Gutpela Bosboi na Gavening Bodi Bilong En
“Wanem bosboi i gat gutpela tingting, na i save mekim gut wok bilong en? Bikman i save makim dispela kain bosboi bilong bosim ol wokboi bilong en, na bilong skelim kaikai long ol long taim bikman i makim.”—LU. 12:42.
1, 2. Jisas i kamapim wanem bikpela askim taim em i stori long mak bilong taim bilong las de?
TAIM Jisas i stori long mak bilong taim bilong las de, em i kamapim dispela askim: “Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en, na bilong skelim kaikai long ol long taim bikman i makim.” Jisas i tok dispela wokboi bai kisim gutpela pe long pasin bilong em long stap gut long wok. Bikman bai makim em long bosim olgeta samting bilong em.—Mt. 24:45-47.
2 Sampela mun paslain long dispela, Jisas i mekim askim i wankain liklik. (Ritim Luk 12:42-44.) Em i kolim dispela wokboi olsem “bosboi” na “ol arapela wokboi” olsem “ol wokboi bilong en.” Bosboi em i man i gat wok long bosim ol wokboi. Tasol bosboi i wanpela wokboi tu. Husat dispela wokboi, o bosboi, na olsem wanem em i givim “kaikai long ol long taim bikman i makim”? Em i bikpela samting long yumi olgeta i luksave long dispela rot em Jehova i save yusim bilong givim kaikai bilong spirit.
3. (a) Planti man bilong Kristendom i ting tok bilong Jisas long “wokboi” i makim wanem samting? (b) Husat dispela “bosboi,” o “wokboi”? Husat dispela “ol wokboi,” o “ol arapela wokboi”?
3 Planti man bilong Kristendom i ting dispela tok bilong Jisas i makim ol man i gat namba namel long ol man i tok ol i Kristen. Tasol Jisas, em “bikman” insait long dispela tok piksa, em i no tok bai i gat planti wokboi i gat gutpela tingting na i stap nabaut insait long ol narapela narapela lotu bilong Kristendom. Nogat. Em i tokaut klia olsem bai i gat wanpela “bosboi,” o “wokboi,” tasol, na bikman bai makim em long lukautim olgeta samting bilong Em. Olsem dispela nius i stori planti taim pinis, bosboi i makim lain olgeta bilong “liklik lain sipsip,” em ol Kristen God i bin makim. Long wankain sapta bilong Gutnius Luk i Raitim, Jisas i bin toktok long dispela lain. (Lu. 12:32) “Ol wokboi,” olsem “ol arapela wokboi,” i makim olgeta wan wan bilong dispela lain. Wanpela gutpela askim i kamap, olsem: Olgeta wan wan man bilong dispela lain wokboi i insait long wok bilong givim kaikai bilong spirit long taim stret? Bekim bilong dispela askim i kamap klia taim yumi skelim gut tok Baibel i mekim.
Wokboi Bilong Jehova Long Bipo
4. Jehova i kolim lain Israel bilong bipo olsem wanem? Em i bikpela samting long save long wanem samting bilong dispela lain?
4 Jehova i toktok long lain bilong em, lain Israel, olsem wanpela lain wokboi. “Yupela i witnes bilong mi. Mi bin makim yupela bilong i stap wokman [wanpela] bilong mi.” (Ais. 43:10) Olgeta manmeri bilong lain Israel i insait long dispela wanpela lain wokboi. Tasol em i bikpela samting long save olsem ol pris na ol lain Livai i no bilong lain pris, ol tasol i gat wok long skulim lain Israel.—2 Sto. 35:3; Mal. 2:7.
5. Jisas i tok wanem bikpela senis bai kamap?
5 Olsem wanem? Lain Israel em dispela wokboi Jisas i bin toktok long en? Nogat. Tok Jisas i mekim long ol Juda long taim bilong em i helpim yumi long save long dispela. Em i tok: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Mt. 21:43) Tru tumas, senis bai kamap. Jehova bai mekim wok long wanpela nupela lain. Tasol bilong mekim wok bilong tokim ol man long ol samting God i laik bai ol i mas mekim, dispela wokboi long tok piksa bilong Jisas i bihainim wankain pasin olsem dispela “wokman” bilong God long Israel bilong bipo.
Gutpela Wokboi i Kamap
6. Wanem nupela lain i kamap long Pentikos bilong yia 33 C.E.? Husat i insait long dispela lain?
6 Dispela nupela lain, “lain Israel tru bilong God,” em ol Israel God i bin makim. (Ga. 6:16; Ro. 2:28, 29; 9:6) Dispela lain i kamap long Pentikos bilong yia 33 C.E., taim God i kapsaitim holi spirit. Bihain long dispela, olgeta Kristen God i bin makim ol i insait long lain wokboi em Bikman, Jisas Krais, i makim. Olgeta wan wan bilong dispela lain i kisim wok bilong autim gutnius na kamapim ol disaipel. (Mt. 28:19, 20) Tasol olsem wanem? Olgeta wan wan bilong dispela lain bai i insait long wok bilong givim kaikai bilong spirit long taim stret? Yumi ken lukim tok Baibel i mekim bilong bekim dispela askim.
7. Pastaim wanem wok em nambawan wok bilong ol aposel? Bihain ol i kisim wanem narapela wok tu?
7 Taim Jisas i makim ol 12-pela aposel bilong em, nambawan wok bilong ol em bilong autim gutnius long ol narapela man. (Ritim Mak 3:13-15.) Dispela wok i stret wantaim mining bilong tok Grik apostolos, em ol i kisim dispela tok long wanpela wed i makim “salim i go.” Tasol bihain taim kongrigesen Kristen i laik kamap, ol aposel i kisim “wok wasman.”—Ap. 1:20-26, NW.
8, 9. (a) Wanem nambawan bikpela wok bilong 12-pela aposel? (b) Husat moa i kisim wok, em lain hetman i givim tok orait long dispela?
8 Wanem nambawan bikpela wok bilong 12-pela aposel? Ol samting i kamap bihain long de Pentikos i bekim dispela askim. Taim tok pait i kamap long wok bilong tilim kaikai long ol meri em ol man bilong ol i dai pinis, ol 12-pela aposel i bungim ol disaipel na i tok: “Sapos mipela i lusim wok bilong autim tok bilong God na mipela i wok long tilim kaikai, em i no stret.” (Ritim Aposel 6:1-6.) Ol aposel i makim sampela narapela strongpela brata long lukautim “dispela wok” bambai ol aposel i ken givim bel long “helpim ol manmeri long tok bilong God.” Ol i stretim wok olsem, na Jehova i blesim dispela na “tok bilong God i go nabaut long olgeta hap. Na planti manmeri moa i kamap disaipel long Jerusalem.” (Ap. 6:7) Olsem na ol aposel i go pas long mekim wok bilong givim kaikai bilong spirit.—Ap. 2:42.
9 Bihain, ol narapela brata i kisim ol bikpela wok. Holi spirit i stiaim ol samting na kongrigesen Antiok i salim Pol na Barnabas long mekim wok misineri. Tupela i kisim nem aposel tu, maski ol i no insait long lain 12-pela aposel. (Ap. 13:1-3; 14:14; Ga. 1:19) Lain hetman long Jerusalem i givim tok orait long tupela i kisim dispela nem. Bihain liklik long dispela, Pol i insait long wok bilong givim kaikai bilong spirit. Holi spirit i kirapim em long raitim namba wan pas bilong em.
10. Long taim bilong ol aposel, olgeta Kristen God i bin makim ol i insait long wok bilong redim kaikai bilong spirit? Stori long dispela.
10 Tasol olsem wanem? Olgeta wan wan Kristen God i bin makim ol i bosim wok bilong autim tok na redim kaikai bilong spirit? Nogat. Aposel Pol i tok: “Olsem wanem? Ating olgeta i stap aposel? Ating olgeta i gat wok bilong autim tok profet? Ating olgeta i gat wok bilong skulim ol manmeri? Ating olgeta i gat strong bilong wokim mirakel?” (1 Ko. 12:29) Olgeta Kristen God i bin makim ol i insait long wok bilong autim tok, tasol wan wan man tasol—inap 8-pela narapela narapela man—i bin raitim 27 buk bilong Ol Skripsa Grik.
Gutpela Wokboi Long Nau
11. Wanem ol dispela “olgeta samting” em wokboi i gat wok bilong lukautim?
11 Tok bilong Jisas long Matyu 24:45 i kamapim klia olsem bai i gat lain wokboi i gat gutpela tingting i stap yet long graun long taim bilong las de. Kamapim Tok Hait 12:17 i kolim dispela lain olsem “ol arapela pikinini” bilong meri. Olsem wanpela lain, dispela lain remnan i bin kisim wok bilong lukautim olgeta samting bilong Krais hia long graun. Ol dispela “olgeta samting” em gutpela bosboi i gat wok long lukautim, em ol samting bilong Kingdom bilong Bikman hia long graun, olsem ol manmeri i stap aninit long Kingdom na ol brens ofis na Haus Kingdom samting em ol i helpim wok bilong autim gutnius.
12, 13. Olsem wanem wanpela Kristen inap save em i insait long lain bilong go long heven?
12 Olsem wanem wanpela Kristen inap save em i insait long lain bilong go long heven na insait long dispela lain remnan bilong Israel bilong spirit? Bekim bilong dispela askim i stap long tok aposel Pol i mekim long lain i bilip na wet long kisim laip long heven wankain olsem em. Em i tok: “Olgeta manmeri i larim Spirit bilong God i stiaim wokabaut bilong ol, dispela ol manmeri i stap pikinini bilong God. Dispela Spirit God i bin givim long yupela i no save mekim yupela i kamap olsem ol wokboi nating, bai yupela i pret gen. Nogat tru. Spirit bilong God i save mekim yupela i kamap pikinini bilong God. Na long strong bilong Holi Spirit yumi save singaut long God olsem, ‘Aba, Papa.’ Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em.”—Ro. 8:14-17.
13 Holi spirit bilong God i bin makim ol dispela man na meri na God i stap long heven em i “singautim” ol. (Hi. 3:1) Ol dispela manmeri i no gat tupela tingting o pret long bihainim dispela singaut long kamap pikinini bilong God. (Ritim 1 Jon 2:20, 21.) Olsem na ol yet i no makim ol bilong kisim laip long heven, nogat, Jehova i makim ol long holi spirit.—2 Ko. 1:21, 22; 1 Pi. 1:3, 4.
Stretpela Tingting
14. Ol Kristen God i bin makim i gat wanem tingting long singaut ol i bin kisim?
14 Ol dispela Kristen God i bin makim i mas i gat wanem tingting long ol yet taim ol i wet long kisim laip long heven? Ol i save olsem ol i bin kisim wanpela gutpela singaut tru—tasol em i wanpela singaut tasol. Ol i mas stap gut long God i go inap long taim ol i dai na bai ol i ken kisim dispela prais. Long pasin daun, ol i wanbel wantaim tok bilong Pol: “Ol brata, mi no ting mi kisim yet dispela pasin. Tasol mi gat wanpela tingting tasol, em long mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain. Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em.” (Fl. 3:13, 14) Ol Kristen God i bin makim ol i mas wok strong tru long ‘wokabaut long pasin i stret long dispela singaut ol i bin kisim, na oltaim ol i mas mekim wantaim pasin daun,’ na ol i mas “pret na guria.”—Ef. 4:1, 2, NW; Fl. 2:12; 1 Te. 2:12.
15. Ol Kristen i mas i gat wanem tingting long ol bratasista husat i kisim bret na wain long Memorial? Ol Kristen God i bin makim ol i gat wanem tingting long ol yet?
15 Tasol ol narapela Kristen i mas i gat wanem tingting long brata o sista husat i tok holi spirit i bin makim em na em i kirap long kisim bret na wain long Memorial? Ol i no ken skelim em. Dispela em i samting bilong em yet wantaim Jehova. (Ro. 14:12) Tasol ol Kristen God i bin makim ol tru, ol i no strong long ol narapela i mas mekim gut tru long ol. Ol i no ting olsem ol i bin kisim narapela kain save tru, winim save bilong sampela bilong lain “planti manmeri tru” husat i bin stap insait long tok i tru inap longpela taim. (KTH 7:9) Na ol i no ting ol i gat planti holi spirit moa, winim ol poroman bilong ol long lain “arapela sipsip.” (Jo. 10:16) Ol i no ting ol narapela i mas i stap olsem wokman bilong ol, na ol i no tok ol i stap antap long ol elda bilong kongrigesen long wanem ol i save kisim bret na wain, nogat.
16-18. (a) Olgeta Kristen God i bin makim i insait long wok bilong kamapim ol nupela save bilong Baibel? Stori long dispela. (b) Bilong wanem Gavening Bodi i no gat wok long kisim tingting bilong olgeta man na meri husat i tok God i bin makim ol?
16 Olsem wanem? Olgeta wan wan bilong ol dispela Kristen God i bin makim em ol i stap long olgeta hap bilong graun, olgeta i insait long wok bilong kamapim long ples klia ol nupela save bilong Baibel? Nogat. Tru, lain wokboi i gat wok long givim kaikai bilong spirit long ol Kristen God i bin makim, tasol i no olgeta wan wan bilong lain wokboi i gat wankain wok. Nogat. (Ritim 1 Korin 12:14-18.) Olsem yumi tok pinis, long taim bilong ol aposel, olgeta i bin insait long bikpela wok bilong autim tok. Tasol wan wan tasol i bin kisim wok bilong raitim ol buk bilong Baibel na lukautim kongrigesen Kristen.
17 Olsem: Sampela taim Baibel i tok long “sios,” o kongrigesen, i harim kot bilong stretim sampela hevi. (Mt. 18:17) Tasol em ol elda tasol i mekim dispela wok, em ol i stap olsem ol mausman bilong kongrigesen. Ol elda i no toktok wantaim olgeta wan wan insait long kongrigesen na askim tingting bilong ol long sampela samting paslain long ol i wokim disisen bilong ol, nogat. Ol i mekim wok ol i bin kisim; ol i makim maus bilong kongrigesen olgeta.
18 Na olsem tasol, long nau wan wan Kristen tasol em God i bin makim ol i gat wok long stap olsem mausman bilong lain wokboi. Ol i lain Gavening Bodi Bilong Ol Witnes Bilong Jehova. Ol dispela man em holi spirit i bin makim, ol i bosim ol wok bilong Kingdom na wok bilong givim kaikai bilong spirit. Tasol olsem long taim bilong ol aposel, Gavening Bodi i no kisim tingting bilong olgeta wan wan man bilong lain wokboi paslain long ol i wokim ol disisen, nogat. (Ritim Aposel 16:4, 5.) Tasol olgeta Witnes God i bin makim ol i insait long bikpela wok bilong bungim kaikai long gaden i wok long kamap long nau. Olsem wanpela lain, “wokboi i gat gutpela tingting” i wanpela bodi, tasol olsem ol wan wan man, ol i gat narapela narapela wok.—1 Ko. 12:19-26.
19, 20. Bikpela lain i gat wanem stretpela tingting long “wokboi i gat gutpela tingting” na Gavening Bodi bilong en?
19 Ol dispela tok yumi bin skelim i mas mekim wanem samting long bikpela lain manmeri i wok long i go bikpela moa na ol i wet long kisim laip oltaim long graun? Ol i samting bilong King, olsem na ol i amamas long wok gut wantaim ol disisen na tok Gavening Bodi i mekim, em i mausman bilong “wokboi i gat gutpela tingting.” Ol bratasista bilong bikpela lain i amamas long kisim kaikai bilong spirit em Gavening Bodi i stiaim wok bilong kamapim dispela kaikai. Ol i rispektim lain wokboi, tasol ol i was gut na ol i no litimapim nem bilong ol bratasista i tok ol i bilong lain wokboi. Ol Kristen God i bin makim tru, ol i no ting ol narapela i mas mekim kain pasin olsem long ol.—Ap. 10:25, 26; 14:14, 15.
20 Maski yumi “ol arapela wokboi” bilong lain remnan, o yumi bilong bikpela lain, yumi mas pasim tok long bel long wok gut wantaim gutpela bosboi na Gavening Bodi bilong en. Gutpela sapos yumi olgeta wan wan i “was i stap” na stap gut long God i go inap long pinis.—Mk. 13:37.
Yu Tingim Yet?
• Husat em “wokboi i gat gutpela tingting”? Husat em ol arapela wokboi?
• Olsem wanem wanpela inap save God i bin singautim em long kisim laip long heven?
• Husat i go pas long kamapim ol nupela save bilong Baibel?
• Ol Kristen God i bin makim ol i mas i gat wanem tingting long ol yet?
[Piksa long pes 23]
Long nau, Gavening Bodi em mausman bilong lain wokboi i gat gutpela tingting. Wankain pasin i bin i stap long taim bilong ol aposel