Pe Bilong Baim Bek Man i Litimapim Stretpela Pasin Bilong God
BIHAIN long Adam na Iv i mekim pasin bikhet, Jehova i tokaut long laik bilong em long givim wanpela Pikinini em birua bai kaikaim lek bilong em. (Stat 3:15) Dispela tok i kamap tru taim ol birua bilong God i wokim rot na Jisas i dai long diwai. (Galesia 3:13, 16) Jisas i no gat sin, long wanem, long rot bilong wanpela mirakel, holi spirit i mekim na em i kamap long bel bilong wanpela meri husat i no bin stap yet wantaim wanpela man. Taim em i dai na blut bilong em i kapsait, dispela blut inap kamap olsem pe bilong baim bek ol man, em ol i bin kisim sin na dai long rot bilong Adam.—Rom 5:12, 19.
I no gat wanpela samting inap pasim Jehova, em God i Gat Olgeta Strong, long mekim ol samting em i tingting pinis long mekim. Olsem na taim Adam i mekim sin, long ai bilong Jehova i olsem pe bilong baim bek man i stap pinis. Dispela i mekim na Jehova inap mekim sampela wok wantaim ol man i bilip long truim bilong ol tok promis bilong em. Olsem na ol tumbuna pikinini bilong Adam—ol tu i sinman—olsem Enok, Noa, na Abraham, ol tu inap wokabaut wantaim God na stap pren bilong em, na dispela i no daunim pasin holi bilong Jehova.—Stat 5:23, 24; 6:9; Jems 2:23.
Sampela man em ol i bilip long Jehova, ol i bin mekim ol bikpela rong. King Devit em i wanpela bilong ol. Ating yu laik save olsem: ‘Bilong wanem Jehova i mekim gut yet long King Devit bihain long Devit i mekim pasin pamuk wantaim Batseba na stretim rot na ol i kilim i dai Uria, em man bilong Batseba?’ Wanpela bikpela samting em olsem Devit i bilip na em i bin tanim bel tru. (2 Samuel 11:1-17; 12:1-14) God i tingim pe bilong baim bek man, em Jisas Krais bai givim, olsem na em i lusim rong bilong Devit na dispela i no daunim stretpela pasin bilong God. (Song 32:1, 2) Bilong strongim dispela tok, Baibel i stori long nambawan gutpela samting em pe bilong baim bek man i mekim, olsem “God i soim yumi olsem em yet i stretpela olgeta” long wanem, em i lusim rong bilong ol man long bipo na long nau tu.—Rom 3:25, 26.
Yes, blut bilong Jisas i opim rot na ol gutpela samting inap painim ol man. Long rot bilong dispela pe bilong baim bek man, ol man i tanim bel ol inap pas gut wantaim God. Na tu, dispela pe i opim rot na ol man i dai pinis ol inap kirap bek na kisim laip long nupela taim God bai kamapim. Dispela i makim ol gutpela wokboi bilong God em ol i dai paslain long Jisas i givim dispela pe, na tu, ol man em ol i no bin kisim stretpela save na ol i no bin lotuim God. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Long dispela taim, pe bilong baim bek man bai opim rot na Jehova bai givim laip oltaim long olgeta man i bihainim tok bilong em. (Jon 3:36) Jisas yet i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Dispela pe bilong baim bek man, em God i bin stretim rot bilong en, dispela tasol i as na olgeta dispela gutpela samting bai painim ol man.
Tasol bikpela samting tru long dispela pe bilong baim bek man, em i no ol gutpela samting yumi kisim long en, nogat. Bikpela samting moa yet em samting dispela pe i mekim long nem bilong Jehova. Dispela pe i kamapim klia olsem Jehova em i God bilong stretpela pasin, na em inap mekim ol samting wantaim ol sinman, tasol dispela i no daunim pasin holi bilong em. Sapos God i no bin tingting long givim dispela pe bilong baim bek man, bai i no gat rot long wanpela tumbuna pikinini bilong Adam, olsem Enok, Noa, na Abraham, ol i ken wokabaut wantaim Jehova o stap pren bilong em, nogat. Man bilong raitim song i luksave long dispela na em i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Yumi mas tenkyu tru long Jehova long em i bin salim dispela gutpela Pikinini bilong em i kam long graun, na yumi mas tenkyu tru long Jisas long em i bin redi long givim laip bilong em olsem pe bilong baim bek yumi!—Mak 10:45.