Wanpela Gel Long Nau i Olsem Yangpela Gel Israel
LONG 2006, tupela wik paslain long bung bilong Memorial bilong tingim dai bilong Jisas, olgeta wan wan long Sales famili long Praia Grande, Brasil, ol i wokim lista bilong ol man ol i laik singautim i kam long dispela bung. Abigayl, em i gat 6-pela krismas, i kisim wanpela invatesen pepa na ol i askim em long em i laik givim pepa long husat.
Em i tok: “Long dispela man i save smail long mi long olgeta taim.”
Papamama bilong em i askim em: “Em i husat?”
Em i tok: “Em dispela man i save sindaun long wilsia.”
Fopela de bihain, Abigayl i soim dispela man long papamama bilong em. Dispela man, Walter, i save stap klostu long Haus Kingdom. Winim 15 yia i go pinis, taim em i gat 28 krismas, em i bin kisim bagarap long ka eksiden na em i paralais. Em i gat tupela bodi gad, long wanem, em i wanpela maniman. Taim Abigayl i kisim tok orait long toktok wantaim Walter, papamama i tokim Walter olsem pikinini meri bilong ol i laik givim wanpela invatesen pepa long em.
Long pinis bilong tok bilong em, Abigayl i tok: “Olgeta narapela long Haus Kingdom bilong mipela i kisim planti invatesen pepa, tasol mi kisim wanpela tasol, olsem na mi singautim yu tasol. Sapos yu no kam, bai mi no gat wanpela visita i kam. Tasol sapos yu kam, bai mi amamas tru, na Jehova bai i amamas moa yet.”
Long de bilong Memorial, ol Witnes, na Abigayl tu, ol i klinim Haus Kingdom bilong redi long Memorial i kamap long nait. Long dispela apinun Walter i abrusim Haus Kingdom na taim em i lukim Abigayl, em i tokim draiva bilong em long stopim ka. Em i opim windo na askim Abigayl long em i mekim wanem. Abigayl i tokim em olsem ol i klinim Haus Kingdom na bai haus i luk nais taim em i kam.
Long dispela nait Abigayl i tingting planti. Tok bilong Memorial i kirap, na em i lukluk raun bilong save Walter i kam pinis o nogat. Orait wantu, Walter na ol bodi gad bilong em ol i kam. Abigayl i smail bikpela tru. Bihain long tok, Walter i tok olsem em i bin kirap long go long narapela taun, tasol em i senisim tingting na kam long Memorial—bilong amamasim Abigayl. Na em i tok moa: “Dispela tok i stret long mi.” Em i askim ol long givim wanpela Baibel long em, na em i kirap stadi na kam long ol miting.
Susa bilong Walter i tok em i laik bungim Abigayl; em i tok brata bilong em i save stori planti taim long Abigayl. Taim em i bungim Abigayl, em i amamas long kisim save olsem Abigayl i wanpela gutpela liklik gel. Em i tok: “Nau mi save long as na brata bilong mi i amamas tru.”
Walter i wok yet long stadi na kam long ol miting. Em i save bekim tok long ol miting na tokim ol narapela man long ol samting em i lainim. Stori bilong Abigayl i kirapim yumi long tingim yangpela gel Israel husat i helpim Naman long kisim save long trupela God, Jehova.—2 King 5:2-14.