long dispela hap Ehut i tanim bek, na i go bek long king bilong Moap. Em i lukim King Eklon na i tokim em olsem, ‘King, mi gat tok bilong yu wanpela tasol.’ ” Baibel i no tokaut olsem wanem Ehut inap i go insait gen long hap Eklon i stap long en. Olsem wanem? Ol wokman bilong king i no saspek long em? Ol i ting wanpela Israel tasol i no inap bagarapim bikman bilong ol? Ehut wanpela i kam na ating dispela i mekim na ol Moap i ting em i bin givim baksait long lain bilong em? Maski wanem samting i kamap, Ehut i askim ol long toktok wantaim king wanpela tasol, na ol i larim em long mekim olsem.​​—⁠Hetman 3:​19.

Baibel i tok moa: “King wanpela i sindaun i stap long kolpela rum bilong en antap long rup bilong haus. Na Ehut i kam long em na i tok, ‘Mi gat wanpela tok bilong yu i kam long God.’ ” Ehut i no toktok long wanpela tok stret bilong God. Ehut i tingting long mekim wok long bainat bilong em. Ating king i ting em i kisim wanpela tok bilong god bilong em Kemos, olsem na king “i sanap” long sia king bilong em. Kwiktaim tru, Ehut i pulim bainat bilong em na planim long bel bilong Eklon. Bainat i no gat samting namel long han na sap bilong en. Olsem na “sap na han bilong bainat i go insait long bel bilong em olgeta. Na gris bilong bel i karamapim bainat, na sap bilong bainat i kamap long baksait bilong en.”​​—⁠Hetman 3:​20-​22.

Em i Ranawe

Ehut i no kamautim bainat, em “i go ausait [“long hul,” NW ] na em i pasim ol dua na lokim na em i wokabaut i go. Ol wokman [bilong Eklon] i kam na ol i lukim ol dua i pas i stap, na ol i ting olsem, ‘Ating king i go long smolhaus.’ ”​​—⁠Hetman 3:​23, 24.

Dispela “hul” em Ehut i ranawe long en, em wanem samting tru? Wanpela buk i tok: “Yumi no save long mining tru [bilong dispela tok Hibru],” tasol “ol i ting em i makim ‘wanpela veranda,’ o ‘liklik rum samting’ ” Olsem wanem? Ehut i lokim dua long insait na bihain em i lusim haus long narapela rot? O em i lokim dua long ausait wantaim ki em i bin kisim long king i dai pinis? Bihain em i wokabaut i kam ausait long hap bilong ol gad na mekim olsem i no gat wanpela samting i bin kamap? Baibel i no tokaut long dispela samting. Tasol maski Ehut i mekim wanem samting, ol wokman bilong Eklon i no saspek hariap long wanpela samting taim ol i lukim ol dua i lok. Ol i ting tasol olsem king “i go long smolhaus.”

Taim ol wokman bilong king i wet i stap, Ehut i ranawe pinis. Orait nau em i singautim ol wanples bilong em na i tok: “Yupela bihainim mi. Bikpela i givim pinis ol birua bilong yupela, ol Moap, long han bilong yupela. Bai yupela i winim ol.” Ol soldia bilong Ehut i pasim rot na ol Moap i no ken brukim wara Jordan, na long dispela rot ol Moap em ol i no gat lida, ol i no inap ranawe i go long ples bilong ol. Olsem na “long dispela taim ol Israel i kilim i dai samting olsem 10,000 strongpela soldia bilong Moap. I no gat wanpela i ranawe. Ol Israel i winim ol Moap long dispela de. Na bihain, ol Israel i no gat pait moa inap long 80 yia.”​​—⁠Hetman 3:​25-​30.

Dispela i Skulim Yumi Long Wanem Samting?

Ol samting i kamap long taim bilong Ehut i skulim yumi olsem ol bikpela hevi i kamap sapos yumi mekim ol samting i no stret long ai bilong Jehova. Tasol Jehova i save helpim ol man i tanim bel na kam long em.

Tasol i no olsem Ehut i smatpela man o ol birua i no gat save na wok bilong em i kamap gutpela, nogat. Ol samting God i tingting pinis long mekim bai kamap maski ol man i mekim wanem. Nambawan bikpela samting na wok bilong Ehut i kamap gutpela em olsem: Taim Ehut i mekim ol samting i stret wantaim laik bilong God bilong kisim bek lain bilong Em, God i bin helpim em. God i makim Ehut, na long “olgeta taim Bikpela i makim wanpela hetman bilong lukautim ol Israel, em i save sambai long dispela hetman inap em i dai.”​​—⁠Hetman 2:​18; 3:​15.