Armagedon—Dispela Graun Bai Pinis?
ARMAGEDON! Olsem wanem? Dispela tok i save kirapim yu long tingim wanpela bagarap em bikpela lain manmeri bai i dai long en o skai na graun bai paia? I gat wan wan tok tasol bilong Baibel em ol man i save toktok long en, na “Armagedon” em i wanpela bilong ol dispela tok we long planti hap bilong graun ol man i save toktok long en. Ol man i save yusim dispela tok bilong stori long ol samting nogut tru bai painim ol man. Ol muvi na televisen i stori long “Armagedon,” na ol i kirapim ol man long tingim olsem ol samting nogut tru bai kamap. Armagedon em i wanpela tok ol man i no kliagut long en. Ol man i gat kain kain tingting long mining tru bilong dispela tok, tasol planti bilong ol dispela tingting i no stret wantaim ol tok bilong Baibel—em buk i kamapim dispela tok.
Taim Baibel i stori long Armagedon, em i yusim dispela hap tok olsem “dispela graun i laik pinis,” olsem na em i bikpela samting long yumi mas kliagut long mining tru bilong dispela tok. (Matyu 24:3) Na i stret long yumi mas skelim Tok Bilong God—em as bilong tok i tru—bilong kisim save long Armagedon i makim wanem samting, na em bai mekim wanem long yu na famili bilong yu.
Taim yumi skelim Tok Bilong God, yumi bai kisim save olsem Armagedon i no makim olsem graun bai bagarap na pinis olgeta, nogat. Em bai kirapim wanpela gutpela taim bilong ol manmeri em ol i laik i stap gut long wanpela taim i gat stretpela pasin tasol long en. Yu bai kliagut long dispela tok bilong Baibel taim yu skelim sampela tok moa long mining tru bilong Armagedon long stori i kamap bihain long dispela.
[Blok/Piksa long pes 3]
YU TING ARMAGEDON EM WANEM SAMTING?
• Wanpela bikpela pait nuklia
• Graun, win, na wara i bagarap
• Graun i bam wantaim wanpela sta samting
• God i bagarapim ol man nogut