Askim

Lo 14:21 i tok: “Yupela i no ken kaikai ol abus i [bin] dai nating.” Olsem wanem? Dispela tok i pait wantaim tok bilong Wok Pris 11:​39, 40, olsem: “Sapos wanpela bilong ol dispela animal i dai nating, na . . . wanpela man i kaikai hap mit bilong dispela abus . . . , orait em i mas wasim klos bilong en. Tasol bai em yet i stap doti inap san i go daun”?

Tok bilong tupela skripsa i no pait wantaim. Namba wan skripsa i kolim gen dispela lo i tambuim pasin bilong kaikai mit bilong animal i bin dai pinis, ating ol wel abus samting i bin kilim i dai. (Kisim Bek 22:31; Wok Pris 22:⁠8) Namba tu skripsa i stori long samting wanpela Israel inap mekim sapos em i bin brukim dispela lo, ating em i popaia na mekim.

Tru Lo i tambuim sampela samting, tasol sampela taim man bai brukim dispela Lo. Olsem: I gat ol lo i tambuim pasin stil, kilim man i dai, mekim tok giaman long kot samting, na ol narapela pasin. Long wankain taim, i gat ol strafe em man i mas kisim taim em i brukim ol dispela lo God i givim. Ol kain strafe man i mas kisim em i strongim ol dispela lo na i kamapim olsem em i bikpela rong sapos man i brukim ol dispela lo.

Man i brukim dispela tambu na i kaikai mit bilong abus i bin dai pinis, dispela man i mas bihainim gut ol lo bilong mekim man i kamap klin. Sapos em i no bihainim stret pasin bilong mekim em i kamap klin, orait “em i mas karim hevi bilong pasin bilong en.”​—⁠Wok Pris 17:​15, 16.