Tingting Long Ol Gutpela Samting Bilong Oganaisesen Bilong Jehova
“Long dispela haus bilong yu yet, planti gutpela samting i stap. Olsem na . . . mipela i save belgut tru.”—SONG 65:4.
1, 2. (a) Ol samting i kamap long tempel bai mekim wanem long lain bilong God? (b) Devit i mekim wanem bilong helpim wok bilong sanapim tempel?
DEVIT bilong lain Israel bilong bipo i wanpela gutpela man tru Ol Skripsa Hibru i stori long en. Dispela wasman bilong sipsip, man bilong mekim musik, profet, na king i bilip tru long God Jehova. Devit i pas gut tru wantaim Jehova na dispela i kirapim laik bilong em long wokim haus bilong God. Dispela haus, o tempel, bai kamap ples bilong mekim lotu i tru long Israel. Devit i save tempel na ol wok i kamap long en bai givim bikpela amamas na ol gutpela samting long lain bilong God. Olsem na Devit i singsing: “Ol man yu save makim na bringim i go long haus bilong yu, ol i ken amamas. Long dispela haus bilong yu yet, planti gutpela samting i stap. Olsem na taim mipela i stap long banis bilong yu, mipela i save belgut tru.”—Song 65:4.
2 Jehova i no larim Devit i bosim wok bilong sanapim haus bilong Jehova. Pikinini man bilong em, Solomon, i kisim dispela gutpela wok. Devit i no toktok planti taim narapela i kisim dispela gutpela wok em yet i gat laik tru long kisim, nogat. Em i ting nambawan bikpela samting em ol i mas wokim tempel. Em i givim bel long sapotim dispela wok na em i givim long Solomon ol plen bilong haus em i bin kisim long Jehova. Na tu, Devit i makim planti tausen Livai long mekim ol wok na em i givim planti gol na silva bilong wokim tempel.—1 Stori 17:1, 4, 11, 12; 23:3-6; 28:11, 12; 29:1-5.
3. Ol wokman bilong God i ting olsem wanem long ol wok ol i stretim bilong mekim lotu i tru?
3 Ol gutpela manmeri bilong lain Israel i sapotim ol wok bilong mekim lotu i tru long haus bilong God. Yumi ol wokman bilong Jehova long nau, yumi tu i sapotim ol wok ol i stretim bilong mekim lotu insait long oganaisesen bilong Jehova long graun. Long dispela rot yumi soim olsem yumi gat wankain tingting olsem bilong Devit. Yumi no save toktok planti. Nogat. Yumi save tingting long ol gutpela samting bilong oganaisesen bilong God. Olsem wanem? Sampela taim yu tingting long ol gutpela samting yumi ken amamas tru long en? Orait nau yumi ken tingim sampela.
Amamas Long Lain i Go Pas
4, 5. (a) Olsem wanem lain “wokboi i gat gutpela tingting” ol inapim wok bilong ol? (b) Sampela Witnes i ting olsem wanem long kaikai bilong spirit ol i save kisim?
4 I gat as tru na yumi ken amamas long “wokboi i gat gutpela tingting” em Jisas Krais i bin makim bilong lukautim ol samting bilong em hia long graun. Lain wokboi em ol Kristen God i bin makim i go pas long autim gutnius, stretim ol miting bilong mekim lotu, na wokim ol buk na nius bilong Baibel long winim 400 tok ples. Planti milion manmeri long olgeta hap i amamas long kisim dispela kaikai bilong spirit “long taim bikman i makim.” (Matyu 24:45-47) Tru tumas, i no gat as long toktok planti long dispela.
5 Inap planti yia, wanpela lapun Witnes Bilong Jehova, nem bilong em Elfi, i bin bihainim ol tok bilong Baibel i stap long ol buk na nius em wokboi i kamapim, na dispela i bin helpim em na mekim gut bel bilong em. Elfi i pilim tru dispela samting na i tok: “Bai mi mekim wanem sapos mi no stap insait long oganaisesen bilong Jehova?” Peter na Irmgard tu i bin mekim wok bilong God inap planti yia. Irmgard i tok tenkyu long olgeta buk na nius em “gutpela oganaisesen bilong Jehova” i wokim. Lain wokboi i wokim tu ol buk samting bilong ol man i gat sampela bagarap long skin, olsem ol man i no inap lukluk gut o harim gut.
6, 7. (a) Olsem wanem ‘gutpela wokboi’ i lukautim wok bilong ol kongrigesen long olgeta hap? (b) Sampela i tok wanem long oganaisesen bilong Jehova long graun?
6 Maus bilong ‘gutpela wokboi’ em Gavening Bodi Bilong Ol Witnes Bilong Jehova, em wanpela liklik lain man God i bin makim ol long holi spirit na ol i wok long hetkota bilong ol Witnes Bilong Jehova long Brooklyn, New York. Gavening Bodi i makim sampela strongpela wokman bilong Jehova long wok long ol brens ofis i lukautim wok bilong winim 98,000 kongrigesen long olgeta hap. Ol i makim ol man i winim ol mak Baibel i kolim long kamap elda na kongrigesen sevan insait long ol dispela kongrigesen. (1 Timoti 3:1-9, 12, 13) Ol elda i go pas long wok na ol i lukautim gut ol sipsip bilong God. Em i wanpela gutpela samting tru long stap insait long dispela lain sipsip na pilim pasin laikim na pasin wanbel i stap insait long lain “manmeri bilong God”!—1 Pita 2:17; 5:2, 3.
7 Planti ol i save mekim tok amamas long gutpela tok bilong God long stiaim ol em ol i bin kisim long ol elda, ol i no toktok planti long dispela. Olsem: Tingim Birgit, em wanpela meri Kristen i marit na i gat 35 krismas samting. Taim em i yangpela, em i bin raun wantaim ol poroman nogut na klostu em i mekim bikpela rong. Tasol gutpela tok bilong Baibel ol elda i bin givim long em na sapot em i bin kisim long ol wanbilip i helpim em long abrusim samting nogut em inap bagarapim em. Birgit i pilim olsem wanem long nau? Em i tok: “Mi amamas tru long mi stap yet insait long gutpela oganaisesen bilong Jehova.” Andreas, em wanpela yangpela i gat 17 krismas, em i tok: “Tru tru dispela em i oganaisesen bilong Jehova, em i nambawan gutpela oganaisesen i winim olgeta oganaisesen i stap long graun.” I stret yumi tenkyu tru long ol gutpela samting oganaisesen bilong Jehova long graun i mekim, a?
Ol Man i Go Pas i No Gutpela Olgeta
8, 9. Sampela man i bin stap long taim bilong Devit i bin mekim wanem? Devit i mekim wanem?
8 Ol man ol i bin makim bilong go pas long lotu i tru, ol i no gutpela olgeta. Olgeta i save popaia, na sampela i gat sampela pasin kranki ol i hatwok long bosim. Olsem wanem? I gat as na yumi mas bel hevi long dispela? Nogat. Sampela man bilong Israel long bipo em ol i holim bikpela wok, ol i bin mekim ol bikpela rong. Taim Devit i yangpela man yet, ol i askim em long pilai musik bilong mekim gut bel bilong King Sol husat i tingting planti i stap. Bihain, Sol i traim long kilim Devit i dai na Devit i mas ranawe bilong lukautim laip bilong em.—1 Samuel 16:14-23; 18:10-12; 19:18; 20:32, 33; 22:1-5.
9 Sampela narapela man bilong lain Israel i bikhet na mekim pasin giaman. Olsem: Komanda bilong ami bilong Devit, em Joap, em i kilim i dai wanblut bilong Sol, Apner. Apsalom i painim rot bilong kilim i dai papa bilong em, Devit, bilong kisim wok king. Na man bilong givim gutpela tingting long Devit, em Ahitofel, em i no stap gut long Devit. (2 Samuel 3:22-30; 15:1-17, 31; 16:15, 21) Tasol Devit i no bel nogut na toktok planti, na em i no givim baksait long lotu i tru. Nogat. Em i mekim narapela samting olgeta. Ol hevi i kirapim Devit long pas strong long Jehova na holimpas dispela gutpela tingting em i bin i gat taim em i ranawe long Sol. Long dispela taim, Devit i singsing: “God, yu mas marimari long mi. Mi go long yu na mi laik bai yu lukautim mi. Mi stap wantaim yu na mi stap gut, olsem ol pikinini kakaruk i save hait na stap gut aninit long wing bilong mama kakaruk. Mi laik i stap olsem tasol inap olgeta samting bilong bagarapim mi i pinis.”—Song 57:1.
10, 11. Wanem samting i bin painim Gertrud taim em i yangpela Kristen? Em i tok wanem long pasin kranki bilong ol wanbilip?
10 Yumi no gat wok long komplein na tok olsem pasin i no stret na pasin giaman i stap insait long oganaisesen bilong God long nau. Jehova, ol ensel bilong em, na ol wasman bilong kongrigesen i no larim ol man i gat kain pasin nogut olsem i stap insait long kongrigesen Kristen. Tasol yumi yet na ol arapela wokman bilong God i gat sin, na dispela i save putim hevi long yumi olgeta.
11 Gertrud i bin lotuim Jehova inap longpela taim pinis, na taim em i yangpela meri ol narapela i bin tok em i no wanpela Witnes tru na em i no meri bilong autim tok bilong Kingdom fultaim. Em i mekim wanem? Yu ting em i toktok planti long pasin ol narapela i mekim? Nogat. Paslain liklik long em i dai long 2003 taim em i gat 91 krismas, em i tingting bek long laip bilong em na i tok: “Dispela na ol narapela samting i bin painim mi bihain i bin lainim mi olsem maski ol narapela i save popaia, Jehova i save stiaim wok bilong em, na em i save mekim wok long yumi ol man i gat sin.” Taim pasin kranki bilong ol narapela wokman bilong God i putim hevi long em, Gertrud i beten strong long Jehova.
12. (a) Sampela Kristen long taim bilong ol aposel i mekim wanem pasin nogut? (b) Yumi mas putim tingting bilong yumi long wanem samting?
12 Ol gutpela Kristen i save givim bel tru long wok bilong God, ol i gat sin, olsem na taim wanpela wasman samting i popaia, gutpela sapos yumi ‘no toktok planti.’ (Filipai 2:14) Sori tru sapos yumi bihainim pasin nogut bilong sampela long kongrigesen Kristen long taim bilong ol aposel! Disaipel Jut i tok, ol tisa giaman bilong dispela taim i “givim baksait long wok bos bilong ol man i gat namba, na ol i tok nogut long ol man i gat biknem.” Na tu, ol dispela man i save “bel nogut long olgeta samting i kamap long ol, na ol i save toktok planti oltaim.” (Jut 8, 16; NW) Gutpela sapos yumi sakim pasin bilong ol man i save komplein tumas na yumi mas putim tingting bilong yumi long ol gutpela samting yumi kisim long rot bilong ‘gutpela wokboi.’ Yumi mas amamas long ol gutpela samting bilong oganaisesen bilong Jehova na ‘long olgeta samting yumi mekim, yumi no ken toktok planti.’
“Dispela Tok Em i Hevi Tumas”
13. Sampela i bin ting olsem wanem long tok Jisas Krais i skulim ol man long en?
13 Long taim bilong ol aposel sampela i toktok planti long ol wasman samting, na sampela i toktok planti long ol tok Jisas i skulim ol man long en. Long Jon 6:48-69, Jisas i tok: “Man i save kaikai bodi bilong mi na dringim blut bilong mi, em i gat laip i stap gut oltaim oltaim.” Taim ol disaipel i harim dispela tok, “planti bilong ol i tok olsem, ‘Dispela tok em i hevi tumas. Husat inap long harim?’ ” Jisas i save “ol disaipel bilong en i toktok planti long dispela tok.” Na tu, “planti disaipel bilong en i lusim em, na ol i go bek, na ol i no wokabaut moa wantaim em.” Tasol i no olgeta disaipel i toktok planti. Tingim samting i bin kamap taim Jisas i askim 12-pela aposel: “Ating yupela tu i laik lusim mi na i go?” Aposel Pita i tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.”
14, 15. (a) Bilong wanem sampela i no amamas long sampela bilip Kristen? (b) Stori bilong Emanuel i lainim yumi long wanem samting?
14 Long nau, sampela tasol insait long lain bilong God i no amamas long sampela bilip Kristen na ol i toktok planti long oganaisesen bilong Jehova long graun. Bilong wanem dispela samting i save kamap? Planti taim as bilong dispela em sampela i no kliagut long pasin bilong God long mekim ol samting. God i save kamapim klia isi isi tok i tru long lain bilong em. Olsem na sampela taim tingting bilong yumi long sampela tok bilong Baibel i senis liklik. Lain bilong Jehova i amamas long dispela, tasol sampela i “strong tumas long bihainim stretpela pasin” na ol i no amamas long ol dispela kain senis. (Saveman 7:16) Ating sampela i gat pasin antap, na sampela i kirap bihainim tingting bilong ol yet. Tasol maski wanem samting i kirapim ol long toktok planti, dispela pasin i samting nogut, long wanem, em inap pulim yumi i go insait gen long ol pasin nogut bilong dispela graun.
15 Olsem: Emanuel i wanpela Witnes na em i sutim tok long sampela samting em i ritim long ol buk bilong “wokboi i gat gutpela tingting.” (Matyu 24:45) Em i no ritim moa ol buk Kristen bilong yumi na bihain em i tokim ol elda bilong kongrigesen olsem em i no laik stap moa olsem wanpela Witnes Bilong Jehova. Tasol insait long sotpela haptaim tasol, Emanuel i luksave olsem ol tok oganaisesen bilong Jehova i lainim ol man long en i stretpela tok. Em i go lukim ol Witnes, tokaut long rong bilong em, na kongrigesen i kisim em bek, na nau em i amamas long stap gen olsem wanpela Witnes Bilong Jehova.
16. Wanem samting inap helpim yumi long daunim pasin bilong kisim tupela tingting long sampela bilip Kristen?
16 Olsem wanem sapos yumi laik toktok planti, long wanem, yumi gat tupela tingting long sampela tok oganaisesen bilong Jehova i lainim yumi long en? Yumi no ken les kwik. Ating bihain ‘gutpela wokboi’ bai kamapim sampela tok i bekim askim bilong yumi na i kliaim tingting bilong yumi. Em i gutpela long askim ol elda Kristen long helpim yumi. (Jut 22, 23) Pasin bilong beten, stadi, na bung wantaim ol wanbilip i strong long lotuim God inap helpim yumi long daunim pasin bilong tupela tingting, na inap helpim yumi long amamas moa long ol tok i tru bilong Baibel i save strongim bilip, em ol tok yumi bin lainim long rot Jehova i makim bilong givim tok long yumi.
Holimpas Gutpela Tingting
17, 18. Yumi no laik toktok planti, tasol yumi laik holimpas wanem tingting? Bilong wanem yumi laik mekim olsem?
17 Tru, ol man i no gutpela olgeta ol i save mekim sin, na ating sampela i gat pasin bilong komplein long ol samting i no gat as bilong en. (Stat 8:21; Rom 5:12) Tasol sapos yumi kisim pasin bilong toktok planti oltaim, pasin bilong yumi long pas gut wantaim God Jehova inap bagarap. Olsem na yumi mas bosim pasin bilong yumi na no ken toktok planti.
18 Yumi no laik toktok planti long ol samting bilong kongrigesen. Gutpela moa sapos yumi holimpas gutpela tingting na bisi long mekim wok, stap amamas, tingim wok bilong God, bihainim stretpela tingting, na stap strong long bilip. (1 Korin 15:58; Taitus 2:1-5) Jehova i save bosim olgeta samting i save kamap insait long oganaisesen bilong em, na Jisas i save long ol samting i kamap long olgeta wan wan kongrigesen, olsem em i bin save long taim bilong ol aposel. (KTH 1:10, 11) Stap isi na wet long God na Krais, em Het bilong kongrigesen. Ating ol gutpela wasman bai stretim ol samting i no stret.—Song 43:5; Kolosi 1:18; Taitus 1:5.
19. I go inap long taim Kingdom i kirap bosim olgeta samting bilong graun, yumi mas tingting long wanem samting?
19 Klostu nau pasin nogut bilong dispela graun bai pinis, na Kingdom Bilong Mesaia bai kirap bosim olgeta samting bilong graun. I go inap long dispela taim, em i bikpela samting long yumi olgeta wan wan i holimpas gutpela tingting! Dispela bai helpim yumi long luksave long ol gutpela pasin bilong ol wanbilip bilong yumi, na yumi no tingting long ol pasin kranki bilong ol. Pasin bilong tingting long ol gutpela pasin bilong ol bai mekim yumi stap amamas. Dispela bai strongim bel bilong yumi na strongim yumi long ol samting bilong spirit, tasol pasin bilong toktok planti bai bagarapim bel na pinisim strong bilong yumi.
20. Pasin bilong tingting long ol gutpela samting bai helpim yumi long kisim wanem ol gutpela samting?
20 Pasin bilong tingting long ol gutpela samting bai helpim yumi long tingim planti blesing yumi gat long nau, long wanem, yumi insait long oganaisesen bilong Jehova long graun. Dispela oganaisesen tasol i stap gut long King bilong heven na graun. Yu ting olsem wanem long gutpela wok yumi ken mekim bilong lotuim trupela God, Jehova? Gutpela sapos yu gat wankain tingting olsem Devit, em i tok: “Yu save harim beten bilong mipela. Olsem na mipela olgeta manmeri i mas i go long yu. Ol man yu save makim na bringim i go long haus bilong yu, ol i ken amamas. Long dispela haus bilong yu yet, planti gutpela samting i stap. Olsem na taim mipela i stap long banis bilong yu, mipela i save belgut tru.”—Song 65:2, 4.
Yu Inap Tingim?
• Bilong wanem yumi mas amamas long lain i go pas long kongrigesen?
• Yumi mas i gat wanem tingting taim ol brata i go pas ol i popaia?
• Yumi mas ting olsem wanem taim tingting bilong yumi long sampela tok bilong Baibel i senis liklik?
• Wanem samting inap helpim Kristen long daunim pasin bilong tupela tingting?
[Piksa long pes 20]
Devit i givim plen bilong tempel long Solomon na em i givim bel tru long sapotim lotu i tru
[Piksa long pes 23]
Ol elda Kristen i amamas long helpim ol arapela long ol samting bilong spirit