Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap long daunbilo:

• Bilong wanem “Olpela Testamen” inap helpim ol man longpela taim?

Man i kamapim tok bilong en i no wanpela God nogut, nogat, em i dispela God i gat pasin laikim, em God Jehova. Jisas na ol disaipel bilong em i bin kamapim ol tok bilong Ol Skripsa Hibru. Olpela Testamen i kamapim ol gutpela tok bilong helpim i stap bilong ol man na i kamapim ol gutpela samting bilong bilip na wet long en.​—9/1, pes 4-7.

• Wanem gutpela samting i bin kamap long rot bilong larim sampela haptaim i lus bihain long Adam na Iv i bin mekim sin?

Insait long 6 tausen yia bihain long Adam na Iv i mekim sin, ol samting i kamapim klia olsem Satan em i man bilong giaman​—Adam na Iv na planti milion tumbuna pikinini bilong ol i bin i dai. Dispela haptaim i lus i kamapim klia olsem i no gat gutpela samting inap kamap sapos ol man i no larim God i bosim wokabaut bilong ol, na tu, ol i no gat rait o save inap long bosim wokabaut bilong ol yet.​—9/15, pes 6-7.

• Bilong wanem ol i no sutim tok long Jekop long em i tok em i Iso?

I stret Jekop i kisim blesing bilong papa bilong em, long wanem, em i bin baim dispela namba olsem namba wan pikinini long Iso. Taim Aisak i luksave olsem em i givim blesing long Jekop, Aisak i no painim rot bilong senisim dispela samting, nogat. Na God i no mekim wanpela samting bilong pasim na dispela i kamapim klia olsem em i laik bai blesing i go long Jekop.​—10/1, pes 31.

• Yumi olgeta i gat maus bilong bel, olsem wanem dispela i pait wantaim tok bilong evolusen?

Namel long ol man bilong kain kain skin kala na sindaun, i gat ol man i bin redi long helpim ol narapela, maski ol yet i mas karim sampela hevi bilong mekim olsem. Kain pasin bilong i no tingim ol yet tasol i no inap i stap sapos ol manmeri i olsem ol animal i mekim kain kain samting bilong stap laip.​—10/15, pes 20.

• Bilong wanem yumi ken tok God i gat pasin daun, na em i kamapim dispela pasin long wanem rot?

God em Nambawan Bikpela na Man Bilong Wokim olgeta samting, em i no gat mak bilong ol samting em inap mekim olsem yumi man i gat. Tasol olsem tok bilong 2 Samuel 22:36 (NW) i makim, God i save daunim em yet taim em i tingim tru ol man nating em ol i mekim ol samting bilong amamasim em, na em i marimari long ol. Jehova i stap antap na em i lukluk i kam daun bilong mekim gut long ol manmeri i save pret long em.​​—11/1, pes 4-5.

• Olsem wanem ol ostraka bilong bipo i strongim tok bilong Baibel?

Ol saveman i bin painim ol hap hap sospen graun long Samaria i gat nem bilong 7-pela lain tumbuna i stap long Josua 17:​1-6. Ol hap hap sospen graun ol i painim long Arat i strongim stori bilong Baibel long ol lain pris na i gat nem bilong God long en. Ol ostraka bilong Lakis i stori gut long ol samting bilong wok politik na ol hevi i kamap long Juda paslain long ol Babilon i kam pait long ol.​​—11/15, pes 12-​14.

• Wanem samting i mekim na ol man i ting olsem Luk i raitim Buk Aposel?

Gutnius Luk i Raitim na Buk Aposel i go long Tiofilus na dispela i makim olsem Luk i bin raitim dispela tupela buk. Pasin bilong yusim dispela tok “mipela” i soim olsem Luk i bin insait long sampela samting em Buk Aposel i stori long en. (Aposel 16:​8-​15)​​—11/15, pes 18.

• Kristen i mas i gat wanem tingting long painim abus na painim pis?

Kirap long taim bilong Noa na i kam, God i bin orait long ol man i ken kilim ol animal na kaikai. Tasol ol i mas rausim blut, dispela lo i makim olsem yumi mas rispektim laip bilong ol animal, long wanem, God yet i givim laip long ol. Ol Kristen i no ken kilim animal olsem pilai tasol, o bilong kisim amamas o kilim nating nating. Em i bikpela samting long bihainim lo bilong gavman na tingim maus bilong bel bilong ol narapela. (Rom 14:13)​​—12/1, pes 31.