Yu Laik i Stap Laip Oltaim Oltaim?

WANPELA lapun meri long Japan i tok: “Mi no pret long dai. Tasol mi bel hevi long lusim ol dispela plaua.” Wanpela meri Kristen i save autim tok i bin go lukim dispela lapun, em i harim na pilim tru dispela tok, long wanem, dispela lapun i gat wanpela naispela gaden plaua. Planti man husat i tok ol i no pret long i dai ol i laikim tru ol gutpela gutpela samting God i bin wokim na ating ol i laik i stap oltaim.

Tasol planti man i no laikim dispela tingting bilong i stap oltaim. Sampela man i tok bai ol i no amamas long i stap oltaim. Bilong wanem ol i no laik i stap oltaim?

Laip Oltaim​—⁠I Gat Amamas o Nogat?

Sampela i ting ol bai les long i stap oltaim. Ating ol i tingim i stap bilong planti manmeri long nau em ol i ritaia long wok na ol i no gat planti samting long mekim​—⁠ol i sindaun na lukluk long TV tasol long olgeta de. Sapos yu pilim olsem, orait tingim tok saveman Robert Jastrow i mekim taim ol i askim em long laip oltaim em i wanpela blesing o em wanpela samting nogut. Jastrow i tok: “Em bai wanpela blesing long ol man husat i laik save long kain kain samting na oltaim ol i gat bikpela laik long lain long ol samting. Dispela tingting olsem ol bai stap oltaim na kisim save long ol samting i mekim gut bel bilong ol. Tasol ol narapela husat i no laik lain long ol nupela samting na tingting bilong ol i pas, laip oltaim em samting nogut tru long ol. Ol i no save ol bai mekim wanem long taim bilong ol.”

Tingting na pasin bilong yu inap mekim na yu bai pilim les long i stap oltaim o yu bai amamas long stap oltaim. Sapos yu gat pasin bilong ‘laik save long kain kain samting na yu gat bikpela laik long lain long ol samting,’ tingim ol samting yu inap mekim olsem penim ol piksa samting, mekim musik, wokim haus samting, wokim gaden, o ol narapela gutpela samting yu amamas long mekim. Laip oltaim long graun bai opim rot long yu ken mekim save bilong yu i go bikpela long ol samting yu amamas long mekim.

Sapos yumi inap long laikim ol narapela i go inap oltaim na ol narapela i laikim yumi, dispela bai mekim na yumi amamas long i stap oltaim. Taim God i bin wokim yumi, em inapim yumi long laikim ol narapela na yumi amamas taim ol narapela i laikim yumi. Taim yumi laikim tru narapela, dispela i givim bikpela amamas tru long yumi na dispela amamas i no inap pinis. Laip oltaim bai mekim na olgeta taim bai yumi wok long kisim pasin bilong laikim ol narapela na moa yet bai yumi wok long kisim pasin bilong laikim God. Aposel Pol i tok: “Sapos wanpela man i givim bel bilong em long God, orait God i save tru long dispela man.” (1 Korin 8:⁠3) Em wanpela gutpela samting tru​—⁠yumi ken save long King bilong heven na graun na em i ken save long yumi! Na tu, bai i no gat pinis bilong kisim save long gutpela Man Bilong Wokim yumi. Em nau, taim yumi tingim ol dispela samting, bai yumi amamas long i stap oltaim​—⁠bai yumi no les, nogat.

Laip​—⁠Sotpela na Gutpela Tru

Sampela i pilim olsem laip i sotpela na dispela i mekim laip i gutpela tru. Ating ol bai skelim laip wantaim gol, long wanem, gol i no stap long olgeta hap. Sapos gol i stap long olgeta hap, ol i tok olsem prais bilong en bai i go daun. Maski i olsem, gol bai i stap yet olsem wanpela naispela samting. Na dispela i wankain tu long laip.

Yumi ken skelim laip oltaim wantaim planti win. Tingim wanpela man i daiv i go insait long solwara na em i no inap kam antap gen bilong pulim win, em bai i tingim win olsem wanpela gutpela samting tru, a? Taim em i kisim helpim na em i lusim solwara, yu ting em bai les na toktok planti long kisim gen planti win? Nogat a?

Olsem dispela man i stap insait long solwara inap kisim helpim, yumi tu inap kisim helpim, tasol i no long stap laip inap sampela yia moa na em tasol, nogat, yumi inap i stap laip oltaim. Aposel Pol i tok: “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Long rot bilong ofa bilong Jisas, God bai rausim sin na indai long ol manmeri na givim laip oltaim olsem presen long ol man i bihainim tok. Yumi mas tenkyu tru long dispela gutpela samting God i mekim bilong yumi!

Olsem Wanem Long Ol Famili na Ol Pren?

Ating sampela bai tok: ‘Olsem wanem long ol famili o pren bilong mi? Laip oltaim long graun bai no gat as bilong en sapos ol i no i stap wantaim mi.’ Ating yu bin kisim save long Baibel na yu bin lainim olsem yumi inap kisim laip oltaim long Paradais long graun. (Luk 23:​43, NW; Jon 3:​16; 17:⁠3) Em pasin bilong yumi ol manmeri, yumi laik ol wanfamili bilong yumi, ol wanblut, na ol gutpela pren i mas i stap, bai ol i ken kisim wankain amamas em yumi wet long kisim long nupela graun i gat stretpela pasin long en em God i promis long kamapim.​—⁠2 Pita 3:⁠13.

Tasol olsem wanem sapos ol pren na famili bilong yu i no gat laik long i stap oltaim long Paradais long graun? Yu no ken larim dispela i daunim yu. Wok yet long kisim stretpela save long Baibel, na bihainim ol tok bilong en. Aposel Pol i tok: “Yu meri, bai yu inap helpim man bilong yu na em i kamap Kristen, o nogat, em yu no save. Na yu man, bai yu inap helpim meri bilong yu na em i kamap Kristen, o nogat, em yu no save tu.” (1 Korin 7:16) Ol manmeri inap senis. Olsem: Wanpela man bipo em i birua long lotu Kristen tasol em i senisim dispela pasin na bihain em i kamap wanpela elda long kongrigesen Kristen. Em i tok: “Mi tenkyu tru olsem famili bilong mi ol i bin stap strong na bihainim ol stiatok bilong Baibel long ol dispela yia mi bin birua long ol.”

God i tingim tru laip bilong yu na laip bilong ol famili na pren bilong yu. Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:⁠9) God Jehova i laik bai yu na ol famili bilong yu i stap oltaim. Pasin laikim bilong em i winim pasin laikim bilong yumi ol man i gat sin. (Aisaia 49:15) Olsem na i gutpela long yu wok nau long kisim pasin bilong pas gut wantaim God, a? Long dispela rot yu inap helpim ol famili bilong yu long mekim wankain samting. Maski sapos nau ol i no gat tingting long i stap oltaim, ating ol inap senisim tingting taim ol i lukim yu i bihainim ol stretpela save bilong Baibel yu lainim.

Olsem wanem sapos wanpela long famili bilong yu i dai pinis? Long planti milion manmeri i bin i dai, Baibel i tok long ol bai kirap bek na stap long Paradais long graun. Jisas Krais i tok promis olsem: “Taim i laik kamap na olgeta manmeri i stap long matmat . . . ol bai i lusim matmat na i kam ausait.” (Jon 5:​28, 29) Na ol lain husat i no bin save long God na ol i dai ol bai i kirap bek, long wanem, Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Bai yumi amamas tru long lukim ol i kirap bek!

Laip Oltaim—⁠Gutpela Samting Yumi Wetim

Sapos yu amamas na yu stap bel isi long nau maski i gat planti hevi long graun, bai yu amamas long i stap oltaim long graun i kamap Paradais. Long taim wanpela Witnes Bilong Jehova i stori long ol blesing bai kamap taim yumi stap oltaim, wanpela meri i tok: “Mi no laik i stap oltaim. Yumi stap 70 o 80 yia em inap long mi.” Wanpela Kristen elda i stap long dispela taim i askim em: “Sampela taim yu bin tingting long ol pikinini bilong yu bai pilim olsem wanem sapos yu dai?” Aiwara i pundaun taim em i tingim bel hevi ol bai kisim taim mama bilong ol i dai. Dispela meri i tok: “Em namba wan taim, mi luksave olsem mi bin tingim mi yet tasol, na mi inap luksave olsem laip oltaim em i no samting bilong ol wan wan man, nogat, em i makim tu pasin bilong yumi long pas gut wantaim ol narapela.”

Sampela i pilim olsem em i no bikpela samting sapos ol i stap laip o ol i dai. Tasol em i bikpela samting long Man Bilong Givim Laip long yumi. Em i tok: “Mi save stap oltaim, na tru tumas mi no save amamas long taim ol man bilong mekim sin, ol i dai. Mi save amamas long ol dispela man i givim baksait long pasin bilong sin na ol i stap gut.” (Esekiel 33:11) God i tingim laip bilong ol man nogut, so yumi ken save em i tingim moa yet laip bilong ol man i laikim em.

King Devit bilong Israel bilong bipo i bilip olsem Jehova i tingim tru laip bilong em. Devit i tok: “Maski papa na mama i givim baksait long mi, Bikpela bai i lukautim mi.” (Song 27:10) Devit i save papamama bilong em i laikim em. Tasol maski sapos papamama​—⁠ol lain em i pas gut wantaim ol​—⁠i givim baksait long em, Devit i save olsem God i no inap givim baksait long em. Jehova i laikim na tingim yumi, olsem na em i laik givim yumi laip oltaim, na em i laik yumi stap pren bilong em inap oltaim oltaim. (Jems 2:23) Dispela i mas kirapim yumi long tenkyu na amamas long kisim ol dispela gutpela presen.

[Piksa long pes 7]

Pasin bilong yumi long laikim God na ol narapela bai mekim na laip oltaim i gat as bilong en