Bai Yu Holimpas Stretpela Pasin Bilong Yu?

“I go inap long taim mi dai mi no ken lusim stretpela pasin bilong mi!”​​—JOP 27:​5, NW.

1, 2. Yumi mas kisim wanem pasin? Bai yumi skelim wanem ol askim?

TINGIM olsem yu lukim ol plen bilong wanpela haus. Yu kirap nogut, long wanem, ol i stretim gut tru ol samting. Yu amamas long tingim olsem wanem dispela haus bai helpim gut yu na famili bilong yu. Tasol ating yu bai wanbel long tok olsem ol dispela plen i no inap helpim yu sapos yu no wokim dispela haus, go sindaun long en, na lukautim gut, a?

² Na i wankain long stretpela pasin, em i bikpela samting na inap helpim gut yumi na ol manmeri yumi laikim tumas. Tasol pasin bilong tingting tasol olsem stretpela pasin inap helpim yumi em i no inap. Yumi mas kisim na holimpas stretpela pasin bilong yumi olsem Kristen. Long nau, planti taim ol i mas tromoi bikpela mani long wokim wanpela haus. (Lu. 14:​28, 29) Na wankain long stretpela pasin, yumi mas lusim taim na wok strong long kisim, tasol ol gutpela samting i kamap sapos yumi mekim olsem. Orait nau yumi ken skelim 3-pela askim: Olsem wanem yumi inap i stap man i bihainim stretpela pasin? Olsem wanem yumi inap holimpas stretpela pasin Kristen? Man inap mekim wanem sapos inap sampela hap taim em i bin lusim stretpela pasin?

Olsem Wanem Yumi Inap i Stap Man i Holimpas Stretpela Pasin?

3, 4. (a) Long wanem rot Jehova i helpim yumi long kisim stretpela pasin? (b) Olsem wanem yumi inap kisim stretpela pasin, olsem Jisas i bin kamapim?

³ Long stadi i kamap paslain long dispela, yumi bin kisim save olsem Jehova i larim yumi long makim bai yumi stap man i holimpas stretpela pasin o nogat. Tasol i no olsem God i no helpim yumi long dispela samting. Em i skulim yumi long olsem wanem yumi ken kisim dispela gutpela pasin, na em i givim holi spirit long yumi na holi spirit i helpim yumi long bihainim ol tok God i skulim yumi long en. (Lu. 11:13) Na tu, em i save lukautim ol man i wok long bihainim stretpela pasin na ol i stap gut long ol samting bilong spirit.​​—Snd. 2:7.

⁴ Olsem wanem Jehova i bin skulim yumi long i stap olsem man i holimpas stretpela pasin? Bikpela samting em olsem: Em i bin salim Pikinini bilong em, Jisas, i kam long graun. Jisas i bihainim stret olgeta tok bilong God. Em i “bihainim tok bilong God, i go inap long em i dai.” (Fl. 2:8) Long olgeta samting Jisas i mekim, em i bihainim tok bilong Papa bilong em long heven, maski i hatwok tru. Em i tok long Jehova: “Yu no ken bihainim laik bilong mi. Nogat. Yu mas bihainim laik bilong yu tasol.” (Lu. 22:42) Yumi wan wan i ken askim yumi yet olsem: ‘Mi gat wankain tingting long pasin bilong bihainim tok?’ Sapos stretpela tingting i kirapim yumi long bihainim tok, bai yumi kamap man i holimpas stretpela pasin. Orait, nau yumi ken skelim sampela samting long sindaun bilong yumi we pasin bilong bihainim tok i bikpela samting.

5, 6. (a) Olsem wanem Devit i soim olsem em i bikpela samting long holimpas stretpela pasin, maski ol man i no lukim yumi? (b) Ol Kristen long nau i gat wanem ol hatwok long holimpas stretpela pasin taim ol i stap wanpis?

⁵ Yumi mas bihainim tok bilong Jehova, maski i luk olsem yumi stap wanpis. Devit, man bilong raitim song, i bin luksave olsem stretpela pasin i bikpela samting long taim em i stap wanpis. (Ritim Song 101:2.) Devit em king, olsem na klostu olgeta taim em i stap wantaim ol man. Ating planti taim planti handet, o tausen, manmeri i lukim em. (Skelim Song 26:12.) Em i bikpela samting long holimpas stretpela pasin long dispela taim, long wanem, king i mas i stap olsem gutpela piksa long lain bilong em. (Lo 17:​18, 19) Tasol Devit i kisim save olsem taim em i stap wanpis​—‘long haus bilong em’​—long dispela taim tu em i mas holimpas stretpela pasin. Olsem wanem long yumi?

⁶ Long Song 101:​3, yumi ken lukim tok bilong Devit, olsem: “Mi no ken orait long [“lukim,” NW] pasin nogut.” Long nau i gat planti rot long lukim ol samting nogut, na moa yet taim yumi stap wanpis. Planti man long nau i mekim wok long Intenet, na dispela i mekim na em isi long pulim man long lukim ol piksa doti, na ponografi. Tasol yu ting dispela em pasin bilong bihainim tok bilong God husat i kirapim Devit long raitim dispela tok? Taim man i lukim ponografi, dispela inap kirapim ol laik nogut, bagarapim maus bilong bel, mekim nogut long marit, na mekim nogut long olgeta man i mekim dispela pasin.​​—Snd. 4:​23; 2 Ko. 7:1; 1 Te. 4:​3-5.

7. Wanem stiatok inap helpim yumi long holimpas stretpela pasin taim yumi stap wanpis?

⁷ Yumi save, i no gat wanpela wokman bilong Jehova i save stap wanpis tru. Gutpela Papa bilong yumi i save was long yumi. (Ritim Song 11:4.) Jehova bai amamas tru taim em i lukim olsem yu sakim traim! Taim yu mekim olsem, yu bihainim tok lukaut bilong Jisas i stap long tok bilong Matyu 5:28. Olsem na tingting strong long yu no ken lukim ol piksa em ol inap kirapim yu long mekim pasin i no stret. No ken lusim dispela gutpela pasin yu holim long rot bilong lukim o ritim ponografi!

8, 9. (a) Wanem samting i laik traim stretpela pasin bilong Daniel na ol poroman bilong em? (b) Olsem wanem ol yangpela Kristen long nau i save amamasim Jehova na ol wanbilip Kristen bilong ol?

⁸ Na tu, yumi inap holimpas stretpela pasin taim yumi bihainim tok bilong Jehova taim yumi stap namel long ol man i no wanbilip bilong yumi. Tingim Daniel na 3-pela poroman bilong em. Taim ol i yangpela ol Babilon i kisim ol i go kalabus. Long dispela hap ol i stap namel long ol man i no save tumas long Jehova o i no save long Jehova, na ol dispela man i laik subim 4-pela Hibru long kisim ol kaikai em Lo Bilong God i bin tambuim. Ol i inap ting olsem i no gat rong tumas long ol i no bihainim Lo Bilong God. Ol papamama bilong ol, ol hetman, na ol pris i no inap lukim ol samting 4-pela i mekim. Tasol husat bai save? Jehova yet bai save. Olsem na ol i sanap strong na bihainim tok maski ol narapela i laik subim ol na ol inap kisim hevi.​—Dan. 1:​3-9.

⁹ Long olgeta hap bilong graun, ol yangpela Witnes Bilong Jehova i bihainim wankain pasin. Ol i bihainim ol lo Kristen na ol i sakim pasin bilong ol narapela long subim ol long mekim pasin nogut. Taim yupela yangpela i sakim ol drak, pasin pait, tok swea, pasin pamuk samting, na ol narapela rong, yupela i bihainim tok bilong Jehova. Taim yu mekim olsem, yu holimpas stretpela pasin. Dispela i helpim yu yet, na i mekim Jehova na ol wanbilip Kristen i amamas!​​—Sng. 110:​3, NW.

10. (a) Wanem tingting kranki long pasin pamuk i bin kirapim sampela yangpela long lusim stretpela pasin bilong ol? (b) Olsem wanem stretpela pasin bai stiaim yumi long abrusim pasin pamuk?

¹⁰ Na tu, yumi mas bihainim tok bilong Jehova taim yumi stap wantaim wanpela man o meri. Yumi save olsem Baibel i tambuim pasin pamuk. Tasol i no hatwok long larim pasin bilong bihainim tok i kamap olsem pasin bilong sakim tok. Olsem: Sampela yangpela i bin insait long pasin bilong putim sem long maus o putim sem long as o pasin bilong narapela i pilai long sem bilong narapela, na ol i ting dispela pasin i orait tasol, long wanem, ol i ting ol i no save “mekim maritpasin.” Ating ol yangpela i no tingim​—o ol i no laik tingim​—​olsem tok bilong Baibel long pasin pamuk i makim olgeta dispela pasin, em inap mekim na man i raus long kongrigesen.a Na samting i nogut moa, ol i no ting ol i mas holimpas stretpela pasin. Yumi laik holimpas stretpela pasin, olsem na yumi no laik painim sampela eskius long abrusim sampela lo bilong Baibel. Yumi no traim long mekim ol pasin we klostu yumi mekim sin, tasol yumi no kisim strafe long dispela pasin. Yumi no tingim tasol strafe em kongrigesen bai givim yumi long mekim pasin nogut, nogat. Yumi tingim ol samting Jehova i amamas long en na abrusim ol pasin bai bagarapim bel bilong em. Yumi no laik go klostu long pasin bilong mekim sin, nogat, yumi laik stap “longwe long pasin pamuk.” (1 Ko. 6:18) Long dispela rot yumi soim olsem yumi laik tru long holimpas stretpela pasin.

Olsem Wanem Yumi Inap Holimpas Stretpela Pasin Bilong Yumi?

11. Bilong wanem olgeta wan wan pasin bilong bihainim tok i bikpela samting? Stori long dispela.

¹¹ Yumi inap kisim stretpela pasin long rot bilong bihainim tok, olsem na yumi holimpas dispela pasin taim yumi bihainim yet tok. Taim yumi bihainim tok long wanpela samting, ating yumi ting olsem dispela i no bikpela samting tumas. Tasol dispela bai mekim na man inap kisim pasin bilong bihainim tok. Yumi ken tok piksa olsem: Wanpela brik i no bikpela samting, tasol sapos yumi kisim planti brik, yumi inap wokim wanpela naispela haus. Olsem na long rot bilong bihainim yet tok, yumi ken holimpas stretpela pasin.​​—Lu. 16:10.

12. Olsem wanem Devit i stap olsem gutpela piksa long holimpas stretpela pasin long taim ol i mekim nogut long em?

¹² Pasin bilong yumi long holimpas stretpela pasin i bikpela samting taim yumi sanap strong long hevi i painim yumi, ol man i mekim nogut long yumi, o i no mekim stretpela pasin long yumi. Tingim samting i painim Devit. Taim em i yangpela man, em i sanap strong taim king, husat i holim wok olsem mausman bilong Jehova, i mekim nogut long em. Jehova i no orait moa long King Sol na Sol i jeles nogut tru long Devit, em Jehova i orait long em. Tasol Sol i stap yet olsem king na i yusim ami bilong Israel bilong raunim Devit. Jehova i larim dispela pasin nogut i stap inap sampela yia. Olsem wanem? Devit i bel nogut long God? Em i tingting olsem i no gat as bilong sanap strong na karim hevi? Nogat tru. Em i tingim tru namba bilong Sol olsem man God i bin makim, na em i no bekim nogut long Sol taim i gat rot long mekim.​—1 Sml. 24:​2-7.

13. Olsem wanem yumi ken holimpas stretpela pasin taim narapela i bagarapim bel bilong yumi?

¹³ Devit i gutpela piksa tru long yumi long nau! Yumi insait long wanpela lain bratasista i stap long olgeta hap na yumi olgeta i sinman, na wanpela inap mekim nogut long yumi o lusim tok i tru. Tru yumi stap long taim we Satan i no inap bagarapim pasin bilong lain olgeta bilong Jehova. (Ais. 54:17) Tasol bai yumi mekim wanem sapos wanpela i bagarapim bel bilong yumi? Sapos yumi larim pasin bilong bel nogut long wanbilip bilong yumi i bagarapim bel bilong yumi, pasin bilong yumi long stap gut long God inap bagarap. Pasin bilong narapela i no ken stap olsem eskius na yumi bel nogut long God o yumi lusim stretpela pasin. (Sng. 119:165) Sapos yumi sanap strong long taim bilong traim, dispela bai helpim yumi long holimpas stretpela pasin.

14. Ol man i holimpas stretpela pasin i save mekim wanem sapos sampela senis i kamap insait long oganaisesen o ol i stretim sampela tok?

¹⁴ Na tu, yumi inap holimpas stretpela pasin sapos yumi abrusim pasin bilong skelim skelim ol narapela na painim ol rong bilong ol. Tasol yumi mas i stap gut long Jehova. Long nau em i save mekim gut tru long lain bilong em, winim olgeta taim bipo. I no gat wanpela taim bipo we lotu i tru i bin go bikpela olsem. (Ais. 2:​2-4) Taim ol i stretim sampela tok ol i bin mekim long wanpela ves bilong Baibel o stretim sampela pasin bilong mekim ol wok, yumi laik bihainim dispela. Yumi amamas long lukim olsem lait bilong spirit i wok long i go bikpela. (Snd. 4:18) Sapos yumi pilim olsem i hatwok long kliagut long wanpela senis, yumi askim Jehova long helpim yumi long kliagut long dispela. I go inap long yumi kliagut long ol samting, yumi bihainim tok na holimpas stretpela pasin.

Olsem Wanem Sapos Wanpela i No Holimpas Stretpela Pasin?

15. Husat tasol inap tekewe stretpela pasin bilong yu?

¹⁵ Em wanpela askim yumi tingting planti long en, a? Olsem yumi lain long stadi i kamap paslain long dispela, pasin bilong holimpas stretpela pasin i bikpela samting. Sapos yumi no holimpas stretpela pasin, yumi no inap pas gut wantaim Jehova na yumi no inap wetim gutpela samting bai kamap. Tingim dispela: I gat wanpela man tasol long olgeta hap em inap tekewe stretpela pasin bilong yu. Dispela man em yu yet. Jop i bin kliagut long dispela samting. Em i tok: “I go inap long taim mi dai mi no ken lusim stretpela pasin bilong mi!” (Jop 27:​5, NW) Sapos yu gat wankain tingting na yu pas gut wantaim Jehova, dispela bai helpim yu long holimpas stretpela pasin.​—Jem. 4:8.

16, 17. (a) Sapos wanpela man i mekim bikpela rong, em i no ken mekim wanem? (b) Em i mas mekim wanem?

¹⁶ Tasol sampela i no save holimpas stretpela pasin bilong ol. Dispela i bin kamap tu long taim bilong ol aposel. Sampela i bin mekim bikpela rong. Sapos dispela i painim yu, yu ting i no gat rot long stretim? I gat. Yu inap mekim wanem? Pastaim yumi laik stori long samting yumi no ken mekim. Em pasin bilong man long haitim rong long ai bilong papamama, wanbilip Kristen, o ol elda. Tasol Baibel i tokim yumi: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” (Snd. 28:13) Ol man i wok long haitim sin bilong ol, ol i popaia stret, long wanem, yumi no inap haitim wanpela samting long ai bilong God. (Ritim Hibru 4:13.) Sampela i traim long mekim pasin hait, ol i giaman long mekim wok bilong Jehova, tasol long wankain taim ol i save mekim ol bikpela rong. Kain man olsem i no holimpas stretpela pasin​—em i lusim pinis stretpela pasin. Jehova i no amamas long lotu bilong wanpela man i save haitim ol bikpela rong bilong em. Nogat tru. Kain pasin olsem i mekim em i kros.​​—Snd. 21:27; Ais. 1:​11-​16.

¹⁷ Sapos wanpela Kristen i mekim wanpela bikpela rong, Baibel i tokaut klia long samting em i mas mekim. Em i mas askim ol elda Kristen long helpim em. Jehova i bin makim ol elda long helpim ol man i gat bikpela sik long ol samting bilong spirit. (Ritim Jems 5:14.) No ken larim pasin bilong pret long strafe o pret long pasin bilong stretim yu i mekim na yu no mekim ol samting bilong kamap orait gen long ol samting bilong spirit. Yu ting man i gat savetingting em bai larim pasin bilong pret long sut o operesen i mekim na em bai i no stretim wanpela bikpela sik?​—Hi. 12:11.

18, 19. (a) Olsem wanem pasin bilong Devit i soim olsem man inap kisim bek stretpela pasin? (b) Yu tingting strong long mekim wanem long stretpela pasin bilong yu?

¹⁸ Olsem wanem? Taim man lusim stretpela pasin, em inap kisim bek dispela pasin? Tingim samting i bin painim Devit. Em i mekim bikpela rong. Long pasin mangal em i lukluk long meri bilong narapela man, mekim pasin pamuk wantaim em, na em i stretim rot na ol i kilim i dai dispela poroman bilong em i no gat asua. Long dispela taim Devit i no man bilong bihainim stretpela pasin, a? Tasol yu ting em i gat rot long stretim dispela hevi? Devit i mas kisim strongpela tok bilong stretim em, na em i bin kisim. Orait nau pasin bilong em long tanim bel tru i mekim na Jehova i marimari long em. Devit i kisim skul long dispela tok bilong stretim em na em i kisim bek stretpela pasin long rot bilong bihainim tok bilong God, maski wanem samting i kamap. Devit i bihainim stret tok i stap long Sindaun 24:16: “Maski sapos stretpela man i save pundaun planti taim, oltaim em bai i kirap gen.” Wanem samting i kamap long dispela? Tingim tok Jehova i mekim long Solomon taim Devit i dai pinis. (Ritim 1 King 9:4.) God i tingim Devit olsem man i holimpas stretpela pasin. Tru tumas, Jehova inap tekewe mak nogut bilong bikpela rong bilong man i tanim bel tru.​​—Ais. 1:​18.

¹⁹ Yes, yu bai stap man i holimpas stretpela pasin sapos pasin laikim i kirapim yu long bihainim tok bilong God. Wok long i stap gut long God na sanap strong, na sapos yu mekim bikpela rong, tanim bel tru. Pasin bilong yumi long holimpas stretpela pasin em i gutpela samting tru! Yumi olgeta i laik tingting strong olsem Devit, em i tok: “Mi yet mi save mekim stretpela pasin. Yu ken marimari long mi na kisim bek mi.”​—Sng. 26:11.

[Futnot]

Bai Yu Bekim Olsem Wanem?

• Olsem wanem yu inap i stap man i holimpas stretpela pasin?

• Long wanem ol rot yu inap holimpas stretpela pasin bilong yu?

• Olsem wanem yu inap kisim bek stretpela pasin bilong yu?

[Blok long pes 8]

‘EM GUTPELA PASIN TRU’

Wanpela meri i gat bel inap 5-pela mun pinis em i mekim dispela tok long gutpela na stretpela pasin wanpela meri em i no save long em i bin mekim. Em i bin stap long wanpela ples bilong dring kopi, na sampela aua bihain em i luksave olsem em i bin lusim paus mani bilong em long dispela hap. Paus i gat 6,000 kina samting long en, em planti mani tru. Em i no save karim planti mani olsem long ol narapela taim. Bihain em i tokim lain bilong wanpela niuspepa olsem: “Bel bilong mi i bagarap stret.” Tasol wanpela yangpela meri i bin painim paus na wantu em i wok long painim mama bilong paus. Em i no inap painim, olsem na em i kisim paus i go long polis stesin, na polis i painim dispela meri i gat bel. Mama bilong paus i amamas na i tok: “Em wanpela gutpela pasin tru em i bin mekim.” Bilong wanem yangpela meri hia i wok strong long bekim mani? Niuspepa i tok, yangpela meri hia i wanpela Witnes Bilong Jehova, na meri i tok “lotu em i go bikpela long en i as na em i bihainim stretpela pasin.”

[Piksa long pes 9]

Ol yangpela inap holimpas stretpela pasin taim ol traim i painim ol

[Piksa long pes 10]

Inap sampela hap taim Devit i no holimpas stretpela pasin, tasol em i kisim bek dispela pasin