Yu Save Long Dispela?
Jisas i bin mekim wanem kain wok olsem wanpela kamda?
Waspapa bilong Jisas em i wanpela kamda. Jisas i bin lainim wankain wok. Taim em i kirap mekim wok bilong em long autim tok taim em i gat “samting olsem 30 krismas,” ol man i no tingim tasol em olsem “pikinini bilong wanpela kamda,” nogat, ol i tingim em olsem wanpela kamda.—Luk 3:23; Matyu 13:55; Mak 6:3.
Long as ples bilong Jisas, planti man i laikim ol samting bilong wokim gaden, olsem ol samting bilong brukim graun, ol plang bilong pasim long nek bilong ol bulmakau, na ol plang bilong karim samting, em ol samting ol i save wokim long diwai. Ol narapela samting ol kamda i save wokim em ol tebol, sia, na bokis bilong putim ol samting, na tu, ol dua, windo, ol diwai lok, na ol timba samting bilong sapotim rup bilong haus. Tasol wanpela wok bilong ol kamda em long wokim ol haus samting.
Long wanpela tok piksa, Jon Bilong Baptais i toktok long tamiok, ating Jisas na ol narapela kamda i bin mekim wok long en bilong katim ol diwai. Taim ol i katim pinis diwai, long dispela hap yet ol i save katim ol longpela plang, o ol i kisim ol timba i go long woksop. Dispela kain wok em man i mas i gat bikpela strong bilong mekim. (Matyu 3:10) Aisaia i kolim ol narapela samting em ol kamda long taim bilong em i save mekim wok long en, em i tok: “Ol man i gat save bilong sapim ol piksa long diwai, ol i save kisim ol gutpela hap diwai na metaim na stretim gut tru bilong wokim piksa. Orait ol i save droim piksa long pensil na metaim gut mak bilong piksa. Bihain ol i save kisim sisel na bihainim ol dispela mak.” (Aisaia 44:13) Ol man bilong painim ol samting bilong bipo insait long graun, ol i painim ol ain so, ston hama, na bras nil, ol dispela samting i bin i stap long taim bilong ol man i raitim Baibel. (Kisim Bek 21:6; Aisaia 10:15; Jeremaia 10:4) Olsem na i stret long ting olsem Jisas i bin mekim wok long ol dispela samting.
Wanem dispela “beng” em Jisas i toktok long en long wanpela tok piksa bilong em? Dispela beng i wok olsem wanem?
Jisas i toktok long wanpela bosman husat i bin krosim wanpela wokboi nogut, na i tok: “Watpo yu no putim mani bilong mi long beng? Olsem na taim mi kam bek mi inap kisim ol mani bilong mi wantaim sampela winmani tu.”—Matyu 25:27.
Ol bikpela beng samting bilong lukautim mani olsem yumi gat long nau, i no bin stap long taim bilong Jisas. Tasol ol man bilong lukautim mani ol i save putim winmani antap long mani ol i save lukautim, na tu, taim ol i givim mani olsem dinau, ol i save sasim bikpela winmani long man i kisim dinau. Buk The Anchor Bible Dictionary i tok, pasin bilong bekim dinau wantaim winmani em i pasin bilong ol Grik i bin i stap 400 yia paslain long Krais. Long wanpela haptaim ol Rom i bin sindaun gut aninit long Gavman Rom, pasin bilong bekim dinau wantaim winmani i bin i stap, na long olgeta yia dispela mak i save senis senis namel long 4 na 6 pesen.
Lo Bilong Moses i bin tambuim pasin bilong kisim winmani taim ol i givim dinau long ol Israel i stap rabis. (Kisim Bek 22:25) Ol i bihainim moa yet dispela lo taim ol i givim dinau long ol rabisman. Tasol olsem tok piksa bilong Jisas i kamapim, em i pasin bilong ol long kisim winmani long man i lukautim mani bilong ol, o long ol “beng” samting. Olsem na Jisas i mekim wok long samting em ol man i harim tok bilong em, ol i kliagut long en.