Skulim Ol Pikinini Bilong Yu

Devit​—As na Em i No Bin Pret

OLSEM WANEM? Yu save pret sampela taim?​—a Yumi olgeta i save pret sampela taim. Taim yu pret, yu ken mekim wanem?​​— Yu ken i go long wanpela husat i bikpela long yu na i strongpela winim yu. Ating papa o mama bilong yu inap helpim yu. Stori bilong Devit inap lainim yumi long yumi ken i go long husat bilong kisim helpim. Devit i mekim singsing long God olsem: “Mi bilip strong long yu. . . . Mi save bilip long God, na mi no ken pret long wanpela samting.”​—Song 56:​3, 4.

Husat i lainim Devit long pasin bilong i no pret? Yu ting papamama bilong em?​​— Ating papamama bilong em i bin lainim em. Papa bilong em, Jesi, em i wanpela bilipman na tumbuna bilong Jisas Krais, em “King bilong kamapim gutpela sindaun na bel isi,” em God i bin promis long en. (Aisaia 9:6; 11:​1-3, 10) Papa bilong Jesi em Obet, na Obet em bubu man bilong Devit. Wanpela buk long Baibel i gat nem bilong mama bilong Obet. Yu save long nem bilong em?​​— Nem bilong em, Rut, em i wanpela gutpela meri na man bilong em, em Boas.​—Rut 4:​18-​22.

Tru, Rut na Boas i bin dai longtaim paslain long mama i karim Devit. Ating yu bai save long nem bilong mama bilong Boas, em tumbuna mama bilong Devit. Em i bin stap long Jeriko, na em i bin helpim tupela man Israel husat i go bilong lukstil. Taim banis bilong Jeriko i bin pundaun, famili bilong em i no kisim bagarap, long wanem, em i bin hangamapim retpela rop long windo bilong em. Wanem nem bilong em?​​— Rahap, bihain em i kamap wanpela meri i lotu long Jehova, na em i stap olsem gutpela piksa long pasin bilong strongim bel em ol Kristen i ken bihainim.​—Josua 2:​1-​21; 6:​22-​25; Hibru 11:​30, 31.

Yumi ken save olsem, papamama bilong Devit i bin skulim em long ol dispela gutpela wokboi bilong Jehova, long wanem, lo bilong God i tok ol papamama i mas lainim ol pikinini long kain samting olsem. (Lo 6:​4-9) Wanpela taim, God i tokim profet bilong em, Samuel, long i go makim laspela pikinini man bilong Jesi, em Devit, long kamap king bilong ol Israel.​—1 Samuel 16:​4-​13.

Wanpela taim, Jesi i tokim Devit long kisim kaikai i go long tripela bikpela brata bilong em, em ol i pait wantaim ol birua bilong God, em ol Filistia. Taim Devit i go kamap, em i ran i go long lain soldia bilong Israel na em i harim traipela man Goliat i wok long tok bilas long “ol ami bilong God i stap oltaim.” Olgeta i pret long i go pait long Goliat. King Sol i harim olsem Devit i laik i go, olsem na em i singautim Devit i kam long em. Tasol taim Sol i lukim Devit, em i tok: “Yu mangi nating tasol.”

Devit i tokim Sol olsem em i bin kilim i dai wanpela laion na wanpela bea taim ol i bin kam na kisim ol sipsip bilong papa bilong em. Devit i tok: “Bai mi mekim wankain pasin” long Goliat. Sol i tok: “Gutpela, yu ken i go. Na Bikpela i ken i stap wantaim yu.” Devit i kisim faipela liklik ston na putim insait long liklik basket bilong em na kisim katapel bilong em, na em i go bilong pait long traipela man. Taim Goliat i lukim Devit, wanpela mangi nating tasol i wokabaut i kam, em i singaut na i tok: “Yu kam na bai mi kilim yu na givim bodi bilong yu long ol pisin.” Devit i bekim tok long em olsem: “Mi kam pait long yu long nem bilong Bikpela I Gat Olgeta Strong.” Na Devit i singaut na i tok: “Bai mi kilim yu.”

Na Devit i ran i go long Goliat, em i kisim wanpela ston long basket bilong em na i putim long katapel bilong em, na em i sutim stret i go insait long poret bilong Goliat. Taim ol Filistia i lukim olsem traipela man i dai, ol i pret na ranawe. Ol Israel i ronim ol na winim pait. Famili olgeta i ken ritim wantaim dispela stori i stap long 1 Samuel 17:​12-​54.

Yu wanpela yangpela, ating sampela taim yu pret long bihainim tok bilong God. Taim Jeremaia i stap yangpela man em i bin pret, tasol God i tokim em: “Yu no ken pret . . . long wanem, mi stap wantaim yu.” Jeremaia i wok strong long daunim pasin bilong pret na em i autim tok olsem God i bin tokim em long mekim. Olsem Devit na Jeremaia, sapos yu bilip tru long Jehova, yu tu inap kisim pasin bilong i no pret.​—Jeremaia 1:​6-8.

[Futnot]

Ol Askim:

○ Taim Goliat i tok bilas long ol ami bilong God, Devit i mekim wanem?

○ Devit i daunim Goliat olsem wanem?

○ Olsem wanem yumi long nau i ken lain long pasin bilong i no pret?