Skulim Ol Pikinini Bilong Yu

Samuel i Wok Strong Yet Long Mekim Pasin i Stret

OLSEM WANEM? Yu save lukim ol narapela i mekim pasin nogut?​—a Samuel i bin lukim. Em i bin stap long hap we yu inap ting ol man i no inap mekim pasin nogut. Em i stap long haus lotu sel bilong God, o ples bilong mekim lotu, long taun Silo. Orait yumi ken skelim olsem wanem dispela haus lotu sel i kamap olsem haus bilong Samuel. Dispela samting i bin kamap winim 3,000 yia i go pinis.

Paslain long Samuel i bon, mama bilong em, Hana, i laik tru long karim pikinini. Wanpela taim Hana i go long haus lotu sel, na em i beten long God long dispela samting. Em i beten strong long tingting na maus bilong em i meknais, tasol i no gat toktok i kamap. Olsem na hetpris Eli i ting olsem em i spak. Tasol taim Eli i kisim save olsem Hana i bel hevi tru, Eli i blesim em na i tok: “God bilong yumi Israel i ken givim yu dispela samting yu bin askim em.”​—1 Samuel 1:17.

Bihain, Samuel i bon. Hana i amamas tru na em i tokim man bilong em, Elkana olsem: ‘Taim Samuel i lusim susu stret, bai mi kisim em i go long haus lotu sel na em bai mekim wok bilong God long dispela hap.’ Orait Hana i mekim olsem em i bin tok! Long dispela taim, ating Samuel i gat 4-pela o 5-pela krismas samting.

Eli i kamap lapun, na tupela pikinini man bilong em, Hopni na Finias, ol i no lotuim Jehova long pasin i stret. Na tu, tupela i save pamuk wantaim ol meri i kam long haus lotu sel! Yu ting papa bilong ol i mas mekim wanem?​​— Yes, em i mas stretim ol na em i no ken larim ol i mekim ol dispela pasin nogut.

Yangpela Samuel i kamap bikpela long haus lotu sel, na ating em i save long ol pasin nogut tupela pikinini man bilong Eli i save mekim. Olsem wanem? Samuel i bihainim pasin nogut bilong ol?​​— Nogat, em i wok strong yet long bihainim pasin i stret, olsem papamama bilong em i bin skulim em long mekim. Tasol yumi no kirap nogut olsem Jehova i bin kros long Eli. Em i bin salim tu wanpela profet bilong tokim Eli long olsem wanem Em bai givim strafe long lain famili bilong Eli, na moa yet long tupela bikhet pikinini man bilong em.​—1 Samuel 2:​22-​36.

Samuel i wok yet long mekim wok bilong God wantaim Eli long haus lotu sel. Orait, wanpela nait taim Samuel i slip i stap, em i harim wanpela nek i kolim nem bilong em. Olsem na Samuel i ron i go long Eli, tasol Eli i tok em i no bin singautim em. Wankain samting i kamap gen. Orait, bihain long wankain samting i kamap namba tri taim, Eli i tokim Samuel long tok olsem: “Bikpela, yu ken tokim mi. Mi wokboi bilong yu na mi putim yau long tok bilong yu.” Taim Samuel i mekim dispela tok, orait nau Jehova i toktok long em. Yu save long samting Jehova i tokim Samuel long en?​—

God i tokim Samuel olsem Em bai givim strafe long lain famili bilong Eli olsem bipo Em i bin tok long en. Long moningtaim, Samuel i pret long tokim Eli long samting Jehova i bin tokim em. Tasol Eli i tokim Samuel olsem: “Yu no ken haitim wanpela tok long mi.” Olsem na Samuel i tokim Eli long olgeta samting Jehova i tok long mekim​—olsem bipo profet bilong Em i bin tokim Eli long en. Eli i tok: “Sapos em [Jehova] i laik mekim wanem samting, orait em i ken mekim.” Bihain, ol i kilim Hopni na Finias i dai, na Eli tu i dai.​—1 Samuel 3:​1-​18.

Insait long dispela haptaim, “Samuel i kamap bikpela man, na Bikpela i stap wantaim em.” Ating nau Samuel i gat 13 o 14 krismas samting. Na kain krismas olsem em wanpela haptaim i bikpela samting long laip bilong ol yangpela. Yu ting em i isi long Samuel long mekim yet pasin i stret maski ol arapela i no mekim?​​— Maski i gat hatwok, Samuel i stap gut long wok bilong Jehova na em i mekim olsem long laip olgeta bilong em.​—1 Samuel 3:​19-​21.

Olsem wanem long yu? Bai yu bihainim pasin bilong Samuel taim yu wok long kamap bikpela? Bai yu wok strong yet long bihainim pasin i stret? Bai yu wok yet long bihainim ol tok bilong Baibel na ol samting papamama i bin skulim yu long en? Sapos yu mekim olsem, orait yu bai mekim Jehova na papamama bilong yu i amamas.

[Futnot]

Ol Askim:

○ Olsem wanem na Samuel i kirap mekim wok bilong Jehova long haus lotu sel?

○ Samuel i gat wanem ol hatwok long dispela hap?

○ Samuel i stap wanem kain piksa long ol yangpela?