Go Klostu Long God
“Em i No i Stap Longwe Long Yumi Olgeta Wan Wan”
TAIM yumi skelim traipela ples antap wantaim ol man bilong graun, ol man i samting nating tasol. Ating sampela taim yu bin tingting, ‘Tru ol man nating inap pas gut wantaim God i Gat Olgeta Strong?’ Dispela samting inap kamap sapos God, em nem bilong em Jehova, em yet i gat laik long yumi stap klostu long em. Yu ting em i laik bai yumi stap klostu long em? Yumi inap painim bekim bilong dispela askim long ol tok aposel Pol i bin givim long ol saveman bilong Atens, i stap long Aposel 17:24-27. I gat 4-pela samting bilong Jehova em Pol i toktok long en.
Namba wan samting, Pol i tok “God i bin wokim skai na graun wantaim olgeta samting i stap long en.” (Aposel sapta 17 Ves 24) Ol kain kain gutpela samting i mekim yumi stap amamas i kamapim klia olsem Man Bilong Wokim yumi i save tingim na laikim yumi. (Rom 1:20) Olsem na i no stret long ting kain God olsem i gat laik long i stap longwe long ol manmeri em i laikim.
Namba tu samting, Jehova “i save givim laip na win na olgeta samting long olgeta manmeri.” (Aposel sapta 17 Ves 25) Jehova em i Man bilong helpim yumi long i stap laip. (Song 36:9) Ol samting bilong helpim yumi long i stap laip olsem win, wara, na kaikai, olgeta em presen i kam long Man Bilong Wokim yumi. (Jems 1:17) Yu ting i stret long ting olsem God bilong givim planti gutpela presen long yumi bai i gat laik long stap longwe long yumi na i no larim yumi long save long em na i go klostu long em, em samting i olsem wanpela gutpela presen? Nogat.
Namba tri samting, “long wanpela tumbuna tasol [God] i bin mekim olgeta lain manmeri i kamap.” (Aposel sapta 17 Ves 26) Jehova i save mekim wankain pasin long olgeta man na em i no tingim wanpela lain tasol. (Aposel 10:34) Bilong wanem em i mekim olsem? Em i bin wokim “wanpela tumbuna,” em Adam, na long rot bilong em olgeta lain bilong graun i bin kamap. Laik bilong God em olsem em “i laik kisim bek olgeta manmeri.” (1 Timoti 2:4) Olsem na rot i op long yumi ken i go klostu long em maski yumi gat wanem skin kala, o yumi bilong wanem kantri na lain.
Laspela samting, Pol i mekim wanpela gutpela tok bilong strongim yumi, em i tok: Jehova “i no i stap longwe long yumi olgeta wan wan.” (Aposel sapta 17 Ves 27) Tru, Jehova i stap antap tru, tasol olgeta taim em i redi long i stap klostu long ol man i gat laik tru long i stap klostu long em. Baibel i strongim yumi olsem em i no stap longwe long yumi, nogat, em i save “stap klostu long ol” manmeri i save singaut long em.—Song 145:18.
Tok bilong Pol i kamapim klia olsem God i laik bai yumi stap klostu long Em. Tasol ol man i gat laik long “painim em,” ol tasol em i larim ol long kam klostu long em. (Aposel sapta 17 Ves 27) Wanpela buk bilong ol man i save tanim tok bilong Baibel i tok, dispela tok i “kamapim klia olsem yumi inap i go klostu long em.” Yumi ken tok piksa olsem: Sapos em i tudak insait long wanpela rum yu save long en, ating bai yu wok long painim swits bilong lait o painim dua, tasol yu save olsem yu bai painim. Olsem tasol, sapos yumi gat laik tru long painim God na i go klostu long em, tru tumas, olsem Pol i tok, bai yumi “painim em.”—Aposel sapta 17 Ves 27.
Olsem wanem? Yu gat bikpela laik long i stap klostu long God? Sapos yu bilip na “wok long painim em” bai yu no inap bel hevi. I no hatwok long painim Jehova, long wanem, “em i no i stap longwe long yumi olgeta wan wan.”