Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Bilong wanem em i bikpela samting long yumi holimpas stretpela pasin Kristen bilong yumi?

Pasin bilong holimpas stretpela pasin i helpim yumi long sapotim wok bos bilong Jehova na long kamapim klia olsem Satan em i man bilong giaman. Stretpela pasin bilong yumi i olsem as na God i ken skelim yumi, olsem na yumi mas i gat dispela pasin bambai yumi ken kisim ol gutpela samting yumi wet long en.​—12/15, pes 4-6.

• Wanem sampela biknem i makim wok bilong Jisas insait long laik bilong God?

Dispela wanpela Pikinini. Tok. I Tru. Namelman bilong nupela kontrak. Hetpris. Pikinini bilong promis.​—12/15, pes 15.

• Bilong wanem na em i bikpela samting long Elaija i tokim wokman bilong em long lukluk i go long solwara taim profet Elaija i beten long ren i kam? (1 Ki. 18:​43-45)

Elaija i soim olsem em i gat save long ol samting bilong ren. Ol klaut i kamap long hap bilong solwara bai kam antap long graun, we ol klaut i ken kamapim ren.​—1/1, pes 15-​16.

• Olsem wanem yumi inap mekim amamas bilong yumi i go bikpela moa long wok autim tok?

Yumi redim bel bilong yumi yet, na tingim olsem wanem yumi ken helpim ol narapela. Taim yumi autim tok, yumi tingting long kirapim ol Baibel stadi. Sapos ol man i les long harim tok, yumi ken senisim tok na tok long ol samting ol man long teritori i gat laik long harim.​—1/15, pes 8-10.

• Sik lepra em Baibel i stori long en, yu ting em i wankain long sik lepra bilong nau?

Dispela sik ol i kolim “lepra” i bin stap long taim bilong ol man i raitim Baibel. (Wkp. 13:​4, 5) Baibel i stori tu long lepra i kamap long ol klos samting na long ol haus. Ating dispela “lepra” i makim wanpela kain mosong samting. (Wkp. 13:​47-52)​—2/1, pes 19.

• Olsem wanem ol tok bilong Baibel i mas stiaim tingting na pasin bilong Kristen long taim bilong fiuneral?

Tru, ating wanpela Kristen i krai sori taim wanpela long famili i dai, tasol em i save olsem ol daiman i no save long wanpela samting. Maski ol man i no bilip i toktok planti long em, em i abrusim olgeta kain kastam i insait long bilip olsem ol man i dai pinis ol inap mekim sampela samting long ol man i stap laip yet. Bilong abrusim ol hevi, sampela Kristen i raitim long pepa ol samting ol i laik bai ol narapela i mekim long fiuneral bilong ol.​—2/15, pes 29-​31.

• Olsem Song 1:1 i tok, yumi mas abrusim wanem tripela samting bambai yumi inap i stap amamas?

Dispela ves i tok long “tok bilong ol man nogut,” “rot bilong ol man bilong mekim sin,” na pasin bilong “sindaun wantaim ol man bilong tok bilas.” Bilong i stap amamas, yumi mas stap longwe long ol man i save tok bilas o i save sakim ol lo bilong God. Yumi mas laikim tumas lo bilong Jehova.​—3/1, pes 17.

• Yu ting ol “Buk Bilong Ol Stretpela Man” na “Buk i stori long ol pait bilong Bikpela” em ol buk bilong Baibel i bin lus? (Jos. 10:13; Nam. 21:14)

Nogat. I luk olsem holi spirit i no as bilong ol tok bilong dispela tupela buk i bin stap long taim ol man i raitim Baibel, em ol man i raitim Baibel i bin stori long ol dispela buk.​—3/15, pes 32.

• Wanem bikpela senis i bin kamap long Baibel Latin bilong nau?

Long 1979, Pop John Paul Namba 2 i tok orait long Baibel Nova Vulgata, wanpela nupela Baibel ol i tanim long tok Latin. Namba wan edisen i gat nem bilong God, Iahveh, long sampela ves. (Kis. 3:​15; 6:3) Tasol taim ol i wokim namba 2 edisen long 1986, ol i rausim nem Iahveh na putim Dominus [Bikpela].​—4/1, pes 22.