Tok Profet Long Mesaia

LAIN Juda i save long ol tok profet em Aisaia na ol narapela profet i bin mekim long Mesaia, na ol i wet long em i kam. Long taim bilong Jisas, planti Juda i wet long “lukim” Mesaia. (Luk 3:15) Ol tok profet bilong Baibel i stori long planti samting bilong Mesaia. I no gat wanpela man long graun inap tokaut long ol dispela samting o wokim rot bilong ol dispela samting i ken kamap long Jisas.

Mesaia i Kamap. Aisaia i tok profet olsem wanpela meri husat i no bin slip wantaim man, em bai karim pikinini husat bai kamap Krais, o Mesaia. Matyu i stori long ol samting bai kamap taim mama i karim Jisas na em i tok: “Dispela olgeta samting i kamap bilong inapim wanpela tok Bikpela i bin mekim long maus bilong profet. Profet i bin tok olsem, ‘Harim. Wanpela meri i no bin slip wantaim man, em bai i gat bel na i karim wanpela pikinini man.’ ” (Matyu 1:​22, 23; Aisaia 7:14) Aisaia i tok profet tu olsem Krais bai kamap long lain tumbuna bilong Devit, na em i kolim stret papa bilong Devit, em Jesi. Na tru tumas, Jisas i kamap stret long lain tumbuna bilong Devit. (Matyu 1:​6, 16; Luk 3:​23, 31, 32) Olsem na paslain long mama i karim Jisas, ensel Gebriel i tokim mama bilong Jisas, em Maria: “God bai i putim em i stap king olsem tumbuna bilong en Devit.”​—Luk 1:​32, 33; Aisaia 11:​1-5, 10; Rom 15:12.

I Stap Bilong Mesaia. Long haus lotu long Nasaret, taim Jisas i kamap bikpela man pinis, em i ritim tok profet bilong Buk Aisaia, na em i ritim tu ol dispela tok: “Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman.” Jisas i kolim tok long pasin i makim em yet, na em i tok: “Dispela tok bilong buk bilong God yupela i harim pinis, nau tasol em i kamap tru.” (Luk 4:​17-​21; Aisaia 61:​1, 2) Aisaia i tok profet tu olsem Jisas bai mekim pasin daun na mekim gutpela pasin na pasin isi long ol man i gat sik samting. Matyu i tok: “Planti manmeri i bihainim em, na em i mekim orait olgeta manmeri i gat sik. Na Jisas i tambuim ol long ol i no ken autim tok bilong em long ol arapela manmeri. Long dispela pasin, Jisas inapim wanpela tok God i bin mekim long maus bilong profet Aisaia. . . . ‘Em bai i no mekim tok kros na singaut bikmaus. . . . Pitpit i no gat strong na i laik bruk, em bai i no brukim olgeta.’ ”​—Matyu 8:​16, 17; 12:​10-​21; Aisaia 42:​1-4; 53:​4, 5.

Mesaia i Kisim Pen na Hevi. Aisaia i tok profet olsem planti manmeri long Israel bai i no orait long Mesaia, na em bai kamap olsem “ston” bilong mekim ol i pundaun. (1 Pita 2:​6-8; Aisaia 8:​14, 15) Na tru tumas, maski Jisas i wokim planti mirakel, ol manmeri “i no bilip long em. Olsem na tok bilong profet Aisaia i kamap tru. Aisaia i bin tok olsem, ‘Bikpela, husat i bilipim tok bilong mipela?’ ” (Jon 12:​37, 38; Aisaia 53:1) Wanpela as na ol Juda i no bilip olsem Jisas em i Mesaia i olsem: Ol i gat bilip kranki olsem Mesaia bai pinisim kwik wok gavman bilong Rom na kamapim bek wanpela kingdom long lain bilong Devit long graun. Olsem na taim Jisas i karim pen na hevi na em i dai, planti Juda i no bilip olsem em i dispela Mesaia. Tasol Aisaia i bin tok profet olsem Mesaia bai karim pen na hevi paslain long em i kamap King.

Long Buk Aisaia, Mesaia i mekim tok profet olsem: “Mi bin larim ol man i paitim baksait bilong mi long kanda . . . Na taim ol i tok nogut long mi na spetim pes bilong mi, mi no bin haitim pes bilong mi long ol.” Matyu i stori long ol samting i bin kamap long Jisas taim em i sanap long kot: “Ol i spetim pes bilong Jisas, na ol i paitim em. Na sampela i solapim em.” (Aisaia 50:6; Matyu 26:67) Aisaia i tok: “Ol man i bin mekim nogut long dispela wokman, tasol em i daunim em yet na karim pen. Na em i no bin mekim wanpela tok.” Olsem na taim Pailat i askim Jisas long ol tok em ol Juda i sutim long em, “Jisas i no bekim wanpela tok long Pailat. Olsem na Pailat i tingting planti.”​—Aisaia 53:7; Matyu 27:​12-​14; Aposel 8:​28, 32-​35.

Dai Bilong Mesaia. Sampela tok profet moa bilong Aisaia i kamap tru taim Jisas i dai na bihain long en tu. Aisaia i tok profet olsem: “[Bai] ol i planim em wantaim ol man i bin mekim ol kain kain pasin nogut, na wantaim ol man i gat planti mani samting.” (Aisaia 53:9) I luk olsem ol tok bilong dispela tok profet i no wanbel wantaim, olsem na em bai kamap tru olsem wanem? Taim Jisas i dai, ol i bin nilim em long pos namel long tupela man bilong pait na stil. (Matyu 27:38) Tasol bihain wanpela maniman, Josep bilong Arimatea, em i kisim bodi bilong Jisas na putim long nupela matmat bilong em yet, em hul ol i bin katim long ston. (Matyu 27:​57-​60) Dai bilong Jisas i truim tu wanpela bikpela samting tru long tok profet bilong Aisaia. Aisaia i tok profet long Mesaia olsem: “Dispela stretpela wokman bilong mi, em i save gut long mi. Em i bin karim hevi bilong ol sin bilong planti manmeri, na long dispela pasin em bai i mekim ol i kamap stretpela manmeri.” Tru tumas, dai bilong Jisas i kamapim pe bilong baim bek ol man, na dispela i opim rot long God i ken tekewe sin bilong ol manmeri i bilip.​—Aisaia 53:​8, 11; Rom 4:25.

Ol Tok Profet i Save Kamap Tru

Planti taim ol aposel na Jisas yet i bin kamapim ol tok bilong Buk Aisaia, winim ol narapela buk bilong Baibel, bilong kamapim klia olsem Jisas em i Mesaia. Tasol i no Buk Aisaia tasol i tokaut long ol samting bilong kamap bihain, nogat. I gat planti arapela tok profet tu long Ol Skripsa Hibru em ol i kamap tru long Jisas, Kingdom bilong em, na ol gutpela samting Kingdom bai kamapim long bihain.a (Aposel 28:23; KTH 19:10) Wanem samting i soim klia olsem ol dispela tok profet bai kamap tru? Jisas i tokim ol Juda husat i harim tok bilong em: “Yupela i no ken ting mi kam bilong rausim tok bilong lo na tok bilong ol profet [Ol Skripsa Hibru]. Nogat. Mi no kam bilong rausim, mi kam bilong inapim tru. Mi tok tru long yupela, inap long taim skai na graun i pinis, i no gat wanpela liklik hap tok bilong lo bai i lus. Nogat. Ol liklik hap rait, na ol liklik mak ol i raitim long lo, olgeta bai i stap. Lo bai i stap olsem tasol inap long olgeta samting i kamap pinis.”​—Matyu 5:​17, 18.

Jisas i bin kolim tu ol tok profet i kamap tru long em na ol samting bai kamap bihain. (Daniel 9:27; Matyu 15:​7-9; 24:15) Na tu, Jisas na ol disaipel bilong em, ol yet i bin tok profet long ol samting bai kamap bihain long taim bilong ol, na long nau yumi lukim truim bilong planti bilong ol dispela tok profet. Stori i kamap bihain long dispela bai skelim truim bilong ol tok profet i wok long kamap long nau, na ol tok profet em ol bai kamap tru bihain.

[Futnot]

[Piksa long pes 4]

“Wanpela meri i no bin slip wantaim man, em bai . . . i karim wanpela pikinini man”

[Piksa long pes 5]

“Taim ol i tok nogut long mi . . . mi no bin haitim pes bilong mi long ol”