Bihainim Pasin Bilong Jisas​​—Lotuim God Long Pasin Em i Laikim

Long pasin sori God i singautim ol manmeri “bilong olgeta lain man na bilong olgeta kantri na bilong olgeta kain skin na bilong olgeta tok ples” long lotuim em. (KTH 7:​9, 10; 15:​3, 4) Ol manmeri i bihainim singaut bilong em ol i “amamas long em i gutpela tumas long [ol].” (Sng. 27:4; 90:17) Olsem man bilong raitim song, ol i litimapim nem bilong God na ol i tok: “Yumi daunim het na lotu long em. Bikpela i bin wokim yumi. Orait yumi go klostu long em na brukim skru.”​—Sng. 95:6.

Lotu God i Laikim Tumas

Jisas, em dispela wanpela Pikinini tasol bilong God, em i gat rot tru bilong lain long ol tingting, na stiatok, na lo bilong Papa bilong em. Olsem na Jisas inap tru long makim rot bilong lotu tru long God. Em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.”​—Jo. 1:14; 14:6.

Jisas i stap gutpela piksa tru long pasin bilong daun na stap aninit long Papa bilong em. Em i tok: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.” Na em i tok moa: “Oltaim mi save mekim ol samting em i laikim.” (Jo. 8:​28, 29) Jisas i bin mekim wanem ol pasin em Papa bilong em i laikim?

Wanpela samting, Jisas i bin givim bel olgeta long Papa bilong em, na yumi mas mekim olsem bilong lotu tru long God. Long pasin bilong em Jisas i bin soim olsem em i pas gut wantaim Papa bilong em, olsem em i bihainim tok bilong Papa, na mekim laik bilong Em, maski em i kisim planti hevi na pen long dispela. (Fl. 2:​7, 8) Wanpela bikpela samting long lotu bilong Jisas, em wok bilong em long kamapim ol disaipel, na em i bin taitim bun tru long mekim dispela wok, olsem na ol bilipman na ol man i no bilip ol i bin kolim em Tisa. (Mt. 22:​23, 24; Jo. 3:2) Na tu, Jisas i bin lusim bikpela hap taim na strong bilong em long helpim ol man. Dispela pasin bilong em i mekim na em i no gat taim bilong mekim ol samting bilong helpim em yet, tasol em i amamas long mekim wok bilong helpim ol narapela. (Mt. 14:​13, 14; 20:28) Maski Jisas i gat planti wok, oltaim em i makim hap taim bilong beten na toktok wantaim papa bilong em long heven. (Lu. 6:12) Tru tumas, God i tingim pasin bilong Jisas long lotuim em i gutpela samting tru!

I Hatwok Long Mekim Pasin God i Laikim

Jehova i lukim wokabaut bilong Pikinini bilong em, na Jehova i tokaut olsem em i amamas long Pikinini bilong em. (Mt. 17:5) Tasol Satan tu i lukim pasin bilong Jisas long i stap gut long God. Olsem na Satan i gat bikpela laik tru long pundaunim Jisas. Bilong wanem? Long wanem, i kam inap long dispela taim i no gat wanpela man bilong graun i bin holimpas pasin bilong bihainim olgeta tok bilong God, em pasin God i laik bai olgeta man i mas mekim bilong lotuim em. Na Satan i laik pasim rot bilong Jisas long lotuim Jehova wanpela tasol.​—KTH 4:11.

Bilong pundaunim Jisas, Satan i tok long givim wanpela gutpela samting tru long Jisas. Em i kisim Jisas i go long “wanpela maunten i antap moa. Na Satan i soim em olgeta strongpela kantri bilong dispela graun wantaim ol gutpela samting bilong ol.” Na em i tokim Jisas: “Sapos yu brukim skru na lotu long mi, orait bai mi givim yu dispela olgeta samting.” Orait Jisas i mekim wanem? Em i tok: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” (Mt. 4:​8-​10) Jisas i save, sapos em i brukim skru long Satan, dispela em i pasin bilong lotuim god giaman, maski i luk olsem em inap kisim gutpela samting tru long en. Em i no laik mekim wanpela pasin bilong lotu long narapela god​—em i laik lotuim Jehova wanpela tasol.

Tru, ating Satan i no ken tok long givim olgeta kingdom bilong graun wantaim ol gutpela samting bilong en long yumi sapos yumi lotuim em. Tasol em i strong yet long bagarapim pasin bilong ol Kristen tru long lotuim God. Satan i laik bai yumi lotuim narapela man o narapela samting.​—2 Ko. 4:4.

Krais Jisas i bin stap gut long God i go inap long taim em i dai. Taim Jisas i mekim olsem, em i givim biknem long Jehova long wanpela rot i no gat narapela man bilong graun i bin mekim. Yumi ol Kristen tru bilong nau, yumi wok strong long bihainim pasin bilong Jisas long i stap gut long God, na bilong mekim olsem, yumi putim pasin bilong yumi long lotuim Man Bilong Wokim yumi i go pas long olgeta narapela samting. Tru tumas, pasin bilong pas gut wantaim God em i nambawan gutpela samting yumi holim.

Ol Gutpela Samting i Kam Long Pasin Bilong Lotuim God

Pasin bilong mekim lotu i “stret olgeta na i no gat asua” long ai bilong God, em i save helpim gut yumi. (Jem. 1:27) Olsem: Yumi stap nau long taim we planti man i ‘laikim ol yet tasol, laikim tumas long kisim mani, litimapim nem bilong ol yet,’ na “birua long olgeta gutpela pasin.” (2 Ti. 3:​1-5) Tasol insait long lain bilong God yumi save bung wantaim ol manmeri i gat stretpela pasin na ol i wok strong long holimpas ol lo God i bin putim bilong lotuim em. Dispela i save givim nupela strong long yumi, a?

Na tu, taim yumi stap stret na i no kisim hap doti bilong dispela graun, maus bilong bel i no kotim yumi. Bilong holimpas dispela pasin bilong bel i no kotim yumi, yumi mas daun na bihainim ol stretpela stiatok bilong God na bihainim ol lo bilong gavman i no save pait wantaim ol lo bilong God.​—Mk. 12:17; Ap. 5:​27-​29.

Pasin bilong givim bel olgeta long lotuim God, dispela i save helpim yumi long narapela rot tu. Taim yumi putim tingting i go long mekim laik bilong God na yumi no tingting tasol long laik bilong yumi yet, yumi pilim olsem i stap bilong yumi i gat as bilong en na yumi belgut long en. Yumi no tok “mobeta ‘yumi kaikai na dring, long wanem, tumora bai yumi dai,’ ” nogat. Yumi bilip na wet long kisim laip i stap gut oltaim long Paradais bai kamap long graun.​—1 Ko. 15:32.

Buk Kamapim Tok Hait i stori long taim ol manmeri i stap stret na i no gat asua long ai bilong Jehova ol bai abrusim bagarap long taim bilong “bikpela hevi [“tru,” NW].” Na skripsa hia i tok moa: “God i save sindaun long dispela sia king, em yet bai i stap wantaim ol na lukautim ol.” (KTH 7:​13-​15) Man i sindaun long sia king em God Jehova tasol, em Man i gat biknem tru. Traim tingim bikpela amamas bai yu kisim taim em i singautim yu long kam insait long haus sel bilong em na em i lukautim yu gut na i no gat samting bai i bagarapim yu! Na long nau tu em i save was long yumi na lukautim yumi.

Na tu, ol man i lotuim God long pasin em i laikim, Baibel i tok “em bai i bringim ol i go long ol hul i gat wara i kamap, em wara bilong givim laip.” Dispela gutpela wara i makim olgeta samting Jehova i bin givim bambai yumi ken kisim laip i stap oltaim oltaim. Tru tumas, long pe Krais i bin givim bilong baim bek ol man, “God bai i mekim drai wara bilong ai bilong ol.” (KTH 7:17) Em bai helpim ol man long kamap gutpela olgeta, na dispela bai givim bikpela amamas moa long olgeta man i gat rot long i stap oltaim oltaim long graun. Long nau tu, ol man i amamas na lotuim God ol i save singaut amamas, na ol i givim bikpela tenkyu long Jehova na lotuim em wantaim ol lain bilong heven, em ol i mekim singsing olsem: “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.”​—KTH 15:​3, 4.

[Piksa long pes 27]

Satan i laik givim wanem samting long yumi sapos yumi lotuim em?