Pasin Laikim Bilong God i Kamap Klia Long Pasin Laikim Bilong Mama
“Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a? . . . Tasol mi no inap tru lusim tingting long yupela.”—AISAIA 49:15.
NUPELA bebi i slip gut long han bilong mama na susu i stap. Yumi lukim olsem mama i laikim em tru na i mekim pasin isi long em. Wanpela mama nem bilong em Pam, i tok: “Taim mi holim nupela bebi bilong mi long namba wan taim, mi pilim tru long bel olsem mi laikim em tumas na mi gat wok long lukautim dispela nupela pikinini.”
Ol saveman i skelim pasin bilong ol mama, na save ol i kisim i strongim wanpela tok olsem, pasin laikim bilong mama i save helpim tingting na skin bilong pikinini long kamap gutpela. Wanpela nius em wanpela lain (World Health Organization Programme on Mental Health) i kamapim, i tok: “Ol i kisim save olsem ol liklik pikinini em mama i lusim ol, ol i save bel hevi, na sampela taim bikpela pret i kisim ol.” Na nius i stori long wanpela lain i bin kisim save olsem ol pikinini em mama i laikim na i mekim gut long ol kirap long taim ol i liklik yet, tingting bilong ol i wok gut na ol inap kisim bikpela save, winim ol pikinini em mama i no save laikim na mekim gut long ol.
Alan Schore, em profesa bilong wanpela skul (UCLA School of Medicine) long Amerika, em i stori long pasin laikim bilong mama i bikpela samting, em i tok: “Taim bebi i nupela, pastaim em i save pas gut wantaim mama, na dispela pasin i stiaim pikinini na em i lain long pasin bilong pas gut wantaim ol narapela taim em i bikpela pinis.”
Tasol sori tru, sik bilong bel hevi, o narapela sik o hevi inap mekim na mama i no lukautim gut pikinini o ating em i “lusim tingting long pikinini em yet i bin karim.” (Aisaia 49:15) Tasol i no planti mama i save mekim olsem. I luk olsem taim mama i karim pikinini, pasin bilong laikim tumas pikinini i stap pinis long bel bilong em. Ol saveman i bin kisim save olsem, taim mama i wok long karim pikinini, wanpela homon long skin (oxytocin) i kamap bikpela. Dispela homon i save kirapim wok bilong bel long subim pikinini i kam ausait na bihain kamapim susu long mama. Skin bilong man na meri wantaim i save kamapim dispela homon, na ol i ting em i save kirapim tu mama long laikim tumas pikinini na mekim gut long em.
Wanem As Bilong Pasin Laikim?
Ol man i laik strongim bilip bilong evolusen, ol i tok pasin bilong ol mama long laikim tumas pikinini, em i bin kamap nating tasol na i stap yet long skin bilong ol mama, long wanem, dispela i helpim ol. Olsem, nius Mothering Magazine i tok: “Namba wan hap bilong kru bilong yumi i bin kamap bihain long hap kru yumi bin kisim long ol palai samting, em i bosim pasin bilong pilim ol samting long bel. Dispela hap kru i save kirapim mama na pikinini long pas gut wantaim.”
Tru, ol i bin kisim save olsem dispela hap bilong kru i gat wok long kamapim pasin bilong pilim ol samting long bel. Tasol yu ting pasin bilong mama long laikim tru pikinini bilong em i bin kamap nating long rot bilong hap kru bilong palai samting?
Orait tingim dispela: Baibel i tok God i bin wokim ol man i kain olsem em yet, olsem ol inap kamapim ol pasin bilong God. (Stat 1:27) Nambawan bikpela pasin bilong God, em pasin laikim. Aposel Jon i tok: “Man i no gat pasin laikim em i no save long God.” Bilong wanem? “Long wanem, God em i pasin laikim.” (1 Jon 4:8, NW) Tingim, dispela ves bilong Baibel i no tok God i gat pasin laikim. Em i tok God em i pasin laikim. Em i As bilong pasin laikim.
Baibel i tok: ‘Man i save givim bel bilong en long ol arapela, em i no save kros kwik na bekim pasin nogut ol i mekim long em. Nogat. Em i save mekim gutpela pasin long olgeta man. Em i no save bel nogut long ol man i gat planti samting, litimapim nem bilong em yet, hambak na bikhet nabaut, tingting tumas long em yet, belhat kwik, tingim rong ol i mekim long em, na amamas long pasin i no stret. Nogat. Em i save amamas long stretpela pasin. Em i save bilip long God na wetim God i helpim em. Na long taim bilong hevi em i save sanap strong. Dispela pasin bilong givim bel bilong yumi long ol arapela, em i no inap pinis.’ (1 Korin 13:4-8) Orait yu ting i stret long ting olsem dispela nambawan gutpela pasin tru i bin kamap nating tasol?
Dispela i Mekim Wanem Long Yu?
Taim yu ritim tok long paragraf paslain long dispela i stori long pasin laikim, ating bel bilong yu i gat laik tru long wanpela i soim kain pasin laikim long yu, a? Na i stret yu gat dispela laik. Bilong wanem? Long wanem, “yumi stap pikinini bilong God.” (Aposel 17:29) God i bin wokim yumi bambai yumi inap pilim pasin laikim bilong narapela na yumi ken soim pasin laikim long ol. Na yumi ken bilip tru olsem God i save laikim tru yumi. (Jon 3:16; 1 Pita 5:6, 7) Ves bilong Baibel yumi bin kamapim long kirap bilong dispela stori i tokaut olsem pasin bilong God long laikim tru yumi i strong moa na i save stap oltaim, winim pasin bilong mama long laikim tru pikinini bilong em.
Tasol ating yu tingting olsem: ‘Sapos God i gat savetingting, strong, na pasin laikim, bilong wanem em i no pinisim ol pen na hevi? Bilong wanem em i save larim ol pikinini i dai, na i no pinisim pasin bilong daunim ol narapela, na pasin bilong bagarapim graun long rot bilong mekim nabaut long ol samting bilong graun na pasin mangal?’ Em ol gutpela askim yumi mas kisim ol stretpela bekim long en.
Maski sampela man i tok wanem, yumi inap painim ol gutpela bekim bilong ol dispela askim. Planti milion manmeri long planti handet kantri, ol i painim pinis ol dispela bekim taim ol i stadi long Baibel wantaim ol Witnes Bilong Jehova. Ol lain i wokim dispela nius ol i singautim yu long mekim olsem. Taim yu wok long kisim save long God long rot bilong stadi long Baibel na long ol samting em i bin wokim, bai yu pilim tru olsem em i no stap longwe na yu inap kisim save long em. Bai yu bilip tru olsem God “i no i stap longwe long yumi olgeta wan wan.”—Aposel 17:27.
[Rait long pes 8]
Pasin bilong God long laikim yumi i strong moa, winim pasin bilong mama long laikim pikinini bilong em