Bihainim Pasin Bilong Pol na Kamap Strongpela Kristen
“Mi bin ran strong long gutpela resis bilong laip. Nau mi kamap pinis long mak, na mi bin holimpas bilip.”—2 TI. 4:7.
1, 2. Sol bilong Tarsus i mekim wanem ol senis long laip bilong em? Em i kirap mekim wanem bikpela wok?
EM I wanpela saveman na man bilong tingting strong long mekim ol samting. Tasol em i save “bihainim laik nogut bilong olpela bel.” (Ef. 2:3) Bihain em i stori long em yet olsem em i bin ‘tok bilas long nem bilong Jisas, na birua long em na tok nogut long em.’ (1 Ti. 1:13) Dispela man em Sol bilong Tarsus.
2 Bihain, Sol i mekim ol bikpela senis tru long laip bilong em. Em i lusim ol pasin bipo em i save mekim na em i wok strong ‘long helpim ol arapela manmeri na i no helpim em yet.’ (1 Ko. 10:33) Em i isi long ol man na em i laikim tru ol man bipo em i birua long ol. (Ritim 1 Tesalonaika 2:7, 8.) Em i tok: “God i mekim mi i kamap wokman bilong autim dispela gutnius.” Na em i tok moa: “Mi aninit tru long olgeta arapela manmeri bilong God, tasol em i marimari long mi na givim dispela wok long mi, em wok bilong autim gutnius long ol arapela lain. Dispela gutnius i tok long olgeta gutpela samting bilong Krais.”—Ef. 3:7, 8.
3. Taim yumi stadi long ol pas Pol i bin raitim na ol stori bilong wok bilong em, olsem wanem dispela inap helpim yumi?
3 Sol, narapela nem bilong em Pol, em i kamap strongpela Kristen tru. (Ap. 13:9) Wanpela gutpela rot bilong yumi ken kamap strong long tok i tru, em yumi ken stadi long ol pas Pol i bin raitim na ol stori bilong wok bilong em na bihainim bilip bilong em. (Ritim 1 Korin 11:1; Hibru 13:7.) Nau yumi ken skelim olsem wanem dispela bai kirapim yumi long wokim gutpela sediul bilong mekim stadi bilong yumi yet, kisim pasin bilong laikim tru ol man, na kisim stretpela tingting long yumi yet.
Pasin Bilong Pol Long Stadi
4, 5. Olsem wanem pasin bilong Pol long stadi i bin helpim em?
4 Taim Pol i bin stap wanpela Farisi na ‘sumatin bilong Gamaliel na Gamaliel i bin skulim em gut tru long olgeta lo,’ em i gat sampela save pinis long buk bilong God. (Ap. 22:1-3; Fl. 3:4-6) Bihain stret long baptais bilong em, Pol i “go i stap long kantri Arebia”—ating em i go long Ples Nating Bilong Siria o long wanpela hap bilong Poin Bilong Arebia i no gat planti man na em inap tingim tingim long bel ol tok em i stadi long en. (Ga. 1:17) Pol i laik tingting long ol skripsa i kamapim klia olsem Jisas em i Mesaia. Na tu, Pol i laik redi long wok em bai kirap long mekim. (Ritim Aposel 9:15, 16, 20, 22.) Pol i lusim hap taim bilong tingim tingim long bel ol tok bilong God.
5 Save Pol i kisim long ol skripsa taim em i mekim stadi bilong em yet i helpim em long skulim gut ol man long tok i tru. Long haus lotu bilong Antiok long Pisidia, Pol i kamapim tok bilong 5-pela skripsa bilong Ol Skripsa Hibru bilong soim olsem Jisas em i Mesaia. Na tu, planti taim Pol i kolim sampela tok bilong Ol Skripsa Hibru. Pasin bilong em long toktok long ol skripsa i gutpela tru, olsem na “planti Juda wantaim planti manmeri bilong ol arapela lain i bihainim pasin bilong lotu bilong ol Juda, ol i bihainim Pol wantaim Barnabas” bilong kisim sampela save moa. (Ap. 13:14-44) Sampela yia bihain, taim sampela Juda bilong Rom i kam long haus Pol i stap long en, em i toktok long “kingdom bilong God long ol. Em i kamapim sampela tok i stap long lo bilong Moses na long ol buk bilong ol profet, na long dispela ol tok em i wok strong long kirapim tingting bilong ol bai ol i ken bilip long Jisas.”—Ap. 28:17, 22, 23.
6. Wanem samting i helpim Pol long stap strong taim ol traim i painim em?
6 Taim ol traim i painim Pol, em i wok yet long skelim buk bilong God na kisim strong long ol dispela tok em holi spirit bilong God i bin kamapim. (Hi. 4:12) Taim em i kalabus i stap long Rom paslain long ol man i kilim em i dai, Pol i askim Timoti long bringim “ol buk” na ‘ol buk ol i bin wokim long skin bilong abus’ i kam long em. (2 Ti. 4:13) Ating ol dispela buk em ol hap bilong Ol Skripsa Hibru em Pol i yusim bilong mekim stadi bilong em yet. Pasin bilong kisim save long buk bilong God long rot bilong stadi oltaim long Baibel, em i bikpela samting long Pol bambai em i ken stap strong.
7. Stori long ol gutpela samting yu inap kisim long rot bilong stadi oltaim long Baibel.
7 Pasin bilong stadi oltaim long Baibel na pasin bilong tingim tingim gut long bel ol tok yumi stadi long en, bai helpim yumi long kamap strongpela Kristen. (Hi. 5:12-14) Man bilong raitim song i stori long olsem wanem Tok Bilong God i gutpela bilong helpim yumi. Em i tok: “Mi no save laikim mani olsem mi laikim lo bilong yu. Lo bilong yu i stap wantaim mi oltaim na i givim planti save long mi. Na dispela i mekim mi i saveman tru na mi winim save bilong ol birua bilong mi. Mi surik long bihainim pasin nogut, long wanem, mi laik bihainim tok bilong yu tasol.” (Sng. 119:72, 98, 101) Olsem wanem? Yu gat sediul bilong mekim stadi bilong yu yet long Baibel? Yu wok long ritim Baibel long olgeta de na tingim tingim ol tok yu ritim bilong redim yu yet long mekim sampela wok moa bilong God long bihain?
Sol i Lain Long Laikim Tru Ol Man
8. Sol i mekim wanem kain pasin long ol man i no bilong lotu Juda?
8 Taim Sol i no kamap wanpela Kristen yet, em i givim bel tru long lotu bilong em, tasol em i no tingim ol man i no bilong lotu Juda. (Ap. 26:4, 5) Em i lukluk i stap na em i orait long ol Juda i stonim Stiven. Ating samting Sol i lukim i strongim em long ting pasin bilong em long birua long ol Kristen i stret, na i stret Stiven i kisim strafe na ol man i kilim em i dai. (Ap. 6:8-14; 7:54–8:1) Baibel i tok: “Sol i wok long bagarapim ol manmeri bilong sios. Em i go insait long ol haus bilong ol na em i kisim ol man na meri wantaim. Na em i pulim ol i go na i putim ol long kalabus.” (Ap. 8:3) Em i ‘belhat nogut tru long ol, na em i go painim ol long ol taun i stap longwe tu, bai em i ken mekim save long ol.’—Ap. 26:11.
9. Wanem samting i painim Sol na dispela i kirapim em long skelim pasin em i mekim long ol man?
9 Sol i go long Damaskus long mekim nogut long ol disaipel bilong Krais i stap long dispela hap taim Bikpela Jisas i kamap long em. Bikpela lait bilong Pikinini Bilong God i mekim na Sol i kamap aipas na ol narapela i mas helpim em. Taim Jehova i oraitim ai bilong Sol long rot bilong Ananaias, tingting bilong Sol long ol manmeri i bin senis tru. (Ap. 9:1-30) Taim em i kamap disaipel bilong Krais, em i wok strong long bihainim wankain pasin Jisas i bin mekim long olgeta man. Olsem na em i lusim pasin bilong pait na bagarapim man na em i “stap wanbel wantaim olgeta man.”—Ritim Rom 12:17-21.
10, 11. Olsem wanem Pol i soim olsem em i laikim tru ol man?
10 Pol i stap wanbel wantaim ol narapela man, tasol em i laik mekim sampela samting moa. Em i laik soim olsem em i laikim ol tru, na wok autim tok i opim rot long em i ken mekim olsem. Long namba 1 raun bilong Pol long autim gutnius, em i autim gutnius long Esia Maina. Maski ol man i birua tru, Pol na ol poroman bilong em i wok strong long helpim ol man i gat pasin daun long kamap Kristen. Pol na ol poroman bilong em i go bek gen long Listra na Aikoniam, maski pastaim ol birua long ol dispela taun i bin traim long kilim Pol i dai.—Ap. 13:1-3; 14:1-7, 19-23.
11 Bihain, Pol na ol poroman bilong em i painim ol man i gat gutpela bel long taun Filipai, long Masedonia. Wanpela meri i bihainim lotu Juda, nem bilong em Lidia, em i putim yau long gutnius na kamap Kristen. Ol bikman bilong gavman i paitim Pol na Sailas long kanda na putim ol long kalabus. Tasol Pol i autim tok long woda, na dispela woda wantaim famili bilong em i kisim baptais na kirap lotuim Jehova.—Ap. 16:11-34.
12. Wanem samting i kirapim bikhetman Sol long kamap wanpela gutpela aposel bilong Jisas Krais?
12 Bilong wanem Sol—bipo em i birua long ol Kristen—i kirap bihainim bilip bilong ol man em i bin mekim nogut long ol? Wanem samting i kirapim dispela bikhetman long kamap wanpela aposel i gat gutpela pasin tru, na i redi long lusim laip bilong em bilong helpim ol narapela man long save long tok i tru bilong God na Krais? Pol yet i tok: “God . . . i singautim mi long kamap man bilong em yet. Na long taim em yet i makim em i soim Pikinini bilong en long mi.” (Ga. 1:15, 16) Pol i raitim pas i go long Timoti na tok: “[Krais Jisas] i sori long mi pastaim, na mi stap olsem piksa, bai olgeta manmeri i ken lukim samting em i bin mekim long mi, na ol tu ol i ken bilip long em na kisim laip i stap gut oltaim oltaim.” (1 Ti. 1:16) Jehova i lusim rong bilong Pol, na sori na marimari long em, na dispela i kirapim Pol long soim pasin laikim long ol man long rot bilong autim gutnius long ol.
13. Wanem samting i mas kirapim yumi long kamapim pasin laikim long ol narapela? Olsem wanem yumi ken mekim olsem?
13 Jehova i save lusim tingting long ol sin na popaia bilong yumi tu. (Sng. 103:8-14) Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?” (Sng. 130:3) Sapos God i no marimari long yumi, i no gat wanpela bilong yumi inap mekim wok bilong God, na yumi no inap wet long kisim laip oltaim. Gutpela pasin sori God i bin mekim long yumi olgeta i bikpela tru. Olsem Pol, yumi mas kamapim pasin laikim long ol narapela long rot bilong autim tok long ol na skulim ol long tok i tru, na strongim ol wanbilip bilong yumi.—Ritim Aposel 14:21-23.
14. Olsem wanem yumi inap mekim bikpela wok moa bilong autim tok?
14 Pol i laik mekim gut moa wok bilong autim gutnius, na em i pilim tru pasin bilong Jisas long mekim dispela wok. Wanpela rot we Pikinini Bilong God i soim bikpela pasin laikim long ol man, em long rot bilong autim tok. Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt. 9:35-38) Pol i mekim ol samting i stret wantaim tok ating em yet i mekim bilong singautim sampela wokman moa na em i givim bel long wok. Olsem wanem long yu? Yu inap mekim wok autim tok bilong yu i kamap gutpela moa? O yu inap lusim bikpela hap taim moa long autim gutnius bilong Kingdom, o ating yu inap kirap mekim wok painia? Yumi mas soim olsem yumi laikim tru ol narapela long rot bilong helpim ol long “holimpas tok i gat laip.”—Fl. 2:15, 16.
Tingting Bilong Pol Long Em Yet
15. Taim Pol i skelim em yet wantaim ol wanbilip Kristen, em i gat wanem tingting?
15 Olsem wanpela wokman Kristen, Pol i stap gutpela piksa tru bilong yumi long wanpela narapela samting tu. Em i kisim planti gutpela wok insait long kongrigesen Kristen, tasol Pol i save ol dispela blesing i no olsem pe em i kisim, na em i no ting em i kisim ol dispela wok long wanem em i gat gutpela save. Nogat. Em i save ol dispela blesing em i kisim em rot bilong God long kamapim gutpela pasin sori bilong em. Pol i save ol narapela Kristen tu i mekim gut wok bilong autim gutnius. Maski em i gat bikpela wok insait long lain bilong God, em i gat pasin daun.—Ritim 1 Korin 15:9-11.
16. Olsem wanem Pol i kamapim pasin daun taim tok bilong katim skin i kamap?
16 Tingim pasin Pol i mekim bilong stretim wanpela hevi i kamap long taun Antiok bilong Siria. Kongrigesen Kristen i no wanbel long pasin bilong katim skin. (Ap. 14:26–15:2) God i bin makim Pol long go pas long autim tok long ol narapela lain i no bin katim skin, olsem na em inap ting em i gat gutpela save tru long pasin bilong toktok wantaim ol man i no bilong lain Juda na em inap tru long stretim dispela hevi. (Ritim Galesia 2:8, 9.) Taim hatwok bilong em long stretim dispela hevi i no karim kaikai, long pasin daun em i go lukim lain bilong bosim ol Kristen long Jerusalem bilong toktok long dispela samting. Em i wok gut wantaim dispela lain em ol i putim gut yau taim em i stori long dispela hevi, na ol i wokim disisen, na makim Pol long kamap wanpela bilong ol man i kisim tok bilong ol i go long ol kongrigesen. (Ap. 15:22-31) Long dispela rot Pol i “strong long litimapim nem bilong” ol wanbilip bilong em.—Ro. 12:10b.
17, 18. (a) Pol i gat wanem kain tingting long ol brata insait long ol kongrigesen? (b) Pasin ol elda bilong Efesus i mekim taim Pol i laik lusim ol i kamapim klia wanem samting?
17 Pol i gat pasin daun na em i pas gut wantaim ol brata na sista insait long kongrigesen. Long pinis bilong pas em i raitim long ol Rom, em i kolim nem bilong winim 20 manmeri na tok gude long ol. Planti bilong ol dispela nem i no stap long narapela hap bilong Baibel, na wan wan tasol bilong ol i bin mekim bikpela wok insait long kongrigesen. Tasol ol i stap gut long Jehova, na Pol i laikim ol tru.—Ro. 16:1-16.
18 Pasin daun na pasin pren bilong Pol i strongim ol kongrigesen. Taim em i bung wantaim ol elda bilong Efesus long laspela taim, “ol i holimpas Pol na i givim kis long em. Ol i sori nogut tru, long wanem, Pol i bin tok long ol bai i no inap lukim pes bilong en moa.” Sapos Pol i gat pasin antap na i no pas gut wantaim ol brata, ol bai no inap mekim kain pasin olsem long em.—Ap. 20:37, 38.
19. Olsem wanem yumi ken ‘daunim yumi yet’ taim yumi stap wantaim ol wanbilip Kristen?
19 Olgeta man husat i laik kamap strongpela Kristen ol i mas i gat wankain pasin daun olsem Pol. Em i tokim ol wanbilip Kristen long ‘ol i no ken tingting long ol yet tasol, na wok long kamapim biknem bilong ol. Nogat. Ol i mas daunim ol yet na ol i mas ting pasin bilong ol narapela i winim pasin bilong ol.’ (Fl. 2:3) Olsem wanem yumi ken bihainim dispela tok? Wanpela rot, em yumi ken wok gut wantaim ol elda long kongrigesen bilong yumi, bihainim tok bilong ol na wanbel long ol disisen ol i mekim. (Ritim Hibru 13:17.) Narapela rot, em yumi givim biknem long ol brata na sista insait long kongrigesen. Ol kongrigesen bilong lain bilong Jehova i gat ol manmeri bilong kain kain kantri, lain, na skin. Tasol yumi mas lain long laikim tru olgeta bratasista na mekim wankain pasin long ol, olsem Pol i bin mekim. (Ap. 17:26; Ro. 12:10a) Baibel i tok yumi mas ‘amamas long kisim ol arapela Kristen i kam i stap wantaim yumi, olsem Krais tu i bin amamas long yumi ken i stap wantaim em. Na long dispela pasin yumi kamapim biknem bilong God.’—Ro. 15:7.
“Ran Strong” Long Resis Bilong Laip
20, 21. Wanem samting bai helpim yumi long ran long resis bilong kisim laip?
20 Laip bilong Kristen i olsem wanpela longpela resis. Pol i tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God. Nau prais bilong man i winim resis em i redi na i wetim mi i stap. Dispela prais em i olsem. Bikpela bai i kolim mi stretpela man. Bikpela i save bihainim pasin i stret tasol na skelim pasin bilong ol manmeri, na long De bilong bikpela kot bilong em, em bai i givim dispela prais long mi. Na em bai i no givim long mi wanpela tasol. Nogat. Em bai i givim long olgeta man i laikim tumas long lukim em na i wetim em i kamap ples klia.”—2 Ti. 4:7, 8.
21 Sapos yumi bihainim pasin bilong Pol, dispela bai helpim yumi long ran long resis bilong kisim laip i stap gut oltaim oltaim. (Hi. 12:1) Olsem na em i bikpela samting long yumi wok long kamap strongpela Kristen long rot bilong wokim gutpela sediul bilong mekim stadi bilong yumi yet, kisim pasin bilong laikim tru ol man, na holimpas pasin daun.
Bai Yu Bekim Olsem Wanem?
• Pasin bilong Pol long stadi oltaim long buk bilong God i helpim em olsem wanem?
• Bilong wanem em i bikpela samting long ol Kristen tru i mas laikim tru ol manmeri?
• Wanem ol pasin bai helpim yu long mekim wankain pasin long olgeta man?
• Olsem wanem pasin bilong Pol i ken helpim yu long wok gut wantaim ol elda long kongrigesen bilong yu?
[Piksa long pes 23]
Kisim strong long buk bilong God, olsem Pol i bin mekim
[Piksa long pes 24]
Kamapim pasin laikim long rot bilong autim gutnius long ol narapela
[Piksa long pes 25]
Yu save bilong wanem ol brata i laikim tru Pol?