I No Gat Wanpela Samting Bilong Pait Inap Bagarapim Yu

“I no gat wanpela bilong ol dispela samting bilong pait inap bagarapim yu.”​—AISAIA 54:17.

1, 2. Olsem wanem ol samting ol Witnes Bilong Jehova long Albenia i bin ekspiriensim i soim olsem tok bilong Aisaia 54:17 i tru?

INAP sampela yia i go pinis, long wanpela liklik kantri i gat ol ples maunten long saut-isten Yurop, i gat wanpela lain Kristen ol i gat strongpela bel. Gavman komiunis bilong dispela kantri i no bilip long God na ol i traim bes bilong ol long bagarapim ol dispela Kristen. Gavman i givim bikpela pen long ol, putim ol long ol kalabus nogut, na mekim kain kain tok giaman long ol insait long ol nius samting, tasol gavman i no inap pinisim ol. Ol dispela Kristen ol i husat? Em ol Witnes Bilong Jehova long Albenia. Maski i hatwok long bung wantaim na mekim wok autim tok, ol i no les. Ol i wok strong inap planti yia na dispela i givim ona long lotu Kristen na i litimapim nem bilong Jehova. Long las yia taim ol i dediketim nupela brens ofis bilong ol, wanpela Witnes husat i bin bihainim lotu i tru inap planti yia, em i tok: “Maski Satan i wok strong i go, em i save lus, na long olgeta taim Jehova i save win!”

² Dispela i kamapim long ples klia olsem promis God i bin mekim long ol lain pipel bilong em long Aisaia 54:17 em i tru: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu.” Ol samting i bin kamap long bipo i soim olsem maski dispela graun em Satan i bosim i mekim wanem, em i no inap pasim ol wokboi bilong God Jehova long lotuim em.

Wok Bilong Satan i No Karim Kaikai

3, 4. (a) Wanem sampela samting Satan i bin mekim long ol man i mekim lotu i tru? (b) Olsem wanem ol dispela samting Satan i mekim i no bin wok?

³ Ol birua i bin mekim kain kain samting long ol man i mekim lotu i tru, olsem tambuim wok bilong ol, ol lain man i bung na paitim ol, kalabusim ol, na ‘putim lo i tok orait long mekim nogut’ long ol. (Song 94:20) Long sampela kantri, taim ol Witnes Bilong Jehova i mekim stadi long dispela Wastaua, Satan i mekim sampela samting bilong “traim” pasin bilong ol dispela Kristen tru long bihainim stretpela pasin bilong God.​—KTH 2:10.

⁴ Olsem: Wanpela brens ofis bilong ol Witnes Bilong Jehova i tok insait long wanpela yia tasol, inap 32 taim ol man i bin paitim sampela Witnes taim ol i mekim wok autim tok. Na tu, i gat 59 taim ol polis i bin holim ol Witnes​—yangpela, lapun, man na meri​—em ol i bin autim tok long ol haus. Ol i kisim pingaprin, piksa, na kalabusim sampela olsem ol i raskol. Ol i bin tokim sampela Witnes olsem ol bai paitim na bagarapim ol. Long narapela kantri, ol i bin arestim, tokim ol long baim kot, na paitim moa long 1,100 Witnes Bilong Jehova. Dispela samting i bin painim moa long 200 Witnes long de ol i bung bilong tingim i dai bilong Jisas! Tasol maski ol birua i strong tru, spirit bilong Jehova i bin strongim ol manmeri bilong em long ol dispela kantri na long ol arapela kantri tu long winim ol dispela hevi. (Sekaraia 4:6) Maski ol birua i mekim nogut tru long ol manmeri bilong God, ol i no inap pasim ol long litimapim nem bilong Jehova. Yes, yumi bilip tru olsem i no gat wanpela samting bilong pait inap stopim God long kamapim samting em i tingting pinis long mekim.

Kamapim Klia Olsem Tok Bilong Ol i Giaman

5. Ol man i sutim wanem kain tok giaman long ol wokboi bilong Jehova long taim bilong ol aposel?

⁵ Aisaia i bin tok profet olsem ol manmeri bilong God bai bekim tok bilong ol man i sutim kain kain tok long ol. Long taim bilong ol aposel, planti man i sutim tok giaman long ol Kristen na tok ol i man nogut. Ol i mekim kain tok olsem i stap long Aposel 16:​20, 21: “Dispela tupela man . . . i wok long kirapim trabel long taun bilong yumi. Na tupela i laik pulim ol manmeri long bihainim sampela pasin em i tambu long yumi ol man bilong kantri Rom i mekim.” Long narapela taim ol birua i laik kirapim ol hetman bilong taun long birua long ol disaipel bilong Krais, na ol i sutim tok olsem: “Dispela ol man i save raun na mekim pasin nogut i kamap long olgeta hap bilong graun, na nau ol i kam i stap hia. . . . Olgeta dispela man ol i save sakim lo bilong Sisar.” (Aposel 17:​6, 7) Wanpela birua i tok aposel Pol “em i man bilong kamapim planti trabel” na em i lida bilong wanpela lain i save kirapim kros na pait namel long olgeta Juda “long olgeta hap bilong graun.”​—Aposel 24:​2-5.

6, 7. Wanem wanpela rot ol Kristen tru i ken bihainim bilong bekim tok long ol man i sutim tok giaman long ol?

⁶ Olsem na long nau yumi no kirap nogut long ol tok giaman ol man i sutim long ol Kristen tru bilong bagarapim gutnem bilong ol. Tasol olsem wanem yumi bekim tok long ol dispela tok giaman?​—Aisaia 54:17.

⁷ Planti taim gutpela pasin bilong ol Witnes Bilong Jehova i save soim olsem ol dispela tok nogut ol man i sutim i no tru. (1 Pita 2:12) Taim ol Kristen i bihainim ol lo bilong gavman na bihainim stretpela pasin na tingim na helpim ol arapela man, dispela i kamapim klia olsem ol tok ol birua i sutim long ol em i giaman. I olsem gutpela pasin bilong yumi i tokaut olsem yumi bihainim stretpela pasin. Taim ol man i lukim yumi wok strong long mekim gutpela pasin, planti taim ol bai givim biknem long Papa bilong yumi long heven, na ol i luksave olsem pasin ol wokboi bilong em i save bihainim em i nambawan tru.​—Aisaia 60:14; Matyu 5:​14-​16.

8. (a) Sampela taim ating yumi mas mekim wanem bilong sambai long bilip bilong yumi, em Baibel i as bilong en? (b) Olsem wanem yumi ken bihainim pasin bilong Jisas taim ol man i sutim tok giaman long yumi?

⁸ Yumi save bihainim stretpela pasin, tasol sampela taim yumi mas tokaut strong long bilip bilong yumi, em Baibel i as bilong en. Wanpela rot bilong mekim olsem em long askim ol gavman na ol kot long sambai long yumi. (Esta 8:3; Aposel 22:​25-​29; 25:​10-​12) Taim Jisas i bin stap long graun, sampela taim em i paitim tok i go kam wantaim ol man i sutim tok long em, na em i kamapim long ples klia tok giaman bilong ol. (Matyu 12:​34-​37; 15:​1-​11) Yumi bihainim pasin bilong Jisas na amamas long tokaut klia tru long ol samting yumi bilip long en. (1 Pita 3:15) Yumi no ken larim tok bilas bilong ol wanskul, ol wanblut i no bilip, na ol wanwok i pasim yumi long autim tok i tru bilong Baibel.​—2 Pita 3:​3, 4.

Jerusalem​—“Wanpela Ston i Hevi Tumas”

9. Dispela tok bilong Sekaraia 12:​3, olsem “ston i hevi tumas,” i makim wanem Jerusalem? Dispela ston i makim husat hia long graun?

⁹ Tok profet bilong Sekaraia i kamapim as na ol gavman i biruaim ol Kristen tru. Sekaraia 12:3 i tok: “Dispela taim i kamap pinis, orait mi bai mekim Jerusalem i kamap olsem wanpela ston i hevi tumas.” Dispela tok profet i stori long wanem Jerusalem? Tok profet bilong Sekaraia i stori long “Jerusalem i stap long heven,” em Kingdom bilong heven na ol Kristen God i bin makim ol i insait long en. (Hibru 12:22) Liklik hap lain bilong ol dispela manmeri husat bai mekim wok king long Kingdom Bilong Mesaia ol i stap yet long graun. Ol wantaim ol poroman bilong ol, em lain “arapela sipsip,” ol i tokim ol man olsem taim i sot pinis na ol i mas aninit long Kingdom Bilong God. (Jon 10:16; KTH 11:15) Ol manmeri i bin mekim wanem long dispela singaut? Na Jehova i save mekim wanem bilong helpim ol manmeri i lotu tru long em long nau? Bai yumi kisim save long dispela taim yumi wok long skelim mining bilong ol tok bilong Sekaraia sapta 12. Taim yumi mekim olsem, bai yumi bilip tru olsem ‘i no gat wanpela samting bilong pait inap winim’ ol Kristen God i makim ol na ol wanwok bilong ol, em ol i dediket pinis long God.

10. (a) Wanem as na ol man i mekim nogut long ol manmeri bilong God? (b) Wanem samting i painim ol man husat i laik apim dispela “ston i hevi tumas”?

¹⁰ Sekaraia 12:3 i tok ol kantri bai kisim “bagarap.” Dispela samting i kamap olsem wanem? God i tokaut pinis olsem ol i mas autim gutnius bilong Kingdom. Ol Witnes Bilong Jehova i ting wok bilong autim tok em i bikpela samting tru. Tasol dispela tokaut olsem Kingdom tasol inap helpim tru ol man i bin kamap olsem “wanpela ston i hevi tumas” long ol gavman. Ol i traim long apim na rausim dispela ston taim ol i laik pasim wok bilong ol man i autim tok bilong Kingdom. Taim ol i mekim olsem ol i kisim “bagarap.” Na tu, ol i kisim sem taim ol i no inap stopim ol man i autim tok. Ol i no inap pasim maus bilong ol man i lotu tru long God, em ol i pilim tru wok bilong autim “gutnius” bilong Kingdom Bilong God long han bilong Mesaia paslain long pasin bilong dispela graun i pinis. (KTH 14:6) Taim wanpela gad long wanpela haus kalabus long Afrika i lukim ol man i mekim nogut long ol wokboi bilong Jehova, em i tok: ‘Yupela i westim taim bilong yupela taim yupela i mekim nogut long dispela lain. Ol i no inap lusim bilip bilong ol, nogat. Namba bilong ol i wok long i go bikpela tasol.’

11. Olsem wanem God i bin truim tok promis bilong em i stap long Sekaraia 12:4?

¹¹ Ritim Sekaraia 12:4. Jehova i tok promis olsem em bai mekim ol lain i save birua long ol man bilong autim tok bilong Kingdom i kamap aipas na mekim ol i “longlong nabaut.” Em i bin truim tok bilong em. Olsem: Long wanpela kantri we ol i tambuim lotu i tru, ol birua i no inap pasim ol manmeri bilong God long kisim ol buk na nius bilong Baibel. Wanpela niuspepa i tok ol Witnes Bilong Jehova i yusim ol balun bilong bringim ol buk na nius i kam insait long kantri! Tok promis God i givim long ol gutpela wokboi bilong em i bin kamap tru: “Bai mi was long ol Juda, tasol bai mi mekim ai bilong ol hos bilong ol birua i pas.” Ol birua bilong Kingdom i belhat nogut tru, na dispela i mekim na ol i no tingting gut na ol i no save long samting ol i mas mekim. Tasol yumi bilip tru olsem Jehova bai lukautim lain bilong em na ol i no inap kisim bagarap.​—2 King 6:​15-​19.

12. (a) Olsem wanem yumi ken tok Jisas i kirapim paia taim em i bin stap long graun? (b) Olsem wanem ol Kristen God i bin makim i bin kirapim wanpela bikpela paia? Dispela i bin mekim wanem?

¹² Ritim Sekaraia 12:​5, 6. Dispela tok “ol lida bilong Juda” i makim ol man i go pas long lukautim lain bilong God. Jehova i kirapim ol long givim bel tru long lukautim ol samting bilong Kingdom bilong em hia long graun. Jisas i bin tokim ol disaipel olsem: “Mi bin kam bilong tromoi paia long graun.” (Luk 12:49) Na tru tumas, em i bin kirapim wanpela paia. Jisas i givim bel tru long autim tok, na dispela i mekim na tok bilong Kingdom Bilong God em i nambawan bikpela tok. Dispela i kirapim bikpela tok pait namel long olgeta lain Juda. (Matyu 4:​17, 25; 10:​5-7, 17-​20) Wankain olsem “bikpela paia i kukim kunai o olsem paia i lait long gaden wit i drai pinis,” ol disaipel bilong Krais long taim bilong yumi i bin kirapim bikpela paia. Long 1917, buk The Finished Mysterya i bin kamapim long ples klia pasin giaman bilong Kristendom. Dispela i mekim na ol pris pasto i belhat tru. Na i no longtaim i go pinis, Kingdom Nius Namba 37, “Pinis Bilong Lotu Giaman i Kam Klostu Tru!” i bin kirapim planti man long makim olsem ol i sapotim Kingdom Bilong God o nogat.

Kisim Bek “Ol Haus Sel Bilong Juda”

13. Dispela tok “ol haus sel bilong Juda” i makim wanem samting? Bilong wanem Jehova bai kisim bek dispela lain?

¹³ Ritim Sekaraia 12:​7, 8. Long tok ples ol i bin raitim Baibel long en long pastaim, mining bilong dispela tok ol i tanim olsem “ol soldia bilong Juda” em olsem “ol haus sel bilong Juda.” Long Israel bilong bipo em pasin bilong ol long yusim ol haus sel, sampela taim ol wasman bilong sipsip na ol man i wok gaden bai i sindaun long ol haus sel. Sapos ol birua i kam bilong pait long Jerusalem, namba wan lain husat i mas kisim helpim, em ol lain i stap long ol haus sel. Dispela tok “ol haus sel bilong Juda” i makim ol Kristen God i makim long holi spirit, na i olsem ol i stap ausait long ples klia na ol i no stap insait long ol taun i gat banis. Long dispela hap ol i no pret long lukautim ol samting bilong Kingdom Bilong Mesaia. Namba wan lain Jehova bai kisim bek em ol Juda i sindaun long “ol haus sel,” bikos Satan bai pait long ol pastaim.

14. Olsem wanem Jehova i lukautim “ol Juda i sindaun long ol haus sel” na helpim ol?

¹⁴ Tru tumas, ol samting i bin kamap i kamapim klia olsem Jehova i save lukautim ol dispela ambasedo bilong Kingdom taim ol i stap ples klia long “ol haus sel” bilong ol.b Em i helpim ol na mekim “ol man i no gat strong bilong pait” i kamap strong olsem King Devit.

15. Bilong wanem Jehova i tok long “bagarapim olgeta kantri”? Em bai mekim olsem long wanem taim?

¹⁵ Ritim Sekaraia 12:9. Bilong wanem Jehova i tok long “bagarapim olgeta kantri”? Bikos long olgeta taim ol i wok long biruaim Kingdom Bilong Mesaia. Ol i mekim nogut long ol manmeri bilong God, olsem na God i tok ol bai kisim bagarap. Klostu nau lain bilong Satan hia long graun bai kirapim laspela pait long ol manmeri i lotu tru long God. Dispela bai kirapim pait em Baibel i kolim Armagedon. (KTH 16:​13-​16) Na dispela bai kirapim Nambawan Jas long mekim samting bilong lukautim ol wokboi bilong em na mekim holi nem bilong em namel long olgeta lain manmeri.​—Esekiel 38:​14-​18, 22, 23.

16, 17. (a) Wanem dispela ‘pasin God i mekim long olgeta wokman bilong em’? (b) Taim Satan i mekim nogut long yumi na yumi sanap strong na karim dispela hevi, dispela i kamapim klia wanem samting?

¹⁶ Ol samting bilong pait em Satan i yusim i no inap bagarapim bilip o daunim pasin bilong ol manmeri bilong God long givim bel long wok. Yumi stap bel isi, long wanem, yumi save olsem Jehova i yusim strong bilong em bilong helpim yumi, na dispela em i ‘pasin God i mekim long olgeta wokman bilong em.’ (Aisaia 54:17) I no gat wanpela man i ken pasim yumi long kisim dispela bel isi na stap gut long ol samting bilong lotu. (Song 118:6) Satan bai wok yet long kirapim ol man long birua na mekim nogut long yumi. Pasin bilong yumi long stap gut long God na sanap strong taim ol man i mekim nogut long yumi, dispela i kamapim klia tru olsem spirit bilong God i stap long yumi. (1 Pita 4:14) Long olgeta hap ol man i autim gutnius olsem Kingdom Bilong Jehova i kamap pinis. Ol birua i bin mekim kain kain samting bilong pasim wok bilong ol manmeri bilong God, tasol long strong bilong Jehova ol wokboi bilong em inap winim ol samting ol birua i mekim. (Sekaraia 9:15) Ol birua i no inap stopim lain remnan na ol gutpela wanwok bilong ol!

¹⁷ Yumi amamas long Jehova bai kisim bek yumi taim Satan i laik pait long yumi. Yumi ken stap bel isi, long wanem, Jehova i tok i ‘no gat wanpela samting bilong pait inap bagarapim yumi. Na bai yumi sanap strong na bekim tok bilong ol man i sutim ol kain kain tok long yumi’!

[Ol Futnot]

Bai Yu Bekim Olsem Wanem?

• Wanem samting i soim olsem ol samting bilong pait em Satan i yusim i no karim kaikai?

• Olsem wanem Jerusalem long heven i kamap “wanpela ston i hevi tumas”?

• Olsem wanem Jehova i kisim bek “ol haus sel bilong Juda”?

• Taim bilong Armagedon i wok long kam klostu, yumi bilip strong long wanem samting?

[Ol Piksa long pes 21]

Maski Satan i birua long lain pipel bilong Jehova long Albenia, ol i stap gut long Jehova

[Piksa long pes 23]

Jisas i bin kamapim long ples klia tok giaman bilong ol man

[Ol Piksa long pes 24]

Ol birua i no inap mekim wanpela samting bilong pasim ol wokboi bilong Jehova long autim gutnius