Ol Spirit Nogut​—Olsem Wanem Yumi Inap Sakim Ol?

“Tingim ol dispela ensel ol i no laik i stap gut long dispela wok God i bin givim ol, na ol i lusim ples bilong ol. Olsem na Bikpela i pasim ol long ol sen i save stap oltaim oltaim, na em i kalabusim ol i stap long dispela ples i tudak nogut tru. Ol i wetim De bilong bikpela kot bilong God.”​—JUT 6.

1, 2. Yumi gat wanem ol askim long Satan na ol spirit nogut?

APOSEL Pita i tok lukaut olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Na aposel Pol i tok long ol spirit nogut olsem: “Mi no laik bai yupela i bung wantaim ol spirit nogut. I no inap yupela i dring long kap bilong Bikpela na long kap bilong ol spirit nogut tu. Na i no inap yupela i kaikai long tebol bilong Bikpela na long tebol bilong ol spirit nogut tu.”​—1 Korin 10:​20, 21.

² Tasol Satan na ol spirit nogut ol i husat? Ol i bin kamap olsem wanem na long wanem taim? God i bin wokim ol o olsem wanem? Strong bilong ol long bosim ol man i bikpela olsem wanem? Yumi inap sakim ol o nogat?

Satan na Ol Spirit Nogut i Kamap Olsem Wanem?

3. Olsem wanem wanpela ensel bilong God i bin kamap Satan?

³ Kirap long taim man i kamap long graun long gaden Iden, wanpela ensel bilong God i bikhet. Bilong wanem em i bikhet? Bikos em i no amamas long wok em i holim insait long lain bilong Jehova long heven. Taim God i wokim Adam na Iv, dispela ensel i luksave olsem em inap pulim tupela long lusim God na ol bai bihainim tok bilong em na lotuim em, God tru, nogat. Long rot bilong bikhet long God na kirapim Adam na Iv long bihainim pasin bilong mekim sin, dispela ensel i kamap Satan. Bihain, sampela arapela ensel ol i bihainim pasin bikhet bilong em. Ol i mekim olsem wanem?​—Stat 3:​1-6; Rom 5:12; KTH 12:9.

4. Sampela bikhet ensel i bin mekim wanem paslain long Bikpela Tait long taim bilong Noa?

⁴ Baibel i tok, paslain long Bikpela Tait long taim bilong Noa, sampela ensel i kirap lukluk long ol meri bilong graun na ol i gat laik long ol. Ol pikinini man bilong God long heven i gat tingting nogut na ol i kirap “lukim ol dispela meri i naispela tumas. Na ol i kisim ol meri long laik bilong ol yet na maritim ol.” Samting ol i mekim i no stret, na ol i kamapim ol traipela pikinini man ol i kolim Nefilim. (Stat 6:​2-4) Ol dispela ensel husat i no bihainim tok bilong God, ol i joinim Satan long bikhet long Jehova.

5. Taim Jehova i bagarapim ol samting long taim bilong Bikpela Tait, dispela i mekim wanem long ol bikhet ensel?

⁵ Taim Jehova i kamapim Bikpela Tait, ol dispela Nefilim wantaim ol mama bilong ol i dai. Ol bikhet ensel i mas lusim bodi bilong graun na i go bek gen long ples spirit. Tasol ol i no inap go bek long “wok God i bin givim ol” long pastaim, nogat. God i pasim ol long “ples i tudak nogut tru [long ol samting bilong spirit],” dispela ples em Baibel long tok Grik i kolim Tatarus.​—Jut 6; 2 Pita 2:4.

6. Ol spirit nogut i save giamanim ol man olsem wanem?

⁶ Kirap long taim ol dispela ensel nogut “i no laik i stap gut long dispela wok God i bin givim ol,” ol i kamap poroman bilong Satan na ol i helpim em long mekim ol pasin nogut. Kirap long dispela taim na i kam inap long nau, ol dispela spirit nogut i no gat strong moa long kisim bodi bilong man hia long graun. Tasol ol i gat strong long kirapim ol man na meri long insait long kain kain pasin sem. Ol spirit nogut i save giamanim ol man long rot bilong sanguma, marila posin samting, na ol glasman. (Lo 18:​10-​13; 2 Stori 33:6) Samting bai painim ol ensel nogut long bihain i wankain long samting bai painim Satan​—ol bai bagarap na pinis olgeta. (Matyu 25:41; KTH 20:10) Tasol i go inap long taim dispela samting bai kamap, yumi mas sanap strong na sakim ol. Em savepasin long skelim strong bilong Satan na olsem wanem yumi inap sakim em na ol spirit nogut.

Strong Bilong Satan i Bikpela Olsem Wanem?

7. Satan i gat strong long mekim wanem?

⁷ Kirap long bipo yet na i kam inap long nau, Satan i bin sutim tok giaman long Jehova. (Sindaun 27:11) Em i bin pulim klostu olgeta manmeri long bihainim em. Long 1 Jon 5:​19, Baibel i tok: “Dispela graun olgeta em i stap aninit long strong bilong Satan.” Dispela em i as na Satan inap traim Jisas na tok em bai givim em strong na biknem bilong “olgeta strongpela kantri bilong dispela graun.” (Luk 4:​5-7) Aposel Pol i stori long Satan olsem: “Sapos sampela lain i no klia long as bilong dispela gutnius mipela i save autim, em ol dispela lain i stap long rot bilong hel [“bagarap,” NW] tasol. Satan, em giaman god bilong dispela graun, em i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol. Olsem na ol i no save lukim Krais, em i piksa tru bilong God.” (2 Korin 4:​3, 4) Satan “em i man bilong tok giaman, na em i papa tru bilong pasin bilong tok giaman,” tasol em “i save senisim pasin bilong en na kamap olsem ensel bilong lait.” (Jon 8:44; 2 Korin 11:14) Em i gat strong na save long pasim tingting bilong ol hetman bilong ol gavman na ol man i stap aninit long ol. Em i yusim ol tok gris bilong pulim tingting bilong ol man, na ol stori nating bilong lotu, na ol tok giaman bilong paulim na trikim olgeta manmeri.

8. Baibel i kamapim klia olsem Satan i gat wanem strong na namba?

⁸ Strong bilong Satan i bin stap ples klia long taim bilong profet Daniel, em 500 yia samting paslain long Krais. Taim Jehova i salim wanpela ensel long givim tok long Daniel bilong strongim em, dispela ensel i mas pait wantaim “ensel i save lukautim kantri Persia.” Ensel i bosim kantri Persia i pasim gutpela ensel inap 21 de i go inap ‘Maikel, em wanpela namba wan ensel’ i kam helpim em. Dispela hap bilong Baibel i stori tu long “ensel [nogut] i lukautim kantri Grik.” (Daniel 10:​12, 13, 20) Na Kamapim Tok Hait 13:​1, 2 i stori long “dispela snek” i makim Satan, na em i “givim strong bilong em yet long dispela wel animal [ol gavman politik]. Em i mekim em i stap king olsem em yet, na em i givim bikpela strong long em.”

9. Ol Kristen i pait long husat?

⁹ Olsem na i gat as na aposel Pol i tok: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.” (Efesus 6:12) Long nau tu, ol spirit nogut em Satan i save kontrolim, i stap hait na ol i wok long bosim ol bikman bilong ol gavman na ol manmeri, na ol i kirapim ol dispela man long mekim ol pasin nogut tru olsem pasin bilong bagarapim na pinisim wanpela lain olgeta, pasin teroris, na kilim i dai ol man. Orait, nau yumi laik skelim olsem wanem yumi ken sakim ol dispela strongpela spirit nogut.

Olsem Wanem Yumi Ken Sakim Ol?

10, 11. Olsem wanem yumi inap sakim Satan na ol ensel nogut bilong em?

¹⁰ Yumi no inap sakim Satan na ol spirit nogut long strong bilong yumi yet, olsem strong bilong skin na bilong tingting. Pol i tok olsem: “Yupela i mas tingting long olgeta bikpela strong bilong en, na yupela i mas sanap strong.” Yumi mas askim God long lukautim yumi. Pol i tok moa olsem: “Pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim. . . . Kisim olgeta klos pait God i save givim yupela, na long taim nogut yupela bai inap sanap strong long pait. Na long taim pait i pinis, yupela bai i sanap strong i stap yet.”​—Efesus 6:​10, 11, 13.

¹¹ Tupela taim Pol i kirapim ol wanbilip Kristen long putim “olgeta klos pait God i save givim.” Dispela tok “olgeta” i makim olsem pasin bilong givim hap bel tasol long sakim ol spirit nogut bai i no inap. Orait, wanem ol klos pait bilong spirit ol Kristen i mas kisim na bai ol inap sakim ol spirit nogut?

Olsem Wanem Yumi Ken “Sanap Strong”?

12. Olsem wanem ol Kristen i ken pasim tok i tru olsem let?

¹² Pol i tok: “Sapos yupela i laik sanap strong, orait yupela i mas pasim tok tru olsem let bilong yupela, na pasim stretpela pasin olsem siot kapa i karamapim bros bilong yupela.” (Efesus 6:14) Tupela hap bilong klos pait dispela skripsa i stori long en, em let na siot kapa. Wanpela soldia i mas taitim strong let bilong em bilong lukautim sangana na bel daunbilo, na bilong karim bainat. Na olsem tasol, yumi mas pasim strong tok i tru bilong Baibel, olsem let i raunim yumi. Long dispela rot ol samting yumi mekim i stret wantaim tok bilong en. Olsem wanem? Yumi gat sediul bilong ritim Baibel long olgeta de? Famili olgeta i save mekim wantaim? Yumi save skelim teks bilong de wantaim olsem wanpela famili? Na olsem wanem? Yumi save long ol tok i kamapim mining bilong Baibel olsem i stap long ol buk na nius em “wokboi i gat gutpela tingting” i save givim long yumi? (Matyu 24:45) Sapos yumi mekim olsem, dispela i makim olsem yumi wok long bihainim tok bilong Pol. Na tu, yumi gat ol vidio na ol DVD i save kamapim ol tok bilong Baibel bilong stiaim yumi. Taim yumi holim strong tok i tru, dispela i helpim yumi long mekim ol gutpela disisen na yumi no bihainim rot nogut.

13. Yumi inap mekim wanem bilong lukautim bel bilong yumi?

¹³ Siot kapa ol soldia i save pasim i lukautim bros, klok, na bel samting. Kristen inap lukautim bel, olsem pasin tru bilong em, taim em i wok long kisim pasin bilong laikim tru stretpela pasin bilong God na wok long bihainim ol stretpela lo bilong Jehova. Siot kapa bilong spirit i lukautim yumi na bai yumi no kisim tingting olsem Tok Bilong God i no bikpela samting tumas. Taim yumi “lusim pasin nogut, na bihainim gutpela pasin tasol,” yumi “surik long bihainim pasin nogut.”​—Amos 5:15; Song 119:101.

14. Wanem mining bilong dispela tok “autim gutnius bilong God i laik wanbel wantaim ol manmeri, na putim dispela pasin olsem su bilong yupela”?

¹⁴ Ol soldia bilong Rom i bin putim ol gutpela su taim ol i mats long ol longpela rot long ol hap Rom i bosim. Dispela tok “autim gutnius bilong God i laik wanbel wantaim ol manmeri, na putim dispela pasin olsem su bilong yupela” i gat wanem mining long ol Kristen? (Efesus 6:15) Dispela i makim olsem yumi redi long mekim wok. Yumi redi long autim gutnius bilong Kingdom Bilong God long olgeta taim yumi gat rot long mekim olsem. (Rom 10:​13-​15) Pasin bilong yumi long bisi tru long mekim wok Kristen i save lukautim yumi na yumi inap sakim ol “trik na giaman Satan i save hait na mekim.”​—Efesus 6:11.

15. (a) Wanem samting i soim olsem bilip, olsem hap plang, em i bikpela samting tru? (b) Wanem ol “spia paia” inap bagarapim bilip bilong yumi?

¹⁵ Pol i tok moa olsem: “Yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.” (Efesus 6:16) Pol i tok “yupela i mas kisim” bilip olsem hap plang, na dispela i makim olsem bilip em i wanpela bikpela samting. Bilip bilong yumi i no ken slek. Wankain olsem wanpela bikpela hap plang, bilip bilong yumi i save lukautim yumi na ol “spia paia” bilong Satan i no inap sutim yumi. Ol dispela spia paia i makim wanem samting long nau? Em ol tok i sutim tru bel bilong yumi, ol tok giaman, na sampela tok em hap bilong en tasol i tru. Em ol tok ol birua na ol apostet i save kamapim bilong bagarapim bilip bilong yumi. Ol dispela “spia paia” inap makim tu ol traim i kamap long pasin bilong laikim tumas long kisim planti samting bilong skin. Dispela inap mekim na yumi tingting tasol long baim planti samting na resis wantaim ol arapela husat i bihainim pasin bilong baim planti samting. Ating ol i bin baim wanpela haus i bikpela na naispela moa na ol nupela ka, o ol i laik bai ol man i ken lukim ol ring na nekles samting ol i baim long bikpela pe na ol nupela nupela klos i gat stail. Maski ol arapela i mekim wanem, bilip bilong yumi mas i stap strong na bai em inap pasim ol dispela “spia paia.” Olsem wanem yumi ken kisim na holim strongpela bilip?​—1 Pita 3:​3-5; 1 Jon 2:​15-​17.

16. Wanem samting inap helpim yumi long kisim strongpela bilip?

¹⁶ Yumi inap go klostu long God long rot bilong mekim stadi bilong yumi yet long Baibel long olgeta taim na kamapim bel bilong yumi long rot bilong ol beten. Yumi ken beten askim Jehova long givim strongpela bilip long yumi na mekim ol samting i stret wantaim beten bilong yumi. Olsem wanem? Yumi save redim gut Wastaua bilong yumi na bai yumi ken bekim tok long Stadi Wastaua? Bilip bilong yumi bai stap strong sapos yumi save stadi long Baibel na ol buk na nius em Baibel i as bilong en.​—Hibru 10:​38, 39; 11:6.

17. Olsem wanem yumi inap kisim pasin bilong bilip na wetim God i kisim bek yumi, olsem hat kapa?

¹⁷ Bilong pinisim stori bilong em long ol klos pait bilong spirit, Pol i tok: “Yupela i mas tingting long God i kisim bek yupela pinis, na dispela tingting i mas i stap olsem hat kapa yupela i putim. Na yupela i mas holim bainat bilong Holi Spirit, em tok bilong God.” (Efesus 6:17) Hat kapa bilong soldia i save lukautim het na kru, em hap we man i save wokim tingting. Na olsem tasol, pasin bilong yumi long bilip na wetim God i kisim bek yumi i save lukautim tingting bilong yumi. (1 Tesalonaika 5:8) Yumi no ken tingting long kisim nem, namba, na ol mani kago samting long nau, nogat. Olsem Jisas, yumi mas tingting tasol long ol gutpela samting God i promis pinis long givim yumi.​—Hibru 12:2.

18. Bilong wanem yumi no ken lusim pasin bilong yumi long ritim Baibel long olgeta taim?

¹⁸ Laspela hap bilong klos pait bilong lukautim yumi long Satan na ol spirit nogut, em tok bilong God i stap long Baibel. Dispela em i narapela as na yumi no ken lusim pasin bilong ritim Baibel long olgeta taim. Taim yumi save gut long Tok Bilong God, dispela i save lukautim yumi long ol tok giaman bilong Satan na ol tok gris bilong pulim tingting bilong yumi em ol spirit nogut i as bilong en. Na tu, em bai lukautim yumi long ol tok giaman bilong ol apostet.

“Prea Oltaim”

19, 20. (a) Wanem samting bai painim Satan na ol spirit nogut? (b) Wanem samting inap strongim yumi long ol samting bilong spirit?

¹⁹ Klostu nau God bai rausim Satan na ol spirit nogut. Satan i save em i gat “sotpela taim tasol bilong i stap.” Em i belhat na em i pait long ol “manmeri i save bihainim ol lo bilong God, na ol i save autim tok bilong Jisas.” (KTH 12:​12, 17) Em i bikpela samting long yumi mas sakim Satan na ol spirit nogut.

²⁰ Yumi ken tok tenkyu tru long gutpela tok i kirapim yumi long pasim olgeta klos pait i kam long God! Bilong pinisim stori bilong em long ol klos pait bilong spirit, Pol i tok: “Long strong bilong Holi Spirit yupela i mas prea oltaim. Yupela i mas strong long mekim ol kain kain beten na askim God long helpim yupela. Oltaim yupela i mas was gut bai yupela i no lusim dispela pasin. Yupela i no ken malolo. Oltaim yupela i mas prea na askim God long helpim olgeta manmeri bilong en.” (Efesus 6:18) Pasin bilong prea inap strongim yumi long ol samting bilong spirit na helpim yumi long was i stap. Yumi laik bihainim tru tok bilong Pol na prea oltaim, long wanem, dispela bai helpim yumi long sakim Satan na ol spirit nogut.

Yu Lainim Wanem Samting?

• Satan na ol spirit nogut i bin kamap olsem wanem?

• Strong bilong Satan i bikpela olsem wanem?

• Olsem wanem yumi ken sakim Satan na ol spirit nogut?

• Olsem wanem yumi inap pasim olgeta klos pait i kam long God?

[Ol Piksa long pes 26]

“Ol pikinini man bilong God i lukim ol dispela meri i naispela tumas”

[Piksa long pes 28]

Yu inap kolim na stori long ol sikspela hap bilong klos pait bilong spirit?

[Ol Piksa long pes 29]

Olsem wanem pasin bilong insait long ol dispela samting inap helpim yumi long sakim Satan na ol spirit nogut?