Ol Gutpela Amamas Bilong Givim Nupela Strong
“Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”—1 KORIN 10:31.
1, 2. Bilong wanem yumi ken ting ol amamas i “presen God i givim yumi”? Baibel i mekim wanem tok lukaut?
YUMI ol man i gat laik long mekim ol samting yumi kisim amamas long en. God bilong yumi, Jehova, em God bilong amamas, na em i laik bai yumi kisim amamas long i stap bilong yumi. Olsem na em i kamapim planti samting yumi ken kisim amamas long en. (1 Timoti 1:11; 6:17) Saveman King Solomon i tok: “Mi save i gat wanpela pasin i win tru. Dispela pasin i olsem. Yumi mas amamas . . . Na tu yumi mas kaikai na dring na amamas long olgeta samting yumi mekim. Dispela i olsem presen God i givim yumi.”—Saveman 3:12, 13.
2 Pasin bilong amamas long tingim ol gutpela wok yumi bin mekim i givim nupela strong long yumi, na moa yet taim yumi mekim olsem wantaim famili o ol pren. I stret yumi ting kain amamas olsem em i “presen God i givim yumi.” Tasol maski God i bin givim planti gutpela presen olsem long yumi, dispela i no makim olsem yumi ken tingting long painim amamas tasol na yumi no bosim gut skin. Baibel i no orait long pasin bilong dring spak, kaikai planti tumas, na pasin pamuk. Baibel i tok ol man i mekim ol dispela kain pasin ol “bai i no inap i go insait long kingdom bilong God.”—1 Korin 6:9, 10; Sindaun 23:20, 21; 1 Pita 4:1-4.
3. Wanem samting bai helpim yumi long was i stap long ol samting bilong spirit na tingim bikpela de bilong Jehova?
3 Nau long dispela taim nogut bilong las de, winim olgeta taim bipo, ol Kristen i gat hatwok long bihainim savetingting namel long ol man nogut na ol i no ken kirap bihainim pasin bilong ol. (Jon 17:15, 16) Olsem Baibel i tok profet long en, ol manmeri long nau ol i “laikim tumas ol kain kain pasin bilong amamas bilong dispela graun, na ol bai i no laikim God,” olsem na ol i “stap olsem tasol” na i no tingim olsem “bikpela hevi tru” i klostu pinis. (2 Timoti 3:4, 5; Matyu 24:21, 37-39) Jisas i mekim tok lukaut long ol disaipel bilong em: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus.” (Luk 21:34, 35) Yumi ol wokman bilong God, yumi tingting strong long bihainim dispela tok lukaut bilong Jisas. Yumi no olsem ol man nogut bilong dispela graun, nogat, yumi wok strong bambai yumi was i stap long ol samting bilong spirit na tingim de bilong Jehova.—Sefanaia 3:8; Luk 21:36.
4. (a) Bilong wanem i hatwok long painim ol gutpela amamas? (b) Yumi laik bihainim wanem tok i stap long Efesus 5:15, 16?
4 I hatwok long abrusim ol pasin nogut bilong dispela graun, long wanem, Satan i mekim na ol dispela pasin i pulim laik bilong yumi na i isi long insait long en. Na i hatwok moa long abrusim ol pasin nogut taim yumi laik painim amamas. Planti amamas bilong dispela graun i bilong inapim “olgeta laik nogut bilong olpela bel.” (1 Pita 2:11) Ol amamas nogut i stap long ol pablik ples, tasol tu, ol inap i kam insait long haus bilong yumi long rot bilong ol buk na nius, TV, Intenet, na ol vidio. Olsem na Baibel i mekim gutpela tok long ol Kristen: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” (Efesus 5:15, 16) Sapos yumi bihainim gut dispela tok, long dispela rot tasol ol amamas nogut i no inap pulim yumi, o kisim bikpela haptaim bilong yumi, o bagarapim pasin bilong yumi long stap gut wantaim Jehova, em dispela samting bai mekim na yumi bai bagarap!—Jems 1:14, 15.
5. Wanem samting i givim nambawan gutpela amamas long yumi?
5 Yumi Kristen i gat planti wok bilong mekim, olsem na sampela taim yumi pilim olsem yumi mas kisim amamas. Saveman 3:4 i tok, i gat “taim bilong lap” na “taim bilong singsing.” Olsem na Baibel i tok, amamas i gutpela samting. Tasol amamas i mas givim nupela strong long yumi, em i no ken bagarapim yumi long ol samting bilong spirit o pasim yumi long mekim ol wok bilong spirit. Ol strongpela Kristen i save olsem yumi kisim bikpela amamas taim yumi givim ol samting. Ol i putim wok bilong mekim laik bilong Jehova i stap nambawan long laip bilong ol na ol i kisim “malolo” taim ol i daun long tok bilong Jisas.—Matyu 11:29, 30; Aposel 20:35.
Makim Gutpela Amamas
6, 7. Wanem samting inap helpim yu long wokim tingting long wanem kain amamas i stret o i no stret?
6 Olsem wanem yumi ken save sapos wanpela kain amamas i stret long ol Kristen i ken mekim? Ol papamama i stiaim pikinini bilong ol, na ol elda tu i ken helpim ol. Tasol i no olsem ol narapela i mas tokim yumi long wanem buk, piksa wokabaut, vidio gem, danis, o singsing i no stret. Pol i tok “ol man i kamap bikpela pinis . . . ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” (Hibru 5:14; 1 Korin 14:20) Baibel i gat ol tok bilong stiaim yumi. Maus bilong bel bilong yu, em Baibel i skulim pinis, bai helpim yu sapos yu larim em i stiaim yu.—1 Timoti 1:19.
7 Jisas i tok “ol man i save lukim kaikai pastaim, na ol i save, diwai em i gutpela o em i nogut.” (Matyu 12:33) Sapos amamas i kamapim kaikai nogut, olsem pasin bilong laikim pait na bagarapim man, pasin pamuk, o wok bilong ol spirit nogut, yumi mas sakim kain amamas olsem. Na i no stret long insait long ol amamas em laip o helt bilong yumi inap kisim bagarap long en, o sapos em i givim hevi bilong mani long yumi o i mekim yumi bel hevi, o sapos em i pundaunim ol narapela. Aposel Pol i mekim tok lukaut long yumi olsem sapos yumi bagarapim maus bilong bel bilong brata bilong yumi, yumi mekim sin. Pol i tok: “Sapos yupela i mekim dispela sin long ol na bagarapim bilip [“maus bilong bel,” NW] bilong ol, long dispela pasin yupela i mekim sin long Krais. Olsem na sapos kaikai i save mekim brata bilong mi i pundaun long sin, orait mi no inap tru kaikai mit gen long laip bilong mi. Nogut mi mekim brata bilong mi i pundaun long sin.”—1 Korin 8:12, 13.
8. Olsem wanem ol vidio gem na vidio samting inap bagarapim yumi?
8 Ol stua i pulap long ol vidio gem na vidio na DVD samting. Sampela inap givim gutpela amamas na malolo long yumi, tasol planti gem na vidio i stori long ol samting Baibel i no orait long en. Yumi no ken ting em i gutpela amamas sapos gem i kirapim ol man i pilai long bagarapim skin o kilim i dai narapela o mekim pasin pamuk samting! Jehova i nolaik tru long “ol man bilong pait.” (Sindaun 3:31; Song 11:5; Kolosi 3:5, 6) Na sapos gem i kirapim yu long mangal o belhat, o i bagarapim bel isi bilong yu, o i westim bikpela haptaim bilong yu, orait yu mas luksave olsem em i bagarapim yu long ol samting bilong spirit na yu mas stretim hariap dispela samting.—Matyu 18:8, 9.
Rot Bilong Kisim Ol Gutpela Amamas
9, 10. Ol lain i bihainim savetingting ol inap mekim wanem bilong painim amamas?
9 Sampela taim ol Kristen i save tok: “Wanem kain amamas i gutpela? Planti amamas bilong graun i no stret wantaim ol lo bilong Baibel.” Yu ken save olsem yu inap painim ol gutpela amamas, tasol yu mas hatwok liklik long painim. Yu mas skelim na tingting gut pastaim, na moa yet ol papamama i mas mekim olsem. Planti i painim gutpela amamas insait long famili na kongrigesen. Pasin bilong kaikai wantaim na stori long wanpela tok bilong Baibel o long ol samting i bin kamap long dispela de, em i gutpela samting na i strongim narapela narapela. Yupela i ken go piknik wantaim, mekim ol gutpela pilai, o go raun long nambis o long ol wara. Kain gutpela amamas olsem inap mekim man i belgut na i kisim nupela strong.
10 Wanpela elda na meri bilong em husat i bin mekim bikpela long 3-pela pikinini, ol i tok: “Kirap long taim ol pikinini i liklik yet, ol inap kamapim tingting bilong ol long wanem hap mipela bai i go malolo long en. Sampela taim mipela i larim wan wan pikinini long singautim wanpela gutpela pren i kam wantaim mipela, na dispela i mekim na mipela i amamas moa. Mipela i mekim ol samting bilong tingim ol bikpela samting i kamap long laip bilong ol pikinini. Sampela taim mipela i singautim wanpela famili na ol pren long kongrigesen i kam long haus bilong mipela. Mipela i kuk ausait na pilai wantaim. Mipela i raun long ka na wokabaut long hap bilong ol maunten, na long kain taim olsem mipela i kisim save long ol samting Jehova i bin wokim.”
11, 12. (a) Yu ken mekim wanem bambai ol narapela i ken insait long ol amamas yu tingting long mekim? (b) Planti i no inap lusim tingting long wanem kain bung?
11 Olsem wanem? Yu o famili bilong yu inap singautim ol narapela long insait long ol amamas yupela i tingting long mekim? I gat wok long strongim bel bilong sampela, olsem meri wanpis, man o meri singel, o famili i gat papa o mama tasol. (Luk 14:12-14) Ating yu ken singautim tu ol lain em ol i bin kirap nau tasol long bung wantaim yumi, tasol yu mas was gut, nogut ol i gat sampela pasin inap bagarapim ol narapela. (2 Timoti 2:20, 21) Sapos ol sikman i hatwok long lusim haus, ating yumi ken stretim rot long karim kaikai i go long haus bilong ol na kaikai wantaim ol.—Hibru 13:1, 2.
12 Planti ol i no inap lusim tingting long ol bung we ol man i kaikai wantaim, harim stori long olsem wanem ol narapela i bin kamap Kristen, na wanem samting i bin helpim ol long stap gut long God. Yumi ken stori long sampela tok bilong Baibel, na singautim olgeta, ol pikinini tu, long kamapim tingting bilong ol. Ol kain toktok olsem inap strongim olgeta na i no gat wanpela i sem o pilim olsem em i no gat gutpela save.
13. Olsem wanem Jisas na Pol i stap gutpela piksa long pasin bilong mekim gut long ol narapela na amamas long i go long haus bilong ol?
13 Jisas i stap gutpela piksa long pasin bilong mekim gut long ol narapela na amamas long i go long haus bilong ol. Long ol kain taim olsem em i givim ol gutpela samting bilong spirit long ol man. (Luk 5:27-39; 10:42; 19:1-10; 24:28-32) Ol disaipel bilong em long bipo i bihainim pasin bilong em. (Aposel 2:46, 47) Aposel Pol i tok: “Mi laikim tumas long lukim yupela, long wanem, mi laik givim sampela presen bilong Holi Spirit long yupela bilong strongim yupela. Tingting bilong mi i olsem. Mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.” (Rom 1:11, 12) Na olsem tasol, ol bung bilong yumi i mas kirapim narapela long strongim narapela.—Rom 12:13; 15:1, 2.
Ol Tok Bilong Tingim na Ol Tok Lukaut
14. Bilong wanem i no gutpela long mekim ol bikpela bung?
14 I no gutpela long mekim ol bikpela bung, long wanem, i hatwok long bosim ol kain bung olsem. Long taim i no gat sampela wok Kristen bilong mekim, sampela famili i ken pasim tok long piknik wantaim o pilai wanpela gem i no gat pasin bilong resis tumas insait long en. Taim sampela elda, kongrigesen sevan, o ol arapela strongpela Kristen i stap long bung, ol inap helpim bung long kamap gutpela na dispela inap givim moa yet nupela strong long ol lain i bung.
15. Bilong wanem papa bilong bung i mas stretim rot na i gat man bilong bosim bung?
15 Ol papa bilong bung i mas stretim rot na bai i gat man bilong bosim bung. Tru, yu amamas long singautim ol man i kam, tasol bai yu bel hevi stret sapos yu kisim save olsem samting i bin kamap long haus bilong yu i bin pundaunim wanpela, long wanem, i no gat man i bin bosim gut bung. Tingim stiatok i stap long Lo 22:8. Man Israel husat i wokim nupela haus em i mas wokim banis arere long rup, em ples we ol i sindaun wantaim ol man ol i bin singautim i kam. Bilong wanem ol i mas wokim banis? Long wanem, ‘sapos wanpela man i kapsait na i pundaun long graun na i dai bai ol i no gat asua.’ Na olsem tasol, ol samting yu mekim—tasol no ken putim ol strongpela lo tumas—bilong lukautim ol man yu bin singautim long wanpela bung i mas soim olsem yu no laik ol i kisim bagarap long skin o long ol samting bilong spirit.
16. Ol papa bilong bung i mas mekim wanem sapos ol i putim alkohol bilong ol man i ken kisim?
16 Sapos papa bilong bung i putim alkohol bilong ol man i ken kisim, em i mas was gut tru. Planti papa bilong bung em ol i Kristen, ol i putim tasol alkohol sapos ol yet inap bosim wanem kain dring ol man i kisim o hamas dring ol i kisim. Ol i no ken larim ol man i kisim samting em inap pundaunim ol narapela o pulim sampela long dring planti tumas. (Efesus 5:18, 19) I gat kain kain as na sampela inap ting i gutpela moa long ol i no dring alkohol long wanpela bung. Long planti kantri lo i makim man i mas i gat hamas krismas na em i ken kisim alkohol, na ol Kristen i mas bihainim lo bilong gavman maski ol i ting dispela lo i strong tumas.—Rom 13:5.
17. (a) Sapos ol i pilai musik long wanpela bung, bilong wanem papa bilong bung i mas skelim gut musik? (b) Sapos danis i kamap long bung, wanem kain danis i no stret?
17 Papa bilong bung i mas bosim gut ol samting na bai musik, danis, o ol arapela amamas i stret wantaim ol stiatok Kristen. Ol man i save laikim narapela narapela kain musik, na i gat kain kain musik bilong harim. Tasol planti musik bilong nau i kirapim ol man long bikhet, mekim pasin pamuk, na pait na bagarapim man. Olsem na yumi mas skelim gut musik yumi harim. I no olsem ol naispela musik i no krai strong, ol tasol i gutpela musik bilong harim, nogat, tasol yumi no ken harim musik i save kirapim bel na volium bilong en i go antap na musik i pairap strong. Yu no ken larim wanpela husat i save laik putim volium bilong musik i go antap, i makim wanem kain musik bai kamap long bung. Na danis i gat pasin bilong meknaisim strong bodi bilong kirapim bel bilong narapela i no stret long ol Kristen i mekim.—1 Timoti 2:8-10.
18. Olsem wanem papamama inap lukautim pikinini bilong ol long rot bilong skelim ol bung pikinini bai go long en?
18 Ol papamama Kristen i mas kisim save long wanem ol samting bai kamap long bung em pikinini bilong ol bai i go long en, na ating planti taim i gutpela long ol i go wantaim pikinini. Sori tru, sampela papamama i bin larim pikinini bilong ol i go long ol bung i no gat man i bosim, na planti yangpela long bung i bin insait long pasin pamuk o sampela narapela pasin i no stret. (Efesus 6:1-4) Maski ol yangpela i gat 18 krismas samting na ol i soim pinis olsem papamama inap trastim ol, i gat wok yet long helpim ol long “givim baksait long olgeta kain laik nogut i save kamap long bel bilong ol yangpela.”—2 Timoti 2:22.
19. Yumi mas tingim wanem samting na dispela bai helpim yumi long save long samting yumi mas painim pastaim?
19 Sapos sampela taim yumi painim gutpela amamas i givim nupela strong long yumi, dispela inap mekim na yumi kisim bikpela amamas moa long i stap bilong yumi. Jehova i no tambuim yumi long kisim dispela samting, tasol yumi save ol amamas tasol i no helpim yumi long bungim ol gutpela samting long heven. (Matyu 6:19-21) Jisas i helpim ol disaipel bilong em long save olsem pasin bilong painim Kingdom pastaim na stretpela pasin bilong God i nambawan bikpela samting. Yumi no ken ting kaikai o dring o klos i nambawan bikpela samting, em ol samting “ol haiden i save wari long painim.”—Matyu 6:31-34.
20. Ol gutpela wokman bilong Jehova i ken wet long kisim wanem ol gutpela samting long Man Bilong Givim ol samting?
20 Yes, maski yumi ‘kaikai na dring o mekim narapela samting,’ yumi ken mekim “dispela olgeta samting bilong givim biknem long God,” na tok tenkyu long Man Bilong Givim ol gutpela samting yumi ken amamas long en inap long skel. (1 Korin 10:31) Long Paradais klostu nau God bai kamapim, bai i gat planti rot bilong yumi ken amamas long ol samting Jehova i givim, na bung wantaim ol man i bihainim ol stretpela lo bilong em.—Song 145:16; Aisaia 25:6; 2 Korin 7:1.
Yu Tingim Yet?
• Bilong wanem i hatwok long ol Kristen i painim ol gutpela amamas long nau?
• Wanem sampela amamas i bin helpim ol famili Kristen long i stap belgut?
• Taim yumi painim gutpela amamas, yumi mas tingim wanem ol tok na tok lukaut?
[Piksa long pes 18]
Painim ol amamas i kamapim gutpela kaikai
[Ol Piksa long pes 19]
Ol Kristen i mas sakim wanem kain amamas?