Skulim Ol Pikinini Bilong Yu
Ol Poroman Nogut i Mekim na Joas i Lusim Jehova
EM WANPELA taim nogut tru long Jerusalem, em taun we tempel bilong God i stap long en. Nau tasol ol i kilim i dai King Ahasia. I hatwok long bilipim samting em mama bilong Ahasia, em Atalia, i mekim bihain long ol man i kilim i dai Ahasia. Em i kilim i dai ol pikinini man bilong Ahasia—em ol tumbuna pikinini bilong em! Yu save long as na em i mekim olsem?—a Em i mekim olsem bambai em yet i ken bosim kantri, na i no wanpela bilong ol.
Tasol wanpela bilong ol tumbuna pikinini man bilong Atalia, em bebi Joas, em i stap laip na Atalia i no save long dispela. Yu laik save long olsem wanem em i stap laip?— Bebi i gat wanpela anti, nem bilong em Jehoseba, na dispela anti i bin haitim Joas insait long tempel bilong God. Em inap mekim olsem, long wanem, man bilong em Jehoiada, em Hetpris. Olsem na tupela wantaim i haitim Joas na bai bagarap i no ken painim em.
Ol i haitim Joas long tempel inap 6-pela yia. Long tempel, ol i skulim em long God Jehova na ol lo bilong em. Orait taim Joas i gat 7-pela krismas, Jehoiada i mekim samting bilong mekim Joas i kamap king. Yu laik save long olsem wanem Jehoiada i mekim olsem na wanem samting i kamap long tumbuna meri bilong Joas, em kwin nogut Atalia?—
Long pasin hait, Jehoiada i singautim ol spesel bodi gad, em ol bodi gad bilong ol king long Jerusalem long bipo. Em i tokim ol long olsem wanem em na meri bilong em i bin lukautim laip bilong bebi boi bilong King Ahasia. Orait, Jehoiada i soim Joas long ol dispela bodi gad, na ol i luksave olsem em man i gat rait long mekim wok king. Na ol i pasim tok long samting ol bai mekim.
Jehoiada i bringim Joas i kam ausait na i putim hat king long het bilong em. Long dispela taim, “ol manmeri i amamas na paitim han na singaut olsem, ‘Joas i ken i stap king longpela taim.’ ” Ol bodi gad i sanap klostu long Joas bilong lukautim em. Taim Atalia i harim ol man i singaut na amamas, em i ran i kam ausait na em i singaut na tokaut olsem em i no wanbel. Tasol Jehoiada i tokim ol bodi gad na ol i kilim i dai Atalia.—2 King 11:1-16.
Yu ting Joas i wok yet long harim tok bilong Jehoiada na mekim pasin i stret?— Em i bin mekim olsem taim Jehoiada i stap laip yet. Na tu, Joas i stretim rot na ol man i givim mani bilong stretim ol samting i bagarap long tempel bilong God—papa bilong em Ahasia na tumbuna papa bilong em Jehoram i no bin tingting long mekim dispela samting. Tasol nau yumi ken skelim samting i bin kamap taim Hetpris Jehoiada i dai.—2 King 12:1-16.
Long dispela taim Joas i gat 40 krismas. Em i no poroman moa wantaim ol man i mekim wok bilong Jehova. Em i kirap poromanim ol man i save lotuim ol giaman god. Sekaraia, em pikinini man bilong Jehoiada, em i stap pris bilong Jehova long dispela taim. Yu ting Sekaraia i mekim wanem taim em i kisim save long ol samting nogut em Joas i wok long mekim?—
Sekaraia i tokim Joas na ol manmeri: “Yupela i bin givim baksait long God, olsem na em i givim baksait pinis long yupela tu.” Dispela tok i mekim Joas i belhat nogut tru na em i odaim ol man long tromoi ston long Sekaraia na kilim em i dai. Tingim: Sampela i bin kisim bek Joas long han bilong ol kilman, tasol nau em yet i kamap kilman na kilim i dai Sekaraia!—2 Stori 24:1-3, 15-22.
Yu luksave long ol samting yumi lainim long dispela stori?— Yumi no ken kisim pasin bilong Atalia, em i gat pasin bilong birua long narapela na mekim hatpela pasin. Mobeta yumi laikim ol wanbilip bilong yumi na ol birua tu, olsem Jisas i skulim yumi long mekim. (Matyu 5:44; Jon 13:34, 35) Na tingim, sapos yumi mekim pasin i stret olsem Joas i bin mekim na yumi laik mekim olsem yet i go, orait yumi mas poroman yet wantaim ol man husat i laikim tru Jehova na ol i strongim yumi long mekim wok bilong em.
[Futnot]
a Sapos yu ritim wantaim pikinini, des (—) bai helpim yu long tingim olsem yu mas malolo na kirapim pikinini long kamapim tingting bilong em.
Ol Askim:
○ Olsem wanem ol i bin lukautim laip bilong Joas? Ol i lukautim em bai husat i no ken bagarapim em?
○ Olsem wanem Joas i kamap king? Em i mekim wanem gutpela wok?
○ Bilong wanem Joas i kamap man nogut? Em i kilim i dai husat?
○ Yumi kisim wanem skul long dispela stori bilong Baibel?
[Piksa long pes 25]
Joas i bin abrusim bagarap