“Ai” Bilong Jehova i Save Lukim Olgeta Man
“Ai bilong [God] i save lukim olgeta man.”—SNG. 11:4.
1. Yumi save amamas long pas gut wantaim wanem kain manmeri?
YU SAVE pilim olsem wanem long ol manmeri em ol i tingim tru yu? Taim yu askim ol long kamapim tingting bilong ol, ol i save kamapim stret samting i stap long tingting bilong ol. Taim yu sot long helpim, ol i save amamas long helpim yu. Taim yu mas kisim sampela tok kaunsel, ol i save bihainim pasin laikim na givim tok kaunsel long yu. (Sng. 141:5; Ga. 6:1) Yu amamas long pas gut wantaim ol kain manmeri olsem, laka? Jehova na Pikinini bilong em ol i kain man olsem. Pasin bilong tupela long tingim yu i winim tru pasin bilong ol man long tingim yu, na astingting bilong tupela i no bilong helpim ol yet, nogat. Ol i laik helpim yu long “kisim dispela laip em i laip tru.”—1 Ti. 6:19; KTH 3:19.
2. Olsem wanem long pasin bilong Jehova long tingim ol wokboi bilong em?
2 Man bilong raitim song, Devit, em i kamapim olsem Jehova i save tingim tru yumi. Em i tok: “Ai bilong [God] i save lukim olgeta man. Em i save long olgeta samting ol i mekim.” (Sng. 11:4) Yes, God i no save lukluk tasol long yumi, nogat, em i save skelim yumi. Devit i tok tu olsem: “Yu save long bel bilong mi. Yu kam lukim mi long nait . . . na yu no lukim tingting nogut i stap long mi.” (Sng. 17:3) Tru tumas, Devit i bin save olsem Jehova i tingim tru em. Devit i save olsem sapos em i no rausim ol tingting nogut o em i tingting long mekim pasin nogut, dispela bai mekim Jehova i bel hevi na em bai i no orait long Devit. Olsem wanem? Yu tingim Jehova olsem wanpela man i stap tru, olsem Devit i bin mekim?
Jehova i Save Lukim Bel Bilong Man
3. Olsem wanem Jehova i kamapim olsem em i gat stretpela tingting long yumi ol sinman?
3 Jehova i save tingim tru ol tingting na laik i stap long bel bilong yumi. (Sng. 19:14; 26:2) Tasol em i no tingim tingim ol liklik popaia bilong yumi. Olsem: Sara, meri bilong Abraham, em i bin haitim sampela tok long wanpela ensel husat i bin tanim i kamap man. Ensel i lukim olsem Sara i pret na sem, olsem na em i givim liklik tok tasol bilong stretim Sara. (Stt. 18:12-15) Taim Jop i tok long “em yet i mekim stretpela pasin na pasin bilong God i no stret,” Jehova i no larim dispela i pasim em long givim blesing long Jop, nogat. Jehova i save olsem Jop i bin kisim bikpela hevi long han bilong Satan. (Jop 32:2; 42:12) Olsem tasol, Jehova i no bel nogut long ol tok em wido bilong taun Sarefat i bin mekim long profet Elaija. God i save olsem em i gat wanpela pikinini tasol na em i bel hevi tru olsem dispela pikinini i dai.—1 Kin. 17:8-24.
4, 5. Olsem wanem Jehova i mekim pasin marimari long Abimelek?
4 Jehova i save skelim bel bilong man, olsem na em i tingim tu ol man i no bilip. Tingim ol samting em i mekim long Abimelek, king bilong taun Gerar long Filistia. Abimelek i no save olsem Abraham na Sara i marit, olsem na em i kisim Sara i go bilong kamap meri bilong em. Tasol paslain long Abimelek i mekim wanpela samting long Sara, Jehova i tokim em long rot bilong wanpela driman olsem: “Yes, mi save yu gat stretpela tingting tasol na yu mekim dispela pasin. Olsem na mi yet mi bin pasim yu na yu no bin slip wantaim dispela meri na mekim sin long ai bilong mi. Tasol nau yu mas salim meri i go bek long man bilong en, long wanem, dispela man em i profet bilong mi. Na bai em i prea long helpim yu, na bai yu no ken i dai.”—Stt. 20:1-7.
5 Abimelek i save lotuim ol god giaman, olsem na Jehova inap givim bikpela strafe long em. Tasol God i lukim olsem Abimelek i bihainim stretpela tingting long dispela samting. Olsem na Jehova i tingim dispela na em i tokim king long samting em i mas mekim bambai God i ken fogivim em na em i “no ken i dai.” Olsem wanem? Yu laik lotuim kain God olsem?
6. Olsem wanem Jisas i bihainim pasin bilong Papa bilong em?
6 Jisas i bihainim gut pasin bilong Papa bilong em, na em i tingim ol gutpela pasin bilong ol disaipel na i redi long lusim rong bilong ol. (Mk. 10:35-45; 14:66-72; Lu. 22:31, 32; Jo. 15:15) Pasin bilong Jisas i stret wantaim tok bilong em long Jon 3:17: “God i no salim Pikinini bilong en i kam long graun bilong skelim pasin bilong ol manmeri bilong graun olsem jas. Nogat. Em i salim em i kam bilong kisim bek ol.” Yes, oltaim Jehova na Jisas i save laikim yumi tumas. Dispela i kamap klia long laik bilong tupela long yumi mas kisim laip. (Jop 14:15) Dispela pasin laikim i helpim yumi long kliagut long as na Jehova i save skelim yumi, na em i gat wanem tingting long yumi, na em i save mekim wanem taim em i skelim yumi.—Ritim 1 Jon 4:8, 19.
Skelim Yumi Long Rot Bilong Pasin Laikim
7. Jehova i gat wanem tingting taim em i skelim yumi?
7 I no stret long yumi tingim Jehova olsem wanpela polisman i stap long heven na i lukluk i kam daun bilong kotim yumi taim yumi mekim sin, nogat! Satan em dispela man i save lukluk long yumi bilong painim rong na kotim yumi. (KTH 12:10) Em i save tok olsem ol man i gat tingting nogut, tasol dispela i no stret! (Jop 1:9-11; 2:4, 5) Man bilong raitim song i tok long God olsem: “Sapos yu kaunim olgeta sin bilong mipela bai husat inap long winim kot bilong yu?” (Sng. 130:3) Bekim bilong dispela askim i olsem, I no gat man inap winim kot! (Sav. 7:20) Taim Jehova i skelim yumi, em i save bihainim pasin marimari na mekim gut long yumi olsem wanpela papa husat i laik lukautim ol pikinini bilong em. Planti taim em i save kirapim yumi long luksave long ol pasin kranki bilong yumi bambai yumi no ken bagarapim yumi yet.—Sng. 103:10-14; Mt. 26:41.
8. Olsem wanem Jehova i save skulim na stretim ol wokboi bilong em?
8 God i kamapim pasin laikim long rot bilong ol tok em i givim bilong skulim na stretim yumi. Ol dispela tok i stap long Baibel na long ol kaikai bilong spirit yumi kisim long “wokboi i gat gutpela tingting.” (Mt. 24:45; Hi. 12:5, 6) Na Jehova i save helpim yumi long rot bilong kongrigesen Kristen na ol man em i givim olsem “ol presen.” (Ef. 4:8) Na tu, Jehova i skulim yumi olsem wanpela gutpela papa, na em i save lukim ol samting yumi mekim long dispela skul yumi kisim, na em i save painim rot bilong givim sampela helpim moa long yumi. Song 32:8 i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” Olsem na em i bikpela samting long olgeta taim yumi mas harim tok bilong Jehova! Yumi mas daunim yumi yet long ai bilong em, na tingim em olsem Tisa na Papa bilong yumi.—Ritim Matyu 18:4.
9. Yumi mas abrusim wanem ol pasin? Bilong wanem yumi mas mekim olsem?
9 Yumi no ken larim pasin antap, pasin bilong lusim bilip, na “pasin bilong sin” i giamanim yumi na pasim strong bel bilong yumi. (Hi. 3:13; Jem. 4:6) Planti taim ol dispela pasin i save kamap taim man i holim ol tingting na laik nogut. Taim man i mekim olsem, em inap sakim ol tok kaunsel bilong Baibel i stret long em. Na samting i nogut moa, tingting bilong em long mekim pasin nogut inap kamap strong tru na em inap mekim em yet i kamap birua bilong God—dispela em samting i nogut tru! (Snd. 1:22-31) Tingim stori bilong Kein, em fesbon bilong Adam na Iv.
Jehova i Lukim Olgeta Samting na Mekim Ol Samting i Stret Long En
10. Bilong wanem Jehova i no orait long ofa bilong Kein? Kein i mekim wanem?
10 Taim Kein na Abel i bringim ofa i go long Jehova, em i tingim ofa bilong ol, na tu, em i tingim samting i kirapim ol long mekim ofa. Olsem na God i save olsem Abel i bilip na mekim ofa, na em i tokaut olsem em i orait long ofa bilong Abel. Tasol em i no orait long ofa bilong Kein, long wanem, sampela samting i kamapim olsem Kein i no gat strongpela bilip. (Stt. 4:4, 5; Hi. 11:4) Kein i no kisim skul long samting i kamap na stretim pasin bilong em, nogat, em i belhat nogut tru long brata bilong em.—Stt. 4:6.
11. Olsem wanem Kein i kamapim olsem bel bilong em i giamanim em? Dispela i skulim yumi long wanem samting?
11 Jehova i lukim dispela samting na long gutpela pasin em i tokim Kein olsem sapos em i mekim gutpela pasin, bai i gat as long em i ken amamas. Tasol sori tru, Kein i sakim tok bilong Man Bilong Wokim em na kilim i dai brata bilong em. Tingting nogut bilong Kein i kamap klia long pasin bilong em long bekim tok taim God i askim em: “We stap Abel, brata bilong yu?” Kein i tok: “Mi no save. Olsem wanem? Yu ting mi stap tasol bilong lukautim brata bilong mi?” (Stt. 4:7-9) Tru tumas, bel inap giamanim man—em inap pulim man long sakim tok i kam stret long God! (Jer. 17:9) Olsem na yumi mas kisim skul long ol kain stori olsem na kwiktaim yumi mas sakim ol tingting kranki na ol laik nogut. (Ritim Jems 1:14, 15.) Sapos yumi kisim ol tok kaunsel i kam long Baibel, orait i gutpela yumi tenkyu long en na tingim dispela olsem samting i kamapim klia pasin laikim bilong Jehova.
I No Gat Sin i Stap Hait Long Ai Bilong Jehova
12. Jehova i save mekim wanem taim man i mekim rong?
12 Sampela man i ting sapos i no gat man i lukim ol i mekim rong, orait ol inap haitim dispela rong. (Sng. 19:12) Tasol i no gat wanpela rong em yumi inap haitim. “Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hi. 4:13) Jehova em i wanpela Jas na em i save skelim ol tingting i stap insait tru long bel bilong yumi, na taim yumi mekim rong em i save mekim stretpela kot. Em i “God bilong marimari na tingim man, em i no save belhat kwik na gutpela pasin sori bilong em i bikpela tru na em i save tok tru oltaim.” Tasol sapos man i no tanim bel, God bai “i no ken larim [em] i abrusim strafe,” nogat. God bai givim strafe sapos “long laik bilong [em] yet [em i] wokabaut long pasin bilong sin,” o em i mekim pasin giaman. (Kis. 34:6, 7, NW; Hi. 10:26) Dispela i kamap ples klia long samting Jehova i bin mekim long Akan na Ananaias wantaim Safaira.
13. Olsem wanem na tingting kranki i kirapim Akan long mekim pasin nogut?
13 Akan i brukim lo bilong God na kisim ol gutpela samting bilong taun Jeriko na haitim insait long haus sel bilong em, na ating famili bilong em i helpim em long mekim dispela samting. Taim sin bilong em i kamap ples klia, Akan i kamapim olsem em i save em i bin mekim bikpela rong, em i tok: “Tru, mi mekim sin pinis long ai bilong God.” (Jos. 7:20) Olsem Kein, Akan tu i kisim tingting nogut long bel. Pasin mangal i bin kirapim Akan long kisim tingting nogut, na dispela i mekim na em i kirap mekim pasin giaman. Ol gutpela samting bilong Jeriko i bilong Jehova, olsem na i kain olsem Akan i stilim ol samting bilong God, na dispela i mekim na em wantaim famili bilong em i lusim laip bilong ol.—Jos. 7:25.
14, 15. Bilong wanem na i stret God i no orait long Ananaias na Safaira? Dispela i skulim yumi long wanem samting?
14 Ananaias na meri bilong em, Safaira, ol i bin insait long kongrigesen Kristen bilong pastaim long Jerusalem. Bihain long Pentikos 33 C.E., ol i bungim mani bilong lukautim ol nupela disaipel em ol i kam long ol longwe ples na ol i stap yet long Jerusalem. Ol Kristen i givim kontribiusen long laik bilong ol yet bilong helpim ol dispela nupela disaipel. Ananaias i salim wanpela hap graun bilong em na em i givim hap mani i go bilong helpim ol dispela nupela disaipel. Tasol em i giaman na tok olsem em i givim olgeta mani em i kisim long dispela hap graun, na meri bilong em i save long samting em i mekim. Dispela tupela marit i laik kisim biknem insait long kongrigesen. Tasol tupela i mekim pasin giaman. Long rot bilong wanpela mirakel, Jehova i kamapim dispela samting long aposel Pita na Pita i askim Ananaias long as na em i mekim dispela rong. Bihain stret long dispela, Ananaias i pundaun na i dai. Bihain liklik, Safaira tu i dai.—Ap. 5:1-11.
15 I no olsem Ananaias na Safaira i no tingting gut na ol i popaia, nogat. Tupela i bin pasim tok pinis na mekim pasin trik bilong giamanim ol aposel. Na samting i nogut moa, ol i ‘laik giamanim Holi Spirit na God.’ Samting Jehova i mekim i kamapim klia tru olsem em i redi long lukautim kongrigesen na bai ol man bilong tupela maus i no ken bagarapim kongrigesen. Tru tumas, “sapos God bilong i stap oltaim em i laik mekim save long wanpela man na em i holimpas em, orait dispela man i ken pret nogut tru”!—Hi. 10:31.
Long Olgeta Taim Mekim Stretpela Pasin
16. (a) Satan i mekim wanem bilong bagarapim ol manmeri bilong God? (b) Satan i save yusim wanem ol samting bilong bagarapim ol manmeri long hap yu stap long en?
16 Satan i wok long mekim olgeta samting em inap long mekim bilong bagarapim yumi bambai Jehova i no ken orait long yumi. (KTH 12:12, 17) Ol tingting nogut bilong Satan i kamap klia long pasin bilong ol manmeri bilong dispela graun, em ol i tingting tasol long pasin pamuk na pasin pait. Long nau ol man inap lukim ol piksa bilong ponografi long rot bilong ol kompiuta samting. Yumi no ken larim Satan i pundaunim yumi, nogat. Yumi mas holim wankain tingting olsem man bilong raitim song, Devit, em i tok: “Bai mi bihainim stretpela pasin tasol. . . . Mi bai mekim stretpela pasin tasol long haus bilong mi.”—Sng. 101:2.
17. (a) Bilong wanem Jehova i save kamapim ol sin long ples klia? (b) Yumi mas tingting strong long mekim wanem?
17 Long nau, Jehova i no save wokim mirakel na kamapim ol bikpela sin na pasin giaman olsem em i bin mekim long bipo. Tasol em i lukim olgeta samting na long taim na rot em yet i makim, em i save kamapim klia ol samting i stap hait. Pol i tok: “Sin bilong sampela man i stap ples klia, na i olsem ol dispela sin i go kamap long kot paslain long ol man i bin mekim sin. Tasol sin bilong sampela man i stap hait, na bihain tasol ol bai i kamap ples klia.” (1 Ti. 5:24) Pasin laikim em i nambawan samting i mekim na Jehova i kamapim ol pasin nogut long ples klia. Em i laikim tru kongrigesen na em i laik bai kongrigesen i stap klin. Na tu, em i save marimari long ol manmeri husat i mekim sin na ol i sori tru long rong bilong ol na ol i tanim bel. (Snd. 28:13) Olsem na yumi mas wok strong long givim bel olgeta long God na sakim olgeta samting em ol inap bagarapim yumi.
Holim Wanpela Tingting Tasol
18. King Devit i laik bai pikinini bilong em i gat wanem tingting long God?
18 King Devit i tokim pikinini bilong em, Solomon, olsem: “Yu mas i gat wanpela tingting tasol, em long i stap aninit long God bilong papa bilong yu. Na yu mas wok strong tru long bihainim laik bilong em. Yu mas mekim olsem, long wanem, Bikpela i save long olgeta tingting na laik bilong yumi.” (1 Sto. 28:9) Devit i laik bai pikinini bilong em i bilip long God, na em i mas mekim sampela samting moa. Em i laik bai Solomon i save olsem Jehova i save tingim tru ol wokman bilong em. Olsem wanem? Yu save holim kain tingting olsem long Jehova?
19, 20. Olsem Song 19:7-11 i kamapim, wanem samting i helpim Devit long i go klostu long God? Olsem wanem yumi inap bihainim pasin bilong Devit?
19 Jehova i save olsem ol manmeri i gat stretpela tingting ol bai go klostu long em, na taim ol i kisim save long ol gutpela pasin bilong em, dispela bai mekim gut bel bilong ol. Olsem na Jehova i laik bai yumi save gut long em na lain gut long ol gutpela pasin bilong em. Yumi inap mekim olsem long wanem ol rot? Taim yumi stadi long Baibel na kisim ol blesing i kam long em.—Snd. 10:22; Jo. 14:9.
20 Olsem wanem? Yu save ritim Baibel long olgeta de na pilim tru ol tok bilong en na beten askim God long helpim yu long bihainim ol dispela tok? Yu luksave olsem ol stiatok bilong Baibel inap helpim tru yu taim yu bihainim long i stap bilong yu? (Ritim Song 19:7-11.) Sapos olsem, orait bilip bilong yu long Jehova na pasin bilong yu long laikim em bai kamap strong moa. Na Jehova tu bai kam klostu moa long yu, na i olsem em i sambai long yu na yutupela i wokabaut wantaim. (Ais. 42:6; Jem. 4:8) Yes, Jehova bai kamapim klia olsem em i laikim tru yu, em bai blesim yu na lukautim yu long ol samting bilong spirit taim yu wokabaut long dispela liklik rot i bringim man i go bilong kisim laip.—Sng. 91:1, 2; Mt. 7:13, 14.
Bai Yu Bekim Olsem Wanem?
• Bilong wanem Jehova i save skelim yumi?
• Wanem samting i kirapim sampela man long kamap birua bilong God?
• Olsem wanem yumi inap soim olsem yumi tingim Jehova olsem wanpela man i stap tru?
• Olsem wanem yumi inap holim wanpela tingting tasol long God?
[Piksa long pes 4]
Olsem wanem Jehova i save lukautim yumi olsem wanpela gutpela papa?
[Piksa long pes 5]
Stori bilong Ananaias i skulim yumi long wanem samting?
[Piksa long pes 6]
Wanem samting bai helpim yumi long holim wanpela tingting tasol na mekim yet wok bilong Jehova?