Sakim “Spirit Bilong Dispela Graun”
“Mipela i no bin kisim spirit bilong dispela graun. Nogat. Mipela i kisim Spirit i kam long God.”—1 KO. 2:12.
1, 2. (a) Long bipo, bilong wanem ol i putim ol pisin kaneri insait long ol main long Briten? (b) Wanem samting nogut inap painim ol Kristen?
LONG 1911, gavman bilong Briten i kamapim wanpela lo i bilong lukautim laip bilong ol man i wok long ol main bilong painim ol ston kol. Olgeta wan wan main i mas i gat tupela pisin kaneri. Bilong wanem i olsem? Sapos paia i kirap insait long main, ol man i go helpim ol wokman, ol bai kisim ol pisin kaneri i stap insait long liklik haus pisin na karim i go wantaim ol. Ol dispela liklik pisin i save pilim hariap ol ges i gat posin long en, olsem kabon monoksait. Sapos ges nogut i stap long win, ol pisin bai soim olsem ol i pilim dispela ges, na ol inap pundaun tu long hap ol i sindaun long en insait long haus pisin. Dispela samting olsem tok lukaut i bikpela samting. Kabon monoksait i no gat kala o smel bilong en, na em i save kilim man i dai long rot bilong stopim ol retpela sel long karim oksijen i go long olgeta hap bilong bodi. Sapos ol man bilong i go helpim ol wokman i no kisim tok lukaut, ol inap airaun na bihain ol i dai na ol i no save olsem ol i bin pulim ges nogut.
2 Wankain samting i painim ol wokman bilong main i save painim ol Kristen long ol samting bilong spirit. Olsem wanem dispela i kamap? Taim Jisas i givim wok long ol disaipel bilong em long autim gutnius long olgeta hap, em i save olsem em i salim ol i go long hap i gat ol samting nogut long en, em hap we Satan na spirit bilong graun i bosim ol samting. (Mt. 10:16; 1 Jo. 5:19) Jisas i wari tru long ol disaipel, olsem na long nait paslain long em i dai, em i beten long Papa bilong em olsem: “Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol.”—Jo. 17:15.
3, 4. Jisas i givim wanem tok lukaut long ol disaipel bilong em? Bilong wanem yumi mas tingim dispela tok lukaut?
3 Jisas i givim tok lukaut long ol disaipel long ol samting inap bagarapim ol long ol samting bilong spirit. Tok bilong em i gat bikpela mining long yumi, long wanem, yumi stap long taim bilong las de bilong pasin nogut bilong dispela graun. Em i tokim ol disaipel: “Oltaim yupela i mas was i stap . . . na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.” (Lu. 21:34-36) Tasol Jisas i tok promis tu olsem Papa bilong em bai givim holi spirit bilong helpim ol long tingim ol samting ol i bin lainim, na long was i stap na sanap strong.—Jo. 14:26.
4 Olsem wanem? Dispela wankain holi spirit i stap bilong helpim yumi long nau? Sapos olsem, orait yumi mas mekim wanem bilong kisim dispela spirit? Spirit bilong graun em wanem samting, na olsem wanem em i mekim wok? Na olsem wanem yumi inap sakim dispela spirit bilong graun?—Ritim 1 Korin 2:12.
Holi Spirit o Spirit Bilong Graun?
5, 6. Holi spirit inap mekim wanem long yumi? Yumi mas mekim wanem bilong kisim holi spirit?
5 I no ol lain long taim bilong ol aposel tasol inap kisim holi spirit. Nogat. Long nau tu yumi inap kisim holi spirit bilong God, na em inap strongim yumi long mekim ol samting i stret na long mekim wok bilong God. (Ro. 12:11; Fl. 4:13) Em inap helpim tu yumi long kamapim ol kain pasin olsem, pasin laikim, helpim man, na gutpela pasin, em ol pasin holi spirit i save kirapim yumi long mekim. (Ga. 5:22, 23) Tasol God Jehova i no fosim ol man long kisim holi spirit sapos ol i no laik kisim.
6 Olsem na i stret yumi mekim dispela askim, ‘Mi inap mekim wanem bilong kisim holi spirit?’ Baibel i soim olsem i gat ol samting yumi ken mekim. Wanpela samting em olsem, yumi mas askim God long givim holi spirit long yumi. (Ritim Luk 11:13.) Narapela gutpela samting em pasin bilong stadi long Baibel na bihainim ol tok bilong en. (2 Ti. 3:16) Tru, i no olgeta man husat i ritim tasol Baibel ol i kisim spirit bilong God, nogat. Tasol taim wanpela Kristen i gat gutpela bel i stadi long Tok Bilong God, em inap pilim ol tingting i stap long Baibel. Em i bikpela samting tu long yumi bilip olsem Jehova i bin makim Jisas long stap olsem mausman bilong Em na rot bilong God long givim spirit bilong em long ol man. (Kl. 2:6) Olsem na yumi mas bihainim pasin bilong Jisas na ol tok em i lainim ol man long en. (1 Pi. 2:21) Taim yumi wok strong long bihainim pasin bilong Krais, bai yumi kisim moa yet holi spirit.
7. Olsem wanem spirit bilong graun i save stiaim ol man?
7 Tasol spirit bilong graun i kirapim ol man long bihainim pasin bilong Satan. (Ritim Efesus 2:1-3.) Spirit bilong graun i wok long planti rot. Olsem yumi inap lukim long olgeta hap long nau, spirit bilong graun i kirapim ol man long bikhet long ol lo bilong God. Dispela spirit i strongim “pasin bilong bel kirap na aigris na bikhet.” (1 Jo. 2:16) Em i kamapim ol pasin bilong olpela bel, olsem pasin pamuk, lotuim god giaman, wok bilong ol spirit nogut, pasin jeles, belhat, na pasin bilong dring spak. (Ga. 5:19-21) Na em i strongim tok bilong ol apostet, em ol tok i no bihainim tingting bilong God. (2 Ti. 2:14-18) Sapos man i larim spirit bilong graun i stiaim em strong, em bai bihainim moa yet pasin bilong Satan.
8. Yumi olgeta i mas mekim wanem?
8 Yumi no inap banisim yumi yet long olgeta samting bilong dispela graun. Olgeta wan wan man i mas makim wanem samting ol bai larim i bosim laip bilong ol—holi spirit o spirit bilong graun. Ol man husat i larim spirit bilong graun i bosim ol long nau, ol inap lusim dispela spirit na larim holi spirit i stiaim laip bilong ol. Tasol tu, ol lain em holi spirit i bin stiaim ol, spirit bilong graun inap pulim ol. (Fl. 3:18, 19) Orait nau yumi ken skelim rot bilong sakim spirit bilong graun.
Luksave Long Ol Samting i Givim Tok Lukaut
9-11. Wanem samting inap givim tok lukaut olsem spirit bilong graun i wok long pulim yumi?
9 Ol wokman bilong main long Briten i bin yusim ol pisin kaneri bilong givim tok lukaut sapos ges nogut i stap long win. Sapos wokman i lukim pisin i pundaun long hap em i sindaun long en, em i save em i mas mekim sampela samting hariap bilong abrusim bagarap. Long laip bilong yumi ol Kristen, wanem ol samting i givim tok lukaut olsem spirit bilong graun i wok long pulim yumi?
10 Taim yumi lainim ol tok i tru bilong Baibel na dediketim laip bilong yumi long Jehova, ating yumi bin amamas long ritim Baibel. Ating yumi bin givim bel long beten na yumi beten planti taim. Na yumi bin amamas long i go long ol miting bilong kongrigesen, na tingim olsem olgeta miting i givim nupela strong long yumi, olsem hulwara i save strongim man em nek bilong em i drai. Dispela i bin helpim yumi long lusim spirit bilong graun na stap longwe long en.
11 Olsem wanem? Yumi save ritim yet Baibel long olgeta de? (Sng. 1:2) Yumi save givim bel long beten na beten planti taim? Yumi save laikim tru ol miting bilong kongrigesen, na go long olgeta dispela miting long olgeta wik? (Sng. 84:10) O yumi lusim pinis sampela bilong ol dispela gutpela pasin? Tru, ating yumi gat planti wok i kisim taim na strong bilong yumi, na ating i hatwok long mekim olgeta wok bilong God. Tasol sapos yumi bin lusim sampela bilong ol dispela gutpela pasin, yu ting spirit bilong graun i wok long pulim yumi? Bai yumi wok strong nau bilong kisim gen ol dispela gutpela pasin em bipo yumi bin bihainim?
No Ken Larim Ol Samting i Daunim Yu
12. Jisas i tokim ol disaipel long husat i mas “lukaut gut”? Bilong wanem em i tok olsem?
12 Wanem narapela samting yumi ken mekim bilong sakim spirit bilong graun? Taim Jisas i tokim ol disaipel bilong em long “was i stap,” em i bin stori long sampela samting inap nogutim ol disaipel. Em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus.”—Lu. 21:34, 35.
13, 14. I gutpela long yumi mekim wanem ol askim long yumi yet long pasin bilong kaikai na dring?
13 Tingim dispela tok lukaut. Yu ting Jisas i tok i no stret long kaikai na dring? Nogat! Em i save long tok bilong Solomon: “Mi tingting long dispela samting na mi save i gat wanpela pasin i win tru. Dispela pasin i olsem. Yumi mas amamas na mekim gutpela pasin long taim yumi stap long graun. Na tu yumi mas kaikai na dring na amamas long olgeta samting yumi mekim. Dispela i olsem presen God i givim yumi.” (Sav. 3:12, 13) Tasol Jisas i save olsem spirit bilong graun i kirapim ol man long kaikai tumas na dring tumas.
14 Olsem wanem yumi ken save spirit bilong graun i no bin paulim tingting bilong yumi long pasin bilong kaikai planti tumas o dring tumas? Yumi ken askim yumi yet olsem: ‘Taim mi ritim sampela tok kaunsel long Baibel o long ol buk na nius bilong yumi long pasin bilong kaikai planti oltaim, mi save ting olsem wanem? Mi save ting dispela tok i no bikpela samting o dispela tok i strong tumas, o ating mi kamapim ol eskius long pasin mi mekim o tok olsem samting mi mekim i no gat rong?a Sapos mi laik dring, mi gat wanem tingting long tok ol i mekim long pasin bilong dring liklik tasol na no ken tru long spak? Mi ting dispela tok i no bikpela samting, na mi no gat wok long bihainim dispela tok? Sapos ol narapela i tok ol i tingting planti long pasin bilong mi long dring, mi save kros o tok mi no gat asua? Mi save tokim ol narapela olsem ol i no ken tingting tumas long ol kain tok olsem bilong Baibel?’ Yes, tingting bilong man yet bai kamapim klia olsem em i wok long bihainim spirit bilong graun o nogat.—Skelim Rom 13:11-14.
Sakim Pasin Bilong Tingting Planti
15. Jisas i tok long wanem pasin bilong ol man?
15 Narapela bikpela samting bilong sakim spirit bilong graun em olsem, yumi mas bosim pasin bilong tingting planti. Jisas i save olsem yumi ol sinman i gat pasin bilong tingting planti tumas long ol samting bilong wan wan de. Em i tokim ol disaipel bilong em olsem: “No ken tingting planti.” (Mt. 6:25) Yumi save tingting planti long ol bikpela samting, olsem yumi laik amamasim God, mekim ol wok Kristen yumi mas mekim, na lukautim famili long ol samting bilong skin. (1 Ko. 7:32-34) Orait tok bilong Jisas inap lainim yumi long wanem samting?
16. Spirit bilong graun i mekim wanem long planti manmeri?
16 Spirit bilong graun i save kirapim ol man long hambak long mani kago, na dispela i mekim na planti man i tingting planti tumas na helt bilong ol inap bagarap. Dispela graun i laik bai yumi ting mani i mekim na yumi stap gut, na sapos yumi gat planti gutpela samting bilong skin, orait yumi gutpela man, tasol sapos yumi gat ol gutpela pasin Kristen, dispela samting i no makim olsem yumi gutpela man, nogat. Ol man husat i bilip long dispela tingting, ol i wok strong tru long kisim mani kago na oltaim ol i tingting planti long ol i mas kisim ol nupela nupela samting, i bikpela moa, na i gutpela moa. (Snd. 18:11) Dispela kain tingting kranki long mani kago i mekim na man i tingting planti na em i no inap kamap strongpela Kristen.—Ritim Matyu 13:18, 22.
17. Yumi ken mekim wanem na bai pasin bilong tingting planti i no ken daunim yumi?
17 Pasin bilong tingting planti i no ken daunim yumi sapos yumi bihainim tok bilong Jisas: “Yupela i mas wok pastaim long painim kingdom bilong God wantaim stretpela pasin bilong em.” Jisas i tok sapos yumi mekim olsem, bai yumi kisim ol samting yumi mas i gat. (Mt. 6:33, Nupela Testamen na Ol Sam) Olsem wanem yumi ken soim olsem yumi bilip long dispela tok promis? Wanpela rot em yumi ken painim pastaim stretpela pasin bilong God—yumi bihainim ol lo bilong God long stretpela pasin long ol samting bilong mani. Olsem, yumi no giaman taim yumi raitim ol samting long takis pepa, na yumi no mekim ol “liklik” tok giaman taim yumi mekim wok bisnis. Yumi wok strong long inapim ol tok promis yumi bin mekim long sait bilong mani. Na long wok bilong bekim dinau, ‘Yes bilong yumi i mas minim Yes tasol.’ (Mt. 5:37, NW; Sng. 37:21) Ating kain pasin olsem i no mekim na yumi kamap maniman, tasol God bai amamas long en, na maus bilong bel bilong yumi bai i no gat tok, na bai yumi no tingting planti.
18. Jisas i stap gutpela piksa long yumi long wanem samting? Taim yumi bihainim pasin bilong Jisas, dispela i helpim yumi olsem wanem?
18 Pasin bilong painim Kingdom pastaim i makim olsem yumi putim ol bikpela samting i go pas. Tingim pasin bilong Jisas. Sampela taim em i werim gutpela klos. (Jo. 19:23) Em i kaikai na dring wain wantaim sampela gutpela pren. (Mt. 11:18, 19) Tasol ol dispela samting i bilong givim liklik amamas tasol long laip bilong Jisas, na i no nambawan bikpela samting long em. Kaikai bilong Jisas em bilong mekim laik bilong Jehova. (Jo. 4:34-36) Taim yumi bihainim pasin bilong Jisas, yumi stap gutpela tru! Yumi ken amamas long helpim ol man ol narapela i daunim ol long kisim bel isi long tok bilong Baibel. Ol bratasista bai laikim na helpim yumi. Na Jehova bai amamas long yumi. Taim yumi putim ol bikpela samting i go pas, mani kago na ol amamas i no bosim yumi. Nogat. Ol i olsem ol samting i helpim yumi long lotuim Jehova. Na taim yumi givim bel moa long wok bilong sapotim Kingdom Bilong God, spirit bilong graun i no ken pulim yumi tumas.
“Bihainim Laik Bilong Holi Spirit”
19-21. Olsem wanem yumi ken wok long “bihainim laik bilong Holi Spirit”? Bilong wanem yumi mas mekim olsem?
19 Paslain long man i mekim wanpela samting, pastaim em i save tingting long en. Taim wanpela man i mekim pasin nogut, ol man i save tok em i no bin tingting gut pastaim na em i mekim, tasol planti taim tingting bilong olpela bel i kirapim man long mekim samting. Olsem na aposel Pol i kirapim yumi long tingim olsem yumi mas was gut long tingting bilong yumi. Em i tok: “Ol man i save wokabaut long pasin bilong olpela bel, tingting bilong ol i save bihainim laik bilong olpela bel tasol. Tasol ol man i save wokabaut long pasin bilong Holi Spirit, tingting bilong ol i save bihainim laik bilong Holi Spirit.”—Ro. 8:5.
20 Yumi ken mekim wanem na bai spirit bilong graun i no ken bosim tingting na pasin bilong yumi? Yumi mas lukautim tingting bilong yumi long rot bilong bosim ol samting yumi tingting long en, yumi no ken larim ol tok gris bilong dispela graun i pulim tingting. Olsem, taim yumi makim ol amamas, yumi no larim ol program i kirapim ol man long mekim pasin pamuk o pait na bagarapim man, i mekim tingting bilong yumi i kamap doti. Yumi save olsem spirit bilong God i holi na i klin na em i no inap stap insait long tingting i doti. (Snd. 3:31; 2 Ko. 6:15-18) Na tu, yumi larim holi spirit bilong God long kam insait long tingting bilong yumi taim yumi stadi oltaim long Baibel, beten, tingim tingim long bel ol tok yumi ritim, na go long ol miting. Na yumi wok wantaim holi spirit taim yumi insait long wok Kristen bilong autim tok long olgeta taim.
21 Yumi mas sakim spirit bilong graun na ol laik nogut em i kirapim ol man long kisim. Tasol gutpela samting bai kamap sapos yumi wok strong long mekim olsem, long wanem, olsem Pol i tok, “sapos tingting bilong man i bihainim laik bilong olpela bel tasol, orait dispela man bai i dai. Tasol sapos tingting bilong man i bihainim laik bilong Holi Spirit, orait dispela man bai i kisim laip na i stap bel isi.”—Ro. 8:6.
[Futnot]
a Pasin bilong kaikai planti oltaim, i kamapim klia tingting bilong man. Em pasin bilong mangal na inapim laik bilong bel. Olsem na bilong skelim husat i kaikai planti tumas, yumi no ken lukluk long skin tasol, olsem em i pat o nogat—yumi mas skelim olsem man i gat wanem kain tingting long kaikai. Sampela man i kaikai planti oltaim, ol i no pat, na sampela i bun nating. Na sampela man i gat wanpela kain sik na skin i pat, o ol i kisim patpela skin long ol tumbuna. Olsem na maski man i pat o nogat, bikpela samting em pasin bilong em, em i gat pasin bilong mangal na kaikai planti oltaim o nogat.—Lukim “Askim” long Wastaua bilong Novemba 1, 2004.
Yu Inap Tingim?
• Bilong kisim holi spirit, yumi mas mekim wanem?
• Wanem sampela rot we spirit bilong graun inap pulim yumi?
• Olsem wanem yumi ken sakim spirit bilong graun?
[Piksa long pes 21]
Paslain long yu go long wok o long skul, beten askim God long givim holi spirit long yu
[Ol Piksa long pes 23]
Tingting bilong yumi i mas i stap klin, yumi mas mekim wok bisnis long stretpela pasin, na yumi no ken kaikai o dring tumas