Yu Ting Ol Witnes Bilong Jehova i Save Brukim Marit Bilong Ol Man?
“SAPOS wanpela i senisim lotu bilong em, orait marit bilong em bai bruk.” Em tok planti man i save mekim. Sampela taim, sampela i save mekim dispela tok long sampela marit em poroman marit bilong ol i laik kamap wanpela Witnes Bilong Jehova. Tasol yu ting dispela tok em i tru?
Tru, taim wanpela poroman marit i kirap bihainim wanpela lotu o senisim ol bilip bilong lotu em i bin holim longpela taim, poroman bilong em bai kirap nogut. Na ating em bai tingting planti, bel hevi, na bel nogut.
Planti taim meri marit i save pilim olsem em i mas senisim lotu bilong em. Sapos meri bilong yu i stadi long Baibel wantaim ol Witnes Bilong Jehova, dispela bai mekim wanem long marit bilong yutupela? Sapos yu wanpela maritmeri na yu stadi long Baibel wantaim ol Witnes Bilong Jehova, yu inap mekim wanem na man bilong yu i no ken tingting planti?
Tingting Bilong Maritman
Mark, em wanpela man i save stap long Australia, em i bin marit inap 12-pela yia na bihain meri bilong em i kirap stadi long Baibel wantaim ol Witnes Bilong Jehova. Mark i tok: “Marit bilong mipela i stap gutpela na mi amamas long wok mani mi holim. Mipela i gat gutpela sindaun. Bihain meri bilong mi i kirap stadi long Baibel wantaim ol Witnes Bilong Jehova. Mi pilim olsem sindaun bilong mi bai senis. Pastaim mi no amamas tumas taim meri bilong mi i laik kisim save long Baibel, tasol taim em i tokim mi olsem em i laik kisim baptais na kamap wanpela Witnes Bilong Jehova, mi tingting planti moa yet long dispela samting.”
Mark i tingting planti olsem marit bilong em bai bruk o nogat, long wanem, meri bilong em i bihainim nupela lotu. Em i tingting long pasim meri bilong em long stadi long Baibel na tambuim em long bung wantaim ol Witnes. Tasol Mark i no mekim olsem hariap, nogat, em i larim sampela taim i lus pastaim. Wanem samting i kamap long marit bilong em?
Mark i tok: “Marit bilong mipela i stap strong nau winim long bipo. Marit bilong mipela i wok long kamap gutpela moa, kirap long taim meri bilong mi i kisim baptais olsem wanpela Witnes Bilong Jehova inap 15 yia i go pinis.” Wanem samting i helpim marit long kamap gutpela olsem? Mark i tok: “Taim mi tingting i go bek, mi ken tok marit bilong mipela i kamap gutpela, long wanem, meri bilong mi i bin bihainim ol gutpela tok i stap long Baibel. Olgeta taim em i save rispektim mi.”
Gutpela Tok i Kam Long Ol Maritmeri
Sapos yu wanpela maritmeri na yu save bung wantaim ol Witnes Bilong Jehova, yu ken mekim wanem na mekim wanem tok bilong helpim man bilong yu na em i no ken tingting planti? Tingim tok bilong ol dispela meri bilong ol narapela narapela kantri.
Sakiko bilong Japan i tok: “Mi bin marit inap 31 yia na mi gat tripela pikinini man. Mi stap wanpela Witnes Bilong Jehova inap 22 yia. Man bilong mi i no wanbilip bilong mi olsem na sampela taim i gat hatwok. Tasol mi wok strong long bihainim tok bilong Baibel long ‘putim yau kwik long harim tok, na i no hariap long mekim toktok, na i no kros kwik.’ (Jems 1:19) Mi wok strong long mekim gutpela pasin long man bilong mi na bihainim ol laik bilong em sapos ol i no pait wantaim ol lo bilong Baibel. Dispela i bin helpim marit bilong mitupela long stap strong.”
Nadezhda bilong Rasia i tok: “Mi bin marit inap 28 yia na mi wanpela Witnes i baptais pinis inap 16 yia. Paslain long mi stadi long Baibel, mi no bin ting olsem man bilong mi i mas i stap het bilong famili. Mi yet i save laik long mekim planti disisen. Tasol isi isi mi luksave olsem taim mi bihainim ol stiatok bilong Baibel dispela i helpim famili bilong mipela long stap bel isi na amamas. (1 Korin 11:3) Isi isi mi lain long mekim pasin daun, na man bilong mi i luksave olsem pasin bilong mi i senis.”
Marli bilong Brasil i tok: “Mi marit inap 21 yia na mi gat tupela pikinini meri. Inap 16 yia i go pinis, mi kisim baptais na kamap wanpela Witnes. Mi kisim save olsem God Jehova i laik bai ol marit i mas i stap wantaim, na ol i no ken lusim poroman marit bilong ol. Olsem na mi wok strong long stap gutpela meri marit, na mi mekim toktok na pasin we Jehova bai amamas long en na man bilong mi tu i amamas.”
Larisa bilong Rasia i tok: “Inap olsem 19 yia i go pinis taim mi kamap wanpela Witnes Bilong Jehova, mi luksave olsem namba wan samting mi mas mekim em mi mas senisim pasin bilong mi. Man bilong mi i luksave olsem Baibel i bin helpim mi long kamap gutpela meri marit na mi tenkyu tru olsem man bilong mi em i gutpela man. Pastaim mitupela i no wanbel long pasin bilong mekim bikpela long ol pikinini, tasol mitupela i stretim dispela hevi. Man bilong mi i save larim tupela pikinini man bilong mipela long kam wantaim mi long ol miting, long wanem, em i luksave olsem ol i kisim save long ol samting inap helpim ol.”
Valquíria bilong Brasil i tok: “Mi marit inap 19 yia na mi gat wanpela pikinini man. Inap 13 yia i go pinis, mi kamap wanpela Witnes Bilong Jehova. Pastaim, man bilong mi i no laik bai mi insait long wok autim tok. Tasol mi lain long bekim tok long em long pasin isi, na mi helpim em long luksave olsem tok bilong Baibel i mekim na mi wok long kisim gutpela pasin. Isi isi man bilong mi i kliagut olsem em i bikpela samting long mi insait long wok bilong autim tok. Long nau, em i save sapotim mi gut long ol wok bilong lotu. Taim mi go mekim Baibel stadi long ol ples i stap longwe, em i save kisim mi long ka bilong em i go na wetim mi ausait inap mi pinisim stadi.”
Wanpela Gutpela Helpim
Sapos poroman marit bilong yu i stadi wantaim ol Witnes Bilong Jehova, no ken pret na ting olsem dispela bai brukim marit bilong yutupela. Planti man marit na meri marit long olgeta hap bilong graun i luksave olsem Baibel i save helpim marit long i stap gut.
Wanpela maritman husat i no wanpela Witnes Bilong Jehova, em i tok olsem: “Pastaim mi bin bel hevi taim meri bilong mi i bihainim bilip bilong ol Witnes Bilong Jehova, tasol nau mi pilim olsem maski i bin i gat hatwok, gutpela samting i kamap.” Narapela man i tok long meri bilong em olsem: “Pasin bilong meri bilong mi long i stap gut long mi, i gat strongpela tingting long mekim samting, na stap gut long God, dispela i bin kirapim mi long laikim ol Witnes Bilong Jehova. Ol bilip bilong lotu bilong em i helpim marit bilong mipela long i stap gut. Mitupela i no save tingim tingim ol liklik pasin kranki bilong narapela narapela, na mipela i tingim marit bilong mitupela olsem samting bilong i stap inap long taim mitupela i dai.”
[Box/Picture on page 13]
Wanem Tingting Bilong Ol Witnes Bilong Jehova Long Marit?
Ol Witnes Bilong Jehova i tingim Baibel olsem Tok Bilong God. Olsem na ol i save tingim tru ol tok Baibel i mekim long marit. Lukim tok Baibel i mekim bilong bekim ol dispela askim:
▪ Yu ting ol Witnes Bilong Jehova i save kirapim ol wanlotu bilong ol long lusim poroman marit bilong ol husat i no wanpela Witnes? Nogat. Aposel Pol i tok: “Sapos wanpela brata long Krais em i marit na meri bilong en i no bilip long Krais, na sapos meri i laik i stap wantaim em, orait dispela brata i no ken rausim em. Na sapos wanpela meri i marit na man bilong en i no bilip long Krais, na sapos man i laik i stap wantaim em, orait meri i no ken lusim man.” (1 Korin 7:12, 13) Ol Witnes Bilong Jehova i save bihainim dispela tok.
▪ Olsem wanem? Ol Witnes Bilong Jehova i save kirapim maritmeri Witnes long no ken bihainim laik bilong man bilong em sapos man i no wanbilip bilong em? Nogat. Aposel Pol i tok: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.”—1 Pita 3:1, 2.
▪ Yu ting ol Witnes Bilong Jehova i skulim ol man olsem wok bos bilong maritman i antap moa long ol arapela wok bos? Nogat. Aposel Pol i tok: “Mi laik bai yupela i save tu long narapela tok olsem. Het bilong olgeta man em Krais, na het bilong meri em man bilong en, na het bilong Krais em God.” (1 Korin 11:3) Maritmeri Kristen i save daun long man bilong em, long wanem, man i het bilong famili. Tasol wok bos bilong maritman i no antap moa long ol arapela wok bos. God na Jisas bai skelim olgeta pasin bilong em. Olsem na sapos wanpela maritman i tokim meri bilong em long mekim sampela samting i brukim lo bilong God, orait meri Kristen bai ‘bihainim tok bilong God tasol. Na i no bihainim tok bilong man.’—Aposel 5:29.
▪ Yu ting ol Witnes Bilong Jehova i skulim ol man olsem i tambu long katim marit? Nogat. Jisas Krais i tok: “Mi tok olsem long yupela. Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” (Matyu 19:9) Olsem na ol Witnes Bilong Jehova i bihainim tingting bilong Jisas olsem man o meri inap katim marit sapos poroman marit i mekim pasin pamuk. Tasol ol i bilip tu olsem ol marit i no ken brukim marit maski i gat ol liklik popaia i stap insait long marit bilong ol. Ol i save strongim ol wanlotu bilong ol long bihainim tok bilong Jisas. Em i tok: “Man i save lusim papamama na i pas wantaim meri bilong en, na tupela i kamap wanpela bodi tasol. . . Olsem na samting God i pasim pinis, em man i no ken katim.”—Matyu 19:5, 6.