Yu Mas i Stap We Taim Pinis i Kamap?

TAIM Jehova i pinisim dispela pasin nogut bilong nau long Armagedon, wanem samting bai painim ol stretpela man? Sindaun 2:​21, 22 i bekim olsem: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”

Tasol ol man i no gat asua, olsem wanem bai ol i stap yet long graun taim ol narapela man i bagarap? Bai i gat ples hait bilong ol? Ol stretpela man i mas i stap we taim pinis i kamap? I gat fopela stori bilong Baibel long sampela man i bin abrusim bagarap na dispela bai givim sampela save long yumi long ol dispela samting.

Ples Ol i Stap Long En i Bikpela Samting

Long 2 Pita 2:​5-7, Baibel i stori long taim God i bin kisim bek Noa na Lot long bikpela bagarap, olsem: “Ol manmeri bilong bipo tu, ol i bin givim baksait long God, na em i no larim ol. Nogat. Em i mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut. God i bin tok long Sodom wantaim Gomora tu i mas bagarap. Na God i kukim dispela tupela bikpela taun long paia, na sit bilong paia tasol i stap. . . . Olsem na bihain, ol man i givim baksait long God, ol i ken tingim dispela samting i bin kamap long Sodom na Gomora, na ol bai i save long samting i mas kamap long ol tu. Tasol dispela stretpela man Lot i bin i stap long Sodom, na em i lukim ol kain kain pasin pamuk samting bilong ol dispela man nogut na em i bel hevi tru. Na God i kisim bek Lot, na em i no bagarap.”

Olsem wanem Noa i abrusim bagarap long taim bilong Bikpela Tait? God i tokim Noa: “Olgeta manmeri i wok long pait na bikhet tasol, olsem na . . . bai mi pinisim tru olgeta lain manmeri. Tasol yu mas kisim plang bilong gutpela diwai na wokim wanpela sip.” (Stt. 6:​13, 14) Noa i wokim sip olsem Jehova i tokim em long mekim. Sevenpela de paslain long bikpela ren bilong tait wara i pundaun, Jehova i tokim Noa long bungim ol animal na bringim ol i go insait long sip, na em wantaim lain bilong em tu i mas i go insait long sip. Long namba seven de Jehova i pasim dua, na “bikpela ren moa i kam daun long san na long nait, inap long 40 de.” (Stt. 7:​1-4, 11, 12, 16) Na “bikpela wara i karim [Noa wantaim lain bilong em] i go na God i kisim bek ol na ol i stap gut.” (1 Pi. 3:20) Bilong abrusim bagarap ol i mas i stap insait long sip. I no gat narapela ples long graun we ol inap i stap long en na abrusim bagarap.​—Stt. 7:​19, 20.

Tasol God i givim narapela tok long Lot. Tupela ensel i tokim Lot long ples em i no ken i stap long en. Dispela tupela ensel i tokim Lot: “Yu mas kisim olgeta . . . lain bilong yu i stap hia [long Sodom], na yupela i mas lusim dispela taun. Bai mitupela i bagarapim dispela taun.” Ol i mas “ran i go antap long ol maunten.”​—Stt. 19:​12, 13, 17.

Samting i painim Noa na Lot i kamapim klia olsem, “sapos traim i kamap long ol man i bihainim God, orait Bikpela i save long rot bilong kisim bek ol . . . na em i save long rot bilong bekim pe nogut long ol [man nogut], i go inap long De bilong bikpela kot.” (2 Pi. 2:9) Stori bilong dispela tupela man i kamapim klia olsem ples ol i stap long en bai makim olsem ol bai abrusim bagarap o nogat. Noa i mas i go insait long sip; Lot i mas lusim Sodom. Tasol yu ting oltaim ples we man i stap long en i bikpela samting? Yu ting Jehova inap lukautim ol stretpela man maski ol i stap we, na i no gat wok long ol i senisim ples na i go long narapela hap? Bilong bekim dispela askim, tingim tupela stori moa bilong ol man God i bin kisim bek ol.

Yu Ting Oltaim Ples i Bikpela Samting?

Taim Jehova i laik salim namba 10 bikpela hevi long Isip long taim bilong Moses, Em i tokim ol Israel long penim blut bilong animal bilong Pasova long ol pos bilong dua na long plang antap long dua. Bilong wanem ol i mas mekim olsem? Long wanem, taim Jehova ‘i go long olgeta hap bilong Isip bilong kilim olgeta namba wan pikinini man bilong ol Isip, bai em i lukim blut long arere bilong ol dua bilong ol na bai em i abrusim ol na i no ken larim ensel bilong kilim man i go insait bilong kilim pikinini bilong ol.’ Long dispela nait stret, Jehova “i kilim i dai olgeta namba wan pikinini man bilong ol Isip. Em i kilim namba wan pikinini man bilong king i go inap long namba wan pikinini man bilong ol kalabusman. Na em i kilim namba wan pikinini man bilong ol bulmakau samting tu.” Jehova i lukautim ol namba wan pikinini bilong ol Israel na ol i no gat wok long i go i stap long narapela ples.​—Kis. 12:​22, 23, 29.

Orait tingim tu stori bilong Rahap, em wanpela pamukmeri i sindaun long taun Jeriko. Ol Israel i redi long kisim Graun Bilong Promis. Taim Rahap i luksave olsem Jeriko bai bagarap, em i tokim tupela man Israel, em ol i bin kam bilong lukstil, olsem olgeta lain bilong Jeriko i pret na guria nogut tru long ol Israel i wok long i kam klostu long Jeriko. Em i haitim dispela tupela man Israel na askim tupela long mekim tok tru antap olsem ol bai lukautim em wantaim famili olgeta bilong em taim ol Israel i daunim Jeriko. Tupela i tokim Rahap olsem em i mas bringim famili bilong em i kam bung insait long haus bilong em​—haus i stap antap long banis bilong taun. Sapos wanpela i lusim haus, em bai kisim bagarap wantaim ol narapela manmeri bilong taun. (Jos. 2:​8-13, 15, 18, 19) Tasol bihain Jehova i tokim Josua olsem “banis bilong dispela taun bai i bruk” na pundaun olgeta. (Jos. 6:5) Dispela ples em tupela Israel i bin makim olsem ples hait, nau i luk olsem em bai bagarap. Olsem wanem Jehova bai kisim bek Rahap wantaim famili bilong em?

Orait taim i kamap long ol Israel i daunim Jeriko, na ol i singaut strong na winim biugel. Josua 6:20 i tok: “Taim ol manmeri i harim, wantu olgeta i singaut bikpela na ol banis bilong taun i bruk.” I no gat wanpela man inap stopim dispela bagarap i kamap long banis. Banis i wok long bruk na pundaun, tasol wanpela mirakel i mekim na hap banis em haus bilong Rahap i stap long en i no pundaun. Orait nau Josua i tokim tupela man bilong lukstil: “Yutupela go insait long haus bilong dispela pamukmeri na bringim em wantaim ol famili bilong en i kam, olsem yupela i bin promis.” (Jos. 6:22) Olgeta long haus bilong Rahap ol i abrusim bagarap na i stap laip.

Wanem Samting i Bikpela Samting Moa?

God i bin kisim bek Noa, Lot, ol Israel long taim bilong Moses, na Rahap, na dispela inap lainim yumi long wanem samting? Olsem wanem ol dispela stori i helpim yumi long save long ples yumi mas i stap long en taim ol pasin nogut bilong nau i pinis?

Tru, Noa i bin stap insait long sip na em i abrusim bagarap. Tasol bilong wanem em i stap insait long sip? Long wanem, em i bilip na i bihainim tok bilong God. Baibel i tok: “Noa i mekim olgeta samting olsem God i tokim em.” (Stt. 6:22; Hi. 11:7) Olsem wanem long yumi? Yumi mekim olgeta samting God i tokim yumi long mekim? Na tu, Noa “em i man bilong tokaut long stretpela pasin.” (2 Pi. 2:5) Olsem Noa i bin mekim, olsem wanem long yumi? Yumi tu i wok strong long autim tok maski ol man long teritori ol i no laik harim tok?

Lot i ranawe lusim Sodom na long dispela rot em i abrusim bagarap. God i lukautim em, long wanem, em i stretpela man long ai bilong God na em i bel hevi tru long pasin nogut bilong ol lain bilong Sodom na Gomora. Olsem wanem long yumi? Yumi bel hevi tru long ol pasin nogut ol manmeri bilong nau i save mekim? O yumi lain pinis long lukim ol dispela pasin nogut na yumi no tingim moa? Yumi wok strong long “i stap klin long ai bilong God na [yumi] i no gat asua long wanpela samting”?​—2 Pi. 3:14.

Na ol Israel long Isip na Rahap long Jeriko, ol i mas i stap insait long haus bilong ol bambai ol i ken abrusim bagarap. Bilong mekim olsem, ol i mas bilip na bihainim tok. (Hi. 11:​28, 30, 31) Long tingting, piksaim ol famili Israel: Ating olgeta wan wan famili i bin lukluk i stap long namba wan pikinini bilong ol taim ol i harim ol manmeri long olgeta wan wan haus bilong ol Isip “i wok long mekim bikpela krai.” (Kis. 12:30) Na taim Rahap i pilim banis bilong Jeriko i guria na i wok long bruk na pundaun klostu long haus bilong em, ating em wantaim famili bilong em ol i bung na sindaun klostu klostu. Em i bin i gat strongpela bilip tru, olsem na em i bihainim tok na stap insait long dispela haus.

Klostu nau yumi bai lukim pinis bilong pasin nogut bilong graun em Satan i bosim. Yumi no save yet long olsem wanem Jehova bai lukautim lain bilong em long de bilong belhat bilong em. (Sef. 2:3) Tasol maski yumi stap we o yumi stap olsem wanem long dispela taim, yumi ken save tru olsem yumi bai abrusim bagarap sapos yumi bilip long Jehova na bihainim tok bilong em. Long nau, yumi mas kisim stretpela tingting long tok profet bilong Aisaia i tok long yumi mas i “go insait long ol haus” bilong yumi.

“Go Insait Long Ol Haus Bilong Yupela”

Aisaia 26:20 i tok: “Yupela ol manmeri bilong mi, yupela go insait long ol haus bilong yupela na pasim ol dua. Yupela i mas hait i stap liklik taim tasol inap belhat bilong Bikpela i pinis.” Ating namba wan truim bilong dispela tok profet i bin kamap long 539 B.C.E. taim ol Midia na Persia i daunim Babilon. Taim Sairus bilong Persia i go insait long Babilon, i luk olsem em i bin tokim olgeta manmeri long stap insait long haus bilong ol, long wanem, ol soldia bilong em i bin kisim tok long kilim i dai olgeta man i stap ausait long haus.

Long taim bilong yumi, ol rum “insait long ol haus” long dispela tok profet inap makim ol 100,000 kongrigesen bilong ol Witnes Bilong Jehova long olgeta hap. Ol dispela kongrigesen i mekim bikpela wok bilong helpim yumi. Ol bai mekim yet i go inap long pinis bilong taim bilong “bikpela hevi tru.” (KTH 7:​14, NW) God i tokim lain bilong em long ol i mas i “go insait long ol haus” bilong ol na hait i stap “inap belhat bilong Bikpela i pinis.” Em i bikpela samting long yumi mas kisim na holimpas stretpela tingting long kongrigesen na tingting strong long pas gut long en. Yumi mas tingim tru dispela tok bilong Pol: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.”​—Hi. 10:​24, 25.

[Ol Piksa long pes 7]

Yumi inap kisim wanem skul long ol samting God i bin mekim bilong kisim bek sampela lain long bipo?

[Piksa long pes 8]

Ol rum “insait long ol haus” inap makim wanem samting long nau?