Skulim Ol Pikinini Bilong Yu

Sampela Taim Yu Save Jeles? Ol Brata Bilong Josep i Bin Jeles

YUMI ken stori long pasin jeles i makim wanem samting. Olsem wanem? Sampela taim yu pilim olsem i hatwok long laikim wanpela, long wanem, ol narapela i tok em i gutpela man o meri, o em i luk nais, o em i smat?a​​​— Dispela inap kamap sapos yu jeles long wanpela.

Pasin jeles i ken kamap insait long famili sapos papamama i laikim wanpela pikinini moa yet winim narapela. Baibel i stori long wanpela famili we pasin jeles i bin kamapim bikpela hevi. Yumi ken skelim hevi dispela pasin i bin kamapim na wanem skul yumi inap kisim long dispela.

Josep em namba 11 pikinini bilong Jekop, na ol brata bilong Josep i bin jeles long em. Yu save long as na ol i jeles long em?​​​— Ol i jeles, long wanem, papa bilong ol, Jekop, i laikim Josep moa yet. Olsem: Jekop i wokim wanpela naispela saket bilong Josep. Jekop i laikim tumas Josep, long wanem, “mama i karim Josep taim [Jekop] i lapun pinis” na em i namba wan pikinini bilong Resel, em meri em i save laikim tumas.

Baibel i tok taim ‘ol brata bilong Josep i lukim olsem papa bilong ol i laikim Josep moa yet, ol i bel nogut tru long em.’ Orait, wanpela taim Josep i tokim famili bilong em olsem long driman em i lukim famili olgeta, na papa tu, i brukim skru long em. Baibel i tok: “Ol brata bilong Josep i bel kaskas long em,” na papa i krosim em long em i kamapim dispela driman.​—Stat 37:​1-​11.

Bihain, taim Josep i gat 17 krismas, ol brata bilong em i stap longwe inap sampela kilomita na ol i was long ol sipsip na meme bilong famili. Olsem na Jekop i salim Josep i go bilong lukim ol brata bilong em i stap orait o nogat. Yu save ol i laik mekim wanem samting taim ol i lukim em i kam?​​​— Ol i laik kilim em i dai! Tasol tupela bilong ol, em Ruben na Juda, i no laik mekim olsem.

Taim sampela bisnisman i kam na i laik i go long Isip, Juda i tok: “Yumi salim em.” Na ol i mekim olsem. Orait nau ol i kilim wanpela meme na ol i putim saket bilong Josep long blut bilong en. Bihain, taim ol i soim dispela saket long papa bilong ol, papa i krai na i tok: “Wanpela laion samting i kilim em pinis, na kaikaim em olgeta.”​—Stat 37:​12-​36.

Bihain, king bilong Isip, em Fero, i laikim Josep. Em i laikim em, long wanem, God i helpim Josep na em inap tokaut long mining bilong tupela driman bilong Fero. Long namba wan driman em i lukim 7-pela naispela patpela bulmakau na bihain 7-pela bun nating bulmakau. Na long namba tu driman em i lukim 7-pela gutpela het bilong rais na 7-pela het bilong rais i no gat kaikai long en. Josep i tok, tupela driman wantaim i makim olsem, 7-pela yia bai i gat planti kaikai na 7-pela yia bai i gat bikpela hangre. Olsem na Fero i putim Josep i stap bosman bilong bungim ol kaikai long ol yia i gat planti kaikai na bai i gat kaikai long taim bilong bikpela hangre.

Taim bikpela hangre i kamap, ol famili bilong Josep em ol i stap longwe inap planti kilomita, ol i sot long kaikai. Olsem na Jekop i salim tenpela bikbrata bilong Josep i go long Isip bilong kisim kaikai. Ol i kam sanap long pes bilong Josep, tasol ol i no luksave long em. Josep i no tokaut long em i husat, na em i traim ol brata bilong em, na em i kisim save olsem ol i sori tru long pasin nogut ol i bin mekim long em. Orait Josep i tokim ol long em i husat. Man! Narapela i holimpas narapela na ol i amamas tru!​​—Stat, sapta 40 i go inap sapta 45.

Yu ken lainim wanem samting long dispela stori bilong Baibel long pasin jeles?​​​— Pasin jeles inap kamapim bikpela hevi, em inap mekim na wanpela i tingting long mekim nogut long brata bilong em yet! Yumi ken ritim Aposel 5:​17, 18 na Aposel 7:​54-​59 na lukim samting em pasin jeles i kirapim ol man long mekim long ol disaipel bilong Jisas.​​​— Yumi ritim pinis dispela skripsa, nau yu inap luksave long as na yumi mas was gut, nogut yumi kisim pasin bilong jeles?​​—

Josep i gat 110 krismas na em i dai. Em i kamapim ol pikinini, na ol pikinini i kamapim ol tumbuna pikinini bilong em, na ol tumbuna pikinini i kamapim ol pikinini. Yumi ken save olsem Josep i skulim ol long narapela i mas laikim tru narapela na ol i no ken kisim pasin bilong jeles.​​—Stat 50:​22, 23, 26.

[Futnot]

Ol Askim:

○ Pasin jeles i makim wanem samting?

○ Pasin jeles i kirapim ol brata bilong Josep long mekim wanem?

○ Bilong wanem Josep i lusim rong bilong ol brata bilong em?

○ Yumi inap kisim wanem skul long dispela stori?