Yu Bilip Tru Olsem Satan i Stap?
BAIBEL i soim yumi olsem Satan em i wanpela man tru. Yumi ol man bilong graun i no inap lukim em, olsem yumi no inap lukim God. Baibel i tok “God em i Spirit.” (Jon 4:24) Satan em i wanpela spirit, olsem na yumi no inap lukim em long ai bilong yumi. Tasol Satan i no wankain olsem Man Bilong Wokim olgeta samting, long wanem, i gat man i bin wokim em.
Long bipo bipo yet, taim God Jehova i no wokim yet ol man, em i bin wokim planti milion ensel. (Jop 38:4, 7) Baibel i tok ol ensel ol i spirit. (Hibru 1:13, 14) God i wokim olgeta ensel i nambawan olgeta—i no gat wanpela i ensel nogut o i gat sampela pasin nogut long em. Sapos olsem, orait Satan i bin kamap olsem wanem? Long tok ples ol i bin raitim Baibel long en long pastaim, insait bilong nem Satan, em ‘Birua’ na man bilong sutim tok giaman long narapela man bilong bagarapim gutnem bilong em. I kain olsem wanpela man pastaim em i gutpela man, tasol bihain em i kirap stilim ol samting na em i mekim em yet i kamap stilman, na olsem tasol wanpela pikinini spirit bilong God i nambawan olgeta em i kisim laik nogut long bel na em i kirap mekim dispela samting, na nau em i kamap Satan. Baibel i stori long ol samting i mekim na man i kamap man nogut, olsem: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, em i olsem meri i kisim bel, na bihain em i save kamapim sin, olsem meri i karim pikinini. Na taim sin i kamap bikpela, em i save kamapim dai.”—Jems 1:14, 15.
Em nau, kain samting olsem i bin kamap. Taim God Jehova i wokim namba wan man na meri, Adam na Iv, dispela ensel i laik bikhet long God em i lukluk i stap. Em i save Jehova i bin tokim Adam na Iv long kamapim planti pikinini na bai ol stretpela manmeri i lotuim Man Bilong Wokim olgeta samting ol i ken pulap long graun. (Stat 1:28) Dispela ensel i lukim olsem i gat rot na bai em i ken kisim biknem olsem man i gat namba. Pasin mangal i kirapim em na em i laik kisim samting i bilong God tasol—em i laik bai ol man bilong graun i lotuim em. Ensel hia i no sakim dispela laik nogut i kamap long bel bilong em, nogat; em i larim i kamap strong long bel na nau dispela laik i kirapim em long mekim tok giaman na bikhet long God. Tingim samting em i bin mekim.
Dispela bikhet ensel i mekim wok long wanpela snek bilong toktok wantaim namba wan meri, Iv. Snek i askim Iv: “Ating God i tambuim yutupela long kaikai pikinini bilong olgeta diwai bilong gaden, a?” Iv i tokim em long tok bilong God na strafe em na Adam bai kisim sapos ol i bikhet long dispela tok, na nau snek i tok: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:1-5) I olsem em i tok God i no bin tok tru long Adam na Iv, na sapos Iv i kaikai pikinini bilong dispela diwai, em bai kamap wankain olsem God na bai em yet inap makim wanem samting i gutpela na wanem samting i nogut. Dispela em i namba wan tok giaman i bin kamap. Taim ensel i mekim dispela tok giaman, em i kamap man bilong krungutim gutnem bilong narapela man. Na tu, em i kamap birua bilong God. Baibel i kamapim klia dispela birua bilong God olsem “dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ ”—KTH 12:9.
“Was Gut”
Dispela tok giaman Satan i mekim long Iv i kamapim tru samting Satan i bin tingim. Baibel i tok: “Meri i lukim dispela diwai i naispela tru na i gat ol gutpela pikinini tru bilong kaikai i stap long en. Na meri i tingting olsem, ‘I gutpela long mi kaikai pikinini bilong dispela diwai na mi kisim olkain gutpela save.’ Olsem na meri i kisim pikinini bilong dispela diwai na i kaikai. Na em i givim sampela long man bilong em, na man tu i kaikai.” (Stat 3:6) Iv i bilipim tok bilong Satan na em i sakim tok bilong God. Em i pulim Adam tu long brukim lo bilong God. Olsem na Satan i kirapim Adam na Iv long bihainim rot bilong bikhet long God. Kirap long dispela taim na i kam inap nau, Satan i bin stiaim ol wok samting bilong ol man, maski ol i no inap lukim em. Em i gat wanem bikpela laik? Em i laik pulim olgeta man na bai ol i no ken lotuim God tru, nogat, ol i mas lotuim em wanpela tasol. (Matyu 4:8, 9) Olsem na i gat as na Baibel i tok lukaut olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
Em nau, Baibel i kamapim klia tru olsem Satan em i wanpela man olsem spirit i stap tru—em wanpela ensel i kamap man nogut na i laik bagarapim ol man! Namba wan bikpela samting yumi mas mekim bilong was gut long em, i olsem: Yumi mas save em i stap tru tru. Tasol bilong redi na was gut oltaim, yumi mas mekim sampela samting moa. Yumi mas save tu long “pasin” bilong Satan na ol samting em i save mekim bilong giamanim ol man. (2 Korin 2:11) Orait wanem ol pasin trik bilong em? Na olsem wanem yumi ken sanap strong na sakim em?
Satan i Save Long Samting Ol Man i Mas i Gat
Kirap long taim God i bin wokim ol man, Satan i wok long skelim ol man. Em i save long pasin bilong ol man—ol samting ol i mas i gat, na ol samting ol i laik mekim, na ol laik bilong bel. Satan i save pinis, taim God i wokim man em i putim laik bilong mekim lotu long bel bilong man na Satan i mekim wok long dispela laik bilong helpim em yet. Em i mekim olsem wanem? Long rot bilong ol lotu, em i skulim ol man long tok giaman. (Jon 8:44) Planti tok ol lotu i mekim long God i save pait wantaim na i paulim tingting bilong ol man. Yu ting dispela i helpim laik bilong husat? Sapos ol tok bilong lotu i pait wantaim, yumi save i no olgeta tok bilong ol i tru. Olsem na yumi ken ting, planti tok bilong lotu em Satan yet i kamapim, na em i mekim wok long en bilong paulim ol man. Baibel i kolim em olsem “giaman god bilong dispela graun” i bin pasim tingting bilong ol man.—2 Korin 4:4.
Ol tok i tru bilong God i save lukautim yumi na bai ol tok giaman bilong lotu i no ken paulim yumi. Baibel i tok piksa long tok i tru bilong God i kain olsem bikpela let ol soldia bilong bipo i bin pasim bilong lukautim hap bilong bel. (Efesus 6:14) Sapos yu kisim save long Baibel na putim ol tok bilong en long bel bilong yu olsem yu pasim let long bel, orait Tok Bilong God bai lukautim yu na bai ol tok giaman na tok kranki bilong lotu i no ken paulim yu.
Dispela laik bilong lotu i stap long bel bilong ol man, i bin kirapim ol long traim ol samting ol i no save long en. Dispela i mekim na nau Satan i gat narapela rot long giamanim ol. Em i save ol man i gat laik long kisim save long ol samting i narapela kain na ol samting i stap hait, olsem na long rot bilong ol kain kain wok bilong ol spirit nogut em i pulim planti man na ol i stap aninit long strong bilong em. Olsem man bilong painim abus i save putim gutpela trap bilong kisim abus, Satan tu i save mekim wok long olkain pasin olsem kisim save long ol samting bai painim man long bihain, ol kain kain marila, posin, pasin sanguma, wok bilong ol glasman, na ol samting olsem bilong pulim ol man long olgeta hap i go insait long umben bilong em.—Wok Pris 19:31; Song 119:110.
Orait yu ken mekim wanem na bai ol wok bilong ol spirit nogut i no ken kalabusim yu olsem umben? Lo 18:10-12 i tok: “Yupela i no ken kilim pikinini bilong yupela na kukim long paia antap long ol alta. Na yupela i no ken . . . mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut. Long dispela as tasol na em bai i rausim ol dispela lain pipel long dispela kantri long taim yupela i kam klostu.”
Tok bilong Baibel i klia tru: Yu no ken mekim olkain pasin na wok bilong ol spirit nogut. Tasol olsem wanem sapos yu bin mekim sampela pasin olsem na nau yu laik lusim olgeta? Yu ken bihainim pasin bilong ol Kristen bilong taun Efesus long bipo. Baibel i tok, taim ol i kisim tok bilong Jehova na bilip long en, ‘planti i bin wokim ol kain kain marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia long ai bilong olgeta manmeri.’ Ol dispela buk i gat bikpela pe, inap olsem 50,000 mani silva. (Aposel 19:19, 20) Tasol ol Kristen long Efesus i kukim ol dispela buk long paia.
Satan i Mekim Wok Long Ol Pasin Kranki Bilong Man
Wanpela ensel i nambawan olgeta em i bin kamap Satan, long wanem, em i no daunim laik bilong em long kisim biknem. Na tu, em i kirapim Iv long kisim pasin antap na strongpela laik long kamap wankain olsem God. Long nau Satan i save kirapim planti man long kisim pasin antap na pasin hambak. Olsem: Sampela i ting ol i winim ol man bilong ol narapela kala skin, lain o kantri. Tasol dispela i narapela kain tru long tok bilong Baibel! (Aposel 10:34, 35) Baibel i tokaut klia olsem: “Long wanpela tumbuna tasol [God] i bin mekim olgeta lain manmeri i kamap.”—Aposel 17:26.
Pasin daun em wanpela gutpela samting bilong helpim yumi long sakim pasin antap em pasin Satan i laik kirapim yumi long mekim. Baibel i tok yumi “no ken ting save na pasin bilong [yumi] i winim ol arapela.” (Rom 12:3) Na Baibel i tok: “God i save daunim ol man bilong litimapim nem bilong ol yet, tasol em i save marimari na mekim gut long ol man i daunim ol yet.” (Jems 4:6) Wanpela gutpela rot tru bilong sakim ol dispela pasin bilong Satan, em bilong mekim pasin daun na ol narapela pasin God i save laikim.
Na Satan i strong tu long mekim wok long pasin bilong ol man long larim ol laik nogut bilong skin i pulim ol. God Jehova i laik bai ol man i kisim amamas long i stap bilong ol. Taim yumi inapim ol laik bilong skin long pasin i stret wantaim laik bilong God, yumi save stap amamas tru. Tasol Satan i laik kirapim ol man long inapim ol laik bilong skin long rot bilong pasin pamuk samting. (1 Korin 6:9, 10) Tasol mobeta yumi putim tingting i go long ol samting i klin na i stret. (Filipai 4:8) Dispela bai helpim yumi long bosim strong ol tingting na laik i save kamap long bel.
Wok Long Sakim Satan
Yu inap tru long sakim Satan? Yes, yu inap. Baibel i tok: “Yupela i mas sakim Satan, na em bai i lusim yupela na ranawe.” (Jems 4:7) Tru, maski yu sakim Satan, em i no inap les kwik na lusim pasin bilong givim hevi long yu taim yu wok long kisim save long God, nogat. Em bai “wetim narapela taim” long traim yu. (Luk 4:13) Tasol yu no ken pret long Satan. Sapos yu wok long sakim em, em i no inap pulim yu long lusim trupela God.
Tasol bilong sakim Satan, yumi mas kisim save long em i husat tru na olsem wanem em i save giamanim ol man, na yu mas save tu long ol samting yu mas mekim bilong sakim ol pasin trik bilong em. Yumi inap kisim dispela stretpela save long Baibel, em Tok Bilong God. Olsem na yu mas strong long stadi long Baibel, na bihainim gut ol tok yu lainim. Ol Witnes Bilong Jehova long hap bilong yu bai amamas long helpim yu long mekim kain stadi olsem long taim i stret long yu, na i no gat pe bilong en. Plis toksave long ol o raitim pas i go long ol lain bilong wokim dispela nius.
Taim yu kirap stadi long Baibel yu mas save, ating Satan bai kirapim sampela long birua long yu o mekim nogut long yu na bai yu lusim pasin bilong kisim save long tok i tru bilong Baibel. Ating sampela long famili bai kros, long wanem, yu save stadi long Baibel. Ating ol bai mekim olsem, long wanem, ol i no save long ol gutpela tok i tru i stap long Baibel. Na ating sampela man bai tok bilas long yu. Tasol sapos yu larim ol i pretim yu na yu lusim stadi, yu ting God bai amamas long dispela? Satan i laik mekim na bai yu bel hevi na lusim pasin bilong kisim save long God tru. Tasol yu no ken larim Satan i win. (Matyu 10:34-39) Yu no gat dinau long em long wanpela samting, nogat tru. Tasol yu gat bikpela dinau tru long Jehova, em i bin givim laip long yu na yu stap. Olsem na yu mas strong long sakim Satan na mekim ‘Jehova i belgut tru.’—Sindaun 27:11.
[Piksa long pes 6]
Ol manmeri i kamap Kristen ol i kisim ol buk bilong ol i toktok long marila posin samting na kukim long paia
[Piksa long pes 7]
Tingting strong long stadi long Baibel