Yu Gat Wankain Tingting Olsem Jehova Long Ol Samting i Holi?

“Yupela i mas was gut, . . . Nogut wanpela man i bihainim pasin pamuk. Nogut wanpela man i givim baksait long God [“long ol samting i holi,” NW].”​—HIBRU 12:​15, 16.

1. Ol wokman bilong Jehova i no gat wanem kain tingting em planti man long nau i holim?

PASIN bilong ol manmeri long tingim ol samting i holi i wok long i go daun. Wanpela saveman long Frans bilong skelim sindaun bilong ol man, Edgar Morin, em i tok: “Olgeta samting i olsem as bilong ol stretpela pasin​—olsem God, wara na bikbus samting, asples, ol stori bilong bipo​—long nau ol man i gat tupela tingting long ol dispela samting. . . . Ol man yet i laik makim wanem ol pasin na tingting ol i laik bihainim.” Dispela i kamapim “spirit bilong dispela graun,” o “dispela strongpela spirit i wok yet insait long bel bilong ol man i save sakim tok bilong God.” (1 Korin 2:12; Efesus 2:2) Ol man i dediket pinis long Jehova na i amamas long daun long wok bos bilong em, ol i no gat dispela spirit bilong graun. (Rom 12:​1, 2) Ol wokman bilong God i save olsem pasin holi em i bikpela samting long wok bilong ol long lotuim Jehova. Wanem ol samting long laip bilong yumi i mas i stap holi? Dispela stadi bai skelim faipela samting em olgeta wokman bilong God i ting i holi. Stadi i kamap bihain long dispela bai skelim ol miting Kristen bilong yumi ol i samting holi. Tasol wanem mining bilong dispela tok “holi”?

2, 3. (a) Olsem wanem Baibel i kamapim klia pasin holi bilong Jehova? (b) Yumi mas mekim wanem bilong tingim olsem nem bilong Jehova i holi?

² Long tok ples Hibru bilong Baibel, dispela tok “holi” i makim olsem stap narapela kain. Long ol samting bilong lotu, tok “holi” i makim ol samting i no bilong ol man i mekim wok long en long olgeta de. Pasin holi bilong Jehova i win olgeta. Baibel i tok Jehova em i “gutpela na stretpela olgeta [“Man i Holi Tru,” NW].” (Sindaun 9:10; 30:3) Long Israel bilong bipo, hetpris i pasim medal gol long laplap bilong het bilong em na long dispela medal i gat tok olsem, “Pasin holi i bilong Jehova.” (Kisim Bek 28:​36, 37, NW) Baibel i stori long ol serap na serafim i raunim sia king bilong Jehova na i tokaut olsem: “Bikpela em i holi, em i holi, em i holi.” (Aisaia 6:​2, 3; KTH 4:​6-8) Pasin bilong kolim dispela tok tripela taim i kamapim klia olsem Jehova i holi na klin olgeta. Em i As bilong olgeta pasin holi.

³ Nem bilong Jehova em i holi. Man bilong raitim song i tok: “Olgeta manmeri . . . i mas litimapim biknem bilong en. Em God bilong mekim gutpela na stretpela pasin [“holi,” NW] olgeta.” (Song 99:3) Jisas i lainim yumi long beten olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Mama bilong Jisas, Maria, em i tok: “Bel bilong mi em i litimapim nem bilong Bikpela. God i gat bikpela strong, em i bin mekim narakain samting tru bilong helpim mi, na nem bilong en i stap holi.” (Luk 1:​46, 49) Yumi ol wokman bilong Jehova, yumi ting nem bilong em i holi na yumi no laik mekim wanpela samting em inap bagarapim dispela nem holi. Na tu, yumi gat wankain tingting olsem Jehova long ol samting i holi, olsem ol samting Jehova i ting i holi, yumi tu i ting ol dispela samting i holi.​—Amos 5:​14, 15.

As na Yumi Daun Tru Long Jisas

4. Bilong wanem Baibel i tok Jisas em i “Man Holi”?

⁴ Jisas em i “dispela wanpela Pikinini tasol” bilong God holi, Jehova, olsem na God i wokim Jisas i stap holi. (Jon 1:14; Kolosi 1:15; Hibru 1:​1-3) Long dispela as Baibel i tok em i “gutpela stretpela [“Man Holi,” NW] man God i bin makim bilong em yet.” (Jon 6:69) Em i stap holi yet taim God i kisim laip bilong em long heven na putim long graun, long wanem, holi spirit i mekim na Maria i karim Jisas. Wanpela ensel i tokim Maria: “Holi Spirit bai i kam long yu, . . . na dispela pikinini bihain bai yu karim, em bai i stap gutpela na stretpela [“holi,” NW] man bilong God, na ol bai i kolim em Pikinini Bilong God.” (Luk 1:35) Taim ol Kristen long Jerusalem i beten long Jehova, inap tupela taim ol i tok long Pikinini Bilong God olsem, “Jisas, wokman [“holi,” NW] bilong yu yet.”​—Aposel 4:​27, 30.

5. Jisas i mekim wanem wok holi long graun? Bilong wanem blut bilong em i dia tumas?

⁵ Jisas i gat wanpela wok holi bilong mekim taim em i stap long graun. Taim em i kisim baptais long 29 C.E., God i makim em long kamap Hetpris bilong bikpela tempel spirit bilong Jehova. (Luk 3:​21, 22; Hibru 7:26; 8:​1, 2) Na tu, em i mas i dai olsem wanpela ofa. Blut bilong em i kapsait olsem pe bilong baim bek ol sinman na bai God i ken kisim bek ol. (Matyu 20:28; Hibru 9:14) Olsem na yumi ting blut bilong Jisas em i samting holi, olsem “dia tumas.”​—1 Pita 1:19.

6. Yumi gat wanem kain tingting long Krais Jisas? Bilong wanem yumi ting olsem?

⁶ Bilong soim olsem yumi daun tru long King na Hetpris bilong yumi, Krais Jisas, aposel Pol i tok: “God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem. Em i givim dispela nem long Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.” (Filipai 2:​9-11) Yumi soim olsem yumi gat wankain tingting olsem Jehova long ol samting i holi taim yumi amamas long daun long Lida na King bilong yumi, Krais Jisas, em Het bilong kongrigesen Kristen.​—Matyu 23:10; Kolosi 1:18.

7. Olsem wanem yumi soim olsem yumi daun long Krais?

⁷ Pasin bilong daun long Krais i makim tu olsem yumi rispek long ol man em i yusim bilong go pas long wok em i bosim long nau. Wok bilong ol Kristen God i bin makim em ol i insait long lain Gavening Bodi, na ol wasman ol i makim long ol brens ofis, distrik, sekit, na ol kongrigesen, yumi mas ting wok bilong ol em i holi. Olsem na yumi mas rispek na daun tru long ol.​—Hibru 13:​7, 17.

Wanpela Lain Holi

8, 9. (a) Olsem wanem ol Israel i lain holi? (b) Olsem wanem Jehova i helpim lain Israel long save gut long pasin bilong stap holi?

⁸ Jehova i wokim kontrak wantaim lain Israel. Dispela samting i mekim na dispela nupela lain i gat nem. Ol i stap narapela kain. Jehova yet i tokim ol: “Yupela i mas . . . stap holi na bihainim gutpela na stretpela pasin bilong mi tasol, long wanem, mi yet mi holi na olgeta pasin bilong mi em i gutpela na stretpela olgeta. Na mi Bikpela, mi bin kisim yupela namel long ol arapela lain pipel, bai yupela i bilong mi tasol.”​—Wok Pris 19:2; 20:26.

⁹ Taim Jehova i kamapim lain Israel, em i helpim ol long save gut long pasin bilong stap holi. Ol i no ken holim maunten we God i bin givim Tenpela Lo long ol, sapos ol i holim, ol bai i dai. I olsem maunten Sainai i holi. (Kisim Bek 19:​12, 23) Wok pris, haus lotu sel, na ol samting i stap long en, ol dispela samting tu i holi. (Kisim Bek 30:​26-30) Olsem wanem long kongrigesen Kristen?

10, 11. Olsem wanem yumi ken tok kongrigesen bilong lain Kristen God i bin makim em i holi? Dispela i mekim wanem long ol “arapela sipsip”?

¹⁰ Kongrigesen bilong lain Kristen God i bin makim em i holi long ai bilong Jehova. (1 Korin 1:2) Dispela lain olgeta bilong ol Kristen God i bin makim, taim ol i stap long graun ol i olsem wanpela tempel holi, tasol ol i no bikpela tempel spirit bilong Jehova. Jehova i stap long dispela tempel long rot bilong holi spirit bilong em. Aposel Pol i tok: “Olgeta bun bilong dispela haus i pas long Krais, olsem na olgeta i pas gut wantaim. Na God i wokim yet dispela haus, na haus i laik kamap bikpela moa na i stap haus [“tempel holi,” NW] bilong Bikpela yet. Yupela tu i pas long Krais, na God i bungim yupela wantaim ol arapela manmeri bilong en, na yupela i kamap haus tru bilong God, bai em wantaim Holi Spirit i ken i stap long dispela haus.”​—Efesus 2:​21, 22; 1 Pita 2:​5, 9.

¹¹ Pol i tok moa long ol Kristen God i bin makim: “Yupela i haus [“tempel,” NW] bilong God yet, na Spirit bilong God i stap insait long yupela. Ating yupela i no save long dispela? . . . Haus bilong God em i samting God i makim bilong em yet [“holi,” NW]. Na dispela haus [“tempel,” NW] em yupela tasol.” (1 Korin 3:​16, 17) Long rot bilong spirit bilong em, Jehova i save “stap” wantaim ol Kristen God i bin makim na “wokabaut namel long ol.” (2 Korin 6:16) Oltaim em i wok long stiaim gutpela “wokboi.” (Matyu 24:​45-47) Ol “arapela sipsip” i ting em i wanpela gutpela samting tru long ol i ken bung wantaim dispela lain tempel.​—Jon 10:16; Matyu 25:​37-40.

Ol Samting i Holi Long Laip Bilong Yumi Ol Kristen

12. Wanem ol samting i holi long laip bilong yumi? Bilong wanem ol i holi?

¹² Planti samting long laip bilong ol Kristen God i bin makim na ol poroman bilong ol, ol i samting i holi. Pasin bilong yumi long pas gut wantaim Jehova i samting i holi. (1 Stori 28:9; Song 36:7) Dispela samting i dia tumas long yumi, olsem na yumi no larim wanpela samting o wanpela man i bagarapim pasin bilong yumi long pas gut wantaim God bilong yumi, Jehova. (2 Stori 15:2; Jems 4:​7, 8) Beten em i bikpela samting bilong helpim yumi long pas gut wantaim Jehova. Beten em i samting holi tru long profet Daniel, na maski ol man inap kilim em i dai long dispela, em i wok yet long bihainim pasin bilong em long beten long Jehova. (Daniel 6:​7-11) “Beten bilong ol manmeri bilong God,” olsem ol Kristen God i bin makim, ol i olsem smok i gat gutpela smel ol i mekim wok long en long tempel long taim bilong lotu. (KTH 5:8; 8:​3, 4; Wok Pris 16:​12, 13) Dispela tok piksa i soim olsem beten em samting i holi. Em i wanpela gutpela samting tru long yumi ken toktok wantaim King bilong heven na graun! Tru tumas, beten em i wanpela samting i holi long laip bilong yumi!

13. Wanem strong i holi? Olsem wanem yumi mas larim dispela strong i mekim wok long i stap bilong yumi?

¹³ I gat wanpela strong long laip bilong ol Kristen God i bin makim na ol poroman bilong ol, em ol i ting em i samting i holi tru​—holi spirit. Dispela spirit em i strong bilong Jehova, na oltaim em i save mekim ol samting i stret wantaim laik bilong God holi, olsem na i stret Baibel i kolim dispela strong olsem ‘holi spirit.’ (Jon 14:26; Rom 1:4) Long rot bilong holi spirit, Jehova i givim strong long ol wokman bilong em long autim gutnius. (Aposel 1:8; 4:31) Jehova i save givim spirit bilong em long “ol manmeri i bihainim tok bilong em,” na long ol man husat i “larim Holi Spirit i stiaim wokabaut” bilong ol, na ol i no wokabaut long pasin bilong olpela bel. (Aposel 5:32; Galesia 5:​16, 25; Rom 8:​5-8) Dispela bikpela strong i helpim ol Kristen long kamapim ‘ol pasin holi spirit i save kirapim yumi long mekim’​—em ol gutpela pasin​—na long “wokabaut long pasin holi na bihainim olgeta pasin bilong God.” (Galesia 5:​22, 23; 2 Pita 3:11) Sapos holi spirit em i samting holi long yumi, bai yumi abrusim olgeta pasin em inap givim bel hevi long dispela spirit, o i pasim em long mekim wok long i stap bilong yumi.​—Efesus 4:30.

14. Ol Kristen God i bin makim i ting wanem gutpela wok em i wok holi? Olsem wanem ol arapela sipsip i insait long dispela gutpela wok?

¹⁴ Yumi gat gutpela wok bilong holim nem bilong God holi, Jehova, na yumi stap ol Witnes bilong em na dispela tu em i samting holi long yumi. (Aisaia 43:​10-12, 15) Jehova i mekim na ol Kristen God i bin makim ol inap “i stap wokman bilong nupela kontrak.” (2 Korin 3:​5, 6) Ol i gat wok long autim “dispela gutnius bilong kingdom” na long “mekim olgeta lain manmeri i kamap disaipel.” (Matyu 24:14; 28:​19, 20) Ol i stap gut long dispela wok, na planti milion manmeri i olsem sipsip ol i harim tok, i olsem ol i tokim ol Kristen God i bin makim: “Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.” (Sekaraia 8:23) Ol dispela lain i amamas long mekim wok bilong God olsem ol man bilong “planim kaikai” na ‘lukautim gaden wain’ bilong helpim “ol wokman bilong God” em i bin makim. Long dispela rot, ol arapela sipsip i mekim bikpela wok bilong helpim ol Kristen God i bin makim bilong inapim wok bilong ol long autim tok long olgeta hap bilong graun.​—Aisaia 61:​5, 6.

15. Aposel Pol i ting wanem wok i holi? Bilong wanem yumi gat wankain tingting?

¹⁵ Aposel Pol i ting wok autim tok bilong em i samting holi. Em i tok em i ‘wokman bilong Krais Jisas, bilong mekim wok namel long ol arapela lain manmeri. Long dispela wok em i mekim bilong autim gutnius bilong God, em i stap olsem pris.’ (Rom 15:16) Pol i raitim pas i go long ol Kristen i stap long Korin, na em i tok wok autim tok bilong em i “gutpela samting tru.” (2 Korin 4:​1, 7) Long rot bilong wok autim tok, yumi “autim stret tok [“holi,” NW] bilong God.” (1 Pita 4:11) Olsem na maski yumi bilong lain Kristen God i bin makim o lain arapela sipsip, yumi ting em i wanpela gutpela wok holi long mekim wok autim tok.

‘Pret Long God na Bihainim Tru Pasin Holi Oltaim’

16. Wanem samting i helpim yumi na yumi no kamap man i “givim baksait long God,” olsem man i no tingim ol samting i holi?

¹⁶ Aposel Pol i givim tok lukaut long ol wanbilip Kristen long ol i no ken kamap man i “givim baksait long God,” olsem man i no tingim ol samting i holi. Em i tokim ol long “bihainim pasin holi,” na long ‘was gut, nogut wanpela bilong ol i kamap olsem diwai i karim kaikai i gat pait, na em i givim hevi long ol na mekim ol i kamap doti long ai bilong God.’ (Hibru 12:​14-16) Dispela tok “diwai i karim kaikai i gat pait” i makim ol wan wan man insait long kongrigesen Kristen husat i sutim tok long ol pasin ol Kristen i mas bihainim. Olsem: Ating ol i no wanbel long tingting bilong Jehova long marit em i samting i holi o long ol i mas bihainim klinpela pasin. (1 Tesalonaika 4:​3-7; Hibru 13:4) O ating ol i toktok long ol tingting bilong ol apostet, “olkain toktok nabaut i no bihainim tingting bilong God” long ol samting i holi. Ol man husat “i lusim pinis rot bilong tok tru” ol i save kamapim ol dispela kain tok.​—2 Timoti 2:​16-18.

17. Bilong wanem ol Kristen God i bin makim i mas wok strong oltaim long bihainim tingting bilong Jehova long ol samting i holi?

¹⁷ Pol i tokim ol brata bilong em olsem: “Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.” (2 Korin 7:1) Dispela tok i soim olsem ol Kristen God i bin makim, em ‘God i singautim ol,’ ol i mas wok strong oltaim long bihainim tingting bilong Jehova long ol samting i holi long olgeta samting long i stap bilong ol. (Hibru 3:1) Aposel Pita tu i tokim ol brata bilong em olsem: “Yupela i mas i stap olsem ol pikinini i save harim tok. Bipo yupela i no gat save, na yupela i save bihainim ol kain kain laik nogut. Tasol nau yupela i no ken bihainim dispela pasin moa. Nogat. God i singautim yupela pinis, em i holi na em i save mekim gutpela na stretpela pasin olgeta. Olsem na yupela i mas givim yupela yet long God na stap holi long olgeta wokabaut bilong yupela.”​—1 Pita 1:​14, 15.

18, 19. (a) Olsem wanem lain “planti manmeri tru” i soim olsem ol i bihainim tingting bilong Jehova long ol samting i holi? (b) Stadi i kamap bihain long dispela bai skelim wanem narapela samting i holi long laip bilong yumi ol Kristen?

¹⁸ Olsem wanem long “planti manmeri tru,” em ol bai abrusim bagarap long taim bilong bikpela hevi tru? Ol tu i mas soim olsem ol i bihainim tingting bilong Jehova long ol samting i holi. Long Buk Kamapim Tok Hait, Baibel i tok ol i mekim ‘wok bilong God’ long banis bilong tempel spirit long graun. Ol i bilip long ofa bilong Krais bilong baim bek ol man, i olsem ol i “wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:​9, 14, 15) Dispela i mekim na ol i stap klin long ai bilong Jehova na ol i gat wok long ‘rausim olgeta pasin doti bilong bodi na bilong spirit, na kamap klin olgeta long ai bilong God. Na ol i mas pret na aninit long God na bihainim tru pasin holi oltaim.’

¹⁹ Wanpela bikpela samting long laip bilong ol Kristen God i bin makim na ol poroman bilong ol, em pasin bilong bung oltaim bilong lotuim Jehova na stadi long Tok bilong em. Jehova i ting ol bung bilong lain bilong em ol i samting i holi. Orait, olsem wanem na bilong wanem yumi mas bihainim tingting bilong Jehova long ol samting i holi long ol bung bilong yumi? Stadi i kamap bihain long dispela bai skelim dispela samting.

Sampela Askim

• Ol wokman bilong Jehova i no gat wanem kain tingting em planti man bilong graun i holim?

• Olsem wanem Jehova em i As bilong olgeta samting i holi?

• Olsem wanem yumi soim olsem yumi daun long pasin holi bilong Krais?

• Yumi mas ting wanem ol samting long i stap bilong yumi i holi?

[Piksa long pes 23]

Long Israel bilong bipo, wok pris, haus lotu sel, na ol samting i stap long en ol i samting holi

[Piksa long pes 24]

Ol Kristen God i bin makim em ol i stap long graun, ol i olsem wanpela tempel holi

[Piksa long pes 25]

Beten na wok autim tok em ol wok holi