Wanpela Rot Tasol Bilong Stretim!

WANPELA man nem bilong en Lasarus, na tupela susa bilong em Marta na Maria, ol i sindaun long Betani, em wanpela taun i stap longwe long Jerusalem inap 3-pela kilomita. Wanpela taim pren bilong ol, Jisas, i stap long narapela hap na bikpela sik i painim Lasarus. Tupela susa bilong em i wari tru long em. Ol i salim tok long Jisas. Jisas i harim dispela tok na bihain em i kirap i go bilong lukim Lasarus. Long rot em i tokim ol disaipel olsem Lasarus i slip na em i laik i go bilong kirapim em. Pastaim ol disaipel i no kisimgut tok bilong Jisas, tasol nau em i tok klia long ol olsem: “Lasarus i dai pinis.”​—Jon 11:​1-14.

Taim Jisas i kam kamap long matmat bilong Lasarus, pastaim em i tokim ol long rausim ston i pasim ai bilong matmat. Orait em i beten strong na bihain em i tok: “Lasarus, yu kam ausait.” Em nau, Lasarus i kam ausait. Dispela man i bin dai na stap long matmat inap 4-pela de, em i kirap bek pinis.​—Jon 11:​38-44.

Dispela stori bilong Lasarus i soim olsem kirap bek em rot tru bilong pinisim dai. Tasol dispela mirakel Jisas i bin mekim long kirapim bek Lasarus, yu ting em i bin kamap tru tru? Baibel i tok em i bin kamap tru. Ritim stori bilong en long Jon 11:​1-44, em i stori gut long ol samting i bin kamap. Yu inap tok dispela samting i no bin kamap tru? Sapos olsem, ating bai yu ting olgeta mirakel Baibel i stori long en, na dispela mirakel long Jisas Krais i bin kirap bek, ol i no bin kamap tru. Na Baibel i tok: “Sapos i tru God i no bin kirapim Krais, orait bilip bilong yupela i no inap helpim yupela.” (1 Korin 15:17) Dispela bilip long kirap bek em wanpela as bilip bilong Baibel. (Hibru 6:​1, 2) Tasol wanem mining bilong dispela tok “kirap bek”?

Wanem Mining Bilong Tok “Kirap Bek”?

Long Ol Skripsa Grik bilong Baibel ol i bin raitim pastaim, dispela tok “kirap bek” i stap winim 40 taim. Ol i kisim dispela tok long wanpela tok Grik i makim olsem “kirap sanap gen.” Long tok Hibru dispela tok i makim “kirapim bek ol man i dai pinis.” Tasol taim man i dai pinis, wanem samting i kirap bek? Bodi yet i no inap, long wanem, em i save sting na tanim i kamap graun gen. Tasol taim man i kirap bek, em i kisim bek olgeta pasin bilong em, na tingting bilong em long olgeta samting em i bin mekim bipo, na olgeta samting i bin makim dispela man yet.

Tingting bilong God Jehova i nambawan olgeta, olsem na em i no hatwok long tingim olgeta samting bilong ol manmeri i dai pinis. (Aisaia 40:26) Jehova yet i As bilong laip, olsem na em inap kirapim bek man yet long wanpela nupela bodi em i wokim. (Song 36:9) Na Baibel i tok, God Jehova i “laikim tumas” long kirapim bek ol man i dai pinis. (Jop 14:​14, 15) Em nau, yumi ken amamas tru long Jehova inap kirapim bek man i dai pinis, na tu, em i gat laik tru long mekim olsem!

Jisas Krais tu i gat bikpela wok long kirapim bek ol man i dai pinis. Inap wanpela yia samting bihain long taim em i kirapim wok bilong em long autim tok, em i tok: “Papa i save kirapim bek ol man i dai pinis na i givim laip long ol. Na olsem tasol Pikinini tu i save givim laip long ol man long laik bilong em yet.” (Jon 5:21) Samting i bin painim Lasarus i soim yumi olsem Jisas Krais i gat strong long kirapim bek ol man i dai pinis, na em i gat laik tu long mekim olsem.

Orait olsem wanem long dispela tingting olsem wanpela samting insait long bodi i save stap laip yet taim yumi dai? Dispela bilip long ol man i dai pinis ol bai kirap bek, na tingting bilong planti lain olsem yumi gat wanpela spirit i no save dai, tupela bilip i pait wantaim. Sapos i gat samting insait long bodi na em i stap laip yet long taim yumi dai, bai God i no gat wok long kirapim bek ol man i dai pinis, a? Susa bilong Lasarus, em Marta, em i no bilip olsem taim brata bilong em i dai em i stap laip yet long wanpela ples spirit, nogat. Marta i bilip long kirap bek. Taim Jisas i tokim em: “Brata bilong yu bai i kirap bek,” Marta i tok: “Mi save, em bai i kirap bek long las de, long dispela taim olgeta manmeri bai i kirap bek.” (Jon 11:​23, 24) Na taim Lasarus i kirap bek, em i no stori long sampela samting em i bin mekim bihain long taim em i dai, nogat. Em i dai pinis. Baibel i tok: “Ol man i dai pinis, ol i no inap save long wanpela samting. . . . Bai [ol] no inap mekim wok o tingting o kisim gutpela tingting na save long ples bilong ol man i dai pinis [matmat], dispela ples bai [ol] go long en.”​—Saveman 9:​4, 5, 10.

Olsem na Baibel i tok, i gat wanpela rot tasol bilong stretim dispela hevi bilong dai​—em kirap bek long matmat. Tasol i gat planti milion milion man i bin dai, olsem na husat bai kirap bek? Na ol bai i stap we?

Husat Bai Kirap Bek?

Jisas i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Olsem dispela tok promis i tok, ol man i stap long matmat​—em ol man i stap long tingting bilong Jehova​—ol bai kirap bek. Orait yumi laik save, husat ol i stap long tingting bilong God na ol i wetim taim bilong kirap bek long matmat?

Buk Hibru sapta 11 long Baibel i gat lista bilong nem bilong ol man na meri husat i bin stap gut long mekim wok bilong God. Ol dispela lain wantaim ol wokman bilong God i bin stap gut long em na ol i dai nau long taim bilong yumi, ol bai kirap bek. Orait olsem wanem long ol manmeri i no bin bihainim ol stretpela lo bilong God, long wanem, ating ol i no gat save long ol dispela lo? Ol tu i stap long tingting bilong God o olsem wanem? Yes, planti bilong dispela lain i stap long tingting bilong God, long wanem, Baibel i tok promis olsem: “God bai i kirapim bek ol man i dai pinis, em ol stretpela man na ol man nogut wantaim.”​—Aposel 24:15.

Tasol i no olgeta man i bin i stap laip ol bai kirap bek, nogat. Baibel i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin. Nogat. Bai yumi pret nogut tru na wetim de bilong bikpela kot.” (Hibru 10:​26, 27) Sampela i bin mekim ol sin God i no inap lusim tingting long en. Ol i no stap long Hades (matmat), ol i stap long Gehena (em Buk Baibel i tanim olsem hel). Geheha em tok piksa long man i bagarap na i pinis olgeta, inap oltaim oltaim. (Matyu 23:33) Tasol yumi mas was gut, nogut yumi wok long skelim skelim olsem wanpela man bai kirap bek o nogat. Em wok bilong God yet long skelim husat man bai kirap bek o nogat. Em i save long husat i stap long Hades na husat i stap long Gehena. I gutpela long yumi wokabaut stret wantaim laik bilong God.

Husat Bai Kirap Bek na Stap Long Heven?

Kirap bek bilong Jisas Krais i narapela kain tru. Baibel i tok: “Long graun em i stap man, na ol i kilim em i dai, tasol em i kirap bek na em i stap spirit long heven.” (1 Pita 3:18) Bipo i no gat wanpela man i bin kirap bek olsem spirit. Jisas yet i tok: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Tru tumas, Pikinini bilong man, Jisas, em i namba wan man i bin kirap bek olsem wanpela spirit. (Aposel 26:23) Na bihain long em i gat sampela moa husat i mekim olsem. Baibel i tok: “Yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek.”​—1 Korin 15:23.

Wanpela liklik lain​—em ‘lain bilong Krais’​—ol bai kirap bek na i stap long heven bilong mekim wanpela bikpela wok. (Rom 6:5) Ol bai i stap king wantaim Krais na “bosim ol manmeri bilong graun.” (KTH 5:​9, 10) Na tu, ol bai i stap pris, olsem ol bai insait long wok bilong rausim ol samting nogut bilong sin em ol man i bin kisim long namba wan man Adam. (Rom 5:12) Dispela lain i wok wantaim Krais olsem king na pris, ol inap olsem 144,000. (KTH 14:​1, 3) Taim ol i kirap bek, ol i kisim wanem kain bodi? Baibel i tok ol i kisim “bodi bilong heven.” Dispela i mekim na ol inap i stap laip long heven.​—1 Korin 15:​35, 38, 42-45.

Dispela lain bilong i go long heven i kirap bek long wanem taim? Long 1 Korin 15:​23, Baibel i tok, “taim [Krais] i kam bek.” Ol samting i kamap long graun kirap long 1914 i kamapim klia olsem Krais i kam i stap long dispela yia, na tu, taim bilong las de bilong dispela graun i bin kirap long dispela yia. (Matyu 24:​3-7) Olsem na i gat as na yumi ken tok, wok bilong kirapim bek ol gutpela Kristen i bilong i go long heven, em i kirap pinis, tasol ol man bilong graun i no inap lukim. Dispela i makim olsem ol aposel na ol Kristen bilong pastaim ol i kirap bek pinis na i go long heven. Orait, olsem wanem long ol Kristen i stap yet long nau na ol i wet long kamap king wantaim Krais long heven, olsem God i bin givim tingting long ol? Taim ol i dai, “wantu tasol” ol bai kirap bek. (1 Korin 15:52) Baibel i kolim kirap bek bilong liklik lain 144,000 olsem ‘kirap bek bilong namba wan taim,’ long wanem, em i kamap paslain long kirap bek bilong bikpela lain manmeri em ol bai kirap bek na kisim laip long graun.​—KTH 20:6; Filipai 3:11.

Husat Bai Kirap Bek na Stap Long Graun?

Baibel i soim yumi olsem, klostu olgeta manmeri i dai pinis ol bai kirap bek na stap long graun. (Song 37:29; Matyu 6:10) Aposel Jon i stori long samting olsem driman em i kisim long ol manmeri i dai pinis ol i kirap bek, na em i tok: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go. Na man i sindaun long sia king em i lukim pasin olgeta wan wan man i bin mekim, na em i skelim ol long kot bilong en. Na bihain em i tromoi Dai wantaim Ples bilong ol man i dai pinis i go daun long dispela bikpela hul i gat paia. Dispela bikpela hul i gat paia em i namba 2 dai.” (KTH 20:​11-14) Ol manmeri i stap long Ples bilong ol man i dai pinis, olsem Hades, o Siol​—em matmat​—ol i stap long tingting bilong God. Olgeta wan wan bai i lusim kalabus bilong dai na kirap bek. (Song 16:10; Aposel 2:31) Na God bai skelim olgeta wan wan long pasin ol i mekim bihain long taim ol i kirap bek. Orait wanem samting bai painim Dai na Ples bilong ol man i dai pinis? Ol bai tromoi i go insait long “dispela bikpela hul i gat paia.” Em nau, dai ol man i bin kisim long Adam, em i no inap bagarapim ol moa.

Ol lain i gat wanpela long famili i dai pinis ol i ken amamas tru long tok promis bilong God long ol man i dai pinis ol bai kirap bek! Taim Jisas i kirapim bek pikinini man bilong wanpela meri bilong ples Nain, em man bilong em i dai pinis na em i gat dispela wanpela pikinini tasol, ating meri i amamas nogut tru! (Luk 7:​11-17) Na Jisas i bin kirapim bek wanpela pikinini meri i gat 12-pela krismas, na Baibel i tok papamama bilong em i amamas na “i kirap nogut tru.” (Mak 5:​21-24, 35-42; Luk 8:​40-42, 49-56) Long nupela taim God bai kamapim, bai yumi amamas tru long lukim gen ol famili bilong yumi i dai pinis na i kirap bek.

Taim yumi save pinis long dispela tok i tru olsem ol man i dai pinis ol bai kirap bek, dispela inap mekim wanem long yumi long nau? Buk The World Book Encyclopedia i tok: “Klostu olgeta man i save pret long dai, na ol i no laik tingting long dispela samting.” Bilong wanem? Long wanem, planti man i no save, dai em i wanem samting tru​—ol i ting em i samting bilong pret long en. Taim yumi save tru olsem ol man i dai pinis ol i stap olsem wanem, na yumi save ol bai kirap bek, dispela inap strongim tru bel bilong yumi sapos dispela “birua,” em dai, i laik painim yumi. (1 Korin 15:26) Na dispela save i mekim na taim wanpela gutpela pren o wanblut i dai, yumi inap karim dispela hevi.

Wanem taim ol lain bilong i stap long graun ol bai i kirap bek long matmat? Long nau pasin bilong pait, kros, kilim man i dai, bagarapim win na wara samting, i pulap tru long dispela graun. Sapos ol man i dai pinis ol i kirap bek long dispela graun i stap nogut olsem, amamas bilong ol bai stap liklik taim tasol, a? Tasol Man Bilong Wokim olgeta samting i tok promis olsem klostu nau em bai pinisim pasin nogut bilong dispela graun i stap aninit long Satan. (Sindaun 2:​21, 22; Daniel 2:44; 1 Jon 5:19) Samting God i tingting pinis long mekim long dispela graun, klostu nau em bai kamap tru. Orait long dispela nupela taim God bai kamapim na i gat bel isi tasol i stap long en, planti milion milion manmeri i dai pinis ol bai kirap bek na i stap laip gen.

[Piksa long pes 7]

Klostu olgeta manmeri i dai pinis ol bai kirap bek na i stap long graun