Ol Stretpela Man Bai Litimapim Nem Bilong God i Go Inap Oltaim Oltaim
“Ol manmeri i no inap lusim tingting long [gutpela man] . . . Stretpela pasin bilong en i stap oltaim.”—SNG. 112:6, 9.
1. (a) Wanem gutpela samting tru i wetim olgeta manmeri em God i tingim ol i olsem stretpela man? (b) Wanem askim i kamap?
GUTPELA samting tru i wetim olgeta manmeri em God i tingim ol i olsem stretpela man! I go inap olgeta taim bihain, ol bai amamas long kisim planti save moa long ol gutpela pasin bilong Jehova. Bel i save kirapim ol long litimapim nem bilong God taim ol i kisim planti save moa long ol samting God i bin wokim. Bilong kisim dispela gutpela samting tru ol i wetim, ol i mas bihainim “stretpela pasin,” em Song 112 i stori long en. Tasol Jehova em God i holi na i stretpela olgeta, so olsem wanem em inap tingim ol sinman i olsem stretpela man? Maski yumi wok strong long bihainim stretpela pasin, yumi save popaia, na sampela taim yumi mekim bikpela rong.—Ro. 3:23; Jem. 3:2.
2. Pasin laikim i kirapim Jehova long wokim wanem tupela mirakel?
2 Pasin laikim i kirapim Jehova long stretim rot we em inap tingim ol sinman i olsem stretpela man. Em i stretim rot olsem wanem? Pastaim em i wokim wanpela mirakel na kisim laip bilong Pikinini bilong em na putim long bel bilong wanpela nupela meri na em i kamap man i gutpela olgeta. (Lu. 1:30-35) Bihain long ol birua bilong Jisas i kilim em i dai, Jehova i wokim narapela bikpela mirakel. God i kirapim bek Jisas olsem wanpela spirit i gat bikpela namba.—1 Pi. 3:18.
3. Bilong wanem God i amamas long givim gutpela pe, em laip long heven, long Pikinini bilong em?
3 Jehova i givim gutpela pe long Jisas, em samting em i no bin holim taim em i no kam daun yet long graun—em laip i stap oltaim oltaim long heven, em laip i no inap long bagarap. (Hi. 7:15-17, 28) Jehova i amamas long mekim dispela samting, long wanem, Jisas i bin stap gut long God, maski ol bikpela traim i painim em. Dispela i givim rot long Papa bilong Jisas long bekim tok long Satan, em man i bin tok giaman taim em i tok ol man i save mekim wok bilong God, long wanem, ol i laik helpim ol yet tasol na i no olsem ol i laikim tru God.—Snd. 27:11.
4. (a) Taim Jisas i go bek long heven, em i mekim wanem bilong helpim yumi, na Jehova i mekim wanem? (b) Yu gat wanem tingting long samting Jehova na Jisas i bin mekim bilong helpim yu?
4 Long heven, Jisas i mekim sampela samting moa. Em i kamap “klostu” long God na i givim pe bilong “blut bilong em yet” long God. Gutpela Papa bilong yumi long heven em i orait long dispela gutpela ofa bilong Jisas “bilong tekewe sin bilong yumi.” Dispela i mekim na bel bilong yumi i kamap “klin tru” long ai bilong God, olsem na yumi inap “mekim wok bilong God.” Em wanpela gutpela as tru na yumi wanbel long dispela namba wan tok bilong Song 112, “Litimapim nem bilong Bikpela!”—Hi. 9:12-14, 24; 1 Jo. 2:2.
5. (a) Yumi mas mekim wanem na bai yumi inap stap stretpela man long ai bilong God? (b) Man bilong raitim song i bihainim wanem pasin bilong raitim Song 111 na Song 112?
5 Bilong stap stretpela man long ai bilong God, yumi mas wok yet long bilip long blut bilong Jisas. Long olgeta wan wan de yumi mas tok tenkyu long Jehova long em i laikim yumi tumas. (Jo. 3:16) Na tu, yumi mas wok yet long stadi long Tok Bilong God na traim bes long bihainim ol tok bilong en. Song 112 i givim gutpela tok long olgeta man husat i laik holimpas klinpela bel long ai bilong God. Ol tok bilong dispela song i helpim tok bilong Song 111. Tupela song wantaim i kirap wantaim dispela tok “Litimapim nem bilong Bikpela!” o “Haleluya!” Long Baibel Hibru bilong pastaim, ol i brukim dispela tupela song wan wan long 22 hap. Namba wan leta bilong ol wan wan hap i bihainim stret ol 22 leta bilong alfabet bilong tok Hibru.a
As na Yumi Ken Amamas
6. “Man” i pret long God, em man Song 112 i stori long em, em i kisim wanem blesing?
6 “Wanem man i save pret long Bikpela na i laikim tumas long bihainim ol lo bilong en, dispela man i ken amamas. Ol pikinini bilong en bai i gat bikpela namba namel long ol manmeri. God bai i mekim gut tru long ol lain tumbuna bilong [“ol,” NW] dispela gutpela man.” (Sng. 112:1, 2) Pastaim man bilong raitim song i stori long wanpela “man” tasol, na laspela hap bilong ves 2 i stori long ‘ol man.’ Dispela i makim olsem Song 112 inap makim wanpela lain. Aposel Pol i tok Song 112:9 i makim ol Kristen long taim bilong ol aposel. (Ritim 2 Korin 9:8, 9.) Dispela song i kamapim klia olsem wanem ol lain bilong Krais long graun long nau ol i ken amamas!
7. I gat wanem as na ol wokboi bilong God i mas pret long em? Yu gat wanem tingting long ol lo bilong God?
7 Olsem Song 112:1 i tok, ol dispela Kristen tru ol i kisim bikpela amamas taim ol i bihainim pasin bilong “pret long Bikpela.” Dispela pasin bilong pret long mekim ol samting God i no orait long en em i helpim ol long sakim pasin bilong dispela graun bilong Satan. Ol i “laikim tumas” long stadi long Tok Bilong God na bihainim ol lo bilong em. Wanpela bilong ol dispela lo em lo bilong autim gutnius bilong Kingdom long olgeta hap bilong graun. Ol i wok long helpim ol man bilong olgeta lain long kamap disaipel, na long wankain taim ol i givim tok lukaut long ol man nogut long kot bilong God bai kamap.—Ese. 3:17, 18; Mt. 28:19, 20.
8. (a) Ol man long nau i givim bel long mekim wok bilong God, ol i bin kisim wanem blesing? (b) Ol man i wet long kisim laip oltaim long graun, ol bai kisim wanem ol blesing bihain?
8 Ol wokboi bilong God i bihainim ol dispela lo, olsem na nau namba bilong ol wokboi bilong God long graun i 7 milion samting. Tru tumas, em “bikpela namba namel long ol manmeri.” (Jo. 10:16; KTH 7:9, 14) Ol bai kisim planti blesing moa taim God i kamapim laik bilong em! Lain manmeri i wet long kisim laip oltaim long graun, ol bai winim taim bilong ‘bikpela hevi tru’ na kamap olsem “nupela graun” we “stretpela pasin tasol bai i stap long en.” Bihain, God bai “mekim gut” moa yet long dispela lain i winim taim bilong Armagedon. Ol bai stap redi long sekanim planti milion manmeri i kirap bek. Em bai wanpela gutpela samting tru! Bihain moa, ol man husat i “laikim tumas” ol lo bilong God, ol bai kamap gutpela olgeta na inap oltaim oltaim ol bai stap ‘gutpela tru olsem ol pikinini bilong God.’—2 Pi. 3:13; Ro. 8:21.
Mekim Gutpela Wok Long Mani Samting
9, 10. Olsem wanem ol Kristen tru i bin yusim ol gutpela samting bilong spirit ol i bin kisim? Olsem wanem ol bai stap gut oltaim?
9 “Famili bilong en bai i kisim planti mani samting, na em bai i stap gut oltaim. Tudak i stap, tasol lait i save kamap bilong helpim ol gutpela man. Gutpela man i save marimari na sori long ol arapela manmeri na em i save wokabaut stret.” (Sng. 112:3, 4) Long taim bilong ol man i bin raitim Baibel, sampela wokboi bilong God ol i gat planti mani samting. Long sait bilong spirit tu, ol man God i orait long ol, ol i gat planti samting, maski ol i no gat planti samting bilong skin. Ating klostu olgeta man i daunim ol yet long ai bilong God ol i stap rabis na ol narapela i no laikim ol, olsem long taim bilong Jisas. (Lu. 4:18; 7:22; Jo. 7:49) Tasol maski man i gat planti mani samting o nogat, i gat rot long kisim planti gutpela samting long sait bilong spirit.—Mt. 6:20; 1 Ti. 6:18, 19; ritim Jems 2:5.
10 Ol Kristen God i bin makim, wantaim ol poroman bilong ol, ol i no haitim ol gutpela samting bilong spirit ol i kisim, nogat. Ol i bin kamapim “lait” bilong ol bilong helpim “ol gutpela man” em ol i stap long tudak bilong dispela graun bilong Satan. Ol i mekim olsem long rot bilong helpim ol long kisim gutpela tingting na save bilong God. Ol birua i bin traim long pasim wok bilong autim tok bilong Kingdom, tasol ol i no inap. Ol gutpela samting i kamap long dispela stretpela wok, em bai “stap gut oltaim.” Na ol wokboi bilong God husat i bihainim stretpela pasin, maski traim i painim ol, ol i ken tingting long kisim laip i “stap gut oltaim.”
11, 12. Wanem sampela rot we ol manmeri bilong God i ken yusim mani samting bilong ol bilong helpim ol narapela?
11 Ol manmeri bilong God, em lain wokboi God i bin makim na bikpela lain manmeri wantaim, ol i bin helpim ol narapela long planti samting bilong skin. Song 112:9 i tok: “Em i save givim planti samting long ol rabisman.” Ol Kristen tru long nau i save givim mani samting bilong helpim ol wanbilip Kristen na ol neiba tu husat i sot long ol samting. Na tu, ol i save givim mani samting bilong helpim ol lain em hevi bilong bikpela win o sunami samting i bin painim ol. Olsem Jisas i tok promis pinis, dispela i bin kamapim amamas tu.—Ritim Aposel 20:35; 2 Korin 9:7.
12 Na ol i bin tromoi planti mani bilong wokim dispela nius long 172 tok ples. Na tu, ol i save wokim dispela nius long tok ples bilong ol yaupas na aipas.
Mekim Gutpela na Stretpela Pasin
13. Husat tupela i stap gutpela piksa tru long pasin bilong givim samting long gutpela pasin? Olsem wanem yumi ken bihainim pasin bilong ol?
13 “Man i save mekim gutpela pasin na i save larim ol arapela man i dinau long en.” (Sng. 112:5) Ating yu save pinis olsem sampela man i helpim ol narapela, ol i bel hevi long givim samting, ol i mekim nating tasol. Yumi no amamas long kisim helpim long kain man olsem. Tasol yumi kisim nupela strong taim yumi kisim helpim long ol man em ol i save mekim long gutpela pasin. Jehova i stap nambawan gutpela piksa tru long pasin bilong givim samting long gutpela pasin na i amamas long mekim olsem. (1 Ti. 1:11; Jem. 1:5, 17) Jisas Krais i bihainim stret pasin bilong Papa bilong em long givim samting long gutpela pasin. (Mk. 1:40-42) Olsem na bilong God i ken tingim yumi i olsem stretpela man, taim yumi givim samting, yumi mas amamas long givim na mekim long gutpela pasin, na moa yet taim yumi autim tok na tokim ol man yumi laik helpim ol long kisim save long Jehova.
14. Wanem sampela samting yumi ken mekim na bai ‘wok bilong yumi i go stret olgeta’?
14 “[Em] i save mekim wok bisnis bilong en i go stret olgeta.” (Sng. 112:5) Olsem Baibel i tok profet, lain bosboi i gat gutpela tingting i save lukautim ol samting bilong Bikman bilong ol na i mekim long pasin i stret olgeta. (Ritim Luk 12:42-44.) Dispela samting i kamap ples klia long ol gutpela tok bilong Baibel ol i givim long ol elda, em sampela taim ol i mas skelim ol bikpela rong i kamap insait long kongrigesen. Na pasin bilong mekim ol samting long pasin i stret olgeta i kamap ples klia tu long ol tok bilong Baibel lain wokboi i givim long olgeta kongrigesen na haus misineri na haus Betel na bai ol samting i ken ron gut. Tasol i no ol elda tasol i mas mekim ol samting long pasin i stret olgeta, ol narapela Kristen tu i mas mekim pasin i stret olgeta long ol wanbilip na ol ausait man, na long taim ol i mekim wok bisnis tu.—Ritim Maika 6:8, 11.
Ol Stretpela Manmeri i Kisim Ol Blesing
15, 16. (a) Taim ol stretpela man i harim nius bilong ol hevi, dispela i mekim wanem long ol? (b) Ol wokboi bilong God i gat strongpela tingting long mekim yet wanem samting?
15 “Gutpela man i no inap pundaun, na ol manmeri i no inap lusim tingting long em. Sapos em i harim nius bilong ol hevi i kamap, em i no save pret. Em i save bilip strong long Bikpela. Em i no save wari na pret long ol samting. Na em i save, ol birua bai i lus long pait.” (Sng. 112:6-8) Long nau, winim olgeta taim bipo, yumi harim nius bilong planti hevi i kamap, olsem woa, pasin teroris, ol nupela sik na sampela olpela sik i kamap gen, pasin raskol, stap rabis, na ol pipia i bagarapim graun. Ol man em God i tingim ol i olsem stretpela man, ol i no inap abrusim ol samting nogut i kamap long ol dispela hevi, tasol nius bilong ol dispela hevi i no mekim ol i pret nogut tru na ol i no inap mekim wanpela samting, nogat. Ol i “no save wari na pret long ol samting,” long wanem, ol i save olsem klostu nau, God bai kamapim wanpela nupela taim i gat stretpela pasin tasol i stap long en. Sapos bagarap i painim ol, ol inap karim dispela hevi, long wanem, ol i bilip na wet long Jehova i helpim ol. Em i no save larim ol stretpela man i “pundaun”—em i save helpim na givim strong long ol na bai ol inap sanap strong.—Fl. 4:13.
16 Narapela hevi i painim ol stretpela manmeri bilong God, em taim ol birua i sutim tok giaman long ol na toknogutim ol, tasol dispela i no bin pasim ol Kristen tru long autim tok. Ol wokboi bilong God i gat strongpela tingting long mekim yet dispela wok Jehova i bin givim long ol long autim gutnius bilong Kingdom na kamapim disaipel. Pinis i wok long kam klostu, olsem na ol man bai birua moa yet long ol stretpela man. Na dispela pasin birua bai kamap bikpela moa yet, taim Satan, Gok Bilong Magok, i mekim pait long ol wokboi bilong God long olgeta hap bilong graun. Ol “birua bai i lus long pait.” Em bai wanpela gutpela samting tru long lukim nem bilong Jehova i stap holi!—Ese. 38:18, 22, 23.
“Ol Bai i Litimapim Nem Bilong En”
17. Ol man God “bai i litimapim nem” bilong ol, ol bai amamas long wanem samting?
17 Em bai gutpela tru taim olgeta manmeri i litimapim nem bilong Jehova, na Satan na dispela graun bilong em i no stap bilong birua long ol! Olgeta man husat i stap stretpela man long ai bilong God ol bai amamas long litimapim nem bilong Jehova i go inap oltaim oltaim. Ol birua i no inap daunim ol, long wanem, Jehova i tok promis olsem em “bai i litimapim nem” bilong man i bihainim stretpela pasin. (Sng. 112:9) Man i bihainim stretpela pasin em bai amamas long lukim pinis bilong olgeta man i birua long wok king bilong Jehova.
18. Laspela hap bilong Song 112 bai kamap tru olsem wanem?
18 “Ol man nogut i save lukim dispela samting na ol i kros. Ol i bel nogut long gutpela man, na bihain ol i save bagarap olgeta. Na ol i no inap kisim gutpela samting ol i bin wet long kisim.” (Sng. 112:10) Olgeta man husat i wok long birua long ol manmeri bilong God, na ol i kros na bel nogut, klostu nau ol bai “bagarap olgeta.” Ol i wet long lukim pinis bilong wok bilong yumi, tasol dispela laik bilong ol bai pinis wantaim ol long taim bilong “bikpela hevi tru.”—Mt. 24:21.
19. Yumi ken bilip strong long wanem samting?
19 Olsem wanem? Bai yu stap namel long ol man i winim dispela taim we graun bilong Satan i pinis? O sapos yu sik o lapun na yu dai paslain long dispela taim, bai yu stap namel long “ol stretpela man” em God bai kirapim bek ol? (Ap. 24:15) Yu inap tok yes sapos yu wok yet long bilip long ofa bilong Jisas long baim bek ol man na yu bihainim ol pasin bilong Jehova, wankain olsem ol man em stretpela “man” long Song 112 i makim. (Ritim Efesus 5:1, 2.) Bai Jehova i “no inap lusim tingting” long ol stretpela man o long ol stretpela pasin ol i bin mekim. Jehova bai tingim ol na laikim ol i go inap oltaim oltaim.—Sng. 112:3, 6, 9.
[Futnot]
a Stail na ol tok bilong tupela song i poroman wantaim. Song 111 i kamapim ol pasin bilong God na Song 112 i stori long “man” i bihainim ol dispela pasin, em samting i kamap ples klia taim yumi skelim Song 111:3, 4 wantaim Song 112:3, 4.
Ol Askim Bilong Skelim Long Bel
• Wanem sampela as na yumi ken singaut “Haleluya”?
• Wanem samting i bin kamap long nau na i mekim ol Kristen tru i amamas?
• Jehova i save laikim wanem kain pasin bilong givim samting?
[Piksa long pes 25]
Bilong stap olsem stretpela man long ai bilong God, yumi mas bilip long blut bilong Jisas
[Ol Piksa long pes 26]
Ol kontribiusen ol man i amamas long givim, inap helpim ol man long taim nogut na prinim ol buk na nius bilong Baibel