Bon-Agen​​—Samting Man Yet i Ken Makim?

HUSAT i mekim na man i bon gen? Taim ol lotuman i tokim ol man long kamap bon-agen Kristen, sampela i save kolim tok bilong Jisas: “Yupela i mas bon gen.” (Jon 3:​7, NW) Ol kain man olsem i yusim dispela tok olsem wanpela oda bilong tokim ol man long samting ol i mas mekim. Olsem na ol i tok olgeta wan wan bilipman yet i mas bihainim tok bilong Jisas na mekim ol samting bilong bon gen. Dispela kain tingting i kamapim olsem man yet bai makim sapos em i laik bon gen o nogat. Tasol yu ting dispela tingting i stret wantaim tok Jisas i mekim long Nikodemus?

Taim yu ritim gut tok bilong Jisas, bai yu lukim olsem Jisas i no tok man yet bai makim olsem em bai bon gen o nogat. Bilong wanem i olsem? Tok Grik ol i tanim olsem ‘i bon gen’ ol inap tanim tu olsem “i mas bon antap.” Olsem na dispela narapela rot bilong tanim tok i makim olsem taim man i bon gen, dispela samting “i bilong antap”​​—olsem “i kam long heven,” o “i kam long Papa.” (Jon 19:11; Jems 1:17) Yes, God yet i as bilong en.​—1 Jon 3:9.

Sapos yumi tingim dispela tok “i bilong antap,” i no hatwok long kliagut long as na man yet i no inap mekim na em bai bon gen. Tingim taim mama i karim yu. Olsem wanem? Yu yet inap mekim na mama i karim yu? Nogat, a? Yu kamap, long wanem, papa bilong yu i bin kamapim yu. Na olsem tasol, yumi inap bon gen sapos God, Papa bilong yumi long heven, i mekim na yumi bon gen. (Jon 1:13) Olsem na aposel Pita i tok stret: “Yumi litimapim nem bilong God, em i God na Papa bilong Bikpela bilong yumi, Jisas Krais. Em i gat bikpela sori long yumi, na em i . . . givim yumi nupela laip.”​—1 Pita 1:3.

Em i Wanpela Oda?

Tasol sampela inap ting, ‘Sapos tru tru man yet i no inap makim olsem em bai bon gen, orait bilong wanem Jisas i mekim dispela tok: “Yupela i mas bon gen”?’ Dispela em i gutpela askim. Sapos Jisas i bin givim oda long mekim olsem, em i odaim yumi long mekim samting yumi no inap mekim. Dispela bai i no stret. Orait wanem mining tru bilong dispela tok yupela i mas “bon gen”?

Taim yumi skelim gut tok ples ol i bin raitim Baibel long en long pastaim, bai yumi lukim olsem Jisas i no odaim ol man long mekim samting. Nogat. Taim Jisas i tok yupela i mas “bon gen,” em i mekim wanpela tok i stret na em i no givim oda. Em i tok: “Em i bikpela samting long yupela i mas bon antap.”​—Jon 3:​7, Modern Young’s Literal Translation.

Bilong kamapim klia dispela samting, tingim dispela tok piksa. Tingim wanpela taun i gat sampela skul. Wanpela bilong ol dispela skul em bilong ol pikinini bilong wanpela asples lain, em ol i stap long wanpela hap longwe long taun. Wanpela de, wanpela yangpela man husat i no bilong dispela asples lain em i tokim hetmasta bilong dispela skul, “Mi laik kam long skul bilong yupela.” Hetmasta i tok, “Bilong yu ken kam long dispela skul, yu mas wanpela asples man.” Hetmasta i no givim wanpela oda. Em i no odaim dispela sumatin na tok, “Kamap wanpela asples man!” Hetmasta i kamapim wanpela tok i stret​—em lo bilong husat tasol i ken go long dispela skul. Na olsem tasol, taim Jisas i tok: “Yupela i mas bon gen,” em i kamapim wanpela tok i stret​—em lo bilong husat tasol i ken “go insait long kingdom bilong God.”

Dispela tok Kingdom Bilong God i insait long narapela samting bilong bon-agen. Em i insait long dispela askim, I gat wanem as na ol man i bon gen? Bekim bilong dispela askim em i bikpela samting bilong save gut long mining bilong bon-agen.

[Piksa long pes 6]

Mama i karim yumi na man i bon gen, wanem samting long tupela i wankain?