Wanem Kain Ediukesen Inap Mekim Laip Bilong Yu i Kamap Gutpela?

OLSEM WANEM? Sampela taim planti hevi i painim yu na i olsem strongpela tait bilong wara i pulim yu i go daun insait long wara? Tingim bikpela pen na hevi inap kamap sapos yu laik stretim wanpela hevi na yu popaia long mekim! Pasin bilong stretim gut ol hevi na tingim stret olgeta samting yumi mas mekim, em i no stap long skin bilong yumi taim mama i karim yumi. Long dispela as, ediukesen em i wanpela bikpela samting yumi mas kisim. Tasol olsem wanem yu ken kisim kain ediukesen em inap helpim yu long karim o stretim ol hevi i save kamap?

Planti manmeri​—⁠ol yangpela na lapun​—⁠ol i ting pasin bilong kisim bikpela skul i bikpela samting tru. Sampela saveman i tok ol i “bilip tru olsem yu no inap painim wanpela gutpela wok mani sapos yu no bin kisim digri long yunivesiti.” Tasol i gat sampela samting yumi mas i gat na yumi no inap kisim long rot bilong winim bikpela skul. Olsem: Yu ting bikpela skul inap helpim yu long kamap gutpela papa o mama, gutpela poroman marit, o gutpela pren? Ol man i litimapim nem bilong ol manmeri i bin winim bikpela skul o holim gutpela wok, tasol sampela inap kisim ol pasin i no gutpela, o famili bilong ol i no stap amamas, o ol i kilim ol yet i dai.

Sampela i bilip olsem lotu em inap soim rot long ol, olsem em rot bilong kisim ediukesen, tasol bihain ol i bel hevi, long wanem, lotu i no bin helpim ol long karim ol hevi. Emiliaa bilong Meksiko i tok: “Inap 15 yia i go pinis, mi pilim olsem mitupela man bilong mi i no inap moa long sindaun wantaim. Oltaim mitupela i save tok pait. Mi no inap helpim em long lusim dring. Planti taim mi mas lusim ol liklik pikinini bilong mipela long haus na mi go painim man bilong mi. Bel bilong mi i bagarap na mi no gat strong moa. Sampela taim mi go long lotu na bai mi ken painim rot bilong stretim dispela hevi. Tru, wan wan taim ol i kamapim hap tok bilong Baibel, tasol mi no harim sampela gutpela tok i stret tru long hevi bilong mi, na i no gat wanpela man i kam na tokim mi long ol samting mi ken mekim. Pasin bilong sindaun long haus lotu na kolim kolim sampela beten i no helpim mi.” Ating sampela i bel hevi taim ol i lukim ol pris pasto bilong ol yet i lusim stretpela pasin. Olsem na planti i no bilip moa olsem lotu em i gutpela rot bilong kisim ediukesen bilong helpim sindaun bilong ol i kamap gutpela.

Olsem na yu ken askim yu yet: ‘Mi mas kisim wanem kain ediukesen na bai i stap bilong mi i gutpela?’ Lotu Kristen tru i gat bekim bilong dispela bikpela askim? Bai yumi toktok long dispela samting long stori i kamap bihain long dispela.

[Futnot]