Amamas Long Jisas​—Em Man i Winim Devit na Solomon

“I gat wanpela man i stap hia, em i winim tru Solomon.”​—MT. 12:42.

1, 2. Bilong wanem ol man i kirap nogut long Jehova i tokim Samuel long makim Devit long kamap king?

EM I no luk olsem wanpela king. Profet Samuel i ting em i luk olsem wanpela yangpela mangi bilong lukautim ol sipsip. Na tu, as ples bilong em, Betlehem, em i wanpela taun i no gat nem. Ol i tok em i “liklik taun tru namel long olgeta taun bilong Juda.” (Mai. 5:2) Tasol maski i olsem, klostu nau Samuel bai makim dispela yangpela mangi nating bilong wanpela liklik taun long kamap king bilong Israel.

² Samuel i no ting Devit em i man Jehova i bin makim bilong kamap king. Devit em laspela bilong 8-pela pikinini man bilong Jesi, na em i no stap taim Samuel i kam long haus bilong Jesi bilong makim wanpela pikinini man bilong dispela gutpela man long kamap king bilong kantri. Tasol Jehova i bin makim Devit, na dispela i bikpela samting.​—1 Sml. 16:​1-10.

3. (a) Taim Jehova i skelim man, em i tingim wanem samting i nambawan bikpela samting? (b) Taim Samuel i welim het bilong Devit, wanem samting i kamap?

³ Jehova i lukim samting em Samuel i no inap lukim. God inap lukim ol samting i stap long bel bilong Devit, na em i amamas long samting em i lukim. God i no tingim lukluk bilong man, nogat, em i save tingim pasin tru i stap insait long bel bilong man. (Ritim 1 Samuel 16:7.) Olsem na taim Samuel i luksave olsem Jehova i no bin makim wanpela bilong ol 7-pela pikinini man bilong Jesi, em i tokim ol long i go kisim dispela laspela pikinini long hap ol sipsip i save kaikai gras long en. Baibel i tok: “Orait Jesi i salim wanpela man i go kisim dispela pikinini bilong en [Devit] i kam. Dispela pikinini bilong Jesi em i yangpela man na pes bilong en i naispela moa na ai bilong en i lait tumas na skin bilong en i gutpela tru. Orait Bikpela i tokim Samuel olsem, ‘Em dispela man tasol. Kisim wel bilong makim king na putim long em.’ Orait Samuel i kisim dispela wel bilong oliv em i bin bringim i kam, na em i kapsaitim liklik wel long het bilong Devit long ai bilong ol brata bilong en. Na long dispela de spirit bilong Bikpela i kam i stap strong long em na spirit i stap long em oltaim bihain.”​—1 Sml. 16:​12, 13.

Devit i Olsem Piksa Bilong Krais

4, 5. (a) Stori long sampela samting bilong Devit na Jisas i wankain. (b) Bilong wanem yumi ken tok Jisas em i Man i Winim Devit?

⁴ Olsem Devit, Jisas i bon long Betlehem, inap 1,100 yia bihain long Devit. Long ai bilong planti man, Jisas tu i no luk olsem wanpela king, olsem em i no dispela kain king em planti Israel i bin wetim. Tasol olsem Devit, Jisas em i dispela man Jehova i bin makim. Na Jehova i laikim tru Jisas, olsem em i bin laikim tru Devit.a (Lu. 3:22) Long Jisas tu “spirit bilong Bikpela i kam i stap strong long em.”

⁵ Sampela samting moa bilong Devit na Jisas i wankain. Olsem, man i givim gutpela tingting long Devit, em Ahitofel, em i no stap gut long Devit, na wanpela aposel bilong Jisas, em Judas Iskariot, em i no stap gut long Jisas. (Sng. 41:9; Jo. 13:18) Devit na Jisas i laikim tumas haus bilong lotuim Jehova long en. (Sng. 27:4; 69:9; Jo. 2:17) Jisas em i tumbuna pikinini bilong Devit. Paslain long Maria i karim Jisas, wanpela ensel i tokim em: “God bai i putim em i stap king olsem tumbuna bilong en Devit.” (Lu. 1:32; Mt. 1:1) Jisas, dispela King Mesaia ol man i bin wetim inap longpela taim, em i winim Devit, long wanem, olgeta tok promis bilong Mesaia bai kamap tru long Em.​—Jo. 7:42.

Bihainim King na Wasman Bilong Ol Sipsip

6. Long wanem ol rot Devit em i gutpela wasman bilong ol sipsip?

⁶ Na tu, Jisas em i wanpela wasman bilong ol sipsip. Wanem sampela pasin bilong wanpela gutpela wasman? Em i no pret na em i save stap gut long wok bilong lukautim, givim kaikai, na was long ol sipsip bilong em. (Sng. 23:​2-4) Taim Devit i yangpela, em i wasman bilong ol sipsip, na em i lukautim gut ol sipsip bilong papa bilong em. Em i no pret taim samting nogut i laik painim ol sipsip, na em i redi long lusim laip bilong em bilong lukautim ol sipsip na bai laion na bea i no ken bagarapim ol.​—1 Sml. 17:​34, 35.

7. (a) Wanem samting i redim Devit long mekim ol wok bilong em olsem king? (b) Olsem wanem Jisas i kamapim klia olsem em i Gutpela Wasman?

⁷ Ol yia Devit i lusim long ol ples i gat gras na long ol maunten bilong lukautim ol sipsip, dispela i redim em long mekim ol bikpela wok em i mas mekim bilong stap olsem wasman bilong lain Israel.b (Sng. 78:​70, 71) Jisas tu i mekim gut wok wasman. Jehova i strongim em na i stiaim em taim em i stap olsem wasman bilong “liklik lain sipsip” na bilong “ol arapela sipsip.” (Lu. 12:32; Jo. 10:16) Olsem na Jisas em i Gutpela Wasman. Em i save gut long ol sipsip bilong em na em inap kolim nem bilong olgeta wan wan sipsip. Em i laikim tru ol sipsip bilong em, olsem na taim em i stap long graun em i redi long daunim laik bilong em yet bilong helpim ol sipsip long i stap gut. (Jo. 10:​3, 11, 14, 15) Olsem Gutpela Wasman, Jisas i mekim samting em Devit i no inap mekim. Ofa bilong em long baim bek ol man i opim rot long ol man i ken lusim kalabus bilong dai. I no gat wanpela samting inap pasim em long helpim “liklik lain sipsip” bilong em long kisim laip long heven na ol i no inap i dai moa, na long helpim “ol arapela sipsip” long kisim laip oltaim long nupela taim i gat stretpela pasin long en na i no gat ol man nogut long en.​—Ritim Jon 10:​27-29.

Bihainim King i Winim Pait

8. Olsem wanem yumi ken tok Devit em i king bilong winim ol pait?

⁸ Olsem king, Devit i wanpela soldia i gat strongpela bel husat i lukautim kantri bilong lain bilong God, na “long olgeta hap Devit i go pait long en, Bikpela i save helpim em na em i win.” Taim Devit i stap king, boda bilong kantri i kirap long wara Isip i go inap long wara Yufretis. (2 Sml. 8:​1-14) Long strong em i kisim long Jehova, em i kamap king i gat bikpela strong tru. Baibel i tok: “Ol manmeri bilong olgeta kantri i harim tok long ol samting Devit i mekim na ol i givim biknem long Devit, na Bikpela i mekim ol i pret long Devit.”​—1 Sto. 14:17.

9. Stori long olsem wanem Jisas, em Man Bilong Kamap King, i olsem man i winim pait.

⁹ Olsem King Devit, Jisas i gat strongpela bel taim em i stap long graun. Em i Man Bilong Kamap King, em i soim olsem strong bilong em i winim strong bilong ol spirit nogut, na em i rausim ol spirit nogut i stap long ol man. (Mk. 5:​2, 6-13; Lu. 4:36) Nambawan birua, Satan, em tu i no inap bosim Jisas. Long rot bilong helpim i kam long Jehova, Jisas inap winim strong bilong dispela graun, em dispela graun i stap aninit long strong bilong Satan.​—Jo. 14:30; 16:33; 1 Jo. 5:19.

10, 11. Jisas, em King Bilong Mekim Pait, i gat wanem wok long heven?

¹⁰ Inap 60 yia bihain long taim Jisas i dai na i kirap bek long heven, aposel Jon i kisim wanpela driman long Jisas em i King Bilong Mekim Pait long heven. Jon i tok: “Mi lukluk gen na mi lukim wanpela waitpela hos, na man i sindaun long en em i holim banara. Ol i givim em wanpela hat bilong man i winim pait, na em i go olsem man i winim pait na em i wok long winim planti pait moa.” (KTH 6:2) Man i sindaun long waitpela hos em Jisas. Em i kisim “wanpela hat bilong man i winim pait” long 1914, taim em i kamap King long Kingdom bilong heven. Bihain long dispela, “em i go olsem man i winim pait.” Yes, olsem Devit, Jisas em i king i winim pait. Bihain liklik long em i kamap King long Kingdom Bilong God, em i winim pait em i mekim long Satan na tromoi em na ol spirit nogut bilong em i kam daun long graun. (KTH 12:​7-9) Em bai raun long hos bilong em i go inap long em i “winim planti pait.”​—Ritim Kamapim Tok Hait 19:​11, 19-21.

¹¹ Tasol olsem Devit, Jisas em i king i gat pasin sori, na long taim bilong Armagedon em bai lukautim lain “planti manmeri tru.” (KTH 7:​9, 14) Na tu, taim Jisas i bosim graun wantaim ol wanlain king, em ol 144,000 i kirap bek pinis, “God bai i kirapim bek ol man i dai pinis, em ol stretpela man na ol man nogut wantaim.” (Ap. 24:15) Ol man i kirap bek long graun ol inap kisim laip i stap gut oltaim. Ol inap kisim gutpela samting tru long bihain! Gutpela sapos yumi olgeta i strong long mekim yet “gutpela pasin” bambai yumi ken i stap laip taim dispela graun i pulap long ol stretpela manmeri i stap amamas aninit long wok king bilong Man i Winim Devit.​—Sng. 37:​27-29.

God i Harim Beten Bilong Solomon Long Kisim Savetingting

12. Solomon i beten askim God long wanem samting?

¹² Pikinini man bilong Devit, em Solomon, em tu i makim Jisas.c Taim Solomon i kamap king, Jehova i kamap long em long wanpela driman na i tokim em olsem Em bai givim Solomon wanem wanem samting em i askim long en. Solomon inap askim God long givim em mani, namba, o long em i ken stap laip longpela taim. Tasol em i no askim long ol kain samting olsem, nogat, em i tokim Jehova olsem: “Mi laik bai yu givim gutpela tingting na save long mi. Orait na bai mi ken bosim gut ol dispela manmeri. Sapos nogat, orait i no gat wanpela man inap long bosim dispela bikpela lain manmeri bilong yu. Mi yet mi no inap tru.” (2 Sto. 1:​7-10) Jehova i harim beten bilong Solomon.​—Ritim 2 Stori 1:​11, 12.

13. Bilong wanem yumi ken tok i no gat narapela man i gat kain savetingting olsem Solomon? Em i kisim we savetingting bilong em?

¹³ Taim Solomon i stap gut long Jehova, i no gat narapela man long taim bilong em i mekim ol tok i gat gutpela savetingting long en olsem Solomon i mekim. Solomon i bin mekim “3,000 gutpela sotpela tok i gat gutpela tingting.” (1 Kin. 4:​30, 32, 34) Ol i bin raitim planti bilong ol dispela gutpela tok, na ol man long nau husat i laik kisim savetingting ol i save laikim tru ol dispela tok. Kwin bilong Seba i raun inap 2,400 kilomita bilong traim savetingting bilong Solomon long rot bilong “ol askim i hat tumas.” Em i kirap nogut long tok bilong Solomon na gutpela sindaun bilong kantri bilong em. (1 Kin. 10:​1-9) Baibel i kamapim klia As bilong savetingting bilong Solomon, em i tok: “Ol man bilong olgeta kantri i save kam lukim Solomon, bilong harim dispela gutpela tingting na save God i bin givim em.”​—1 Kin. 10:24.

Bihainim King i Gat Savetingting

14. Long wanem ol rot Jisas i “winim tru Solomon”?

¹⁴ I gat wanpela man tasol em savetingting bilong em i winim savetingting bilong Solomon. Dispela man em Jisas Krais, em yet i tok em i “winim tru Solomon.” (Mt. 12:42) Jisas i kamapim ‘ol tok i givim laip i stap gut oltaim oltaim.’ (Jo. 6:68) Olsem, Bikpela Tok Long Maunten i skruim sampela tok moa long ol savetok em Solomon i kamapim. Solomon i kolim planti samting i givim amamas long ol man i lotuim Jehova. (Snd. 3:13; 8:​32, 33; 14:21; 16:20) Jisas i tok olsem amamas tru i kam long ol samting yumi mekim bilong lotuim Jehova na long truim bilong ol tok promis bilong God. Em i tok: “Ol man i hangre long kisim save long God, ol i ken amamas, long wanem, kingdom bilong heven em i bilong ol.” (Mt. 5:​3, NW) Ol man husat i bihainim ol stiatok i stap long ol tok Jisas i bin mekim, ol i go klostu long Jehova, em “as tru bilong laip.” (Sng. 36:9; Snd. 22:11; Mt. 5:8) Krais i kamapim tru “save bilong God.” (1 Ko. 1:​24, 30) Jisas Krais em i King Mesaia, na em i gat “gutpela save na tingting.”​—Ais. 11:2.

15. Olsem wanem yumi inap kisim helpim long savetingting i kam long God?

¹⁵ Olsem wanem yumi ol man i bihainim Man i Winim Solomon, inap kisim helpim long savetingting i kam long God? Savetingting bilong Jehova i stap long Baibel, olsem na bilong kisim dispela savetingting yumi mas wok strong long stadi long Baibel, na moa yet ol tok bilong Jisas, na tingim tingim long bel ol tok yumi ritim. (Snd. 2:​1-5) Na tu, yumi mas wok yet long askim God long givim savetingting long yumi. Baibel i tokim yumi olsem God bai harim ol beten we yumi askim em long helpim yumi. (Jem. 1:5) Long helpim yumi kisim long holi spirit, yumi inap painim long Baibel ol tok i gat savetingting na ol dispela tok inap helpim yumi long karim ol hevi na wokim ol gutpela disisen. (Lu. 11:13) Baibel i kolim Solomon tu olsem “man bilong bungim lain” husat i “wok long skulim ol manmeri.” (Sav. 12:​9, 10; NW) Jisas, em Het bilong kongrigesen Kristen, em tu i man bilong bungim lain bilong em. (Jo. 10:16; Kl. 1:18) Olsem na yumi mas i go long ol miting bilong kongrigesen we ol i “wok long skulim” yumi.

16. Long wanem rot Solomon na Jisas i wankain?

¹⁶ King Solomon i mekim planti samting. Em i stretim rot bilong wokim planti samting long olgeta hap bilong kantri, olsem bosim wok bilong sanapim ol haus king, ol rot, ol baret bilong wara, ol taun i gat ol bakstua, ol taun bilong putim ol karis, na ol taun bilong ol man i raun long hos. (1 Kin. 9:​17-​19) Olgeta man i kisim helpim long ol samting em i wokim. Jisas tu em man bilong wokim ol samting. Em i wokim kongrigesen bilong em antap long bikpela “ston.” (Mt. 16:18) Em bai bosim tu wok bilong wokim ol haus samting long nupela taim.​—Ais. 65:​21, 22.

Bihainim King Bilong Bel Isi

17. (a) Wok king bilong Solomon i kamapim wanem gutpela samting? (b) Solomon i no inap mekim wanem?

¹⁷ Nem Solomon i kam long wanpela tok i makim “bel isi.” King Solomon i stap long Jerusalem na mekim wok king, mining bilong nem Jerusalem em “Stap Bel Isi Long Tupela Samting.” Solomon i bosim lain Israel inap 40 yia na ol i stap bel isi tru. Baibel i tok long ol dispela yia olsem: “Taim Solomon i stap king, olgeta manmeri long olgeta hap bilong Juda na Israel, ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.” (1 Kin. 4:25) Maski Solomon i gat bikpela savetingting, em i no inap helpim ol man long lusim kalabus bilong sik, sin, na indai. Tasol Man i Winim Solomon bai helpim ol man long lusim kalabus bilong ol dispela samting.​—Ritim Rom 8:​19-21.

18. Wanem ol gutpela samting i stap insait long kongrigesen Kristen?

¹⁸ Long nau tu insait long kongrigesen Kristen i gat bel isi i stap. Tru tumas, yumi stap long wanpela paradais bilong spirit. Yumi stap bel isi wantaim God na ol narapela. Tingim tok profet Aisaia i mekim long ol gutpela samting i painim yumi long nau: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Ais. 2:​3, 4) Taim yumi larim spirit bilong God i stiaim yumi, yumi mekim paradais bilong spirit i kamap gutpela moa.

19, 20. I gat wanem ol as na yumi ken amamas?

¹⁹ Tasol bihain, ol man bai kisim ol samting i gutpela moa. Ol man i harim tok ol bai i stap bel isi tru aninit long wok king bilong Jisas, na isi isi ol bai lusim “dispela kalabus bilong bagarap” na bihain ol bai kamap gutpela olgeta. (Ro. 8:21) Taim ol i winim laspela traim long pinis bilong Taim Bilong Wan Tausen Yia Bilong Krais i Stap King, “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Sng. 37:11; KTH 20:​7-10) Tru tumas, long planti rot wok king bilong Krais Jisas bai winim tru wok king bilong Solomon!

²⁰ Lain Israel i amamas aninit long wok bos bilong Moses, Devit, na Solomon, na yumi bai amamas moa yet aninit long wok king bilong Krais. (1 Kin. 8:66) Yumi laik tenkyu long Jehova long em i bin givim dispela wanpela Pikinini bilong em long yumi​—em Man i Winim Moses, Devit, na Solomon!

[Ol Futnot]

Yu Inap Stori Long Dispela?

• Olsem wanem yumi ken tok Jisas em i Man i Winim Devit?

• Olsem wanem yumi ken tok Jisas em i Man i Winim Solomon?

• Bilong wanem yu amamas long Jisas, em Man i Winim Devit na Solomon?

[Piksa long pes 31]

Savetingting Solomon i kisim long God i makim savetingting bilong Man i Winim Solomon

[Piksa long pes 32]

Long planti rot wok king bilong Jisas bai winim tru wok king bilong Solomon na Devit!