Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w08 9/15 p. 16-20
  • Holimpas ‘Baklain i Gat Tripela String’ Insait Long Marit

No gat vidio bilong dispela seksen.

Sori, popaia kamap long lodim vidio.

  • Holimpas ‘Baklain i Gat Tripela String’ Insait Long Marit
  • Wastaua i tokaut Long Kingdom Bilong Jehova—2008
  • Ol Liklik Het Tok
  • Wankain Infomesen
  • Jehova i Mas Stap Insait Long Marit
  • Taim Ol Hevi i Kamap
  • Sampela Blesing Moa
  • Marit—Presen i Kam Long God
    Rot Bilong Stap Yet Insait Long Laikim Bilong God
  • Strongim na Lukautim Gut Marit
    Wastaua i Tokaut Long Kingdom Bilong Jehova (Stadi Edisen)—2016
  • Marit—Presen i Kam Long God
    “Stap Insait Yet Long Pasin Laikim Bilong God”
  • Bihain Long Weding De
    Rot Bilong Stap Yet Insait Long Laikim Bilong God
Lukim Moa
Wastaua i tokaut Long Kingdom Bilong Jehova—2008
w08 9/15 p. 16-20

Holimpas ‘Baklain i Gat Tripela String’ Insait Long Marit

“Sapos ol i tanim tripela string na wokim baklain, orait dispela baklain i no inap bruk kwiktaim.”​—SAV. 4:12.

1. Husat i wokim marit bilong namba wan man na meri?

TAIM God Jehova i wokim pinis ol animal na ol diwai na plaua samting, em i wokim namba wan man, Adam. Bihain God i mekim Adam i slip i dai tru, na Em i kisim wanpela bun long sait bilong Adam bilong wokim nambawan gutpela helpim bilong em. Taim Adam i lukim meri, em i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi.” (Stt. 1:27; 2:​18, 21-​23) Jehova i soim olsem em i amamas long dispela samting, na em i wokim marit bilong namba wan man na meri na em i blesim tupela.​—Stt. 1:28; 2:24.

2. Olsem wanem Satan i putim hevi namel long Adam na Iv?

2 Sori tru, i no longtaim bihain na hevi i kamap long marit em God i bin kamapim. Olsem wanem dispela i kamap? Wanpela spirit nogut, bihain em i kisim nem Satan, em i giamanim Iv long kisim kaikai bilong dispela wanpela diwai em God i bin tambuim tupela long en. Bihain liklik, Adam i bihainim meri bilong em long bikhet long wok bos bilong God na gutpela wok bilong Em long stiaim tupela. (Stt. 3:​1-7) Taim Jehova i askim tupela long samting ol i bin mekim, em i klia tru olsem hevi i stap pinis namel long tupela. Adam i sutim tok long meri bilong em na i tok: “Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.”​—Stt. 3:​11-​13.

3. Sampela Juda i bin kisim wanem tingting kranki?

3 Kirap long dispela taim na i kam, Satan i bin yusim kain kain rot bilong kamapim hevi insait long marit. Sampela taim em i bin yusim ol bikman bilong lotu long kirapim ol man long kisim kain kain tingting long marit, em ol tingting em Baibel i no as bilong en. Sampela bikman bilong lotu Juda i bin daunim ol lo bilong God, na ol i larim man i katim marit na lusim meri bilong em long ol liklik liklik samting, olsem meri i putim planti sol tumas long kaikai. Tasol Jisas i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”​—Mt. 19:9.

4. Wanem ol samting i wok long bagarapim marit long nau?

4 Satan i wok strong yet long bagarapim marit. Long sampela hap, tupela man o tupela meri i marit, man na meri i no marit tru ol i stap wantaim, na i no hatwok long ol marit i katim marit, ol dispela samting i soim olsem wok bilong Satan i karim kaikai. (Ritim Hibru 13:4.) Yumi ol Kristen inap mekim wanem na bai yumi no kisim tingting kranki em planti man i gat long marit? Nau yumi ken skelim sampela pasin bilong ol marit em ol i stap gut na amamas wantaim.

Jehova i Mas Stap Insait Long Marit

5. Insait long marit ‘baklain i gat tripela string’ i makim wanem samting?

5 Bilong marit i ken i stap strong, Jehova i mas stap insait long en. Baibel i tok: “Sapos ol i tanim tripela string na wokim baklain, orait dispela baklain i no inap bruk kwiktaim.” (Sav. 4:12) ‘Baklain i gat tripela string’ em wanpela tok piksa. Taim yumi yusim dispela tok piksa bilong stori long marit, tupela string i makim man na meri, na ol i tanim wantaim namba tri string, em God Jehova. Taim tupela marit i pas gut wantaim God, dispela i strongim tupela long karim ol hevi, na em rot bilong kisim bikpela amamas insait long marit.

6, 7. (a) Ol Kristen i ken mekim wanem na bai God i stap insait long marit bilong ol? (b) Wanpela sista i laikim tru wanem pasin bilong man bilong em?

6 Tasol tupela marit i ken mekim wanem na bai marit bilong ol i stap olsem baklain i gat tripela string? Man bilong raitim song, Devit, i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Sng. 40:8) Pasin bilong yumi long laikim tru God i kirapim yumi long givim bel olgeta long mekim wok bilong em. Olsem na man na meri wantaim i mas pas gut wantaim Jehova na amamas long mekim laik bilong em. Ol marit i mas wok strong tu long strongim pasin bilong poroman bilong ol long laikim tru God.​—Snd. 27:17.

7 Sapos lo bilong God i stap tru long bel bilong yumi, bai yumi kamapim ol kain pasin olsem bilip, pasin laikim, na pasin bilong wetim gutpela samting i kamap, em ol pasin i save strongim marit. (1 Ko. 13:13) Sandra, em wanpela Kristen i bin marit inap 50 yia pinis, em i tok: “Ol pasin bilong man bilong mi em mi save laikim tru, em pasin bilong em long givim ol gutpela tok bilong Baibel long mi bilong stiaim mi, na pasin bilong em long laikim tru Jehova, em dispela i winim pasin bilong em long laikim mi.” Yupela ol man marit, olsem wanem? Ol meri bilong yupela inap mekim wankain tok long yupela?

8. Ol marit i mas mekim wanem bambai “wok bilong tupela i kamap gutpela” insait long marit?

8 Olsem wanem? Yupela ol marit, yupela i save putim ol samting bilong spirit na wok bilong Kingdom i stap nambawan long laip bilong yupela? Na tu, yupela i save tingim poroman marit bilong yupela olsem poroman bilong yupela long mekim wok bilong Jehova? (Stt. 2:24) Saveman King Solomon i tok: “I no gutpela long man i stap wanpis. . . . Sapos tupela man i poroman long wok, orait bai wok bilong tupela i kamap gutpela moa.” (Sav. 4:9) Tru tumas, man na meri marit i mas wok strong bambai “wok bilong tupela i kamap gutpela,” olsem tupela i stap gut na amamas wantaim na God i blesim marit bilong ol.

9. (a) Ol man marit i gat wanem wok bilong mekim? (b) Kolosi 3:19 i tok, man marit i mas mekim wanem kain pasin long meri bilong em?

9 Wanpela samting bilong makim sapos God i stap insait long marit o nogat, em hatwok man na meri wantaim i mekim bilong bihainim ol lo bilong Em. Ol man marit i mas go pas long lukautim famili long ol samting bilong skin na spirit. (1 Ti. 5:8) Ol i mas tingim tu bel na tingting bilong meri bilong ol. Kolosi 3:19 i tok: “Yupela man, yupela i mas laikim tru ol meri bilong yupela, na yupela i no ken mekim nogut bel bilong ol.” Wanpela saveman bilong Baibel i tok, dispela tok “mekim nogut” i olsem “mekim hatpela tok long meri, o tromoi strong tok, na i no mekim gut, lukautim, sambai, na helpim meri.” I no stret long kain pasin olsem i kamap insait long famili Kristen. Taim man marit i bihainim gutpela pasin laikim na mekim wok bos bilong em, dispela bai mekim na meri i amamas long stap daun long em.

10. Ol meri Kristen i mas kamapim wanem kain pasin?

10 Ol meri Kristen husat i laik bai Jehova i ken i stap insait long marit bilong ol, ol tu i mas bihainim ol lo bilong God. Aposel Pol i tok: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios.” (Ef. 5:​22, 23) Satan i bin giamanim Iv, em i kamapim tok giaman olsem pasin bilong man long bosim wokabaut bilong em yet, dispela em rot bilong stap amamas tru. Nau yumi ken lukim olsem insait long planti marit, ol meri i laik bosim wokabaut bilong ol yet. Tasol ol meri i gat tingting bilong God long marit, ol i amamas long stap daun long het bilong ol. Ol i tingim olsem Jehova i bin makim Iv long i stap “poroman bilong helpim” man bilong em, na i klia tru olsem God i ting dispela i wanpela gutpela samting tru ol meri i ken mekim. (Stt. 2:18) Meri Kristen husat i amamas long mekim wok God i givim long em, em i “givim biknem” long man bilong em.​—Snd. 12:4.

11. Wanpela brata i tok wanem samting i bin helpim marit bilong em?

11 Narapela samting bilong helpim ol marit na bai God i ken stap insait long marit bilong ol, em pasin bilong tupela long stadi wantaim long Baibel. Gerald i bin marit inap 55 yia, na em i tok: “Nambawan bikpela samting bilong helpim marit long stap gut, em pasin bilong ritim na stadi wantaim long Baibel.” Em i tok moa, “Pasin bilong mekim ol samting wantaim, na moa yet ol wok bilong God, dispela i save mekim na tupela marit i pas gut wantaim na ol i pas gut wantaim Jehova.” Pasin bilong stadi wantaim long Baibel i helpim famili long tingim gut ol lo bilong Jehova, na pas gut moa wantaim Em, na kamap strongpela Kristen.

12, 13. (a) Bilong wanem em i bikpela samting long tupela marit i mas beten wantaim? (b) Wanem ol narapela wok Kristen i save strongim marit?

12 Ol marit i stap amamas wantaim, ol i save beten tu wantaim. Taim man i “autim olgeta hevi” na i kolim stret ol samting i painim tupela marit, dispela bai strongim marit bilong ol. (Sng. 62:8) Olsem, em bai i no hatwok tumas long stretim kros yu gat wantaim poroman bilong yu bihain long yutupela wantaim i askim God i Gat Olgeta Strong long stiaim yupela! (Mt. 6:​14, 15) Bilong mekim ol samting i stret wantaim beten, tupela wantaim i mas pasim tok long bel long helpim narapela narapela na long ‘karim hevi na lusim sin’ bilong narapela. (Kl. 3:13) Tingim, pasin bilong beten i soim olsem yutupela i wetim God long helpim yupela. King Devit i tok: “Olgeta samting i gat laip i save lukluk i go long em.” (Sng. 145:15) Taim yumi lukluk i go long God na beten long em, bai yumi no tingting planti long planti samting, long wanem, yumi save olsem God i ‘wari long yumi.’​—1 Pi. 5:7.

13 Narapela rot bilong helpim marit na bai Jehova i ken stap insait long marit, em pasin bilong go long ol miting bilong kongrigesen na wok wantaim long wok autim tok. Long ol miting bilong yumi, ol marit i lain long pasin bilong sakim ol “trik na giaman Satan i save hait na mekim” bilong brukim ol famili. (Ef. 6:11) Na man na meri marit husat i mekim wok autim tok wantaim, ol i lain long “stap strong, na i no ken surik liklik.”​—1 Ko. 15:58.

Taim Ol Hevi i Kamap

14. Wanem ol samting inap givim hevi long ol marit?

14 Tru, ating ol dispela tok yumi skelim pinis i no nupela tok, tasol gutpela sapos yu toktok gut wantaim poroman bilong yu long ol dispela samting. Skelim sapos yupela i mas bihainim gut moa yet sampela bilong ol dispela tok. Tasol Baibel i tok olsem ol marit em God i stap insait long marit bilong ol, ol tu “bai i painim planti hevi long laip bilong ol.” (1 Ko. 7:28) Yumi no gutpela olgeta, na pasin nogut bilong dispela graun i laik pulim yumi, na Satan i gat ol trik na giaman bilong em, olsem na ol hevi i save kamap insait tu long ol marit bilong ol gutpela wokboi bilong God. (2 Ko. 2:11) Tasol Jehova i helpim yumi long karim ol dispela hevi. Yes, yumi inap long mekim olsem. Ol bikpela hevi i painim gutpela man Jop olsem ol bulmakau samting, ol wokboi, na ol pikinini bilong em i dai. Tasol Baibel i tok: “Ol dispela taim nogut i painim Jop, tasol em i no mekim sin na em i no tok nogut long God.”​—Jop 1:​13-​22.

15. Hevi inap kirapim man long mekim wanem? Taim hevi i kirapim wanpela long kros, poroman bilong em i mas mekim wanem?

15 Tasol meri bilong Jop i tokim Jop olsem: “Olsem wanem na yu bihainim God yet? Mobeta yu lusim em na tok nogut long em na yu ken i dai.” (Jop 2:9) Em nau, taim ol bikpela hevi i painim yumi, dispela inap bagarapim bel na kirapim yumi long mekim pasin kranki. Saveman Solomon i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Sav. 7:​7, NW) Sapos hevi o samting bilong “daunim” man i kamap na dispela i mekim na poroman marit bilong yu i kros na mekim tok i bagarapim bel, traim long stap isi. Pasin bilong bekim tok long wankain pasin inap kirapim wanpela bilong yutupela o yutupela wantaim long mekim sampela tok i mekim hevi i go bikpela. (Ritim Song 37:8.) Olsem na no ken tingting tumas long ol “toktok nabaut” em poroman bilong yu i mekim taim em i bel hevi o sampela hevi i painim em.​—Jop 6:3.

16. (a) Olsem wanem tok bilong Jisas long Matyu 7:​1-5 i stret long ol marit? (b) Bilong wanem stretpela tingting i bikpela samting insait long marit?

16 Ol marit i mas i gat stretpela tingting long narapela narapela. Wanpela inap luksave long sampela pasin long poroman bilong em na tingting, ‘Mi inap senisim pasin bilong em.’ Long gutpela pasin laikim na pasin isi, ating isi isi yu inap helpim poroman bilong yu long stretim sampela pasin bilong em. Tasol no ken lusim tingting long tok bilong Jisas, em i tok man i skelim tumas ol liklik pasin kranki bilong narapela, em i olsem man i lukim “liklik hap pipia” i stap long ai bilong brata bilong em, tasol em i no lukim “bikpela plang” i stap long ai bilong em yet. Jisas i tokim yumi: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu.” (Ritim Matyu 7:​1-5.) Dispela i no makim olsem ol marit i no gat wok long stretim ol pasin i no stret. Nogat. Robert i bin marit klostu 40 yia, na em i tok: “Taim tupela i toktok gut na tokaut stret long ol samting na orait long tok narapela i mekim long sampela pasin bilong narapela, dispela inap kirapim tupela long senisim sampela pasin bilong ol.” Olsem na kisim stretpela tingting. No ken bel hevi long poroman bilong yu i no gat sampela pasin yu laikim, yu mas lain long tingim na amamas long ol gutpela pasin em i gat long nau.​—Sav. 9:9.

17, 18. Taim ol hevi i go bikpela, yumi ken mekim wanem bilong kisim helpim?

17 Ol traim inap kamap taim sampela senis i kamap long sindaun bilong tupela marit. Ating sampela hevi i painim ol taim ol i gat ol pikinini. Poroman marit o pikinini inap kisim bikpela sik. Ating ol i gat wok bilong lukautim lapun papamama. Ol pikinini i bikpela pinis ol inap lusim haus na i go sindaun long wanpela longwe ples. Ol wok tiokratik insait long kongrigesen o oganaisesen inap kamapim ol narapela senis. Olgeta dispela senis inap kamapim sampela hevi na putim presa long tupela marit.

18 Sapos ol hevi insait long marit bilong yu i mekim na yu ting yu no inap karim moa ol dispela hevi, orait yu ken mekim wanem? (Snd. 24:10) No ken givap! Satan i gat bikpela laik tru long ol wokboi bilong God i lusim lotu i tru. Em bai amamas moa sapos tupela marit i mekim olsem. Olsem na mekim olgeta samting yu inap mekim na bai marit bilong yu i olsem baklain i gat tripela string. Baibel i gat stori bilong planti man husat i bin stap gut long God maski ol bikpela traim i painim ol. Olsem, wanpela taim Devit i autim ol hevi bilong em long Jehova na i tok: “God, yu mas marimari long mi. . . . Oltaim ol birua i mekim nogut long mi.” (Sng. 56:1) Olsem wanem? Sampela taim yu pilim olsem “birua” i mekim nogut long yu? Maski wanpela long famili i givim hevi long yu o sampela arapela man i givim hevi long yu, tingim dispela: Devit i kisim strong bilong karim hevi, na yu tu inap mekim olsem. Devit i tok: “Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi.”​—Sng. 34:4.

Sampela Blesing Moa

19. Olsem wanem yumi ken sakim Satan?

19 Long dispela taim bilong pinis, ol marit i mas wok long ‘givim gutpela tok long narapela na strongim bel bilong em.’ (1 Te. 5:11) No ken lusim tingting, Satan i sutim tok olsem yumi tingim yumi yet na long dispela as yumi stap gut long Jehova. Satan bai yusim kain kain rot, na em inap brukim ol marit tu, bilong bagarapim pasin bilong yumi long stap gut long God. Bilong sakim Satan, yumi mas bilip tru long Jehova. (Snd. 3:​5, 6) Pol i tok: “[God] i save strongim mi, na long strong bilong em mi inap mekim olgeta samting.”​—Fl. 4:13.

20. Bai yumi kisim wanem ol blesing sapos God i stap insait long marit bilong yumi?

20 Yumi kisim planti blesing taim God i stap insait long marit. Dispela samting i bin painim Joel na meri bilong em, em tupela i bin marit inap 51 yia. Joel i tok: “Oltaim mi save tenkyu long Jehova long meri bilong mi na pasin bilong mitupela long stap amamas wantaim. Em i wanpela gutpela poroman tru.” Wanem samting i mekim na marit bilong ol i stap strong? Joel i tok: “Oltaim mipela i traim long mekim gutpela pasin, i no les kwik, na laikim tru narapela narapela.” I no gat wanpela bilong yumi inap mekim gut olgeta dispela samting long dispela taim nau yumi stap long en. Tasol gutpela sapos yumi wok strong long bihainim ol stiatok bilong Baibel na mekim ol samting na bai Jehova i stap insait long marit bilong yumi. Sapos yumi mekim olsem, orait marit bilong yumi bai stap olsem ‘baklain i gat tripela string na i no inap bruk kwiktaim.’​—Sav. 4:12.

Yu Inap Tingim?

• Wanem mining bilong dispela tok Jehova i stap insait long marit?

• Ol marit i mas mekim wanem taim ol hevi i kamap?

• Olsem wanem yumi ken save sapos God i stap insait long marit o nogat?

[Ol Piksa long pes 18]

Pasin bilong beten wantaim i helpim ol marit long karim ol hevi

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim