Rot Bilong Mekim i Stap Bilong Yu i Gat As Bilong En

“Yupela olgeta samting i stap laip, litimapim nem bilong Bikpela!”​​—SONG 150:6.

1. Stori long ol samting em wanpela yangpela man i mekim bilong mekim i stap bilong em i gat as bilong en.

“MI SKUL long kamap dokta, long wanem, mi laik helpim ol man. Na tu, mi pilim olsem biknem na mani mi kisim long wok dokta bai helpim mi long stap amamas.” Dispela em tok bilong Seung Jin, em i bin kamap bikpela long Korea.a Em i tok moa: “Bihain mi luksave olsem ol dokta i no inap helpim tru ol man long olgeta samting ol i laik helpim ol long en, na dispela i mekim mi bel hevi. Olsem na mi kirap stadi long kamap atis, tasol dispela wok i no helpim tru ol narapela, na mi pilim olsem mi wok long tingim mi yet tasol. Olsem na mi kamap tisa, tasol i no longtaim na mi lukim olsem mi inap givim savetok long ol sumatin, tasol mi no inap stiaim ol long rot bilong i stap amamas tru.” Em nau, olsem planti man i mekim, Seung Jin i wok long painim rot bilong mekim i stap bilong em i gat as bilong en.

2. (a) I stap bilong man i gat as tru bilong en, dispela i makim wanem samting? (b) Olsem wanem yumi save olsem i gat as na God i putim yumi long graun?

² I stap bilong man i gat as tru bilong en, dispela i makim olsem i gat wanpela mak em i laik winim, na ol wok em i mekim i bilong inapim dispela mak. Olsem wanem? Ol man inap mekim i stap bilong ol i gat as tru bilong en? Yes, ol inap mekim! Yumi ol man i gat tingting, na maus bilong bel, na yumi inap skelim ol samting, na dispela i givim tingting long yumi olsem i gat as na God i putim yumi long graun. Olsem na sapos yumi mekim ol samting i stret long laik bilong God, yumi inap mekim i stap bilong yumi i gat as tru bilong en.

3. Wanem ol samting i insait long ol samting em God i laik mekim bilong helpim ol man?

³ Baibel i kamapim olsem i gat planti samting i insait long ol samting em God i laik mekim bilong helpim yumi. Olsem: God i wokim gut bodi bilong yumi na dispela i soim olsem God i laikim tru yumi. (Song 40:5; 139:14) Olsem na bilong bihainim laik bilong God, yumi mas laikim tru ol narapela olsem God i mekim. (1 Jon 4:​7-​11) Na tu, yumi mas mekim ol samting God i tokim yumi long mekim, na dispela bai helpim yumi long bihainim laik bilong em.​​—Saveman 12:13; 1 Jon 5:3.

4. (a) Man i mas mekim wanem bambai i stap bilong em i gat as tru bilong en? (b) Wanem samting em gutpela samting tru yumi inap mekim?

⁴ Na tu, God i laik bai ol man i mas stap amamas na stap wanbel wantaim narapela narapela na wantaim olgeta narapela samting em i bin wokim. (Stat 1:​26; 2:​15) Orait yumi mas mekim wanem bambai yumi ken i stap amamas na stap gut na stap bel isi? Tingim wanpela pikinini. Em i mas save olsem papamama bilong em i stap klostu, na dispela bai mekim em i amamas na em bai stap gut. Olsem tasol, yumi mas pas gut wantaim Papa bilong yumi long heven bambai i stap bilong yumi i gat as tru bilong en. (Hibru 12:9) God i stretim rot long yumi inap pas gut wantaim em olsem pikinini i pas gut wantaim papa; em i orait long yumi ken i go klostu long em, na tu, em i save harim ol prea bilong yumi. (Jems 4:8; 1 Jon 5:​14, 15) Sapos yumi bilip na “wokabaut” wantaim God na kamap pren bilong em, yumi inap litimapim nem bilong Papa bilong yumi long heven na mekim em i belgut. (Stat 6:9; Sindaun 23:​15, 16; Jems 2:​23) Dispela em gutpela samting tru yumi inap mekim na i no gat narapela samting i winim dispela. Man bilong raitim song i tok: “Yupela olgeta samting i gat laip, litimapim nem bilong Bikpela!”​​—Song 150:6.

Yu Yet i Gat Laik Long Mekim Wanem?

5. Bilong wanem em i no gutpela tingting long putim ol samting bilong skin i stap namba wan?

⁵ God i laik tu olsem yumi mas lukautim gut yumi yet na famili bilong yumi long ol samting bilong skin na long sait bilong lotu. Tasol sait bilong lotu em i bikpela samting moa, olsem na yumi mas bihainim stretpela tingting na bai wok mani samting i no ken karamapim ol samting bilong lotu. (Matyu 4:4; 6:​33) Tasol sori tru, planti man i tingting tasol long bungim ol samting bilong skin. Em i no gutpela tingting sapos yumi ting olsem ol samting bilong skin tasol bai inapim olgeta laik bilong yumi. Ol i bin mekim wanpela wok painimaut long ol maniman long Esia na ol i kisim save olsem planti bilong ol “i save pret na tingting planti maski ol i gat biknem na planti mani kago.”​​—Saveman 5:​11.

6. Jisas i tok wanem long pasin bilong bungim mani kago?

⁶ Jisas i mekim tok long “planti mani samting i giamanim man.” (Mak 4:​19, King Jems Nupela Testamen) Olsem wanem mani kago inap giamanim man? Ol man i ting mani kago i save mekim ol i amamas, tasol dispela em i no tru. King Solomon i tok: “Sapos bel bilong man i skrap long kisim planti mani, orait oltaim bai em i ting em i sot long mani.” (Saveman 5:​10) Tasol olsem wanem? Man inap wok yet long bungim mani kago na long wankain taim em i givim bel olgeta long mekim wok bilong God? Nogat. Jisas i tok: “I no gat wanpela man inap i stap aninit long tupela bosman wantaim. Bai em i laikim wanpela na bel nogut long narapela. Bai em i harim tok bilong wanpela na givim baksait long narapela. Yupela i no inap i stap aninit long God na long mani wantaim.” Jisas i no tokim ol disaipel bilong em long bungim mani kago long graun, nogat, em i tokim ol long bungim “ol gutpela samting . . . long heven.” Em olsem: Ol i mas mekim ol samting bambai ol i gat gutnem long ai bilong God, em man husat “i save pinis long olgeta samting yupela i sot long en.”​​—Matyu 6:​8, 19-​25.

7. Yumi mas mekim wanem bambai yumi inap kisim dispela laip em i “laip tru”?

⁷ Taim aposel Pol i raitim pas i go long wanwok bilong em Timoti, em i mekim sampela strongpela tok long dispela samting. Em i tokim Timoti: “Tokim ol man i gat planti mani samting . . . Ol i no ken bilip long ol dispela kain samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi amamas. . . .  Oltaim ol i mas givim planti samting long ol manmeri i sot. Ol i no ken ting samting tru bilong ol em ol mani samting bilong ol. Nogat. Samting tru bilong ol, em pasin bilong mekim gut long ol arapela. Sapos ol i mekim olsem, orait ol bai i bungim planti samting bilong helpim ol bihain, na ol bai i kisim dispela laip em i laip tru.”​​—1 Timoti 6:​17-​19.

“Laip Tru” Em i Wanem Kain Laip?

8. (a) Bilong wanem planti man i wok strong long kisim mani kago na biknem? (b) Ol i no luksave long wanem samting?

⁸ Taim ol man i harim dispela tok “laip tru,” planti ol i save tingim ol gutpela gutpela samting bilong skin na ol amamas. Wanpela nius bilong Esia i tok: “Ol man i lukim ol muvi o televisen, ol i save kisim pasin bilong laikim ol samting ol i lukim, o ol i tingting long ol samting ol inap kisim.” Planti man i tingting tasol long bungim mani kago na kisim biknem. Bilong kisim ol dispela samting, taim ol i yangpela yet ol i save wok tasol na ol i no lukautim gut helt bilong ol na sindaun bilong famili, na ol i no tingim ol samting bilong lotu. Ol i no luksave olsem ol dispela samting ol i lukim long muvi na televisen samting i kamapim “spirit bilong dispela graun”​​—em nambawan tingting i stiaim planti lain long graun na i kirapim ol long mekim ol samting i no stret wantaim samting God i laik yumi mas mekim. (1 Korin 2:​12; Efesus 2:2) Olsem na yumi no kirap nogut olsem planti man long nau ol i stap bel hevi!​​—Sindaun 18:11; 23:​4, 5.

9. Ol man i no inap tru long mekim wanem samting? Bilong wanem?

⁹ Olsem wanem long ol lain i laik helpim ol narapela long stap gut, olsem ol i wok strong long pinisim hangre, na sik, na pasin i no stret? Gutpela wok bilong ol i save helpim planti man. Tasol maski ol i mekim gutpela wok, ol i no inap tru long senisim pasin nogut bilong nau na kirapim ol man long mekim gutpela na stretpela pasin tasol. Bilong wanem? Long wanem, “dispela graun olgeta em i stap aninit long strong bilong Satan,” na em i no laik bai pasin nogut bilong nau i pinis.​​—1 Jon 5:​19.

10. Ol gutpela man bai kisim “laip tru” long wanem taim?

¹⁰ Sori tru sapos man i tingim ol samting bilong nau tasol na i no gat wanpela gutpela samting em i wetim i kamap bihain! Pol i tok: “Yumi bilip long Krais na wetim em i mekim gut long yumi. Tasol sapos yumi wetim ol samting yumi bai kisim long laip bilong dispela graun tasol, orait tru tumas yumi tarangu lain stret, na yumi winim ol arapela tarangu lain bilong dispela graun.” Ol man husat i ting olsem yumi bilong i stap laip long nau tasol na bihain nogat, ol i save tok: “Mobeta ‘yumi kaikai na dring, long wanem, tumora bai yumi dai.’ ” (1 Korin 15:​19, 32) Tasol yumi inap i stap laip long bihain tu, long wanem, “God i promis pinis long em bai i wokim nupela skai na nupela graun, na stretpela pasin tasol bai i stap long en.” (2 Pita 3:​13) Long dispela taim bihain, ol Kristen inap amamas long kisim “laip tru,” em “laip i stap gut oltaim oltaim” na ol bai stap gutpela olgeta. Sampela Kristen bai kisim dispela laip long heven na sampela bai kisim dispela laip long graun aninit long gutpela wok bos bilong Kingdom Bilong God!​​—1 Timoti 6:​12.

11. Bilong wanem em i gutpela samting long mekim ol samting bilong helpim wok bilong Kingdom Bilong God?

¹¹ Kingdom Bilong God tasol bai stretim tru ol hevi bilong ol man. Olsem na taim man i mekim ol samting bilong helpim wok bilong Kingdom Bilong God, dispela em i gutpela samting tru, winim ol narapela samting man inap mekim. (Jon 4:​34) Taim yumi insait long dispela wok, yumi pas gut wantaim Papa bilong yumi long heven. Na tu, yumi amamas long wok bung wantaim planti milion bratasista bilong yumi, em ol tu i mekim wankain wok olsem yumi.

Ol Samting i Stret Long Lusim

12. Stori long olsem wanem laip bilong nau i narapela kain long “laip tru.”

¹² Baibel i tok ol pasin bilong dispela graun “bai i pinis.” Olgeta samting bilong graun bilong Satan bai i bagarap​—biknem na mani kago bilong en tu bai i bagarap, “tasol man i bihainim tok bilong God, em bai i stap oltaim.” (1 Jon 2:​15-​17) Mani kago i save bagarap kwik, na biknem em i bilong sotpela taim tasol, na amamas bilong nau em i giaman tasol. Tasol “laip tru”​​—em laip oltaim aninit long Kingdom Bilong God​​—em i bilong oltaim oltaim na em inap tru long yumi lusim ol samting i stret long lusim bilong kisim dispela laip.

13. Tupela marit i lusim wanem ol samting i stret long lusim?

¹³ Tingim Henry na Suzanne. Ol i bilip tru long tok promis bilong God olsem Em bai helpim ol man i putim Kingdom i stap namba wan long laip bilong ol. (Matyu 6:​33) Olsem na ol i sindaun long wanpela haus we ol i no mas tromoi bikpela mani long en. Ol i mekim olsem bambai i no gat wok long tupela wantaim i mekim wok mani, na ol inap lusim bikpela hap taim moa long mekim ol wok bilong lotu wantaim tupela pikinini meri bilong ol. (Hibru 13:​15, 16) Tasol wanpela gutpela pren i no klia long as na ol i mekim olsem, na em i tokim Suzanne: “Suzanne, sapos yu gat laik long stap long wanpela naispela haus, orait yu mas lusim sampela hap wok nau yu mekim.” Tasol Henry na Suzanne i save olsem taim ol i putim Jehova i stap namba wan long laip bilong ol, dispela bai “helpim [ol] long dispela laip nau [ol i] stap long en, na long laip [ol] bai kisim bihain tu.” (1 Timoti 4:8; Taitus 2:​12) Tupela pikinini meri bilong ol i kamap bikpela na ol i mekim wok bilong autim gutnius fultaim. Dispela famili i pilim olsem ol wok ol i bin mekim bilong kisim “laip tru,” dispela i bin helpim tru ol na ol i no bin sot long wanpela samting ol i mas i gat.​​—Filipai 3:8; 1 Timoti 6:​6-8.

No Ken Mekim Wok Tumas Long Ol Samting Bilong Graun

14. Wanem ol samting inap kamap sapos yumi no tingim as tru bilong i stap bilong yumi?

¹⁴ Samting nogut inap kamap sapos yumi lusim tingting long as tru bilong i stap bilong yumi na yumi slek long holimpas “laip tru.” Yumi inap pundaun long pasin bilong ‘tingting planti long ol samting i kamap long yumi na long mani samting na ol amamas bilong dispela graun.’ (Luk 8:​14) Strongpela laik bilong bungim mani kago na pasin bilong “wari long ol samting bilong bodi,” dispela inap pulim yumi long insait tru long ol wok bilong graun. (Luk 21:34) Sori tru olsem sampela i bin givim bel tru long bungim planti mani kago na dispela pasin i bin “pulim ol na ol i lusim bilip pinis, na ol i karim bikpela hevi moa,” na tu, ol i lusim pasin bilong pas gut wantaim Jehova. Man! Em ol gutpela samting tru man inap lusim sapos em i no strong long holimpas dispela “laip i stap gut oltaim oltaim”!​​—1 Timoti 6:​9, 10, 12; Sindaun 28:20.

15. Wanpela famili i ‘stap olsem samting bilong graun i no bikpela samting long laip bilong ol,’ na dispela i helpim ol olsem wanem?

¹⁵ Pol i tokim “ol man i save mekim wok long samting bilong graun [long] ol i mas i stap olsem dispela wok i no bikpela samting long laip bilong ol.” (1 Korin 7:​31) Keith na Bonnie ol i bihainim dispela tok. Keith i tok: “Mi kisim skul long kamap dentis na klostu long taim bilong pinisim skul, mi kamap wanpela Witnes Bilong Jehova. Mi mas makim wanem samting mi bai mekim. Mi inap stretim sik bilong planti man na kisim planti mani long dispela wok, tasol dispela bai pasim mipela long mekim ol wok bilong lotu. Mipela i gat 5-pela pikinini meri. Orait mi makim long daunim namba bilong ol sikman i kam long mi bambai mi gat bikpela taim moa long lukautim gut famili bilong mipela long ol samting bilong lotu na helpim tingting na bel bilong ol long i stap gut. Mipela i no gat planti mani, tasol mipela i lain long yusim gut mani na oltaim mipela i gat ol samting mipela i mas kisim. Famili bilong mipela i pas gut wantaim na oltaim mipela i stap amamas. Bihain, mipela olgeta i kirap insait long wok fultaim bilong autim tok. Ol pikinini meri bilong mipela ol i marit, na 3-pela bilong ol i gat ol pikinini. Famili bilong ol tu i stap amamas na ol i wok yet long putim laik bilong Jehova i stap namba wan.”

Putim Laik Bilong God i Stap Namba Wan

16, 17. Baibel i stori long wanem ol manmeri em ol i gat save long mekim sampela wok samting? Ol man i tingim ol long wanem samting?

¹⁶ Baibel i kamapim stori bilong sampela man em ol i bihainim laik bilong God long i stap bilong ol na stori bilong sampela man em ol i no mekim olsem. Ol skul yumi kisim long ol dispela stori i stret long olgeta kain man, maski krismas, na ples, na sindaun bilong ol i narapela narapela. (Rom 15:4; 1 Korin 10:​6, 11) Nimrot i bin wokim ol bikpela taun, tasol dispela i sakim laik bilong Jehova. (Stat 10:​8-​12) Tasol i gat planti arapela em ol i stap gutpela piksa. Moses em i wanpela bikman bilong Isip, tasol em i no tingting long holimpas dispela namba na putim i stap olsem namba wan samting long laip bilong em, nogat. Em i tingim wok bilong God olsem samting i “winim tru olgeta mani na bilas samting bilong Isip.” (Hibru 11:26) Luk, em i mekim wok dokta, ating em i stretim sik bilong Pol na sampela narapela. Tasol em i helpim tru ol narapela long rot bilong autim gutnius na raitim Baibel. Na Pol yet, em i no kisim nem olsem wanpela saveman bilong Lo, nogat, em i kisim nem olsem wanpela misineri, em man ‘God i salim i go bilong mekim wok namel long ol manmeri bilong ol arapela lain.’​​—Rom 11:13.

¹⁷ Ol man i no tingim Devit olsem wanpela komanda bilong ami o wanpela man bilong pilaim musik o raitim song, nogat, ol i tingim em olsem “wanpela gutpela man i save bihainim pasin Bikpela i laikim.” (1 Samuel 13:14) Yumi no tingim Daniel olsem wanpela ofisa bilong gavman bilong Babilon, nogat, yumi tingim em olsem gutpela profet bilong Jehova. Na yumi no tingim Esta olsem kwin bilong Persia, nogat, yumi tingim gutpela pasin bilong em long bilip na strongim bel. Na yumi no tingim Pita, Andru, Jems, na Jon, olsem ol man bilong painim pis, nogat, yumi tingim ol olsem ol aposel bilong Jisas. Na yumi no tingim Jisas olsem wanpela “kamda,” nogat, yumi tingim em olsem “dispela man God i bin makim bilong kisim bek ol manmeri bilong en.” (Mak 6:3; Matyu 16:16) Olgeta dispela lain i save olsem maski ol i save gut long mekim sampela wok o ol i gat mani kago o biknem, ol dispela samting i no ken i stap namba wan long laip bilong ol, wok bilong God i mas stap namba wan. Ol i save olsem gutpela samting tru ol inap mekim, em long stap olsem wokman o wokmeri bilong God.

18. Wanpela yangpela Kristen i mekim wanem? Em i luksave long wanem samting?

¹⁸ Seung Jin, em yumi bin stori long em long kirap bilong stori, em tu i luksave long dispela samting. Em i tok: “Mi no laik lusim olgeta strong bilong mi long wok dokta, o wok atis, o wok tisa, olsem na mi pasim tok long bel long mekim ol samting i stret wantaim dediket bilong mi long God. Nau mi mekim wok long hap we ol i sot long ol tisa bilong Baibel, na mi helpim ol man long wokabaut long rot bilong kisim laip oltaim. Bipo mi ting olsem wok fultaim bilong autim tok em i liklik wok na em bai i no inap long mi. Tasol nau mi gat planti wok long mekim, na mi traim long mekim pasin bilong mi i kamap gutpela moa na wok gut wantaim ol manmeri bilong kain kain ples. Mi luksave olsem sapos yumi putim laik bilong Jehova i stap olsem samting yumi laik mekim, orait dispela bai mekim i stap bilong yumi i gat as bilong en.”

19. Yumi mas mekim wanem na bai i stap bilong yumi i gat as tru bilong en?

¹⁹ Yumi ol Kristen, yumi kisim pinis dispela save em inap helpim yumi long abrusim bagarap na kisim laip. (Jon 17:3) Yumi “kisim pinis marimari bilong God” na nogut yumi “lusim nating.” (2 Korin 6:1) Yumi mas yusim olgeta de na yia long laip bilong yumi long givim biknem long Jehova. Yumi mas autim dispela save em inap helpim man long i stap amamas tru long nau na kisim laip oltaim long bihain. Taim yumi mekim olsem, yumi bai pilim tru dispela tok bilong Jisas: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Na i stap bilong yumi bai i gat as tru bilong en.

[Futnot]

Yu Inap Stori Long Dispela?

• Wanem samting em nambawan gutpela samting tru yumi inap mekim?

• Bilong wanem em i no gutpela tingting long putim ol samting bilong skin i stap namba wan?

• “Laip tru” em God i tok promis long en, em i wanem kain laip?

• Olsem wanem yumi ken mekim wok long laip bilong yumi bilong mekim laik bilong God?

[Ol Piksa long pes 18]

Ol Kristen i mas lusim ol samting i stret long lusim