Ol Yangpela—Yupela Inap Mekim Ol Papamama i Amamas
LAPUN aposel Jon i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Tru, dispela ol pikinini em Baibel i stori long ol i makim ol disaipel Kristen, tasol ol papamama i aninit long God ol tu inap pilim dispela tok bilong Jon. Pasin bilong ol papamama i mekim ol pikinini i amamas, na olsem tasol pasin bilong ol pikinini i mekim papamama i amamas.
King Solomon bilong Israel long bipo em i lukim samting pasin bilong ol pikinini inap mekim long ol papamama na em i tok: “Sapos pikinini man i gat gutpela tingting na save, orait papamama bilong en i amamas. Tasol sapos pikinini i bihainim longlong pasin, orait papamama i bel hevi tru.” (Sindaun 10:1) Olsem na i gutpela olgeta pikinini—ol bikpela pikinini tu—i mas tingim olsem pasin bilong ol bai mekim ol papamama i amamas o i bel hevi. Bilong wanem dispela i tru?
Tingim bikpela hatwok papamama i bin mekim bilong mekim bikpela long yu! Ol i tingim na beten long yu taim yu stap yet long bel. Taim yu kamap pinis, papa na mama wantaim i mekim ol samting bilong pas gut wantaim yu na ating tupela i tok tenkyu long God long dispela gutpela wok ol i bin kisim bilong lukautim yu. Yu stap nau long han bilong wanpela man na meri i save lotuim Jehova, na ol i tingim dispela wok bilong mekim bikpela long yu i bikpela samting.
Papamama bilong yu ol i Kristen tru, olsem na ol i skelim tok bilong Baibel na ol buk na nius bilong Baibel, na tu, ol i askim ol narapela i gat pikinini long givim gutpela tingting long ol long mekim bikpela yu. Na tu, ol i beten long God long ol samting ol i tingting planti long en. (Hetman 13:8) Taim yu wok long i go bikpela, papamama i save long ol gutpela pasin bilong yu na ol pasin kranki tu bilong yu. (Jop 1:5) Taim yu kamap yangpela, i gat ol hevi bai i kamap. Ating sampela taim yu bikhet long tupela, na dispela i mekim na papamama i mas beten planti long dispela, ritim planti buk moa, na tingting long rot bilong helpim yu long lotuim yet Papa bilong yu long heven, em Jehova.
Maski yu bikpela pinis, papamama bilong yu bai stap yet olsem papamama. Ol bai wok yet long tingim yu long ol samting bilong skin, tingting, bel, na ol samting bilong spirit. Tasol taim ol papamama i mekim olsem, ol i save olsem yu stap fri long makim wanem samting yu laik mekim. Olsem na ol i no inap tru long save sindaun bilong yu long bihain bai kamap olsem wanem. Bihain yu yet i mas makim wanem rot yu bai bihainim.
Olsem na i stret long tok olsem ol papamama i “amamas tru” taim ol i harim olsem ol pikinini bilong ol i “bihainim tok i tru,” tasol ol papamama bai i no amamas sapos ol pikinini i no mekim olsem, a? Tru tumas, ol pikinini i no bihainim gutpela tingting ol i mekim papamama i bel hevi. Solomon i tok: “Sapos man i bihainim longlong pasin, bai papamama bilong en i bel nogut na bel hevi tru.” (Sindaun 17:25) Taim pikinini i lusim lotu bilong God tru dispela i save mekim papamama i bel hevi tru!
Dispela i kamapim klia olsem pasin bilong yupela yangpela inap mekim sampela samting insait long famili bilong yupela. Pasin bilong yu bai mekim papamama i bel hevi o amamas. Sapos yu sakim tok bilong God na ol lo bilong em, dispela bai mekim papamama bilong yu i bel hevi. Tasol sapos yu bihainim tok bilong God ol bai amamas. Tingting strong long mekim papamama bilong yu i amamas! I no gat narapela samting yu inap givim long papamama bilong yu, em ol i bin mekim bikpela long yu na lukautim na laikim yu.